Baba wam John Mills yange er batisema ken inyom i 1913, ken geri u New York. Shighe ne lu anyom 25. Lu Anmgbian Russell na kwaghôron u batisema na la ye. Terem eren batisema shighe kar kpuaa yô, a yem ken icile i Trinidad. Ka ker kpaa a za vôso kwase ye; i yilan iti na ér Constance Farmer, lu kwase u tseen ishima kpen kpen, un kpa lu Orhenen Bibilo. Terem yange a wase ijende na William R. Brown tom u tesen ior Photo-Drama of Creation (Foto u Iniumbe i Kwagh u Igbetar) la. Ve er tom ne imôngo zan zan i va kar tindin Brown ken Afrika ken inyom i 1923 la. Terem man ngôm di lu ken Trinidad her. Ve cii yange ve lu a ishimaverenkeghen i yemen Sha.

Mbamaren av yange ve mar se utaankarunyiin, ve na wan u hiihii la iti ér Rutherford, u zuan sha iti i anmgbian u lu pesiden u Watch Tower Bible and Tract Society hen shighe shon la. Ka va maren mo sha iyange i Disemba 30 inyom i 1922 yô, i nam iti ér Woodworth. Lu iti i anmgbian u lu orkengese magazin u The Golden Age (hegen i yer ér Awake!) la, i yilan un ér Clayton J. Woodworth. Mbamaren asev yange ve wa se cii makeranta sha er se zua a ityesen i ka i gba u wanye nana zua a mi hange hange la yô; kpa ve hemban ôron se kwagh u akaa a se er ken mcivir u Yehova yô. Ngôm yange fa u pasen ior Bibilo kpishi, a ôr or kwagh i kôr nan ken ishima keng. Terem yange a soo u ôron se akaa a ken Bibilo kpen kpen, a ôron a tenger iyol cii shi i wanger kpaa.

Iniôngon ve la yange i ume atam a dedoo. Se lu se mbayev mba nomso utaan; se utar ken mba utaan mbara se za makeranta u Gileadi. Anmgbianev asev mba kasev utar di yange ve er pania ken icile i Trinidad man Tobago anyom imôngo. Mbamaren asev yange ve tese se tsembelee shi ve ver se ikyav i dedoo, nahan ve môôr se “ken iyou i TER.” Yange ve shi taver se ishima nahan kwagh la wase se u lun ken iyou i Yehova shi zan ikyura “ken ityembe i sha ishigh ki iyou i Aôndo wase.”—Ps. 92:13.

 Ya wase yange lu ijiir i i kohol u duen kwaghpasen yô. Upania kumban her, man ashighe kpishi ve ôron kwagh u Ormishen ugen u lu marnya u tar u Kanada u yange za ken icile i Trinidad yô, i yilan anmgbian ne ér George Young. Mbamaren asev yange ve shi nan inyigh sha kwagh u anmgbian Brown vea kwase na, er ngise ve eren tom imôngo yô. Shighe ne, i tindi Brown vea kwase na ve lu ken Afrika. Yange mea ungwan akaa ne nahan i doom kpen kpen, nahan maa m hii u pasen kwagh shighe u m lu anyom pue la.

Umagazin asev mba sha ayange la ve lu usu usu, sha ci u ve pon ukwaghaôndo mbaaiev kpôghôô kua mbakpengav mba wan hua man ifer i mbapatii la. Sha nahan yô, ken inyom i 1936 la, mbahemenev mba kwaghaôndo tuur gomna u lu hemen Trinidad la hingir u wan tindi ér ityakerada i Watch Tower cii i de nyer a mi ken tar la ga. Kpa se yer ityakerada i se lu a mi la, shi se za hemen u nan ior zan zan i kar been. Yange se due waaji shi se due kwaghpasen sha akeke, se lu a ikyatakerada i karen ior kua ikpande. Mbagen ken geri u Tunapuna di ve lu a mato u yôôn angwe u Tartor. Yange se pase kwagh zan zan se ar ken agar a icaa hiinii ken icile i Trinidad la. I lu kwagh u saan iyol kpen kpen! Akaa ne cii na yô, m er batisema shighe u m lu anyom 16 la.

Tsombor wase yange u soo akaa a ken jijingi shi akaa a m sember teren la na yô, m soo u va hingir ormishen. Shighe u m va mough m yem ken Aruba ken inyom i 1944 m za kohol Anmgbian Edmund W. Cumming la kpa m lu a isharen la her. Yange se er mkombo u Umbur Ku u Yesu ken inyom i 1945 la, iorov va 10. Ken inyom i i dondo la maa i bugh tiônnongo u hiihii ken icile la.

Shighe kar kpuaa yô, m pase gumkwase ugen kwagh sha ijiir tom yase shighe u ian due yô. I yilan iti i wankwase ne ér Oris Williams. Oris yange a nyiman kwagh kpen kpen, sha er una sue atesen a i hii tesen un iyev je la yô. Kpa ngur henen Bibilo yô, a mase kaven kwagh u Mkaanem ma Aôndo ma tese jim jim la, nahan a er batisema sha iyange i Janawari 5, inyom i 1947 la. Shighe kar yô, se hii ishiôr maa se er ivaa. Yange Oris hii pania ken uwer u Novemba inyom i 1950 la. M lun a Oris yô, uma wam shi seer doon.

Ken inyom i 1955 la, i lôhô se Makeranta u Gileadi. Kwagh la na yô, mo vea Oris se de tom shi se tee ya wase kua akaa ase agen maa se undu icile i Aruba. Yange se lu kelase u Gileadi u sha 27. Se mba been makeranta sha iyange i Julai 29, inyom i 1956 yô, maa i tindi se ken Najeria.

Oris umbur nahan ér: “Jijingi u Yehova ka a wase or u hoghol a mbamtaver mba ken tom mishen. Nomom yange soo u lun ormishen, kpa mo lu isharen yam la ga. Yange hemba saren mo u lun a ya wam shi maren ônov. Kpa m kaven er i lu torough torough u a pase loho u dedoo yô, m gema mhen wam la. Yange se mba been makeranta u Gileadi yô, m wa iyol tsembelee u eren tom mishen. Nahan se za nyôr tso u i yilan ér Queen Mary la, anmgbian Worth Thornton u eren tom shin afishi a Anmgbian Knorr yô, va kaa a vese ér se za dedoo. Shi a kaa a vese ér se lu za eren tom shin Betel. Maa m toghor iyol mer ‘Kpei.’ Kpa ngôôr ga je maa Betel hoghol mo, shi m er ityom kposo kposo shimi. Tom u yange u hemba doon mo cii yô, lu tom u ngohol mbavannya. Kwagh u ior ka a doom, man tom ne yange u na yô, m zua ishigh a anmgbianev mba ken Najeria kpishi. Yange mbagen vea va nyôr yô, ve lu a ihundu iyol shi ve vôr shi imura i kôr ve kua ijen kpaa. Yange i doom u nengen sha ve sha er vea ya kwagh shi a kundu ve iyol yô. Kwagh ne cii lu tom u icivirigh u shiren Yehova, shi u nam msaanyol kpaa.” Sha mimi yô, hanma tom u yange a na se cii, u wase se u vesen ken jijingi.

Kwa ugen la se za iniongo i tsombor wase ken Trinidad ken inyom i 1961 la. Anmgbian Brown ôr se akaa a doon a ve lu zuan a mi ken tom u kwaghpasen ken Afrika yô. Maa mo kpa m ôr kwagh u mvese u tom ken Najeria. Anmgbian Brown kamber mo uwegh iyol maa kaa a terem ér: “Johnny, u za Afrika ga, kpa Woodworth za.” Terem maa kaa ér: “Za hemen Worth! Za hemen!” Ishimataver i ior mba ve civir Yehova ica i gbe, ve lu taver mo la yange i na isharen yam i eren tom u kwaghpasen kpoghuloo la seer taver.

 Ken inyom i 1962 la, shi i za seer tsaase mo ken kelase u sha 37 u Gileadi. Yange i er kelase ne iwer pue. Anmgbian Wilfred Gooch u lu ortamen u nengen sha branci u Najeria la yange za kelase u sha 38 la, maa i tindi un ken tar u Ingila. Maa tom u nengen sha branci u Najeria la hingir u wam. Yange m dondo ikyav i Anmgbian Brown la, nahan m zende sha ajiir kposo kposo ken Najeria, m fa anmgbianev shi ve doom ishima. Anmgbianev mba ken Najeria lu a akaa a ior mba ken ityar igen lu a mi la ga, kpa saan ve iyol. Kwagh la tese je ér saa or a lu a inyaregh shin uyôughyôughmbaakaav ve a saan nan iyol ga. Er ve lu a kwagh ave ga nahan kpa, vea va mkombo yô, ve lu tsembelee shi ve tese icivir kpaa; i doo kpen kpen. Yange vea vaan mbamkohol mba vesen yô, ve kpishi ve va shin ugongulo kua bolekaja * (bolekaja ka mato u ka a lu inja er ka bôôsu nahan, kpa a lu sha ivegher yô). Ashighe kpishi i nger akaa a doon sha bôôsu mban. Ugen la yange i nger ér: “Little drops of water make a mighty ocean.” (Ka aber a mnger a kiriki ka a kohol a hingir zege ityeku ye).

Kwagh la ka mimi tsô. Iniôngon i hanma or yô, ka i wase, se kpa yange se nôngo ci wase. Ken inyom i 1974 la, Najeria hingir tar u hiihii u lun a mbapasenkwagh 100,000 dugh tar u Amerika sha yô. Sha mimi yô, tom la vese!

Er ior kpishi lu van ken mimi la, i lu nôngon di ityav mbi Biafra hang, hii inyom i 1967 zan zan 1970. Anmgbianev asev mba yange ve lu ken vegher u Ifi u Niger u lu sha ikyev i Biafra la yange ve kera fatyô u lamen a afishi a branci ga iwer imôngo. Yange i gba u se za ve a kwaghyan u ken jijingi. Er ashen m ter ken mhii nahan, yange se per ifi la acin imôngo, kpa se er msen tsung shi se suur sha Yehova.

M umbur ijende i cier iyol i yange se za per Ifi u Niger se za yô, vindi vindi. Uma wase yange a lu sha zongo, sha ci u shoja man angev kua akaa agen. U karen ken vegher u shoja i gomoti la kpa yange i yina ga, kpa a va gbaan ken vegher u shoja i Biafra la yô, ashe a hemba nyian cii. Kwa gen la m mough Asaba m per Ifi u Niger tugh m yem Onitsha maa m kar heela m za taver mbatamen ishima shin Enugu. Kwa ugen la di, lu mbatamen mba shin Aba ape i venda ér or môm a de tsaren usu tugh ga la m za taver ve ishima ye. Shin Port Harcourt di, kwa gen la se kure mkombo sha msen kôugh sha ci u shoja i gomoti va hemba shoja i Biafra sha kpe geri la.

Mbamkombo mban lu hange hange sha ci u ve umbur anmgbianev asev ér Yehova ngu a ve, shi ve umbur ve er i gbe u vea wa ave sha ityav mbi nôngon ga yô. Anmgbianev mba ken Najeria yange ve wa ishima gbem ayôôso la kar been. Yange ve doo ayol a ve je dooshima la taver hemba ma ihyom i i kôron or sha ci u mpav u zwa u ngun a u ngura, shi ve lu ken mzough. Lum kwagh u icivirigh kpishi u lun vea ve ken shighe u ican ne!

Ken inyom i 1969 la, Anmgbian Milton G. Henschel lu orikyon u Mkohol u Ityar Ityar u “Peace on Earth” (Bem sha Tar) u i er ken Agirigi u Anumbegh u Yankee ken New York la. Mo di m lu wasen un tom, man m hen akaa kpishi. Kwagh ne er sha shighe vough, sha ci u ken inyom i 1970 la, se er Mkohol u Ityar Ityar u “Men of Goodwill” (Ior Mba i Doo Un a Ve La) la ken Najeria, shin geri u Lagos. Ka sha iveren i Yehova yange i kôrcio u eren mkohol ne ye, sha ci u ityav mbi Biafra bee ica lu a gba ga. Lu kwagh u kpilighyol sha ci u i er un ken ijô 17, shi iorov 121,128 za mkohol ne. Anmgbian Knorr man Henschel kua ior mbagen nyôr igirgi ken tar u Amerika man Ingila va mkohol ne. Ve va nenge er i er ior kpishi batisema yô. Yange iorov 3,775 er batisema! Hii shighe u Pentekosti la va keen, batisema ne lu môm ken batisema mba ingyeghior hemba ngeen yô. Ken uma wam cii, lu shighe u se lu wan agoyol sha mkohol ne la m hemba ngeen a akaa a eren ye. Mbapasenkwagh lu seer a seer iyenge tsô ga, ior va seer hen icin i môm er ka iyiyer nahan!

Ken anyom 30 man kwagh a se er tom ken Najeria la, shighe gen m er tom u ningir sha shi m er tom u ortamen u sôron afishi a branci ken ityar i shin Ityôtar i Afrika. Yange sea za sôr mbamishen a lam a hanma ve shi a taver ve ishima nahan i doo ve kpen kpen! Mo kpa i doom u pasen ve mer i hungur a ve ga! Tom ne tesem ér aluer kwagh u ior gba u ishima yô, u fatyô u wasen ve u zan ikyura, shi kwagh la una na nongo u Yehova ua seer taver shi mzough una lu.

 Lu sha iwasen i Yehova se kôrcio u nôngon a mbamzeyol mba ityav mbira kua angev va se a mi la ye. Hanma shighe yô, se nenge a ikyav i tesen wang ér Yehova ngu veren se. Oris kaa nahan ér:

“Yange se hia iyol acin imôngo. Kwa gen la, mba za nyer a Worth sha iyouci shin Lagos yô, a hume, a kera fa kwagh ga. I kaa a mo ér alaghga una war ga, kpa Aôndo wase yô, yange war! Va nderen, kaven kwagh yô, a pase ortwer u lu nengen sha a na la kwagh u Tartor u Aôndo. Shighe kar yô, mo vea Worth se za sôr ortwer shon sha er se wase un a seer lun a isharen i henen Bibilo yô. I yilan un ér Nwambiwe. Yange va fa mimi, shighe kar yô, hingir ortamen shin Aba. Mo kpa yange m wase ior kpishi u hingir mbacivir Yehova, mbagen ken ve je yô, eren kwaghaôndo u Musulumi kpoghuloo. Yange saan se iyol u fan ior i Najeria shi soon kwagh ve kua ieren ve man aeren a ityôô a ve kua ijô ve.”

Shi m hen kwagh ugen kpaa mer: Cii man se za ikyura ken tom u Yehova u se lu za eren ken tar ugen ne yô, yange gba u se hen u soon anmgbianev mba nomso man mba kasev shin er aeren a ityôô a ve kaha a ase nahan kpaa.

Yange se mba eren tom shin Betel ken Najeria shighe kar yô, ken inyom i 1987 la, i mough a vese i yem a mi ken icile i St. Lucia, ken tiôntar u Caribbean la ér se za lu mbamishen ker. Yange lu kwagh u doon se kpen kpen, nahan kpa se tagher a mbamtaver mbagen. Ken veghertar u Afrika yô, yange or er kasev kpishi, kpa zayol u hen St. Lucia heen yô, nomsoor man kwase ve tsaan imôngo kpa ve er ivaa ga. Er Mkaanem ma Aôndo ma lu a tahav yô, yange ma mgbegha ior kpishi mba se lu henen Bibilo a ve yô, u geman mlu ve sha gbaa ne.

Er anyom ase lu zan yô, agee ase kpa lu panden a pande, nahan ken inyom i 2005 la, Mbahemenev mba Shin Itine maa mough a vese heela yem a vese ken afishi a shin itine ken Brooklyn, ken New York, ken tar u Amerika. Hanma sev yô, ka m sugh Yehova sha kwagh u Oris. Yange ku va tôô un kera ken inyom i 2015 la, man me fatyô u pasen er ku na nyoon mo la jighilii ga. Yange lu ijende yam i hemban cii shi lu kwase u m doo un ishima, un kpa doom ishima kpishi yô. Yange doom ishima ken anyom 68 a se lu imôngo la cii. Kwagh u yange naan se msaanyol ken ivese yase kua ken tiônnongo yô, ka u nan hemen u Aôndo a ver la icivir, den kwaghbo, hiden a iyol ijime shi tesen aeren a ityamegh ki jijingi la.

Yange sea tagher a akaa a van se ahenge shin a nan se iyolkpen yô, se ver ashe hen Yehova ser a wase se sha er mayange se vihi nagh ku se lu nan un la ga yô. Er i ze hemen u nyôôso akaa yô, se nenge akaa kpa nga seer doon a doo sha hanma shighe cii, man kwagh u hemban doon ngu van a va!—Yes. 60:17; 2 Kor. 13:11.

Ken icile i Trinidad man Tobago la, Yehova ver tom u mbamaren av kua mbagenev lu eren la, je yô, ripoti i semberee i ken ijiir la tese ér iorov 9,892 mba ken mcivir u mimi. Ken Aruba kpa mbagenev er tom kpoghuloo u seer taver tiônnongo u hiihii u mo kpa m lu ker la. Atôônanongo nga ken icile la hegen 14. Ken tar u Najeria yô, ingyegh ki mbapasenkwagh seer hingir zegeikpelaior i kuman iyenge 381,398. Ken icile i St. Lucia di, mbapasen kwagh u Tartor u Yehova mba ker 783.

Hegen m hemba anyom 90. Pasalmi 92:14 ôr kwagh u ior mba i môôr ve ken iyou i Yehova nahan ér: “Vea ume atam a iyol i been ve her; vea lu a zar kpishi, shi vea lu gese gese kpaa.” Saan mo iyol kpishi sha tom u m er Yehova ken uma wam la. Er yange m lu a ior mba vian ken jijingi mba taver mo ishima yô, kwagh la wasem u civir Yehova a ishima yam cii. Yehova tesem erdoo na u been mayange ga la, a na yô, ‘kpem iyol ken ityembe i sha ishigh ki iyou i Aôndo wam.’—Ps. 92:13.