Ujijingi mba! Ken tar u i nengen a u sha ashe a inyam ga la, ujijingi mba dedoo man mbabov mba. Ve ka ior mba ve vande lun sha tar ne kpa ve kpe kera yôô?

Ei, ve vande lun ga. Zum u ka or a kpe yô, a lu nomsoor shin kwase kpaa mba karen mba yemen ken tar u jijingi, er ior kpishi ka ve hen la nahan ga. Hii nan se fe nahana? Sha ci u ka Bibilo i kaa nahan ye. Bibilo ka takerada u mimi u u dugh hen Aôndo u mimi tswen, u i yer iti na er Yehova la. Yange Yehova gba uumace; nahan á fa kwagh u ka á er zum u ka vea kpe yô.—Pasalmi 83:18; 2 Timoteu 3:16.

Bibilo i kaa er yange Aôndo maa Adam, or u hiihii la, “sha vuulevu u inyaagh.” (Genese 2:7) Aôndo ver un kan Paradiso, ka sule u Eden je la. Aluer yange Adam una we tindi u Yehova ikyo yô, yange ma kpe ga; ma á lu uma sha tar zan zan nyian. Kpa er Adam yange peren tindi u Aôndo sha apera yum yô, Aôndo kaa a na er: “Ú hide hen inya, gadia ka i, i tee, i er u min ye, gadia u ngu vuulevu, nahan ú shi ú hide ú hingir vuulevu.”—Genese 3:19.

Kwagh ne inja na nena? Ka shami, Adam yange lu hana man Yehova mase gban un sha vuulevu? Vande lun mape ga. Lu jijingi u i lu a mar un sha tar ga kpaa ga. Vande lun ga. Nahan zum u Yehova yange kaa a Adam er “ú hide hen inya” yô, inja na er Adam una kpe. Yange per yem ken tar u  jijingi ga. Ken ku yô, Adam hingir ikyom, lu mape ga. Ku ka iaven i uma a kera lu ga la.

Kpa mba ve vande kpen mbera di yee? Mba mape gaa? Bibilo i na ikyar er:

• “Ve cii ka ijiir i môm vea za ye, ve cii ka shin vuulevu ve dugh, shi ka shin vuulevu kpaa vea hide ye.”—Orpasenkwagh 3:20.

• “Gadia mbakpenev yô, . . . kera mba a ma injar kpaa ga.”—Orpasenkwagh 9:5.

• “Dooshima ve kua ihom ve i kôron man iwuhwe ve cii saa ishe ngise je.”—Orpasenkwagh 9:6.

• “Gadia ma tom shin mhen shin mfe shin kwaghfan mba shin Sheol [shin uwar] henpe u ze la ga.”—Orpasenkwagh 9:10.

• “Nan shi nan hide hen inya i nan, sha iyange la je mbamhen mba nan saa ishe.”—Pasalmi 146:4.

 Taver we u lumun a avur a cighanruamabera nee? Aluer ka nahan yo, shi hen sha kwagh ne: Ken icombor kpishi, or ngu a ker inyaregh sha u kosun ya u nan. Shie u nan kpe kera yô, tsombor u nan la u gba yan ican. Ashighe a genegh je yô kwase u nan kua mbayev cii ve zua a inyaregh ki kuma ki yamen kwaghyan ga. Alaghga mbaihomov mba or la vea gba kôhôn ve ashe. Yô pine a se iyolyou wer: ‘Áluer or la ngu uma ken tar u jijingi yô, hii nan a kera lu koson tsomber na la heregh zan zan ga? Hii nan a kera lu yiman tsombor na sha ikyev i aferaior ga?’ Ka sha ci u kwaghôron u cighanruambera la ka u vough. Or la kera ngu uma ga, shi una faityô u eren makwagh tsô kpaa ga.—Pasalmi 115:17.

Ka u kaan er mbakpenev vea kera nder mayange ga shinii? Ei, ka nahan ga. Ken hemen yô se ôr kwagh sha kwagh u mnder u shin ku. Kpa inja na yô mbakpenev mbera kera fa kwagh u we u eren la ga. Vea faityô u nengen a we ga, shin u ungwan we, shin u lamen a we kpaa ga. Doo u we cian ve ga. Vea faityô u wasen we ga, shin vea faityô u eren we kwaghbo kpaa ga.—Orpasenkwagh 9:4; Yesaia 26:14.