Fa akaa a u vande eren yô. Bibilo wa se kwagh ér, se ‘fa akaa a a hembe lun a inja la.’ (Mbafilipi 1:10) Nôngo nger akaa a a hembe lun a inja la shin a lu torough torough la shin inya, shi umbur wer kwagh u a lu u hange hange la una fatyô u lun torough torough ga. Ikyav i tesen yô, er u yamen kwaghyan nahan. Shi alaghga kwagh u u nenge wer ngu torough torough er u kôron ma mhii u ma porogeram u sha televishen u ka a doo u kpishi la, una lu hange hange ga.

Hen sha kwagh u ken hemen. Orpasenkwagh 10:10 kaa ér: “Aluer iyôgh kia kpughul man or nana wua zwa u ki ga yô, nana seer u gberen sha agee; kpa kwaghfan ngu a inja sha u nan ér kwagh á kure vough.” Ka nyi se hen ken kwagh nee? Vande wuan ijembe you, inja na yô, vande sôron akaa veren sha er u fatyô u va eren kwagh a shighe wou sha inja yô. De eren akaa a u nenge wer nga hange hange ga la ga, sha er aa vihi u shighe man agee ga yô. Aluer u ngu eren tom man u va bee u shighe shi her yô, u fatyô u za eren tom u u we ishima wer u va er ken hemen la. Aluer u ngu henen sha kwagh u ken hemen yô, u hemba eren tom tsembelee, vough er ortom u fan kwagh, u nan wua ijembe i nan tsembelee nahan.

Eren kwagh akuma akuma. Palegh u eren akaa a a lu a hange hange ga la, shin akaa a cuku a u er kpa aa gema a ya u shighe la. Aluer u ngu eren akaa kpishi shin u wa akaa ave kpishi yô, aa na ishima ia nyian we shin a kera saan we iyol ga.

U wan ahô shin fan kwagh u u tsua ga. Bibilo kaa ér: “Or u nan ver ishima sha ahumbe yô, nana lôô ga; man shi or u nan ver ishima sha abeen kpaa nana sunda ga.” (Orpasenkwagh 11:4) Ka nyi se hen ken kwagh nee? Ahô a wan ka a ya or shighe shi a na nan kera er kwagh tsembelee ga. Orsule u nan lu wan ahô keghen ér saa akaa a va doo yô, nana tsa a lôô shin a sunda iyiav mbi nan ga. Aluer se kpa se saa ser se fa er kper a lu ga yô, se tsa se er kwagh ga. Shin alaghga se nenge ser doo u se kegh, se fa hanma kwagh sha kwagh u se soo u eren la cii ve, se mase tsuan kwagh u se er ye. Jighilii yô, cii ve se tsua akaa a vesen a se er yô, a gba u se tôv sha mi zulee shi se gbidye kwar sha mi. Anzaakaa 14:15 kaa ér, “Orfankwagh yô, ka nan ver ishima sha zende u nan.” Kpa kwagh u a lu yô, akaa kpishi a ka se tsua u eren la, ka se fa kwagh u una va due ker ga.—Orpasenkwagh 11:6.

Saa u er hanma kwagh a mshi shio ga. Yakobu 3:17 kaa ér: “Kwaghfan u a dugh sha [shin hen Aôndo] la, . . . eren kwagh sha mkav.” Jighilii yô, u eren kwagh sha inja ka kwaghbo ga. Kpa ashighe agen, adooga se soo ser se er kwagh a mshi shio, nahan kwagh ne una na yô, se kera fatyô u eren kwagh shon ga shi iyol ia kpe se je kpaa. Ikyav i tesen yô, gba u or u nan lu henen zwa ugen yô, nana fa ér akaa agen yô, nana ôr a lu sha mi ga, ka nahan ve nana hen zwa shon tsembelee ye. Nahan kpa, or u nan soon ér nana er kwagh a lu vough a zayol shio yô, nana lu henen ér aluer nan ôr kwagh kpa a lu sha mi ga, maa a taver nan u henen zwa shon. Nenge er i doo u se hiden a iyol ijime sha hanma kwagh u se eren sha wono! Anzaakaa 11:2 kaa ér: “Kwaghfan ngu hen mbahiden a iyol ijime.” Heela tseegh ga, mba ve eren kwagh akuma akuma shi ve hiden a iyol ijime yô, mba tôôn iyol ve gede gede ga, nahan ashighe agen ka ve er kwagh i hide i hôm ve je kpaa.

Eren tom shi eren akaa a nan we msaanyol. Bibilo kaa ér: “Guda uwegh môm ku ku iv a mmem a ave ahar a a iv a ican kua u zendan ahumbe ityô la.” (Orpasenkwagh 4:6) Mba ve shi sha tom u eren yô, ashighe kpishi ka ve ya tom u “ave [ve] ahar a a iv a ican” la ga. Mba kera lun a ian shin agee kpaa ga. Gema mba ve we hwev di yô, ka ve shi memen a “ave [ve] ahar” nahan ve vihin shighe. Bibilo wa se kwagh u doon kpishi ér, se eren tom kpoghuloo shi se yaan tom u ave ase. Kwagh ne, “ka iyua i Aôndo” a ne yô.—Orpasenkwagh 5:19.

Yaven tsembelee. Orngeren Bibilo ugen yange kaa ér: “Me yav inya, me gba mnyam a ishima i gbar gbar kpaa.” (Pasalmi 4:8) Ka i gba u mbaganden vea yav tugh a kuma ahwa anigheni sha er vea nder a lu ve iyol tsevaa shi a wase ve sha igbenda igen kpaa yô. Ka wea yaven tsembelee yô, u eren kwagh a shighe wou sha inja, sha ci u ka u hemba umbur kwagh shi henen kwagh sha inja. Kpa aluer u ngu yaven sha inja ga yô, a taver we u henen kwagh tsembelee shi kwagh la una na u fatyô u eren aikyôr shi wea er kwagh je, mshi a lu sha mi keng shi u ngôôr vihin ishima kpaa ga.

Tsua akaa a u fatyô u eren yô. Bibilo kaa ér: “Guda u nengen a kwagh sha ashe a u lun a isharen sha akaa wuee la.” (Orpasenkwagh 6:9) Inja i kwagh ne ér nyi? Orfankwagh yô, nan keren ér sar nana zua a akaa a a sar nan la keng keng ga, hemban je yô, shighe u i lu u nana nôngo nan nan kpa, nana zua a akaa shon ga la. Sha nahan yô, ka hanma kwagh u i yôôn ken kasua cii a saren nan ga, shi nan gbe azôr dang dang ga. Kpa kwagh u nan fetyô u zuan a mi la ngu a kuma nan, inja na yô, ka kwagh u nan ‘nengen a mi sha ashe a nan’ je la.

Hen sha aeren a ou. Aeren a ou ka a wase u u fan kwagh u a lu u dedoo man u hange hange man u injaa. Luun er uma wou ka ivaan yô, aeren la ma a wase u u unan ivaan shon. Kape aeren a dedoo ka a wase u u tsuan akaa a a hembe lun hange hange ken uma wou shi eren kwagh a shighe wou sha inja, hanma shighe je la. Ka han u fatyô u zuan a aeren a dedoo laa? Ior kpishi ka ve ker aeren ne ken Bibilo sha ci u ve fa ér ka Bibilo i lu a kwaghfan u hemban cii ye.—Anzaakaa 2:6, 7.

Dooshima a lu ieren you i hemban cii. Mbakolose 3:14 kaa ér, dooshima “ka a zua ior ve lu kangenaa.” Aluer dooshima ngu hen atô wase ga, hemban cii je yô hen tsombor yô, a fatyô u saan se iyol sha mimi ga shi se tema a kpe se iyol kpaa ga. Mba ve venda u lumun a kwagh ne, ve gema ve hemba veren ishima sha u lun mbainyarev shin eren tom yô, a saan ve iyol ga. Ka nahan ve Bibilo i ôr vaa vaa ér dooshima ka ieren i hemban cii i i doo u se lu a mi ye.—1 Mbakorinte 13:1-3; 1 Yohane 4:8.

Ver shighe u henen kwagh u Aôndo. Orgen u i yer un ér Geoff yô, yange lu a kwase u soo un kpishi man mbayev uhar kua azende a dedoo shi eren tom u injaa ken iyouci. Nahan kpa, tom na la yange u na ashighe kpishi a ya ican shi a nôngo u kpen je kpaa. Kwagh la na yô, a pine ér, “Uma ne jim yô, kape i gbe u ma a lu nee?” Maa iyange igen la, ôr ityakeda i i har sha Bibilo i Mbashiada mba Yehova ve gber, nahan zua a mbamlumun mba doon un.

Geoff yange ôr kwase na kua mbayev nav kwagh u lu henen la, nahan ve kpa sar ve u fan kwagh shon. Tsombor ne yange u hii Bibilo i henen, nahan kwagh ne wase ve, ve hemba fan u eren kwagh a shighe ve sha inja. Shi Bibilo i henen wase ve u lun a ishimaverenkeghen i va lun uma gbem sha won shin tar, hen shighe u zayol môm una kera lu ga la.—Mpase 21:3, 4.

Kwagh u Geoff la umbur se mkaanem ma Yesu Kristu yange ôr yô. Yesu yange kaa ér: “Saan mba i sar ve tsung u fan Aôndo la iyol.” (Mateu 5:3) U kegh iyol u veren shighe sha er u seer henen kwagh u Aôndo kpa? Sha mimi yô, saa u henen Mkaanem ma Aôndo ve u hemba fan u eren akaa ayange ayange shin ken uma wou sha inja ye.