Ior mba ve eren kwagh sha mimi yô, mbamaren vev man azende a ve kua mba ve tee ve ityom la cii ka ve na ve jighjigh. Ambaaior la ka a kuran atindi a i we la, shi ve eren kwagh u ve tôndo zwa u eren yô, shi ve ôron kwagh sha mimi hanma shighe cii.

Aluer mbamaren ou shin hanma orgen u u lu sha ikyev i nan cii nan nenge ér u ngu eren kwagh sha mimi yô, nana fatyô u nan we ian i eren akaa agen, kpa ishima ia za nan iyol ga.

“Kwagh u hemban cii u u er ve mbamaren ou vea na u jighjigh yô, ka u tesen ve wer u kera ngu wanye ga, shi eren kwagh sha inja shighe u u lu vea ve kua shighe u u lu vea ve ga kpaa.”—Mkaanem ma gumkwase ugen, iti na ér Sarahi.

KWAGHWAN U BIBILO: “Nana̱ tese sha ieren i nan i dedoo.”—Yakobu 3:13.

Aluer u soo wer i seer nan we jighjigh, shin i hide i na u jighjigh yô, akaawan a a dondo ne aa wase u.

Ôron kwagh sha mimi. Aluer i na u jighjigh kpa, er u va er aie je, ior vea kera na u jighjigh ga. Kpa aluer u ngu ôron kwagh gbar gbar man sha mimi, hemban je yô zum u u er kwagh u sha mi ga yô, ior vea na u jighjigh.

“Shighe u akaa a lu zan vough vough yô, ka i lu ican ga u ôron kwagh sha mimi. Kpa ka a lu kwagh u u ôr sha mimi ior a kenger we dang shin u hee je kpa, wea yer ga, wea ôr yô, i hemba nan we jighjigh cii.”—Mkaanem ma gumor ugen, iti na ér Caiman.

KWAGHWAN U BIBILO: “Sar se u eren akaa cii sha mimi.”—Mbaheberu 13:18.

Eren kwagh sha inja. Mbakeren ior ityom kpishi ken tar u Amerika tese ér, “akaa nga atar, a ka i hemba soon u nengen a mi ken or cii man a tôô nan tom yô.” Môm ken akaa shon yô, ka ve soo ér or u ve keren nan tom la nana lu or u eren kwagh sha inja. Aluer u ngu henen u eren kwagh sha inja hegen yô, kwagh la una wase u shighe u u va hingir organden je kpaa.

“Mbamaren av ka ve nenge shighe u m kar a ishima yam m er ityom i i gbe u me eren hen ya la yô. Er m lu nôngon mer me eren kwagh ne hanma shighe yô, mba hemban nan mo jighjigh.”—Mkaanem ma gumkwase ugen, iti na ér Sarah.

KWAGHWAN U BIBILO: “M ngu a vangertiôr mer u ungwam, . . . sha ci u m fa dedoo mer u er a hemba kwagh u m kaa ne je kpaa.”—Filemon 21.

Waan ishima. Agumaior ka aa vesen shi aa taver iyol a seer a seer yô, i lu lian ga. Kpa ka i gema i tôô shighe cii ve ve va hii u eren kwagh sha inja shi tesen ér kera mba mbayev ga ye. Ka nahan ve i gbe u agumaior aa waan ishima ye.

“U er kwagh sha inja kwa môm di tsô maa mbamaren ou shin ior vea na u jighjigh ga. Saa u hen u eren kwagh sha inja kure kure gbem a va hingir ikye you.”—Mkaanem ma gumor ugen, iti na ér Brandon.

KWAGHWAN U BIBILO: ‘Haa nen . . . ishimawan iyol.’—Mbakolose 3:12.