Or u nan eren tom sha gbashima yô, nan yevese tom ga. Kpa ka nan eren tom kpoghuloo sha er nana nenge sha iyol i nan kua mbagenev kpaa yô, ka a lu tom u mbagenev ve nengen ér ka u icivirigh ga je kpaa.

Er u lu uma je, gba keng u u er ityom kpishi, wea soo shin wea soo ga kpaa. Ken tar u ior kpishi ve soon u eren tom sha gbashima ga ne, or ka nana eren tom sha gbashima yô, kwagh la a wase nan kpishi.—Orpasenkwagh 3:13.

“Ka wea eren tom sha gbashima yô, u nenge wer u gba kwagh shi i saan we iyol. Msaanyol la na yô, tom hingir u doon mo. Aluer u ngu eren tom kpoghuloo yô, kwagh la una na u lu a iti i dedoo.”—Mkaanem ma gumor ugen, iti na ér Reyon.

KWAGHWAN U BIBILO: “Hanma tom u nyoon iyol ngu a mtser[a].”—Anzaakaa 14:23.

Dondo igbenda i i ter shin heen ne sha er tom ua doo u yô.

I doo u u henen igbenda i eren kwagh tsembelee. Hanma kwagh u u lu eren cii yô, ver ishima sha mi, a lu ityom i hen ya, shin asaimenti u i ne u ken makeranta ér we u va er ken ya, shin ma tom u i tee u a tôô kpaa. U faan u eren ma kwagh tsembelee yô, shi nôngo hen u eren un fele fele, shin eren un sha gbenda u hemban doon cii. Aluer u ngu fan tom seer a seer yô, ua lu doon we seer a seer.

KWAGHWAN U BIBILO: “Aluer u nenge a or u fan tom u nan dedoo yô, nana tile sha ishigh ki utor je, nana tile sha ishigh ki upeepeembaiorov ga.”—Anzaakaa 22:29.

Nenge er mbagenev kpa tom wou ua wase ve yô. Hanma tom cii ka wea eren u tsembelee yô, mbagenev kpa ve zua a iwasen ker. U tesen ikyav yô, aluer u ngu eren ityom you i hen ya la sha gbashima yô, tom a kera ngee mbagenev hen tsombor wou la ga.

KWAGHWAN U BIBILO: “Or u nan ne kwagh la ka i hemba saan nan iyol a or u nan ngohol la.”—Aerenakaa 20:35.

Er tom i hemba er i ver ishima la. De eren ma tom u i ne u daalaa tsô maa deen ga, kpa nôngo er u i hemba er i ver ishima ér u er la. Aluer u er nahan yô, a tese ér u er u a ishima you i môm, i kighir we a kighir ga, kpa u tsua a ishima you u eren nahan.—Mateu 5:41.

KWAGHWAN U BIBILO: “Er u tese erdoo wou la, a lu sha mkighir ga, kpa a lu sha ishima you je yô.”—Filemon 14.

Eren tom akuma akuma. Or u eren tom sha gbashima nan we hwev ga, kpa nan hingir kpan u tom di ga. Ka nan soo ér nana eren tom akuma akuma, sha er a saan nan iyol shighe u nan lu eren tom kpoghuloo la kua hen shighe u nan lu memen kpaa yô.

KWAGHWAN U BIBILO: “Guda uwegh môm ku ku iv a mmem a ave ahar a a iv a ican kua u zendan ahumbe ityô la.”—Orpasenkwagh 4:6.