Ugomoti kpishi sha tar wa atindi ér ior ve palegh u teman shin tilen ikyua a mbagenev shi ve de kumban imôngo ga. Nahan Mbashiada mba Yehova kange ishima u kuran atindi la shi zan hemen u eren mbamkombo vev sha gbenda u kwagh a er ve ga yô. Sha nahan yô, atôônanongo gema nyôron mbamkombo sha app er Zoom nahan, sha Intanet.

 Kwagh ne na yô, Mbahemenev mba Shin Itine na ian ér i dugh inyaregh ken uiyua mba ior ve er la, i yam mbaakauntu vea Zoom sha ci u atôônanongo, sha er aa za hemen u eren mbamkombo nduuluu yô. Kwagh ne wase atôônanongo agen a ma a fetyô u zuan a udola hii 15 zan zan 20 shin hemban nahala, yamen akauntu vea Zoom ga la kpishi je. Atôônanongo la yange lu nyôron mbamkombo sha app mba i kimbin inyaregh sha mi ga, mba ve lu a ian sha ci u iorov kpuaa tseegh, shi ve lu sha gbenda u mbaaferev vea fatyô u nyôron sha mi la. Atôônanongo a a lu nyôron mbamkombo sha mbaakauntu mba Zoom mba nongo wase u yam la cii zua a iwasen kpishi, ka ve er mbamkombo a ican i yan shio, shi mba tagher a mbaaferev sha mi ga, shi ior kpishi ka ve fatyô u nyôron mbamkombo mban. Hegen ne, atôônanongo a hemban 65,000 nahan, nga eren tom a mbaakauntu mba Zoom mban ken ityar i hemban 170.

 Tiônnongo u Kairagi u a lu hen geri u Manado, tiôntar u North Sulawesi, ken tar u Indonesia la, yange de u nyôron mkombo sha app mba i kimbin inyaregh sha mi ga la, hide ngu nyôron mbamkombo sha akauntu u Zoom u nongo u Yehova la. Anmgbian ugen hen tiônnongo la, iti na ér Hadi Santoso, a kaa ér: “Anmgbianev mba ve fe u eren tom a mbaanar er hanseeti shin tableeti nahan tsembelee ga je kpa, hegen ne ka ve nyôr mbamkombo asev sha Intanet zan zan ve kar kuren a zayol shio. Ngise la yô, ve nyôr kpa ica i gba ga tsô mkombo a tôndo, tsô shi ve hide ve gba yan ican u nyôron.”

 Ortamen u hen tiônnongo u Guayacanes Oeste, hen geri u Guayaquil, tar u Ecuador, mba yer un ér Lester Jijón, Jr., a kaa ér: “Er anmgbianev asev mba nomso man mba kasev ve lu a inyaregh kpishi ga yô, atôônanongo kpishi yange ma zua a inyaregh ki yamen akauntu u Zoom sha ci u anmgbianev ve nyôron mbamkombo sha Intanat ga. Hegen ne, sha iwasen i nongo u Yehova yô, se zua a akauntu u Zoom u ior kpishi vea fatyô u nyôron mkombo sha mi yô. Sha nahan yô, ka se lôhô ior mbamkombo gbar gbar, se mba kera cian ser ior a va ngee a gande ga.”

 Ortamen ugen ken tiônnongo u Ngwerere North, hen geri u Lusaka, Tar u Zambia, mba yer un ér Johnson Mwanza, a nger wener: “Anmgbianev mba nomso man mba kasev kpishi ka ve shi kaan ér, ‘akauntu u Zoom u nongo u Yehova u ne se ne wase se u seer lun kôôsôô a anmgbianev asev tseegh ga, kpa shi a wase se u nengen er se doo Yehova ishima shi a we se ikyo yô.’”

 Ka inyaregh ki i ver sha ci u wasen anmgbianev mba kwagh a tser ve la, i tee i yam akauntu u Zoom, i ne atôônanongo a nyôron mbamkombo sha mi ye. Ka i zua a inyaregh kira sha uiyua mba ior ve ne ishima a ve u suen tom u Tartor u i eren sha tar cii la. Uiyua mban kpishi ka i er ve hen ijiir yase i sha Intanet i donate.pr418.com la. Se sugh ne sha uiyua mba ne ne mgbeghaa, mba shi ka i er tom a mi u wasen anmgbianev mba kwagh a tser ve sha ajiir kposo kposo sha tar cii la.—2 Mbakorinte 8:14.