SHA CI U NOOV MAN KASEV
1: Ka Ve Ver Ishima sha Ivese Ve
INJA I KWAGH LA ÉR NYI?
Noov man kasev mba ve veren ishima sha ivese ve yô, mba nengen i ér ka mzough u lun igbekeke. Kwagh la ka a na ishima i kera nyian ve sha kwagh u ivese ve ga. Hanma ve cii ka nan lu a vangertiôr ér shighe u ve lu a zayol je kpa, vea za hemen u lun imôngo.
Noov man kasev mbagenev yô, ka ve gba lun imôngo tsô sha ci u, aluer ve undu or u ve vese la yô, a doo azende a ve ga, shin a doo mba hen tsombor ve ga. Nahan kpa, aluer noov man kasev za hemen u lun imôngo sha ci u ve doo ayol a ve shi mba ne ayol a ve icivir yô, a hemba doon.
KWAGHWAN U BIBILO: ‘Nom nana̱ de undun kwase u nan ga.’—1 Mbakorinte 7:11.
“Ka wea ver ishima sha ivese you yô, nomou shin kwase wou una er kwagh u doon ga kpa u wa ishima. Ka u de nan kwaghbo fele, shi fese je we u u er kwagh u doon nan ga la u kaa wer nana ya u anyi. Nengen mbamzeyol ou wer ka akaa a nan we gbeev mbu nôngon, ve de luun we atôakyaa a paven ivaa ga.”—Mkaanem ma orgen, iti na ér Micah.
ER I HII VE KWAGH NE A LU HANGE HANGE YÔ
Noov shin kasev mba ve veren ishima sha ivese ve ga la ka vea va tagher a mbamzeyol ken ivese yô, ve kaa ér, ‘Ka or shin kwase u ma m vôso ne ga,’ maa ve gba keren gbenda u paven ivaa.
“Ior mbagenev kpishi ka ve gba eren ivese tsô ér aluer ivese ve va kor ga kpa vea pav. Aluer ior er ivaa a imba mhen ne yô, tese ér ken mhii u ivese ve la je yange ve soo u lun imôngo gbem ga.”—Mkaanem ma kwase ugen, iti na ér Jean.
KWAGH U U ER YÔ
HEN SHA MBAMPIN MBAN
Hen shighe u ne lu ken ayôôso nahan . . .
Ka u vaan afanyô er u vôso or shin kwase u u lu vea nan la yôô?
Ka i lu u er ma u lu vea orgen nahana?
Ka u kaa wer, “M ngu undun we,” shin “Me za ker or u nana nengem ér m gba kwagh yô,” shin ambaakaa la nahana?
Aluer u na mlumun sha mpin môm shin uhar ken mba i ter sha heen ne wer een yô, a gba u u hii u veren ishima sha ivese you hegen je.
LAM VEA NOMOU SHIN KWASE WOU SHA MBAMPIN MBAN
Se kera mba veren ishima sha ivese yase tsembelee gaa? Aluer ka nahan yô, ka nyi i ne ve i lu nahana?
Ka nyi akaa nahan se er ve se hide se ver ishima sha ivese yase?
AKAA A AA WASE NE YÔ
Ngeren kwase wou shin nomou kwagh sha ashighe ashighe sha u pasen un er a doo u ishima yô
Tese wer u ver ishima sha ivese you sha u veren ufoto mba kwase wou shin nomou ken afishi, ape u eren tom la
Nôngon u yilan kwase wou shin nomou sha hanseeti ken hanma iyange shighe u u yar tom shin u lu her ga yô
KWAGHWAN U BIBILO: “Kwagh u Aôndo a zough yô, or a de paven ga.”—Mateu 19:6.
