SHA CI U NOOV MAN KASEV
3 Ka Ve Eren Kwagh sha Icivir
INJA I KWAGH LA ÉR NYI?
Nom vea kwase ka vea eren kwagh sha icivir yô, hanmô ve ka nan tesen ér kwagh u orgen la gba nan ishima, kua shighe u ve gbe ayôôso sha ma kwagh je kpaa. Takeda ugen u i yer ér Ten Lessons to Transform Your Marriage (Akaawan Pue a Aa Na Ivese Yen ia Doo Yô) kaa ér, “Nom vea kwase ka vea lu nahan yô, hanma ve nan palegh u gban anyiman sha kwagh je hiden ijime ga la. Kpa hanma shighe u ve lu a zayol yô, ka ve tema ve lam sha mi. Mô ve ka nana lamen yô, orgen la nan na nan icivir sha u keghen atô ungwan mnenge u nan, nahan ve fa akaa a i doo u hanmô ve nana eren ve, a wase ve uhar cii yô.”
KWAGHWAN U BIBILO: “Dooshima . . . keren mtsera na ga.”—1 Mbakorinte 13:4, 5.
“U eren kwagh a kwase wam sha icivir la inja na yô, ka u tesen un mer a gbam kwagh, shi mayange m soo u eren kwagh u vihin un iti shin ivese yase ga.”—Mkaanem ma orgen, iti na ér Micah.
ER I HII VE KWAGH NE A LU HANGE HANGE YÔ
Nom vea kwase ka vea naan ayol a ve icivir ga yô, shighe u ve lu lamen kpa ve gba anyiman, hanmô ve nan nyôr u puun orgen la shi lamen sha a nan dang, lahan nan je kpaa. Mbatôvon sha akaa kaa ér kwagh ne ngu a tese ér, ivese la ia kure a doo ga.
“Aluer u ngu kaan kwase wou akaa, shin lamen sha a na ivarvase, shin u nenge un ityôkyaa ga yô, una kera nenge ér un gba u kwagh ga, shi una kera na u jighjigh kpaa ga, shi ivese you kpa ia doo ga.”—Mkaanem ma orgen, iti na ér Brian.
KWAGH U U ER YÔ
HEN SHA MBAMPIN MBAN
Ver ishima nenge gbenda u u lamen a kwase wou shin nomou la, zan zan i kuma kasua jimin. Nahan pine iyol wou wer:
‘Ken kasua ne, m puu nomom shin kwase wam kuma kwa me, man gema ka kwa me m wuese unu?’
‘Ka nyi akaa nahan jighilii m er a nomom shin kwase wam sha iciviri?’
LAM VEA NOMOU SHIN KWASE WOU SHA MBAMPIN MBAN
Ka nyi akaa nahan u hen wer aluer u ôr shin u er yô, nomou shin kwase wou una nenge ér u na un iciviri?
Ka nyi akaa nahan ka wea ôr shin wea er ve, nomou shin kwase wou a nenge ér u na un icivir ga?
AKAA A AA WASE NE YÔ
Nger akaa atar, pase er u soo wer i eren akaa shon a we sha icivir la. Ôr nomou shin kwase wou kpa a nger a na. Gema a u nger la na un, un di kpa a na u aa a nger la, nahan hanma wen nana dondo gbenda u orgen la nan nger ér i eren a nan sha icivir la.
Nger aeren a doon a u nenge a mi ken nomou shin kwase wou yô. Nahan pase un er aeren la a doo u kpishi yô.
“U mo nan nomom icivir la inja na yô, ka u mo eren kwagh a na sha gbenda u tesen ér a gbam kwagh shi m soo mer i saan un iyol. Ashighe agen je yô, ka i lu akaa a kiriki a m ôr a na shin m er sha ci na la je ka a tese ér m ne un icivir sha mimi ye.”—Mkaanem ma kwase ugen, iti na ér Megan.
Ken masejime yô, nomou shin kwase wou ka nana eren kwagh a we sha icivir shin nana eren ga kpa ka ze u iyol ga, we yô ka i hemba gban we ishima u ma nan nenge ér u ngu eren kwagh a nan sha icivir.
KWAGHWAN U BIBILO: “Haa nen mhôônom ma zungwen iyol, man erdoo man iyol hiden a mi ijime man ishima i legh legh kua ishimawan.”—Mbakolose 3:12.
