Tar u Russia Ta Ityav sha Tar u Ukraine
Sha iyange i Febewari 24, 2022 la, tar u Russia ta ityav sha tar u Ukraine. Yange ve hii ityav mbin sha use sha iyange la. Er mbahemenev mba ityar kposo kposo venda kwagh ne a tar Russia nahan kpa ve de ga. Ityav mbin ne mbia bende a tar jimin cii nena? Orvesen António Guterres, un u a lu akawe u tamen u mzough u tar cii, u i yilan United Nations la ôr kwagh ayange kpuaa ken ijime ér: “Ityav mbin mbia wua ior kpishi shi mbia va a ican je a gande shi mbia vihi bem u a lu ken Yuropa man sha tar jimin cii la kpaa.”
Bibilo pase ikyav i akaa a a lu eren shin tar nahan ne ér nyi?
Yesu Kristu yange vande ôron tsuaa wener shighe ngu van u “ikyurior igen ia mough ityav a ikyurior igen, shi tartor ugen ua mough ityav a tartor ugen” yô. (Mateu 24:7) Ôr ngeren u a lu a itinekwagh ér, “Ka Nyi i Tese Ér Se Mba ken ‘Ayange a Masejime,’ Shin ‘Ashighe a Mkur’?” la. Nahan nenge er Bibilo i pase ér, kwagh u i lu nôngon ityav hegen ne kure kwaghôron u profeti u Yesu yô.
Takerada u Mpase ôr kwagh u ityav ér ka orhendan nyinya i ‘lun iyol nyian,’ u a lu “tôôn bem sha tar kera” yô. (Mpase 6:4) Ôr ngeren u a lu a itinekwagh ér, “Mbaanyinyav Mba Unyiin Mbara—Ka Unô?” la, nahan nenge er kwaghôron u profeti ne a zua sha kwagh u ityav mbi i lu nôngon ayange ne la.
Takerada u Daniel tsengaôron er “tor u ken imbusutarimese” una nôngo kwagh a “tor u ken imbusutariyan” yô. (Daniel 11:25-45) Nenge vidio i ken zwa Buter, ngi a itinekwagh ér Fulfilled Prophecy—Daniel Chapter 11, nahan nenge er i hii ve a fatyô u kaan ér “tor u ken imbusutarimese” la ka tar u Russia kua shi ityar igen i í eren kwagh imôngo a na yô. a
Takerada u Mpase shi ôr kwagh u “ityav mbi iyange i vesen i Aôndo U Hemban Agee Cii la.” (Mpase 16:14, 16) Nahan kpa, ityav mbin ka mbi akuraior aa nôngo ker ayolave er a lu nôngon hegen nahan ne ga. Ôr ngeren u ken zwa Buter, u a lu a itinekwagh ér, “What Is the Battle of Armageddon?” (Ka Nyi i Lu Ityav mbi Armagedon?) la, nahan seer fan kwagh u ityav mbi a va nôngo mbi ken hemen ne.
U fatyô u lun a ishimaverenkeghen wer a va doo ken hemen sha ci u nyi?
Bibilo kaa ér Aôndo “er ityav mbi bee zan zan ar hen ikighir i tar je.” (Pasalmi 46:9) Ôr ngeren u ken zwa Buter u a lu a itinekwagh ér, “A Real Hope for a Better Tomorrow” la (Se Fatyô u Lun a Ishimaverenkeghen i Mimi Ser A Va Doo ken Hemen). Ngeren ne una wase u, nahan u seer fan akaa a dedoo a Aôndo a tôndo zwa u va eren ken hemen la.
Yesu yange tese mbahenen nav u eren msen ér Tartor u Aôndo u̱ va. (Mateu 6:9, 10) Tartor la ka gomoti u a lu sha yô. Gomoti ne una er akaa a Aôndo a we ishima u eren sha ci u tar ne yô, man kwagh môm u Aôndo a we ishima u eren yô ka u van a bem sha tar cii. Wea soo u fan er Tartor la wase u yô, nenge vidio i i lu a itinekwagh ér, Ka Nyi I Lu Tartor u Aôndo? la.
Iyenge i Mbashiada mba Yehova mba ve lu ken tar u Ukraine hemba 129,000. Mbashiada mba ken tar u Ukriane man mba ken ityar igen kpaa, mba nyer iyol ken pati u eren ga shi mba nôngon ityav ga er Yesu kpa yange eren nahan. (Yohane 18:36) Mbashiada mba Yehova mba yôôn “loho u dedoo u Tartor” sha tar jimin cii. Mba yôôn ér ka tartor la ua sôr mbamzeyol mba uumace, shi ua bee a ityav mbi nôngon kpaa ye. (Mateu 24:14) Lam a vese sha er u seer fan kwagh u loho u Bibilo u nan se ishimaverenkeghen ne yô.
a Ngeren u a lu a itinekwagh ér “‘Tor u ken Imbusutarimese’ sha Shighe u Mkur” man u a lu a itinekwagh ér “Ka An Nan Lu ‘Tor u ken Imbusutarimese’ sha Ayange Nee?” la, pase kwaghôron u profeti ne vindi vindi.
Kwagh Ugen u Alaghga Shi Una Doo U Yô
KURAN NEN!
Ior mba Yevese Ityav ken tar u Ukraine—Kwagh u Bibilo i Ôr Yô
Bibilo pase er i hii ve kwagh a lu eren nahan yô, man er a va bee a zayol ne vindi vindi yô.
MBAMPIN MBA BIBILO I NE MLUMUN SHA MI LA
Tartor u Aôndo Ua Er Nyi?
Hen fa kwagh u gomoti u Aôndo una va er sha tar yô.
ESSENTIAL BIBLE TEACHINGS
Ka Nyi I Lu Tartor u Aôndo?
Yesu yange hemban tesen ior kwagh u Tartor u Aôndo shighe u lu eren tom na la. Mbadondon un ndera eren msen sônon ér Tartor la u va anyom kar hegen uderi imôngo.
