Ishimaverenkeghen Ngi a Iwasen ken Uma Wase Je Kpa?

ANNOMSO ugen iti na ér Daniel, yange lu yan ican a angev mbu kyansa, man lu anyom pue tseegh. Mbatwerev nav nôngo a kyansa na shon ka kom inyom jimin yô, ve kaa ér una war ga, shi a azende a na kpa ôr nahan. Kpa Daniel lu a ishimaverenkeghen ér angev nav mbua bee. Yange na jighjigh ér un vese yô, una lu ortwer u tôvon sha kwagh u uange, nahan yange sev a hungwa a av una wase u tôvon fan icigh ki been angev mbu kyansa. Lu veren ashe a ortwer ugen u sôron imba kyansa na ne, u yange gba u una va nenge un yô. Nahan kpa, ka va lun sha iyange i ortwer shon una va la yô, or shon kera fatyô u van ga, sha ci u ura lumun ga. Daniel maa tôô ér kwagh hemba un a hemba je. Ken uma u Daniel cii, lu hiin je vôr a uma ne. Ayange kar kpuaa tseegh, maa Daniel kpe.

Ka orgen u eren tom ken iyouci a ôr se kwagh u Daniel ne ye. A hen kwagh u ishimaverenkeghen ken makeranta, a fa er or ka nana lu a ishimaverenkeghen shin nana lu a mi ga ve, kwagh la a bende a mkpeyol u nan yô. Alaghga u vande ungwan imba kwagh ne. Ikyav i tesen yô, orbeenyol ugen nana lu nôngon ku, kpa a gema a sar nan tsung u ma nan nenge a ma kwagh u vesen u nan lu veren ashe a mi yô. Shighe ugen a lu u nengen a ma or u nan gayô nyôron sha iyange i umbur kwagh ugen ken uma u nan. Nana va nengen a or la, shin a been iniongo la yô, maa nana sule. Ka nyi ka i na ve kwagh a er nahana? Ishimaverenkeghen ia fatyô u wasen se mimi er mbagenev ve ne jighjigh nahana?

Mbatwerev mba tôvon sha igbenda i been iangev kaa ér, aluer se mba a vangertiôr man ishimaverenkeghen shi se mba hemban henen sha akaa a dedoo tseegh yô, kwagh la una wase se u lun uma, shi a kpe se iyol. Kpa ka i taver mbagenev kpishi u lumun a kwagh ne. Mbatwerev mbagenev ka ve hule kwagh la sha ér ka ukaaer, sha ci u a fatyô u pasen er i hii ve kwagh a lu nahan ga. Ka ve hemba soon u kaan ér ka akaa a nan iangev mbi sha iyol tseegh a ne ior ve lun dedoo ga ye.

Ior ndera tan akperan sha gbenda u ishimaverenkeghen i wasen se la ka kwagh u nyian a mi ga. Yange i pine Orgrika u fan takeda, u yilan un ér Aristotle la, ér a pase kwagh u a lu ishimaverenkeghen yô, maa a kaa ér: “Ka kwagh u or hen ér nan ngu nengen a mi, kpa kwagh shon a lu ga yô.” Shi semberee ne, orgen u yange hemen tar u Amerika yô, Benjamin Franklin, lam dang sha mnenge na, kaa ér: “Or u nan suur sha ishimaverenkeghen i nan ve nan lu uma cii, ishimaverenkeghen ia wase nan ga.”

Nahan, jighilii yô, ka nyi i lu ishimaverenkeghene? Ka u nengen a ikyav i kwagh u u soo wer a lu la ga, gban nan jighjigh tsô wer ngu? Shin ka u keren wer u zua a msurshima sha mnyamciem ma gbilinighi? Shin ityôkyaa ngi i i ne ve i doo u se nenge ishimaverenkeghen ser ka kwagh u a hembe mnyamciem, u i gbe u hanma wase nana lu a mi ve a kpe nan iyol shi a saan nan iyol, shi ka kwagh u hange hange u se suur sha mi ve una wase se yôô?