Ka Han Se Fatyô u Zuan a Ishimaverenkeghen i Mimi

ÔÔ ase wer agogo a ou de tom, man ka inja er a vihi nahan. U gbe keren or u nana sôr a yô, u nenge a ajiir kpishi a i sôron agogo yô, man hanma ijiir yô, i nger kwagh i penda, u tesen ér or u sôron agogo u hen ijiir la fa u sôron agogo tsema tsema. Kpa ajiir agen yô, kwagh u i nger la tese nahan ga. Aluer u va fa wer ka or u wan ndor a we yange nan var agogo shon, shi nan kegh iyol u wasen we, sôron we agogo la gbilin nahan, u er nena? U kera ker a ker or u nana sôr u agogo ga, shin u kere?

Tôô ase agogo a ou la kar sha kwagh u a ne ve u fetyô u lun a ishimaverenkeghen la. Aluer ishima ngi yinan we, er ior kpishi ishima i lu yinan ve sha ashighe a mbamzeyol ve ngee yum ne nahan yô, ka hen an u fatyô u zuan a iwasena? Ior kpishi senge ér vea fatyô u been zayol ne, kpa ka ve ôr ior akaa kpishi, man akaa la ka a tsume a tsume a ior shi a gba zwa môm ga. Sha nahan yô, er nan u ker iwasen hen Aôndo u a gbe uumace sha gbenda u vea fatyô u lun a ishimaverenkeghen la ga? Bibilo kaa ér “ngu ica a hanmô wase ga,” shi a kegh a kegh iyol u wasen se.—Aerenakaa 17:27; 1 Peteru 5:7.

Kwagh u a Lu Ishimaverenkeghen Jim Jim Yô

Gbenda u Bibilo i pase kwagh u ishimaverenkeghen la hemba wanger shi hemba zan shimi a gbenda u mbatwerev man mbasainsi kua mbatôvon gbenda u orumace nan henen kwagh la ve pasen nyian la. Asember a ken ijô i yange i hii ngeren Bibilo ker, a i gem ér “ishimaverenkeghen” la, inja na yô ér, u veren ashe a kwagh u dedoo, shi veren ishima ér kwagh shon una er. Jighilii yô, akaa nga ahar, a ka a na ve or lu a ishimaverenkeghen yô. A yô, ka isharen i or ka nan lu a mi sha kwagh u dedoo la, man ityôkyaa i ka nan lu a mi ve nan na jighjigh ér nana zua a kwagh u dedoo shon la. Ishimaverenkeghen i Bibilo i ne se la ka kwagh u henen a hen wer u zua a kwagh u a sar u la ga. Kpa ka ishimaverenkeghen i ityôkyaa i lu, i u fatyô u nan jighjigh wer kwagh u a sar u la u va zua mi keng a bunde ga yô, sha ci u ka kwagh u mimi, shi ikyav tese ér kwagh ngu nahan.

Sha nahan yô, ishimaverenkeghen ngi inja er ka jighjigh u nan nahan; mba gbe nan jighjigh a kwagh ga, saa ka i nenge a ikyav i tesen mimi u kwagh shon. (Mbaheberu 11:1) Nahan kpa, Bibilo tese ér ishimaverenkeghen ngi kposo a jighjigh u nan.—1 Mbakorinte 13:13.

De se tese ikyav: Aluer u kaa a ma ijende you i u ne nan jighjigh wer nana wase u yô, u fatyô u lun a ishimaverenkeghen wer nana wase u. Kpa u gba lun a ishimaverenkeghen a ityôkyaa shio tsô ga, sha ci u u na ijende you la jighjigh, shi u fa un dedoo, shi yange u nenge er kwagh a ior kundu kundu, shi na ior kwagh kpishi. Jighjigh u nan wou la nôngo u lun kwaghmôm a ishimaverenkeghen you la, shin ve wa zua je kpaa, kpa mkposo ngu hen atô ve. Aôndo di ye? Ityôkyaa ngi i u fatyô u lun a ishimaverenkeghen wer una wase u kpa?

Ityôkyaa i Lun a Ishimaverenkeghen

Ka Aôndo a ne se ishimaverenkeghen i mimi la ye. Sha ayange i ngeren Bibilo la, i yila Yehova ér “ishimaverenkeghen i Iserael.” (Yeremia 14:8) Ka un yange a na ve ior nav ve lu a ishimaverenkeghen i mimi sha ma kwagh ye; ka nahan ve lu ishimaverenkeghen ve ye. Ishimaverenkeghen i mimi i ve lu a mi la, lu di u gban henen tsô ér kwagh u a sar ve la vea zua a mi ga. Aôndo yange a na ve ityôkyaa i injaa i vea fatyô u lun a ishimaverenkeghen yô. Ken atô u anyom uderi imôngo a Aôndo er kwagh a ve la cii, yange er uityendezwa a ve kpishi, shi kure uityendezwa mbagenev sha shighe ve la. Ka nahan ve Yoshua u lu hemen Mbaiserael la ôr kwagh ne a ve ye, a kaa ér: “Ne fa . . . , ma kwagh môm sha akaa a dedoo a TER, Aôndo wen, ter sha a ven la bunde ga.”—Yosua 23:14.

Anyom kar udubu imôngo hegen, kpa uityendezwa mbara mba kuren sha mi her. Bibilo ter uityendezwa mba doon tsung mba Aôndo er yô, shi i pase er uityendezwa mba shon kure la vough. Uityendezwa mba i ter ve ken akaaôron a profeti la ka mba mimi, je yô ashighe agen yange i nger ve ken ruamabera vough er ve vande kuren cii i nger ve nahan.

Ka nahan ve ka se kaa ser Bibilo ka takeda u nan ishimaverenkeghen ye. Aluer u ngu timen sha akaa a Aôndo er a uumace la yô, u seer zuan a atôakyaa a nan we ishimaverenkeghen wer, we kpa una er kwagh a we nahan. Apostoli Paulu yange nger ér: “Akaa a i vande ngeren la cii, yange i nger a sha u se̱ zua a ityesen ker, sha er ishimawan yase man ishimasurun i se zuan a mi ken Ruamabera la ia na se lu a ishimaverenkeghen yô.”—Mbaroma 15:4.

Ka Ishimaverenkeghen i Nyi Aôndo a Ne Se?

Ka hanma shighe nahan ka i gba u se hemba lun a ishimaverenkeghene? Ka shighe u se tagher ishigh a ku shin ku u er se la gaa? Nahan kpa, mbagenev yô, ka shighe u or ve nan saa ku la ka i hemba taver ve u lun a ishimaverenkeghen ye. Kera ga kpa, kwagh ugen u una na se ban a ishimaverenkeghen kpishi er ku nahan ngu je kpa? Ka se shi tagher a akaa a aa fatyô u van se a ku yô. Se fatyô u palegh ambaakaa la, nahan tsan kpishi, kpa se fatyô u been a ku ga. Sha nahan yô, kwagh u Bibilo i kaa ér ku ka “Orhyom u a va mase timin kera” la ka vough.—1 Mbakorinte 15:26.

Nahan, shighe u se tagher ishigh a ku, shin ku u er se yô, se er nan ve se lu a ishimaverenkeghene? Ivur Bibilo i i yer ku ér orihyom u masetyô la shi kaa ér, ‘a va tim’ orihyom ne kera. Yange tese acin imôngo ér una fatyô u eren kwagh ne, sha ci u yange nder ior shin ku. Bibilo ôr kwagh u iorov utaankarunyiin mba Aôndo yange nder ve shin ku sha ashighe kposo kposo yô. Kwagh ne tese ér Yehova Aôndo ngu a tahav hemba ku ica je.

U hemban kpiligh iyol yô, Yehova yange na Wan na Yesu tahav ér a nder Lasaru shin ku; Lasaru lu ijende i Yesu shi doo Yesu ishima kpishi. Man Lasaru kpe ayange kar anyiin. Kpa Yesu nder ijende na ne, lu ken myer ga, kpa lu ken igbar, sha ashe a ikpelaior.—Yohane 11:38-48, 53; 12:9, 10.

Alaghga u pine wer, ‘Ityôkyaa i yange i nder ior shin ku yô lu nyi? Yange i nder ve nahan, ve tsa ve bee iyol, shi ve hide ve kpe gaa?’ Yange ve kpe. Nahan kpa, kwagh u ior mba Bibilo i kaa ér yange i nder ve shin ku mimi, er Lasaru nahan la cii na yô, kera sar se a sar tseegh u ior asev mba ve kpe la ve hide ve lu uma ga; kpa se mba a ityôkyaa i nan jighjigh ser vea va hide a lu uma. Inja na yô, se mba a ishimaverenkeghen i mimi.

Yesu yange kaa ér: “Mo m ngu mnder u shin ku man uma.” (Yohane 11:25) Ka un Yehova una va na un tahav una nder ior shin ku sha tar cii ye. Yesu kaa ér: “Shighe ngu van u mba ve lu shin iwar cii vea ungwa imo na [Kristu] vea due yô.” (Yohane 5:28, 29) Sha nahan yô, ior mba ve lu yaven shin iwar cii, ka u a va nder ve vea lu uma, shighe u tar ua hingir paradiso la.

Profeti Yesaia yange ôr kwagh u mnder u shin ku ne sha gbenda ne nahan, ér: “Mbakpenev Ou vea lu uma; akom a am kpaa aa nder. Nder nen, wa nen icam, ne mba ne tem shin vuulevu; gadia avure a Ou ka avure a iwanger je, man tar kpaa ua due a ujijingi mba mbakpenev.”—Yesaia 26:19.

Ityendezwa ne sur se ishima gaa? Mbakpenev mba ken mlu u cuku tsô kpa kwagh a nzughul Aôndo sha kwagh ve ga yô, er kwase u nan lu yav ka nan nenge ér kwagh nzughul sha wan u ken uya ga nahan. Jighilii yô, mba ve lu yaven shin ku la cii Aôndo u Hemban Agee Cii la ngu umbur kwagh ve vough er mba her uma nahan. (Luka 20:37, 38) Nahan ica ia gba ga tsô a nder ve vea hide a lu uma, vea nyôr ken tar u he, u ior vea lu ker saan saan, shi a ngohol ve, er ka a mar wan ve nan doo mbamaren mba nan ishima shi i saan ve iyol nahan! Sha nahan yô, shighe u se tagher a ku shin or wase nan saa ku je kpa, se fatyô u lun a ishimaverenkeghen.

Er Ishimaverenkeghen ia Wase U La

Apostoli Paulu pase er aluer se mba a ishimaverenkeghen ve kwagh la una wase se kpishi yô. A kaa ér ishimaverenkeghen ngi er ka idyerutya nahan, u tesen er i lu kwagh u vesen ken akaa a uitya a kuran or yô. (1 Mbatesalonika 5:8) Er nan ve a tôô ishimaverenkeghen a kar sha idyerutya? Sha ayange i ngeren Bibilo la, yange a zaan ityav yô, hanma orshoja nan cir idyer i iyôgh, kpa nan vande cirin idyer i i tume sha ikyondo i civir shin ikyôvor ki inyamegh yô, maa nan tôô idyer i iyôgh la nan cir sha mi. Er nan cir idyer i iyôgh yô, mbaihyomov ve fatyô u vihin nan iyol sha ityou ga. Nahan lu nyi jighilii Paulu lu ôrono? Er idyer i iyôgh la yange i kura ityough ki orshoja nahan, kape ishimaverenkeghen ka i kura mhen u or, shin gbenda u se henen kwagh la je la. Aluer u ngu a ishimaverenkeghen sha akaa a Aôndo a we ishima u eren la taveraa yô, shighe u u lu yan ican je kpa, ishima ia nyian we shin u tôô wer kwagh hemba u ga, nahan u za hemen u lun a bem ken ishima. Ka an wase je nan soo u lun a imba idyer la ga sha wono?

Paulu shi tese ikyav igen vighe vighe, er ishimaverenkeghen i zua vea awashima u Aôndo yô. A nger ér: “Se mba a ishimaverenkeghen ne inja er ka imandetso i sha ci u uma wase nahan, ka i̱ wase se u tilen dông a akperan a tan shio.” (Mbaheberu 6:19) Er tso ur a Paulu kwa môm tseegh ga yô, Paulu fa dedoo er imandetso i lu a iwasen kpishi yô. Ahumbe yange aa nguren moughon a agôndo a mnger tan sha tsô yô, mbanahan tsô ve shir a imandetso shin mnger zan zan, ia za hangen shin tareghnyaagh yô, tso maa a tile ijiir i môm, ijeverahumbe la i kera fatyô u daase a na yemen a mi sha kpetar, ape una za ta sha avande maa una hembe la ga.

Er imandetso ka i kôr tso a tile jigh jigh nahan, kape aluer se mba a ishimaverenkeghen sha akaa a Aôndo a tende zwa u eren sha ci wase la “dông a akperan a tan shio” ve, se fatyô u wan ishima shi waren shighe u ican i te sha a vese taveraa, er ka ijeverahumbe nahan je la. Yehova tôndo zwa ér ica ia gba ga tsô uumace cii vea kera tagher a ityav mbi nôngon ga, kua ifer man ijungwen kpaa ga, shin ku je kpaa ga. (Nenge ngeren u kiriki u a lu sha peeji 10 la.) Aluer se mba a ishimaverenkeghen taveraa ser a va lu nahan ken hemen yô, kwagh la una wase se u waren kwaghtseren; se zua a agee a i gbe u se lu a mi ve se fatyô u kuran atindi a Aôndo, geman palegh dang u eren, ka idya shin ijimba i ior kpishi ve eren sha tar nyian la je la.

We kpa gba u u er kwagh sha ishimaverenkeghen i Yehova a ne se la. A soo ér mlu wou a lu er yange un gba or ér nana lu la nahan vough. Sar un u “i̱ yima ior cii.” A yima ior nena? Hiihii yô, gba u hanma or nana “zua a mfe u mimi u vough la.” (1 Timoteu 2:4) Mba ve gberen magazin ne la mba kaan a we ér we u nôngo u zua a mfe u nan uma u tsôron, u a lu mimi u Mkaanem ma Aôndo la. U er nahan yô, Aôndo una na u ishimaverenkeghen i i hembe hanma ishimaverenkeghen i u zua a mi ken tar ne cii yô.

Aluer u ngu ishimaverenkeghen i Aôndo a ne la yô, mayange u kera nenge wer kwagh hemba u ga, sha ci u Aôndo una na u agee a i gbe u u lu a mi ve u fatyô u eren hanma kwagh u u tsua u eren sha ishima i Aôndo cii. (2 Mbakorinte 4:7; Mbafilipi 4:13) Ka imba ishimaverenkeghen i u soo la gaa? Nahan aluer u soo u lun a ishimaverenkeghen, shi u ngu keren u lun a ishimaverenkeghen yô, taver ishima. Ishimaverenkeghen ngi. U fatyô u zuan a mi!

[Ngeren u kiriki/Foto]

Atôakyaa a nan se Ishimaverenkeghen

Avur a Bibilo ne ôr akaa a seer nan we ishimaverenkeghen:

◼ Aôndo tôndo zwa ér ken hemen a va saan we iyol.

Mkaanem ma Aôndo kaa ér tar cii ua va hingir paradiso, nahan a saan tsombor u uumace mba vea lu ker la cii iyol, shi vea lu ken mzough.—Pasalmi 37:11, 29; Yesaia 25:8; Mpase 21:3, 4.

◼ Aôndo eren aie ga.

Hanma aie cii Aôndo kôr un ihyom. Yehova ka icighan Aôndo shi ngu wang a ikighir shio, nahan una er aie ga.—Anzaakaa 6:16-19; Yesaia 6:2, 3; Titu 1:2; Mbaheberu 6:18.

◼ Tahav mbu a Aôndo mbu a ikighir ga.

Ka Yehova tswen a hemba agee sha won cii ye. Sha man tar cii, kwagh môm una fatyô u yangen un u eren akaa a a tôndo zwa u eren la ga.—Ekesodu 15:11; Yesaia 40:25, 26.

◼ Aôndo soo ér we u lu uma gbem sha won.

—Yohane 3:16; 1 Timoteu 2:3, 4.

◼ Aôndo nengen se ér kwagh hemba se ga.

Kwagh gbe Aôndo sha mbamshi asev shin mlu wase u yinan la ga, hembe veren ishima sha aeren a dedoo a se lu a mi la, kua akaa a dedoo a se nôngon se eren la. (Pasalmi 103:12-14; 130:3; Mbaheberu 6:10) A ver ishima ér se eren kwagh u vough, shi ka sea eren nahan yô, i saan un iyol.—Anzaakaa 27:11.

◼ Aôndo tôndo zwa ér una wase u u eren akaa a u tsua wer u er sha u kuren awashima na la.

Mayange je ityôkyaa ngi i mbacivir Aôndo vea nenge ér kwagh hemba ve ga. Aôndo ka a na se icighan jijingi, ua lu tahav mbu hemban sha won cii la, ér a wase se.—Mbafilipi 4:13.

◼ Ishimaverenkeghen i Aôndo a nan se la ka i bunden ga.

Aôndo ka u mimi, shi a kuma u se suur sha a na, mayange una er a we dang ga.—Pasalmi 25:3.

[Foto]

Er idyerutya ka i kura ityough ki orshoja nahan, kape ishimaverenkeghen ka i kura mhen u or je la

[Foto]

Aluer u ngu a ishimaverenkeghen taveraa yô, ican ia ta sha a we nan nan kpa u tenger ga, er imandetso ka i kôr tso a tile jigh jigh hen shighe u ijeverahumbe nahan

[Ngeren mba pasen orngeren]

I zua a foto ne sha ikyav i René Seindal/Su concessione del Museo Archeologico Regionale A. Salinas di Palermo