U fatyô u nan mbamlumun sha mbampin mban sha kwagh u i nger ken Iyoukura i 2019 la kpa?

Inja i ityendezwa i Aôndo a er ér: “Hanma ityumugh ki i var sha ci u vihin we iyol, ikôl ia lagh ki ga” la ér nyi? (Yes. 54:17)

Se fatyô u nan jighjigh ser, Yehova una kura se sha akaa a bulan se er “kumetan u uipirambaiorov” la nahan. (Yes. 25:4, 5) Mayange mbaihyomov asev vea fatyô u eren se kwagh u una uve a vese gbem sha won ga.—w19.01, peeji 6-7.

Gbenda u Aôndo er kwagh a ior i Kanaan kua Mbaiserael mba ve hemba un ato la tese er a ôron ijir sha mimi nena?

Yehova yange tsaha ior mba ve nyôr iyol ken aeren a hôngorough a ijimbagh shi ve lu nzughul a kasev kua mbayev la. Kpa gema ver ior mba ve civir un tseegh shi ve eren kwagh a mbagen sha mimi la doo doo.—w19.02, peeji 22-23.

Ka nyi i doo u se er shie u se lu hen ape or u nan lu Orshiada ga nan lu eren msene?

Se fatyô u lun ving shi se er kwagh sha icivir kpaa, kpa se er “amen” ga, shi se kôr ave vea ior mbagen mba ve lu her la ga. Alaghga se tsua u eren msen wase shin ishima.—w19.03, peeji 31.

Ieren i nzughul a mbayev la ka isholibo i vesen i vihin tsung nan je?

Aluer or nzughul a wanye nan yav a nan yô, nan er wanye la isholibo shi nan er tiônnongo isholibo kua gomoti man Aôndo cii. Sha ajiir a gomoti a we tindi ér i za yila ijir shie u i kaa ér or nzughul a wanye yô, mbatamen ka ve dondo tindi ne.—w19.05, peeji 9-10.

U gema shin u sôr mhen wou nena?

Akaa a vesen aa u er yô, ka a je ne: Eren msen hen Yehova. Gbidyen kwar sha er u tôv iyol you yô. Tsuan azende a injaa.—w19.06, peeji 11.

Se wa agoyol hegen sha er se va kôrcio u wan ishima a tôvacan nena?

Gba u se seer taver ikyar i se ye a Yehova la. Fa wer se doo Yehova ishima shi mayange una kende se ga. Ôron Bibilo ayange ayange shi eren msen hanma shie. Lu a vangertiôr wer averen a Tartor u Aôndo la aa bunde ga. Shi kôr avur a Bibilo kua atsam a wuese Aôndo a a hembe doon we la ken ityo.—w19.07, peeji 2-4.

Ka nyi se fatyô u eren sha er se wase ior asev ve wara?

Gba hange hange u mhôônom ma a kôron se a ve, shi se ver ikyav i dedoo, se gba ishima ikyôr shi se eren a ve kundu kundu.—w19.08, peeji 15-17.

Er Yesu tôndo zwa ken Mateu 11:28 nahan, se zua a mmem nena?

Se mba a mbakuran mba se doo ve ishima yô, kua azende a hemban doon cii man tom u hemban cii.—w19.09, peeji 23.

Aôndo una fatyô u nan sha u se̱ lu a isharen kua tahav mbu eren kwagh nena? (Fil. 2:13)

Aluer se mba ôron Mkaanem ma Aôndo shi gbidyen kwar sha ma yô, Aôndo una na se isharen man tahav mbu eren kwagh la. Una na se icighan jijingi na sha er se seer fan kwagh u se vande lun a mkav sha mi yô.—w19.10, peeji 21.

Ka akaa a nyi nahan i gbe u se er cii ve se tsua kwagh u vesene?

Ka akaa ataan a i gbe u se er je ne: Tôv sha kwagh shon tsembelee. Er msen sôn kwaghfan. Gbidye kwar sha atôakyaa a a ne ve u tsough kwagh u u soo u eren la yô. Fa kwagh u ú soo u eren la jighilii. De we kwagh u ganden we ave ga.—w19.11, peeji 27-29.

Ityesen i kwagh ngu ken or u ka nana kpe yô, a due la yange i hii shie u Satan tsugh Ifa laa?

Ikyav tese ér kwagh lu nahan ga cii. Diabolo yange kaa a Ifa ér una kpe ga; yange kaa a na ér una lu inja er a kpe kpa kwagh ugen ken a na una due a za lu ijiir igen ga. Yange i bee a hanma ityesen i aiegh cii kera sha shie u Mngerem ma Deemee la. A shi nan kpa ityesen i kwagh ngu ken or u ka nana kpe ve a due a yem a za lu pe gen la yange i hii cii ve Yehova sambe ior mba ve lu maan gôgôyou u Babel la ye.—w19.12, peeji 15.