ITYOUGH 56
Nôngo Mzough a Lu ken Tiônnongo Her
Ka sea lu imôngo vea mbacivir Yehova mbagen yô, i lu se er yange i lu Tor Davidi nahan. A kaa ér: “Aluer anmgbianev vea tema imôngo, ishima ve ia lu i môm yô, á doo yum á hôm kpaa.” (Pasalmi 133:1) Kpa mzough wase la gbe van iyol na tsô ga. Gba u hanma wase yô, nana nôngo sha er bem la una lu her yô.
1. Ka nyi i fe ior mba Aôndo sha mi wuee?
Aluer u za mkombo ken tar ugen yô, alaghga u ungwa zwa u i lu lamen la ga, kpa ishima ia nyian we sha kwaghmôm ga. Sha ci u nyi? Sha ci u hanma ijiir i u za cii, ityakeda i se henen Bibilo a mi la ka i lu kwaghmôm. Shi ka se nôngo se doo ayol a ase. Heela tseegh ga, hanma ijiir i se lu cii se mba ‘yer sha iti i TER, shi se mba eren Un tom sha ishima i môm’ shin ken mzough.—Sefania 3:9.
2. Ka nyi u er ve mzough una seer lun hen atô wase?
“Doo nen ayol a en tsung, a ishima i môm.” (1 Peteru 1:22) U dondo kwaghwan ne nena? De hembe veren ishima sha mbamyen mba mbagenev ga, kpa hemba veren ishima sha aeren a ve a dedoo la. Nôngo fa anmgbianev mba ken tiônnongo mba mlu ve a kaha a u wou la, de saan sha mba mlu ve a zough vea u wou la tseegh ga. Shi se fatyô u nôngon kpoghuloo dughun hanma ieren i sangen a sange ior i alaghga se lu a mi ken a vese la kera.—Ôr 1 Peteru 2:17. a
3. Shighe u iyongo i zough u a Orkristu ugen yô, u er nena?
Er se lu ken mzough nahan kpa, se mba a mbamyen asev. Nahan ashighe agen alaghga se er kwagh u vihin anmgbian ugen shin se va nan ahenge. Sha nahan yô, Mkaanem ma Aôndo kaa a vese ér: “Deen nen mbagenev kwaghbo.” Shi ma kaa ér: “Er Yehova a den ne kwaghbo sha mimi nahan, ne kpa gba u ne eren nahan vough.” (Ôr Mbakolose 3:13.) Se er Yehova akaabo ngee gande ôron, nahan kpa ka a de se a mi. Nahan a soo ér se kpa se deen anmgbianev asev a kwaghbo. Aluer u nenge wer u er kwagh u vihin or yô, nôngo ker gbenda za sôr zayol la.—Ôr Mateu 5:23, 24. b
HEN KWAGH I ZA SHIMI
Hen sha igbenda i u fatyô u seer van a mzough hen ato u anmgbianev shi bem una lu ken tiônnongo yô.
Ka nyi u er sha u keren beme?
4. Dugh ieren i sangen a sange ior la ken a we kera
Gba u anmgbianev asev cii vea doo se ishima. Nahan kpa alaghga ashighe agen a taver se u soon or u i lu inja er mlu u nan kaha a u wase la. Ka nyi ia wase se? Ôr Aerenakaa 10:34, 35, maa lam nen sha mbampin mban:
-
Yehova soo hanma or u nan lu Orshiada na cii. Doo u kwagh ne una wase u u nengen ior mba mlu ve a kaha a mlu wou la nena?
-
Ka sha igbenda i nyi nahan ior ve eren kwagh a mbagen hen ijiir you u tesen ér mba sangen a sange? Er nan ve i gbe u u palegh ieren laa?
Ôr 2 Mbakorinte 6:11-13, maa lam nen sha mpin ne:
-
U nenge wer u er nan ve anmgbianev mba nomso man mba kasev mba ve dugh sha ajiir kposo kposo la, vea seer doon we ishima?
5. Deen mbagenev kwaghbo sha mimi shi keren bem
Er i lu u mayange Yehova una er se kwaghbo u se de un a mi ga nahan kpa, den se a akaabo a ase sha mimi. Ôr Pasalmi 86:5, maa lam nen sha mbampin mban:
-
Yehova den se a akaabo a ase nan je?
-
Doo u kpishi er Yehova a den se kwaghbo kpa? Er nan ve u ôr nahana?
-
Ka akaa a nyi nahan alaghga aa na a taver se u lun ken bem vea mbageneve?
Se fatyô u dondon ikyav i Yehova la sha u lun ken mzough vea anmgbianev asev nena? Ôr Anzaakaa 19:11, maa lam nen sha mpin ne:
-
Shighe u or nan vihi u ishima ker shin nan er kwagh u doon we ga yô, u er nan ve kwagh la una hemba vihin a vihi ga?
Ashighe agen ka se er kwagh u vihin mbagenev. Shighe u kwagh a lu nahan yô, ka nyi i doo u se ere? Nenge VIDIO i i lu heen ne, maa lam nen sha mpin u a dondo ne.
-
Ka nyi anmgbian u kwase u ken vidio la a er sha u keren beme?
6. Hemban nengen a aeren a dedoo a anmgbianev ou mba nomso man mba kasev
Ka sea seer fan anmgbianev asev mba nomso man mba kasev yô, se hemba fan aeren a ve a dedoo kua mbamyen vev. Se er nan ve se hemba veren ishima sha aeren a ve a dedoo laa? Nenge VIDIO i i lu heen ne, maa lam nen sha mpin u a dondo ne.
-
Ka nyi ia wase u u nengen a aeren a dedoo a anmgbianev ou mba nomso man mba kaseva?
Yehova hembe veren ishima sha aeren a ase a dedoo la. Ôr 2 Kroniku 16:9a, maa lam nen sha mpin ne:
-
Er u fe wer Yehova hembe veren ishima sha aeren a ou a dedoo la nahan, ka u nena?
Er diamondi ka una pande a kua iyol kpa a lu kwagh u injaa her nahan, kape anmgbianev asev ve lu a mbamyen kpa, ve doo Yehova ishima je la
IOR MBAGENEV KA VE KAA ÉR: “Cii ve m de un a kwaghbo yô, saa una va zamber mo ve me de un ye.”
-
Er nan ve i gbe u se kegh a kegh iyol u den mbagenev kwaghbo?
KA NYI U HENE?
U fatyô u nôngon wer mzough a lu ken tiônnongo sha u den mbagenev a kwaghbo shi soon anmgbianev ou mba nomso man mba kasev cii.
Mbampin mba umbur kwagh u i hen yô
-
U er nan ve u dugh ieren i sangen a sange ior la ken a we kera?
-
Shighe u iyongo i zough u a Orkristu ugen yô, u er nena?
-
Er nan u soo wer u dondo ikyav i Yehova i den mbagenev kwaghbo laa?
SEER HENEN KWAGH
Hen fa er injakwagh igen i Yesu yange ôr la, ia wase se se palegh u ôron mbagen ijir yô.
U nenge wer doo u se zamber shin se na anyi a yan shighe u se nenge ser se mba a ibo ga kpaa?
“U Yan Or Anyi—Ka Gbenda u Injaa u Keren Bem” (Iyoukura, Novemba 1, 2002)
Nenge er ior mbagen yange ve hen u eren a ior doo doo, kera sangen a sange sha dooshima ga yô.
Hen igbenda i u fatyô u himen iyongo a mbagenev cii ve kwagh shon una hingir zegekwagh u van a mpav ken tiônnongo ye.
“Dooshima a Mgbegha U Sôr Ayôôso Vea Mbagenev” (Iyoukura, Mei 2016)
a Ngeren u Seer Tan Iwanger 6 la tese er dooshima ka a mgbegha Mbakristu ve palegh u samber a angev mbu tsaren yô.
b Ngeren u Seer Tan Iwanger 7 la pase er se fatyô u sôron zayol shighe u ayôôso a gbe sha kwagh u kpenga shin sha ikyaa i zan koti yô.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
