1. Gbenda u uumace ve den kwaghbo la ka u taver u kaven ashighe kpishi sha ci u nyi?

 OR KA nana kaa a we ér: “M de u a kwaghbo wou” yô, i pever we iyol kpen kpen. Kpa a hemba pever we iyol shighe u u fe wer u ôr shin u er kwagh u vihin nan yô. Inja i ishember i “M de u a kwaghbo wou” la jim ér nyi? Alaghga or la nan ngu kaan ér ne hide ne mba azende a dedoo. Shin alaghga nan ngu kaan ér nan soo u lamen sha kwagh u a ze hemen la ga, kpa ne kera fatyô u hiden lun kôôsôô er yange ne lu la ga. Sha nahan yô, gbenda u uumace ve den kwaghbo la ka u taver u kaven.

 2. Ruamabera pase gbenda u Yehova a den kwaghbo la nena? (Shi nenge ngeren u shin kpe la kpaa.)

² Gbenda u Yehova a den se uumace mba se yen mban a asorabo la kaha kposo a gbenda u se den mbagenev a asorabo la. Or môm nana fatyô u den or a isholibo er Yehova a den se la ga. Orpasalmi ôr kwagh u Yehova ér: “We u den ior asorabo sha mimi, Sha er kwagh wou una ta ior ihindi iyol yô.” a (Ps. 130:4 NWT.) Yehova “den ior asorabo sha mimi.” A ver ikyav i tesen se inja i u den or kwaghbo sha mimi la. Ken avur agen ken ruamabera u ken zwa Heberu la, mbangeren Bibilo ter asember agen u pasen gbenda u  Yehova a den kwaghbo la, a mayange vea er tom a mi u pasen gbenda u uumace ve den kwaghbo la ga yô.

 3. Gbenda u Yehova a den se a kwaghbo la ngu kposo a u wase sha ci u nyi? (Yesaia 55:6, 7)

³ Yehova ka una de or a isholibo yô, a kough i sha vindi vindi. Ka nan hide nan ya ijende a na kangenaa. Doo se kpishi er Yehova a den se a kwaghbo wuee kwa kimbir kimbir yô.—Ôr Yesaia 55:6, 7.

 4. Yehova wase se u kaven inja i u den or a kwaghbo sha mimi la nena?

⁴ Er gbenda u Yehova a den kwaghbo la u kaha a u wase yô, se er nan ve se uumace mba se yen ne, se fa inja i u den or a kwaghbo sha mimi laa? Yehova tese akav a doon a wasen se u fan er a den se a kwaghbo sha mimi yô. Nahan se lu timen sha akav ne agen ken ngeren ne. Akav ne aa wase se u fan er ka sea gema ishima sha mimi ve Yehova a kough isholibo yase, shi a na se ian i hiden yan ijende a na yô. Er se lu timen sha akav ne la, kwagh la una wase se u seer wuese Ter wase u sha u a den kwaghbo wuee shi a zungwen mhôônom la shi una seer doon se ishima.

YEHOVA KA A TÔÔ ISHOLIBO YASE KERA

 5. Yehova ka una de se a isholibo yô, ka nyi ka i za hemene?

⁵ Ashighe kpishi Bibilo ka i tôô asorabo i kar sha ikyav mbi yuhwan kpishi. Tor Davidi yange ôr kwagh u asorabo a na sha imba gbenda ne. A kaa ér: “Aferakaa am cirim, yisa, a yuhwam a hembam, er ikyav mbi yuhwan yum yô.” (Ps. 38:4) Kpa Yehova den mba ve gema ishima la a asorabo a ve. (Ps. 25:18; 32:5) Ishember i ken zwa Heberu i i gem ér ‘de isholibo’ la, inja na yô ka u “shirin” shin “tôôn” kwagh sha. Yehova ka una de se a kwaghbo yô, a shir se ikyav mbi yuhwan. Nahan i lu inja er se tôô ikyav mbi yuhwan sha avande maa a ngohol mbi hen a vese kera nahan.

 6. Yehova ka a tôô asorabo a ase a ta ica a vese nan je?

⁶ Bibilo shi tese ikyav igen u ôron er Yehova ka a tôô asorabo a ase a ta kera ica a vese yô. Pasalmi 103:12 kaa a vese ér: “Er ica i ityoughkitaregh a ityôtar nahan, kape ngu A pav akaabo ase a vese la.” Ityoughkitaregh gba ica kpishi a ityôtar. Ityoughkitaregh man ityôtar vea zua mayange ga. Inja na yô, Yehova ka a tôô asorabo a ase a ta ica a vese i hemba er se hen la. Kwagh ne wase se u fan ér Yehova ka a de se a asorabo a ase vindi vindi!

 7. Bibilo pase ér Yehova ka una de se a asorabo a ase yô a er nena? (Mika 7:18, 19)

⁷ Er Yehova ka a tôô asorabo a ase a ta ica a vese nahan kpa tese ér ka a hide a umbur asorabo shono? Ei he. Tor Hesekia ôr kwagh u Yehova ér: “U gema asorabo am cii U gbihi ken ijime You.” (Yes. 38:9, 17) Mkaanem man tese ér Yehova ka a tôô asorabo a mba ve gem ishima la a ta ica ape una kera nenge a mi ga yô. Shi a fatyô u geman mkaanem man nahan ér: “U er a [asorabo am] inja er m er a ga yô.” Bibilo shi seer ôron kwagh ne ken takeda u Mika 7:18, 19. (Ôr.) I ôr hen ijiir la ér Yehova ka a haa asorabo a ase shin aiv a zegemnger. Sha ayange a tsuaa la, yange a ta kwagh shin zegemnger yô, i taver kpishi u hiden zuan a mi.

 8. Ka nyi se hila hene?

⁸ Akaa a se hen ne tese wang ér Yehova ka una de se a asorabo a ase yô, a de se a mi vindi vindi sha er ishima ia kera za se iyol ga yô. Man ka vough er Davidi yange  ôr nahan ér, “saan mba i de ve aferakaa a ve, shi i cir asorabo a ve la iyol; saan or u Yehova a umbur isholibo i nan ma shighe môm ga la iyol.” (Rom. 4:7, 8) Ka inja i u den or kwaghbo sha mimi je la!

YEHOVA KA A KOUGH ISHOLIBO YASE KERA

 9. Bibilo wase se u fan er Yehova ka a de se a kwaghbo vindi vindi la nena?

⁹ Nagh ku ipaan kura na yô, Yehova una fatyô u koghun asorabo a mba ve gem ishima la kera. Nenge ase er Bibilo i ôr ér ka a er kwagh ne yô. Yehova ka a kire shi a ôô asorabo a ve ne sha injakwagh. Kwagh ne ka a na yô, or u nan er isholibo la, nan hide nan hingir wang. (Ps. 51:7; Yes. 4:4; Yer. 33:8) Yehova pase kwagh u ka a due ken kwagh ne yô, a kaa ér: “Shin er asorabo a en a nyian bong, nahan kpaa aa kungu er awombo nahan; shin er a nyian er kpagh nahan kpaa aa kungu er mou nahan.” (Yes. 1:18) Ka i taver kpishi u koghun kpagh shin kwagh u nyian bong sha ikyondo. Nahan kpa, Yehova tese ikyav ne u wasen se u fan ér, una kire asorabo a ase vindi vindi je yô a kera fatyô u nengen a a ga.

10. Ka ikyav igen i nyi Yehova shi a tese u wasen se u fan ér un den kwaghbo wuee?

¹⁰ I tôô asorabo a ase i kar sha anzô, er yange se hen ken ngeren u a kar la nahan. (Mat. 6:12; Luka 11:4) Nahan hanma kwa u se er kwagh u vihin Yehova yô, injô yase la ka i kehen i seer a seer. Se mba un a zege injô! Kpa Yehova ka una de se a kwaghbo yô, i lu inja er a de se a injô i se lu un a mi la nahan. Kera kaan ér se kimbi un injô yase shin asorabo a a de se a mi la ga. Er ka a de or a injô ve i pever nan iyol nahan, kape Yehova ka una de se a asorabo a ase ve i pever se iyol je la!

11. Kwagh u Bibilo i kaa ér Aôndo ka a “ese” asorabo a ase kera la, inja na ér nyi? (Aerenakaa 3:19)

¹¹ Yehova den se a anzô shin asorabo a ase tseegh ga; kpa ka a ese a kera. (Ôr Aerenakaa 3:19.) Ikyav i tesen yô, tôô wer or gber kwarkwa sha injô i u lu nan a mi yô. Nahan kpa, a fatyô u nengen a ingyegh inyar i i gber kwarkwa sha mi la her. Kpa u esen kwagh sha yô, kaha kposo. Kwagh u una wase se u kaven inja i ikyav ne yô, ka u umbur inki u yange ior ngeren kwagh a mi sha ayange a tsuaa la. Inki la yange a lu ican ga u koghun sha mnger. Yange or nan mir soso shin mnger nan kough kwagh u i nger yô. Nahan yange a “ese” shin a kough injô sha yô, i kera nenge a mi ga kuaa. Ior ve kera nenge a kwagh u yange i nger hen ijiir shon la ga. Nahan i hingir inja er yange i gba a gba injô la tsô kpaa ga nahan. Doo se kpishi er Yehova ka a de se a asorabo a ase tseegh ga, kpa shi a ese a kera gbindigh gbindigh yô!—Ps. 51:9.

12. Ka nyi se hen ken ikyav i ibeenegh laa?

¹² Yehova tese imba ikyav la u wasen se u fan er ka un de se a asorabo a ase vindi vindi yô. A kaa ér: “[Me] ese atindi a ou a peren kera er irkpiigh nahan, man asorabo a ou kpaa, er ibeenegh yô.” (Yes. 44:22) Yehova ka una de se a asorabo a ase yô, i lu inja er a yer a ken ibeen, ka u un vea vese cii se kera nenge a asorabo shon ga nahan.

13. Yehova ka una de se a asorabo ase yô, i lu se nena?

¹³ Ka nyi se hen ken akav a i tese nee? Aluer Yehova de se a asorabo a ase yô, doo u ishima ia zer nan se ibo ken ayange a uma wase cii ga. Nagh ku ipaan ku Yesu kura na yô, Yehova ka a de se a asorabo a ase gbindigh gbindigh. Ka una de se a  isholibo yô a kough i sha, nahan i lu inja er yange se er isholibo shon tsô kpaa ga nahan. Kape ka sea gema ishima sha mimi ve, Yehova a de se a asorabo a ase je la.

YEHOVA KA A LUMUN ÉR SE HIDE SE LU AZENDE A NA

14. Se fatyô u nan jighjigh ser Yehova una de se a asorabo a ase gbindigh gbindigh sha ci u nyi? (Shi nenge ufoto kpaa.)

¹⁴ Aluer Yehova de se a asorabo a ase yô, se fatyô u lun a vangertiôr ser se hide se lu azende a na. Er Yehova ka a de se a kwaghbo sha mimi yô, ityôkyaa ngi i ishima ia zer nan se ibo ga. Nahan doo u se yem cian ser ishima ngi vihin Yehova a vese her, shin ngu keren gbenda u tsahan se ga. Yehova una er kwagh nahan mayange ga. Aluer Yehova kaa ér un de se a kwaghbo yô, se fatyô u nan un jighjigh sha ci u nyi? Yehova yange kaa a profeti Yeremia ér: “Me de ve ifer ve, asorabo a ve kpaa Me kera seer u umbur a ga.” (Yer. 31:34) Apostoli Paulu yange ter mkaanem man shighe u kaa ér: “Mayange me kera umbur asorabo a ve ga” la. (Heb. 8:12) Kpa inja i mkaanem man jim ér nyi?

15. Kwagh u i kaa ér Yehova una kera umbur asorabo a ase ga la, inja na ér nyi?

¹⁵ Ka a ter ishember i “umbur” la ken Bibilo yô, i ôron kwagh u or henen shin umbur ma kwagh u yange er ken ijime tseegh ga. Kpa shi a fatyô u lun u or eren kwagh. Ormbaiv u yange i mande un ikyua a Yesu la yange zamber a na ér: “Yesu, umbur mo zum u u nyôr ken Tartor wou yô.” (Luka 23:42, 43) Inja na yô lu kaan ér Yesu a er kwagh sha ci na. Yesu yange kaa ér una va nder un shin ku. Sha nahan yô, er Yehova a kaa ér una kera umbur asorabo a ase ga yô, ngu kaan ér un de se a asorabo a ase shi una tsaha se sha ci u a ken hemen kpaa ga.

16. Bibilo tôô se kar sha nyi?

¹⁶ Yehova ka una de se a asorabo a ase yô, ishima kera ze se iyol ga. Bibilo shi wase  se u kaven inja i kwagh ne sha u tesen ikyav igen. Er i kaa ér se mba uumace mba yinan yô, se mba“ikpan i isholibo.” Kpa Yehova ka una de se a asorabo a ase yô, se “kera lu ikpan i isholibo” ga. (Rom. 6:17, 18; Mpa. 1:5) Shighe u Yehova a de se a kwaghbo yô, a fatyô u saan se iyol er kpan u i pase nan nahan.

17. Yehova ka una de se a asorabo yô, a bee se angev sha nyi gbenda? (Yesaia 53:5)

¹⁷ Ôr Yesaia 53:5. Ikyav i masetyô i se lu timen sha mi yô, ka kwagh u Bibilo i kaa ér se mba er ior mba ve gbe bouange nahan la. Nagh ku ipaan ku Yehova a ne sha ikyev i Wan na la na yô, Yehova bee se angev mbu shon. (1 Pet. 2:24) Ka sea er isholibo yô, se vihi mlu wase vea Yehova. Kpa Yehova una fatyô u den se a asorabo a ase, shi se fatyô u hiden yan ijende a na kangenaa sha ci u nagh ku ipaan kura. Yehova ka una de se a asorabo, sea hide sea ya ijende a na yô, i doo se vough er or u i bee nan icôronuange nahan.

ER YEHOVA KA UNA DE SE A ASORABO VE KWAGH LA A WASE SE YÔ

18. Ka nyi se hen ken akav a Bibilo i tese sha gbenda u Yehova a den kwaghbo laa? (Shi nenge ngeren u kiriki u a lu a itinekwagh ér “Gbenda u Yehova a Den Se Kwaghbo La.”)

¹⁸ Ka nyi se hen ken akav a Bibilo i tese sha gbenda u Yehova a den se a kwaghbo laa? Ka una de se a kwaghbo yô, a de se a mi gbindigh gbindigh shi mayange hiden umbur ga. Kwagh ne ka a na se ya ijende kôôsôô a Ter wase u sha la. Shi a umbur se ér, u den or a kwaghbo la ka iyua i Yehova a ne se uumace mbaasorabo sha ci u se doo un ishima shi mhôônom kôr un a vese yô. A na se uumace iyua ne ér gba u una er nahan keng keng ga.—Rom. 3:24.

19. (a) Ka nyi i gbe u se lu a iwuese sha mini? (Mbaroma 4:8) (b) Ka nyi se lu timen sha mi ken ngeren u a dondo laa?

¹⁹ Ôr Mbaroma 4:8. Doo u hanma wase yô, nana wuese Yehova Aôndo er a “den [se a] asorabo sha mimi” yô! (PS. 130:4, NWT.) Kpa cii ve Yehova a de se a asorabo ase yô, gba keng u se er kwagh u vesen ugen u Yesu yange ôr ne. A kaa ér: “Aluer ne de ior akaabo a ve ga yô, Ter wen u sha di kpaa una de ne akaabo a en ga.” (Mat. 6:14, 15) Kwagh ne tese wang ér gba u se dondo ieren i Yehova i den ior a kwaghbo la. Kpa se er kwagh ne nena? Ngeren u a dondo la una tese se er se er kwagh ne yô.