JIGHJIGH ngu a tahav kpishi. U tesen ikyav yô, er Satan a soo ér una wua se ken jijingi nahan kpa, jighjigh ka a wase se “u pirin avaan a usu a orbo la” cii. (Ef. 6:16) Aluer se mba a jighjigh yô, se fatyô u wan ishima a mbamzeyol mba ve kehe er ka uwo nahan je kpaa. Yesu yange kaa a mbahenen nav ér: “Aluer nea lu a jighjigh u nan sha inja i ishange i masetadi yô, ma ne kaa a uwo ne ner: Mough heen, hire kaara, kpa ma u mough.” (Mat. 17:20) Er jighjigh una fatyô u wasen se u tilen dông ken jijingi yô, doo u se pine ayol a ase mbampin mban: Ka nyi i lu jighjigh? Kwagh u or lu a mi ken ishima la ngu a bende a jighjigh u nan nena? Se er nan ve se taver jighjigh u nan wase? Man ka an i gbe u se na nan jighjigh?—Rom. 4:3.

Jighjigh u nan hemba di u lumun a kwagh u Bibilo i tese tseegh tsô la, sha ci u ‘ujijingi mba bov je kpaa na jighjigh ér Aôndo ngu, ikyarikyase gem gbidi ve iyol.’ (Yak. 2:19) Nahan jighjigh u nan yô, ka nyi?

Bibilo pase ér jighjigh ngu ker avegher ahar. Hiihii yô, “jighjigh u nan yô, ka u fan kwagh u ishimaverenkeghen yase i lu sha mi la dedoo a akpelan a tan ga.” (Heb. 11:1a) Ka wea lu a jighjigh yô, u lu a vangertiôr wer hanma kwagh u Yehova a ôr cii ka u mimi shi una kure sha mi kpaa. Ikyav i tesen yô, Yehova ngise kaa a Mbaiserael ér: “Aluer nea fatyô u bunden ikyuryan Yam a tetan man a tugh, je er tetan man tugh ve̱ de kera lu sha ashighe a ve ga yô, nahan á fatyô u bunden ikyuryan Yam a Davidi, wanakiriki Wam.” (Yer. 33:20, 21) I lu nahan u yem cian wer yange sev a hungwa a av iyange ia kera due ga shin ia mire ga, nahan tugh mbua de u ilen shi kwagh u sev aven kpaa una bee? Er u lu a akperan sha kwagh u tahav mbu sha gbaaôndo, mbu ka mbu na tar u ningir iyange hanma shighe la ga nahan, doo u u ta akperan wer kwaghôron u Aôndo yô una kanshio u kuren sha mi? Mayange ga cii!—Yes. 55:10, 11; Mat. 5:18.

Sha uhar yô, jighjigh ka “ikyav i akaa a i nengen a mi ga la.” Ivur la kaa ér jighjigh ka “ikyav” shin “ikyav i tesen wang” ér mimi je kwagh u i nenge a mi sha ashe a bong ga la, ngu kpôô kpôô. (Heb. 11:1b) Sha nyi gbenda? Tôô wer wanye u kiriki pine u ér, ‘Er nan u fe wer ahumbe nga kpôô kpôô?’ Er u lu a vande nengen a ahumbe ga nahan kpa, u fatyô u wasen wanye la u gbidyen kwar sha akaa a a tese ér ahumbe nga la keng je; er iôôn kua ahumbe a tan man ambaakaa la nahan. Wanye la nana lumun a akaa a a tese wang ér ahumbe nga ne yô, nana na jighjigh a kwagh u nan nenge a mi sha ashe ga ne. Kape jighjigh u nan kpa i lu vough je la. Ka se na jighjigh a kwagh sha ci u ikyav tese wang ér kwagh shon ngu.—Rom. 1:20.

Er or ka nan na jighjigh sha ci u ikyav tese wang ér kwagh u nan ne jighjigh a mi la ngu yô, ka i gba u nana hii zuan a “mfe u mimi u vough.” (1 Tim. 2:4, NW ) Kpa mfe la tseegh kuma ga. Apostoli Paulu yange nger ér: ‘Ka ken ishima ka i na jighjigh’ ye. (Rom. 10:10) Gba u or a lumun a mimi tseegh ga, saa mimi la una gba nan kwagh. Ka er mimi shon una gba nan kwagh la ve ishima ia mgbegha nan u nan jighjigh ye,  inja na yô, ka u eren ishima i Aôndo je la. (Yak. 2:20) Or u mimi a gbe nan kwagh ga yô, nana nenge a ikyav i tesen wang ér kwagh ngu, kpa nana venda u nan jighjigh a kwagh shon sha ci u akaa a nan vande lun a mi ken ishima la, gayô sha ci u kwagh u nan soo u eren yô. (2 Pet. 3:3, 4; Yuda 18) Ka nahan ve sha ayange a i ngeren Bibilo la ior mbagen nenge a uivande kpa ve na jighjigh ga ye. (Num. 14:11; Yoh. 12:37) Ka or u mimi a doo nan ishima shi nan vende aie la icighan jijingi u Aôndo ka a wase nan u lun a jighjigh ye.—Gal. 5:22; 2 Tes. 2:10, 11.

Tor Davidi lu môm ken ior mba yange ve lu a jighjigh u nan taveraa yô. (Heb. 11:32, 33) Kpa lu hanma or hen tsombor u Davidi nan lu a jighjigh u nan nahan ga. Ikyav i tesen yô, shighe ugen la Eliabi, u lu anmgbian u Davidi u vesen la er kwagh u tese ér a ban a jighjigh yô. Zum u Goliati lu bamen Mbaiserael la, ishima vihi Davidi ker a Goliati. Kpa Eliabi gema lu zôhôn a Davidi sha kwagh ne, nahan kwagh ne tese ér Eliabi na Yehova jighjigh ga. (1 Sam. 17:26-28) Or môm kpa ka maren nan a jighjigh u nan ga, shi or ye dyako u jighjigh hen mbamaren mba nan ga. Nahan Davidi lu a jighjigh na sha ci u ya ikyar a Yehova.

Ken Pasalmi u sha 27 la, Davidi pase akaa a yange wase un u lun a jighjigh u nan taveraa yô. (Ivur 1) Yange a gbidye kwar sha akaa a a er un ken uma la kua sha gbenda u Yehova er kwagh a mbaihyomov nav la kpaa. (Ivur 2, 3) Yange wuese gbenda u Yehova sôr akaa ver ken mcivir Na la. (Ivur 4) Davidi civir Aôndo vea mbajighjigh mbagen ken tabernakel. (Ivur 6) Yange a ker Yehova ken msen. (Ivur 7, 8) Shi Davidi yange soo ér Aôndo a tese un gbenda Na. (Ivur 11) Jighjigh yange lu Davidi kwagh u vesen kpishi je yô, a pine iyol na ér: “Me a lu a jighjigh u nan . . . ga nahan, ma m lu hana?”—Ivur 13, NW.

U fatyô u lun a jighjigh u nan er Davidi nahan aluer u dondo aeren kua akaa a i ter ken Pasalmi 27 la yô. Er ka i gba u saa or a zua a mfe u vough ve nana lu a jighjigh yô, saa u lu henen Mkaanem ma Aôndo kua ityakerada i pasen Bibilo kpoghuloo ve a hemba lun we zange u lun a jighjigh ye. Man ieren ne ka vegher u ityamegh ki icighan jijingi u Aôndo. (Ps. 1:2, 3) Nahan wea henen kwagh yô, tôôn shighe gbidyen kwar sha mi. Aluer u ngu gbidyen kwar sha kwagh u u lu henen la yô, u seer nan Yehova iwuese. Iwuese la di ia mgbegha u u tesen jighjigh wou la sha u civir Yehova ken mbamkombo mba tiônnongo, man sha u pasen mbagen kwagh u ishimaverenkeghen you. (Heb. 10:23-25) Shi ka se tese ser se mba a jighjigh aluer se za hemen “u eren msen zumbee, gban uwer ga” yô. (Luka 18:1-8) Nahan yô, ‘eren msen hen Yehova gbem’ shi na jighjigh wer “ka Un A lu koson” we ye. (1 Tes. 5:17; 1 Pet. 5:7) Jighjigh ka a mgbegha se u eren kwagh u vough, man kwagh u vough u se lu eren la di a gema a seer taver jighjigh wase.—Yak. 2:22.

Hen aikighe u kpernan i wua Yesu la, a kaa a mbahenen nav ér: “Na nen Aôndo jighjigh, Mo kpaa nam nen jighjigh.” (Yoh. 14:1) Nahan ka Yehova tseegh i gbe u se na un jighjigh ga, Yesu kpa gba u se na un jighjigh. Kpa u tese wer u na Yesu jighjigh nena? De se nenge igbenda itiar i se fatyô u eren kwagh ne yô.

Hiihii yô, nenge iyua i ipaan la wer ka iyua i Aôndo a ne u jighilii yô. Apostoli Paulu yange kaa wener: “Ka sha jighjigh u nan ken Wan u Aôndo u m doo Un ishima man A gem A ne iyol Na sha ci wam la, man m lu uma ye.” (Gal. 2:20) Aluer u na Yesu jighjigh yô, u lumun wer mimi je ipaan la ngi sha ci wou, shi ka ipaan la i ne ve i lu u a de u asorabo ye. Shi i na u ngu a ishimaverenkeghen i va zuan a uma u tsôron kpaa. Heela tseegh ga, ipaan la shi ka kwagh u hemban cii u a tese ér u doo Aôndo ishima yô. (Rom. 8:32, 38, 39; Ef. 1:7) Aluer u na jighjigh wer ipaan la ia wase u yô, u kera na iyol you ibo ga.—2 Tes. 2:16, 17.

Sha uhar yô, nagh ku Yesu kura bugh se gbenda u kporom hen Yehova ken msen. Ku na yô, se fatyô u sônon Yehova “vangertiôr sha u sé ngohol mhôônom ma zungwen man shi i̱ rumun se sha mhôôn, i̱ wase se sha shighe vough” yô. (Heb. 4:15, 16; 10:19-22) Msen ka a wase se u seer kangen ishima u palegh imeen.—Luka 22:40.

Sha utar yô, ungwan imo i Yesu. Apostoli Yohane yange nger ér: “U nan ne Wan jighjigh yô, nan ngu a uma u tsôron; kpa u nan hembe Wan ato yô, nana nenge a uma ashe ga, kpa iyugh i Aôndo ngi sha a nan.” (Yoh. 3:36) Fa wer, Yohane yange pase ér, or u nan ne jighjigh ga yô, nan hemba ato. Sha nahan yô, ka u tese wer u na Yesu jighjigh sha u ungwan imo na. Ka u ungwa imo na sha u kuran “tindi u Kristu,” inja na yô, ka u eren hanma kwagh u yange tese shi kaa ér se eren cii. (Gal. 6:2) Shi ka u ungwa imo i Yesu sha u dondon kwaghwan u a we sha ikyev i “wanakiriki u jighjigh man u fan kwagh” la. (Mat. 24:45) Aluer u ngu ungwan imo i Yesu yô, shighe u mbamzeyol mba lun er ahumbeaura nahan ve va te sha we je kpa u zua a agee a tilen dông.—Mat. 7:24, 25.

Kwagen la, orgen genger imo kaa a Yesu ér: “M na jighjigh, wasem sha myina u jighjigh wam u nan ne.” (Mar. 9:24) Orne pande lu a jighjigh u nan, kpa gema fa er i gbe u una seer lun a jighjigh yô. Se kpa ashighe agen a gba u se seer lun a jighjigh er or ne nahan. Shi hanma wase nana fatyô u seer taver jighjigh u nan lu a mi la hegen. Er se hen nahan, jighjigh wase ka a seer taver shighe u se lu henen Mkaanem ma Aôndo shi gbidyen kwar sha mi yô. Kwagh ne di ka a gema a mgbegha se u seer wuese Yehova. Shi jighjigh wase una seer taver aluer se mba civir Yehova vea anmgbianev asev shi se mba pasen mbagen kwagh u ishimaverenkeghen yase la shi eren msen a uwer gban shio yô. Kwagh ugen yô, shighe u se seer taver jighjigh wase yô, ka se zua a injar i hemban cii. Mkaanem ma Aôndo taver se ishima ér: ‘Ne mbadoon mo ishima, maan nen ayol a en ken icighanjighjigh wen u nan, sha er ne luun ken dooshima u Aôndo’ yô.—Yuda 20, 21.