Kwagh u u lu la ka di iti i i yilan we a mi la man mluashe wou tseegh tsô ga, kpa kua aeren a ou a dedoo, man atesen a Bibilo a u ne jighjigh a mi la, kua inja you. Jighilii yô, ka sha gbenda u u henen kwagh la man ieren you u fa kwagh u u lu sha mi jim jim ye.

Ka wea fa kwagh u u lu sha mi jim jim yô, u dondon kwagh u Bibilo i tese la, u den wer mbakwav wou ve tesen we kwagh u u er ga.

“Ior kpishi mba er ieev mbi mbateen akondo ka ve hua mbi akondo, i yer ér mannequines la nahan. Ka ieev mbira iyol i mbi ka mbi tsua akondo a ka i hua mbi la ga, kpa ka i lu orgen.”—Mkaanem ma gumor ugen, iti na ér Adrian.

“M hen u suen kwagh u mimi shighe u i taver u eren nahan je kpaa. M fa azende a am a mimi sha gbenda u ve eren kwagh la man er m eren kwagh vea ve la.”—Mkaanem ma gumkwase ugen, iti na ér Courtney.

KWAGHWAN U BIBILO: “De nen u eren kwagh inja i môm a tar ne, kpa lu nen a mhen u he, sha er ne gema . . . yô.”—Mbaroma 12:2.

Nenge er agee a ou a lu la, man er mbamyen ou ve lu la, kua er jighjigh u nan wou a lu la kpaa, nahan hen sha inja or i u lu hegen la, kua inja or i u soo u wer ma u lu la kpaa. Kpa doo u u hii nan mlumun sha mbampin mba ve dondo ne cii man u er kwagh ne ye.

Agee: Ka akaa a nyi nahan m fe u eren tsema tsema? Ka anza a nyi nahan m lu a mini? (Ikyav i tesen yô: M ze hen kwagh faa je kpa? m kôron iyol yam tsaha kpa? m eren tom sha gbashima kpa? m ne ior kwagh kpa?) Ka akaa a dedoo a nyi nahan m erene?

KWAGH U UNA WASE U YÔ: Ka wea er shin wea ôr kwagh, a lu kwagh u dedoo kpa u fa gaa? Pine ormaren wou gayô ma ijende you i u ne nan jighjigh yô, nana ôr u akaa a dedoo a nan nenge a mi ken a we, a a lu agee a ou la, shi nana pase u er i hii ve nan ôr nahan yô.

KWAGHWAN U BIBILO: “Hanma or nana tôv sha aeren a nan, nahan nana lu a ityôkyaa i ember sha kwagh u nan iyol i nan tseegh, a lu sha u tôôn iyol i nan karen sha orgen ga.”—Mbagalatia 6:4.

Mbamyen: Ka ieren yam i nyi nahan i gbe u me seer lun a mini? Ka hanma shighe nahan ka i hemba lun mo pe eren kwaghbo? Ka nyi akaa nahan me fatyô u seer kôron iyol tsaha sha mini?

KWAGHWAN U BIBILO: “Aluer se kaa ser, ‘Se mba a isholibo ga’ yô, se mba tsughun ayol a ase.”—1 Yohane 1:8.

Jighjigh u nan: Ka atindi a nyi m dondono, man ka sha ci u nyi? M na Aôndo jighjigh je kpa? Ka nyi m nenge a mi i tesen mo ér Aôndo ngu? Ka nyi akaa nahan ka a er a ior ve m nenge mer i nzughul a ve, man ka sha ci u nyi? Ka akaa a nyi nahan m ne jighjigh mer aa va er ken hemene?

KWAGHWAN U BIBILO: “M-er u sha inja una kuran we, mkav kpaa una kumban we.”—Anzaakaa 2:11.