Anmgbian wase ugen yange kaa ér: “Ka kwagh u yange m lu veren ashe a mi ken anyom 19 a a kar ne je ne!” Ka nyi yange lu veren ashe u nengen a mini? Lu veren ashe u nengen a Icighan Bibilo i Tar u He—Mateu-Mpase ken zwa u a lamen yô, ka zwa Bengali je la. Ior kpishi ka ve ôr imbakwagh la shighe u i due a Icighan Bibilo i Tar u He la ken zwa-ityôô ve yô. Kpa i lu nahan u pine er ka i er tom u geman Bibilo ne shi gberen i ken ijô kposo kposo la vee?

 Hiihii yô, ka Kômatii u Mbahemenev Mba Shin Itine u Nengen sha Kwaghngeren ka na zwa ér i tsua anmgbianev mba nomso man mba kasev mba vea er tom u geman Bibilo la ye. Nahan ka i tôô ve shighe nena u geman Bibilo beene? Anmgbian Nicholas Ahladis u a eren tom hen Afishi a Nengen sha Tom u Geman Kwagh ken Warwick, New York la kaa ér: “Shighe u geman Bibilo ken ma zwa been la har sha ingyegh ki mba ve geman kwagh ken zwa shon la, man er zwa shon u taver shin u taver ga la, man er mbalamen zwa shon ve kav mlu u ior mba sha ayange a i ngeren Bibilo la, man er i lamen zwa shon sha ajiir kposo kposo la, kua akaa agen. Kohol cii yô, hanma zwa cii ka i tôô er hii inyom i môm zan zan anyom atar nahan, u geman Ruamabera u Mbakristu u ken Zwa Grika (Mateu-Mpase) la tseegh been. I gema i tôô anyom anyiin shin i hemba nahan je kpaa, u geman Bibilo jimin cii been. Kpa ka a lu u geman Bibilo i ken iliam i sha a ve yô, i hemba tôôn shighe gôgônan.”

 Ka mbageman kwagh tseegh ka ve er tom u geman Bibilo la ga. Ka i tsua anmgbianev mba nomso man mba kasev mbagenev mba ve geman kwagh ga, mba vea fatyô u ôron kwagh u i lu geman la, nahan kôron akaa a ve nenge ér doo u a sôr shin a nyôôso yô. Ka i tsua i lu agumaior kua mbaganden, mba ve hen makeranta kpishi ga la je kpaa. Ashighe agen je yô, ka i tsua mbaôron mban ken ityar kposo kposo, i i lamen zwa shon ker yô. Anmgbianev mban cii ka ve lumun u eren tom ne gbilin. Ka vea ôron shi vea pasen mbageman Bibilo mbara akaa a ve nenge ér doo u a sôr la yô, kwagh la a wase i gema kwagh u Bibilo i ôr la vough, man sha gbenda u i lamen sha zwa shon la, shi i gema i wanger. Kera ga je kpa, er anmgbian ugen shin South Africa u a eren tom u tsaase mbageman Bibilo yange kaa nahan, “mbagemankwagh ka ve nenge ér gba hange hange u vea er tom kpishi sha ci u Yehova kua mbaôron Mkaanem nam.”

 Ka a geman Bibilo a been yô, i gba u a gber i shi a wa i igbende. Kwagh ne cii ka i er ken ayou a ase a gberen ityakeda la sha “ilyôghonov” shin akaa kposo kposo a kuman er pue nahan. A yô ka: pepa (paper) man inki (ink) man tsur (adhessive), man ikyôvor shin imbakwagh la (cover material) man tsar (ribbon) man imba tsar la ugen (headbands), man kwagh u cirin sha igbende (cover liner) man ugen (capping material) man imbakwagh la ugen (silver leaf), kua kwagh u varen ken igyôndo i igbende (spine stiffeners). Ken inyom i 2019 la, i vihi inyaregh sha akaa ne tseegh hemba udola (inyaregh ki Amerika) million 20, sha ci u gberen Bibilo. Anmgbianev mba gberen Bibilo mbara yange ve er tom u gberen Bibilo shi tindin a mi sha ajiir agen sha tar hemba ahwa dubu 300 ken inyom la.

 Er nan ve ka se na shighe kpishi sha tom u gberen Bibilo la shi se vihi inyaregh sha mi kpishi yum nahana? Anmgbian ugen u a eren tom hen afishi Gbaatom u Nengen sha Tom u Gberen Ityakeda sha Ityar Ityar yô, iti na ér Joel Blue, a kaa ér, “Bibilo ka takeda u hemban cii, ken ityakeda i se gberen la. Nahan ka se soo ser mluashe u Bibilo a tese iengem i Aôndo u se civir la kua loho u se pasen la.”

 Dugh gbenda u se vanden gberen Icighan Bibilo i Tar u He la keke ne sha yô, ashighe agen ka se gber Icighan Bibilo i Tar u He la sha igbenda igen kpaa, sha ci u ior mbagenev mba vea fatyô u ôron Bibilo i se gberen keke la ga yô. Ikyav i tesen yô, i gber Icighan Bibilo i Tar u He la sha kwaghngeren u mbaapirashe ken ijô pue. Ka i tôô ahwa er anigheni nahan u gberen kôpi u Bibilo môm tseegh sha kwaghngeren ne. Ka a gber ukôpi imôngo yô, ve tôô ian i koson ve i gbanger je i kuma angahar 7 man tiôn. Shi ka se gber Bibilo i lun a igbende ga sha ci u mba i wuhe ve ken purusu yô, sha ci u tindi yange u nyôron a ityakeda i i we i igbende cii ken purusu.

 Icighan Bibilo i Tar u He la ka i wase mba ve ôron i la kpishi. Ikyav i tesen yô, tiônnongo ugen ngu hen ijiir i yer ér Tombe la, ken tar u Democratic Republic of the Congo. Ka tiônnongo u ken zwa Kiluba. Tombe gba ica a gartamen u tar la hemba ukiloimta 1,700. Mbashiada mba hen Tombe cii yange ve lu a Bibilo i môm tseegh, man lu Bibilo i ken zwa Kiluba, i yange i gema i sha gbenda u ngise i lamen zwa shon yô. Nahan yange a na anmgbianev asaimenti ken tiônnongo yô, or ngura nan tôô Bibilo i i lu i môm tseegh ne, nan za wa iyol sha asaimenti u nan, nana been yô, nan gema Bibilo shon nan na orgen. Kpa ken uwer u Agusutu, inyom i 2018 la je, hanma or hen tiônnongo la zua a kôpi u Icighan Bibilo i Tar u He la ken zwa Kiluba.

 Anmgbian u kwase ugen u a lamen zwa German yô, ôr kwagh u Icighan Bibilo i Tar u He i ken zwa na, i yange i sôr i gber la kaa ér: “M kera keren a ker ape me zua a Bibilo me ôr ga. Kpa hegen ka m pine iyol yam mer, ‘Ka hanma shighe me seer ôron Bibilo?’ ” Orgen u i wuhe un ken purusu yô, nger ér: “Yange i nam kôpi u Icighan Bibilo i Tar u He la, man ngi wasen mo u nengen er i gbe u me de uma u yange m eren la yô. M soo u seer fan Mbashiada mba Yehova man er me er ve me hingir Orshiada u Yehova yô.”

 Mbaôron Icighan Bibilo i Tar u He la cii ka ve wuese uiyua mba ior ve ne a ishima ve sha u suen tom u gberen i la. Ka sha igbenda i i eren iyua sha donate.pr418.com la ior ve eren uiyua sha ci u suen tom u pasen kwagh, u i lu eren sha tar cii la ye. Se sugh ne kpishi sha ieren yen i dedoo i nan kwagh la.