Bibilo kaa ér Tor Davidi yange lu uma ken Iserael er anyom 3,100 nahan ken ijime, shi ônov nav va kar tema tor ken ijime na anyom uderi imôngo. Kpa mbapuunakaa mbagen kaa ér Davidi ka or u i er kwagh na ken ukwaghhir mba ior va hii u tan tsô, yange lu kpôô kpôô ga. Nahan Tor Davidi yange lu or kpôô kpôô?

 Ken inyom i 1993 la, or u dughun akaa shin inya ugen u i yer iti na ér Avraham Biran yô, vea ior nav mba ve eren tom imôngo yô, za dugh kpande iwen ugen hen geri u Tel Dan, vegher u ken imbusutarimese i tar u Iserael. Kwagh u i nger sha kpande shon la ôr kwagh u “Ya u Davidi.” Kwaghngeren u mbayiase ne, i nger un er anyom 2,900 nahan ken ijime. Ikyav tese ér kpande ne lu vegher u ikyav i umbur kwagh i ior i Aram tim u tan ihyagh ér ve hemba Mbaiserael ityav yô.

 Ngeren u Bible History Daily ugen kaa nahan ér: “Ngeren u a er kwagh u ‘Ya u Davidi’ la, ior mbagen ta abusan sha mi . . . Nahan cii kpa, mbatimen sha akaa a ken Bibilo kua mbadughunakaa shin inya kpishi lumun ér kpande iwen u ken Tel Dan la, ka kwagh u hiihii u yange i zua a mi u tesen wang ér Tor Davidi u i er kwagh na ken Bibilo la lu kpôô kpôô yô; kwagh ne shi ka môm ken akaa a vesen a mbadughunakaa shin inya ve zough a mi a i er kwagh u a ken magazin u BAR [Biblical Archaeology Review] la yô.”