Kwagh môm u sagher iyol u Mbashiada mba Yehova ve lu veren ashe a mi inyom ne yô, ka u nengen Vegher 1 u vidio i Loho u Dedoo U Yesu Pase La. Ior umiliôn nenge i kera kpaa. Man Vegher 1 ne ka di u hiihii tsô, sha ci u vidio la ngi a avegher 18! Ka tom u nyi nahan anmgbianev mba nomso man kasev ve lu eren sha u wasen tom u eren avegher a vidio nee? Man we di u ngu suen ve nena?

 Ka ken branci wase u Australasia la i lu kuran avegher a vidio i Loho u Dedoo ne la a hemban iyenge ye. Man hanma kwa u i lu kuran vidio yô, ka i lu hii iorov 50 zan zan 80 nahan ve eren tom la ye. a Anmgbianev ka ve na mba eren tom u vidio la kwaghyan u atetan man u aikighe man akaayan agen a kiriki. Ka ve vande wan agoyol sha kwaghyan u a va na ior la cii ve shighe u yan kwaghyan shon a kuma ye. Anmgbian u kwase ugen u a eren tom ken Gbaatom u Nengen sha Kwaghyan yô, iti na ér Esther, a kaa ér: “Ka se yam akaayan vea ior kposo kposo sha er se zua a akaa a yôron a injaa sha ishe i dedoo yô. Shi ka se geman gbenda u se yôron la sha er se saa kwaghyan ishe ga yô.” Hanma or ka nan ya kwagh i kuma inyaregh er udola mba Amerika unyiin nahan sha hanma iyange.

 Ka kwaghyan tseegh i ne mbaeren vidio la ga, ka i gba u a kuran ve kpaa. A kuran ve nena? Oo ka u ta ken tar u Australia ayange agen kpishi shi i tsee iyol, kpa ka cii la ga, mtseenem ma bom ma ka ma duen sha iyange la ka ma ngee kpishi. Anmgbianev ka ve er utenti kua ajiir a ior za memen oo shi ve yam mkurem ma shien ma kuran or kwavyolough ken oo kua anema a cirin kua mngerem ma man sha er a kura ve sha oo u ka u ta kpishi shi i tsee la yô. Anmgbian ugen u a eren tom vea Gbaatom u Eren Icer i Ungwan a Ungwa man Uvidio yô, iti na ér Kelvin, a kaa ér: “Anmgbianev mba nomso man mba kasev kpishi mba ve eren tom la ka mba wasen tom shin Betel. Ka ve er tom ne kua ityom igen saan saan man a iyolhiden a mi ijime. A iwasen ve shio yô, se fatyô u eren tom ne ga.”

 Avegher a vidio agen aluer i kura hen iyagh ki branci shin hen ijiir i kuran uvidio shin branci la yô, kwagh shon una kera bee kwagh u mimi er i soo ér a lu la ga. Shighe u i gbe u a kura avegher la nahan yô, ka i mough i yem hen ijiir igen i za kura her. Ka a gba u a kura vidio sha kwagh u akaa a ken Bibilo shighe u usu u lateriki lu ga, igbenda i matoo man ayou a ainge ne lu ga la yô, ashighe kpishi ka i gba u vea mough a yem ken agar vea za kura ker. Ka i gba u a wa ikyav mbi wuhan iyol man ikyav mbi eren tom a mi ken vidio man ikyav mbi kuran vidio a mi cii, a tôô a yem a mi ape i gbe u a za kura vidio la shi a koso mbi tsembelee. Cii man i za hii vidio i kuran yô, anmgbianev mba wasen mba eren vidio tom la ka ve nenge ér i wa iyol sha akaa er ujanaretô man mngerem ma man kua ahungwa akôngo nahan cii. Anmgbianev mba kuran vidio la cii ka ve tsaan hen uya mba Mbashiada mba hen ijiir shon gayô ken ayou a ka i zer ken mato la shin ken uhôtel gayô ken ayou a i er sha ikyon yô.

 Tom u za kuran vidio mape la ka u vihi inyaregh kpishi, shi ka u tôô shighe shi mba ve ze la ka ve er tom je i tume ve iyol. Nahan ken inyom i 2023 la, Mbahemenev mba Shin Itine na ian ér i yam kpande ugen u lun er kpekpe nahan u ka u tesen ajiir inja ér u ngu hen ijiir shon kpôô kpôô nahan yô. Yange i yam u sha udola mba Amerika milliôn uhar man tiôn, sha er a kuran uvidio a mi yô. Jingi i kpande ne ka i due akaa i engem kpishi shi usu u ka i tsar la kpa ka u lu vough nahan i lu inja er ka kuran vidio shon ken inya hen ijiir i i soo la kpôô kpôô nahan. Kwagh ne ka a na yô, se pande inyaregh ki ma i mough u za kuran vidio ape gen ve ma i vihi kpishi la. Anmgbian ugen u a lu ken Kômatii u Nengen sha Branci u Australasia la yô, iti na ér Darren, a kaa ér: “Vidio i kuran a kpande ne la wase kpishi, sha ci u yange a yem vidio i kuran mape yô, mbakuran vidio ve er tom i tume ve iyol, kpa kera ka nahan ga, shi ka vea soo u hiden kimbir kuran avegher a vidio agen kpa ve er nahan acin imôngo er ve soo la. Ikyav i tesen yô, ka sea za kuran vidio mape man a gba se tôô iyange foto er i lu yemen u miren la yô, se lu di a miniti kpuaa tseegh, u timbir je ia mire kera. Kpa er se lu a kpande ne yô, ka se er iyange la nahan se tôô i foto er se soo la cii, zan zan se va kar zuan a kwagh u se soo la.”

 Hanma vegher u vidio i Loho u Dedoo u i gbe u a kura cii kwagh ka gba sha mbakuran vidio ior uderi imôngo. Ka ve nenge tom u anmgbianev mba nomso man mba kasev ve lu eren kpoghuloo u nengen sha a ve la nena?

 Anmgbian u kwase ugen mba yer iti na ér Amber, yange mough hen ya na ken geri u Melbourne va tom u vidio ne. Zende ne lu zende u kuman ukilomita 700 nahan, a kaa ér: “Yange m va nyer shin tashan u girgi i purugh je tsô anmgbianev mba shin Betel hii u nengen sha a mo doo doo. Anmgbianev mba shin Betel kpishi yange ve lôhôm iwer. Yange sea za u kuran vidio kpa anmgbianev ve er a mo kundu kundu shi ve tesem ér m doo ve ishima kpaa. Yange m zua a averen kpishi ken zende ne. M nenge mer kwagh saam ga!”

 Anmgbian ugen u a eren tom vea mba ve eren uvidio yô, iti na ér Derek, a kaa ér: “Yange se mba hii tom ne je, mba ken agbaatom agen kpa hii u nan se iwasen. Saan mo kpishi er m lu imôngo vea anmgbianev mba nomso man mba kasev mba ve ne shighe ve man akaa a ve kua agee a ve sha u eren tom ne yô. Ka ve kegh a kegh iyol u wasen shi ve eren kwagh kundu kundu. Ikyav tese ér Yehova ver ve man se cii doo doo. M na jighjigh mer ka tom u se er la tseegh kwagh a gbe un sha mi ga, kpa kwagh gba un sha gbenda u se er tom shon la kpaa.”

 Se sugh ne kpishi sha uiyua enev kua mba ne eren hen ijiir i donate.pr418.com. sha u suen tom u eren uvidio mban la cii.