1. Ka ian i nyi Yehova a ne se?

YEHOVA na se ian i tsuan kwagh u se soo la ken uma u wase. Tesen se u tsuan akaa a vough, shi ka sea tsua akaa a a lu sha ishima na yô, a wase se nahan se za ikyura. (Ps. 119:173) Ka sea dondon kwaghfan u ken Mkaanem ma Aôndo la yô, se hemba fan u tsuan akaa sha inja cii.—Heb. 5:14.

2. Zum u se tsough kwagh u se soo u eren yô, ka nyi alaghga shi se tagher a mi?

² Shie u se tsough kwagh u injaa je kpa, alaghga a taver se u eren kwagh shon kuren. Nenge ase akav ne: Anmgbian ugen u a lu gumor yô, tsua ér una ôr Bibilo jimin cii a bee. A hii u eren kwagh ne doo doo je, kpa ukasua mba kar kpuaa yô a de. Anmgbian u kwase ugen tsua ér una va er pania u keke. Kpa shie u a ver u hiin la ka una va kuman yô, shi a yem a mi ken hemen. Mzough u mbatamen tsua ér una nôngo a seer zan imôngo i za sôron anmgbianev mba ken tiônnongo ve, iwer kar imôngo je kpa or er kwagh sha mi ga. Akav a se tese ne nga kwaghmôm ga, kpa a gema a zua sha gbenda ugen. Ken akav ne cii, i kera er kwagh u i tsough u eren la ga. Sha ayange a mbaapostoli la, Mbakristu mba ken Korinte kpa tagher a imba kwagh ne. Nenge ase kwagh u se fatyô u henen hen a ve yô.

3. Yange Mbakorinte tsua ér vea er nyi, kpa lu nyi i ere?

³ Yange Mbakristu mba ken Korinte mban tsua u eren kwagh u injaa ugen er ken inyom i 55 la nahan. Ve ungwa er anmgbianev vev mba ken Yerusalem man Yudia nyôr ken mbamtaver man ican i yan, nahan atôônanongo agen lu kohol inyaregh sha u vea na anmgbianev mbara iwasen yô. Er Mbakorinte mban lu mba wan nagh shi eren erdoo yô, ve tsua ér vea er iyua, ve kpa vea wase anmgbianev mbara. Nahan ve pine apostoli Paulu er vea fatyô u nan iwasen ne yô. Paulu maa tindi tiônnongo la a akaawan a vea fatyô u dondon  yô, shi tsua Titu ér a wase ve u kohol iyua shon. (1 Kor. 16:1; 2 Kor. 8:6) Nahan kpa, iwer ngi kar yô, Paulu mase kaven ér Mbakorinte mban kera er kwagh u ve kaa ér vea er la ga. Sha nahan yô, lu zan inja er vea kera kohol iyua ve la sha shie vough sha er a tôô a yem a mi ken Yerusalem kwaghmôm vea iyua i atôônanongo agen la ga nahan.—2 Kor. 9:4, 5.

4. Er 2 Mbakorinte 8:7, 10, 11 a tese nahan, Paulu yange taver Mbakorinte ishima ér ve er nyi?

⁴ Mbakorinte mban yange ve tsua u eren kwagh u injaa, shi Paulu kpa wuese ve sha jighjigh ve u nan kua isharen i ve lu a mi tsung i nan iyua la. Nahan kpa shi gba u una taver ve ishima ér ve kure kwagh u yange ve hii la. (Ôr 2 Mbakorinte 8:7, 10, 11.) Kwagh u er ve ne tese se ér Mbakristu mba jighjigh kpa ashie agen a taver ve u eren akaa a dedoo a ve tsough u eren yô.

5. Ka mbampin mba nyi se lu zuan a mlumun sha mi?

⁵ Se kpa alaghga a taver se u eren akaa a se tsough u eren la er Mbakorinte mbara nahan. Sha ci u nyi? Sha ci u se yina, nahan alaghga se lu wan a wa ahô. Gayô, kwagh va er aburabur nahan ka u se kera fatyô u eren kwagh u yange se tsua u eren la ga. (Orpa. 9:11; Rom. 7:18) Kpa se er nan ve se hide se time sha kwagh u se tsough u eren la se nenge aluer ka u se sôr kwagh shono? Se er nan ve hanma kwagh u se hii cii se na ishima se er un se kure?

6. Ka hanma shie nahan a gba u se hide se sôr ma kwagh u se tsough u erene?

⁶ Akaa a vesen agen a se tsough yô, kwagh u geman sha mi ngu ga. Ikyav i tesen yô, se tsua ser se civir Yehova, shi se kange ishima ser se eren kwagh a nom shin kwase wase sha mimi; nahan akaa ne cii kwagh u geman sha mi ngu ga. (Mat. 16:24; 19:6) Nahan kpa, se fatyô u hiden sôron akaa agen a se tsough u eren yô. Sha ci u nyi? Sha ci u akaa nga gem. Nahan ka nyi ia wase se u tsuan akaa sha injaa?

7. Ka nyi se fatyô u eren msen sônon, man ka sha ci u nyi?

⁷ Er msen sôn kwaghfan. Yehova yange mgbegha Yakobu nger ér: ‘Aluer kwaghfan yina mô wen yô, nana̱ de gbe uwer u sônon Aôndo ga, gadia un ka a na ior cii mgbeghaa.’ (Yak. 1:5) Se cii “kwaghfan yina” se sha igbenda igen. Nahan zum u ú lu tsuan kwagh u ú er, shin u lu hiden sôron kwagh u ú tsough u eren yô, suur sha Yehova. U er nahan yô, Yehova una wase u ú tsua kwagh sha kwaghfan.

8. Cii man se tsua kwagh u se er yô, ka nyi i doo u se ere?

⁸ Tôv sha kwagh shon tsembelee. Time ken Mkaanem ma Aôndo shi ôr ityakerada i nongo u Yehova u gber la shi lam a ior mba vea fatyô u wan we kwagh u injaa yô. (Anz. 20:18) Doo u ú er kwagh nahan hange hange cii ve u mase tsuan ambaakaa er u musan tom shin moughon yemen hen ijiir igen shin makeranta u i doo u ú hen sha er u eren tom u zuan a kwagh u koson iyol you civir Yehova nahan ye.

9. Aluer se tsua kwagh u se soo u eren la a ishima i môm man sha mimi kpaa yô, kwagh la una wase se nena?

⁹ Gbidye kwar sha atôakyaa a a ne ve u tsough kwagh u u soo u eren la yô. Yehova ka a ver ishima sha awashima shin ityôkyaa i i ne ve se tsough kwagh u se soo u eren la yô. (1 Sam. 16:7) A soo ér se eren hanma kwagh cii sha mimi. Nahan se kpa shie u se tsough ma kwagh u se soo u eren yô, doo u awashima wase u eren kwagh shon la a lu u mimi, shi mba kwagh shon a bende a ve la kpa se er kwagh a ve sha mimi. Aluer mimi je ka awashima wase u eren ma kwagh u se tsough ga yô, alaghga a taver se u eren kwagh shon kuren. Ikyav i tesen yô, alaghga anmgbian u nomso ugen u a lu gumor yô, tsua u eren pania u keke. Kpa ayange nga kar yô, kera ngu fan ityô u nan ahwa a i gbe u una naan la ga, shi tom u pasen kwagh la kpa kera ngu maan un iyol keng ga. Alaghga una hen ér awashima na u eren pania yô, lu u eren kwagh u una doo Yehova yô. Kpa jighilii  yô, alaghga lu sha ci u nôngon ér i doo mbamaren nav shin ma orgen a na.

10. Ka nyi ka i wase or u geman inja?

¹⁰ Hen ase sha kwagh u orgen u i lu henen Bibilo a na man a soo u den taav u man yô. Sha hiihii la, nôngo je kera ma taav ga kuma kasua môm shin uhar nahan. Kpa shie kar yô, a kera fatyô u wan ishima ga, nahan shi a bende. Kpa ken masejime yô, a va kôrcio u den taav kuaa! Er Yehova a doo un ishima shi i sar un tsung u eren kwagh u una na a saan Yehova iyol yô, kwagh la wase un a kôrcio u den ieren la.—Kol. 1:10; 3:23.

11. Er nan ve i gbe u se lu a kwagh u se soo u eren la ken ishima jighilii?

¹¹ Fa kwagh u ú soo u eren la jighilii. Aluer u fa kwagh u u soo u eren la jighilii yô, a hemba lun we ican ga u eren un kuren. Ikyav i tesen yô, alaghga u tsua wer, u ôron Bibilo hanma shie i hemba er u vanden eren la. Kpa aluer u ver shie shin u sôr ian jighilii i eren kwagh ne ga yô, alaghga a taver we u kuren kwagh u u hii la. * Gayô, alaghga mbatamen mba ken tiônnongo ugen tsua ér vea gema zan imôngo i za sôron anmgbianev fele fele. Kpa shie ngur karen yô, ve kera za hemen a kwagh u yange ve tsua ér vea er la ga. Kpa kwagh u ma a wase ve u kuren awashima ve la yô, ka u pinen mbampin er mban nahan: “Se fa anmgbianev mba nomso man mba kasev mba se za sôr ve ve imôngo shon ia wase ve kpishi yôô? Se ver shie jighilii u se za sôr ve kpa?”

12. Alaghga a gba u se er nyi, man ka sha ci u nyi?

¹² De we kwagh u ganden we ave ga. Mô wase môm kpa nan ngu a shie man inyaregh shin agee a eren hanma kwagh u nan soo u eren cii ga. Sha nahan yô, fa kwagh u ú fatyô u eren man u ú fatyô ga yô. Zum u ú tsough kwagh man u nenge wer kwagh shon gande u vanger yô, hide nenge sha mi, nahan sôr. (Orpa. 3:6) Kpa tôô ase wer u hide u nenge sha kwagh u yange u tsua la, shi u sôr kwagh shon maa u nenge wer hegen u fatyô u eren un. Nenge ase akaa ataan a u er ve u fatyô u kuren kwagh u ú hii la yô.

13. U er nan ve u zua a agee a kwagh a gbe u a mi u kuren kwagh u ú tsough u eren laa?

¹³ Er msen sôn agee a eren kwagh shon. Aôndo una fatyô u nan we “tahav mbu eren kwagh” sha er u kure kwagh u ú tsough la yô. (Fil. 2:13) Sha nahan yô, sôn Yehova a na u icighan jijingi na sha er u zua a agee a kwagh a gbe u a mi la yô. Aluer ka inja er ngu a ungwa msen wou la ga kpa, za hemen u sônon her. Yesu yange kaa ér: “Sônon nen her, nahan a na ne [icighan jijingi].”—Luka 11:9, 13.

14. Kwaghwan u a lu ken Anzaakaa 21:5 la, una wase ú u kuren kwagh u ú tsough u eren la nena?

¹⁴ Due a mhen. (Ôr Anzaakaa 21:5.) Nyityôkwagh i u hii u eren cii aluer u soo u eren i kuren yô, gba u ú er mhen. U duen a mhen shon yô, shi dondo un kpaa. Nahan zum u ú tsough kwagh u ú er yô, nger akaa a i gbe u u dondo la vough vough shin inya sha er u kôrcio u eren kwagh shon yô. Aluer u soo u eren ma tom man u pav u ker kpuaa kpuaa yô, kwagh la una wase u u hemba fan mzehemen wou. Paulu yange taver Mbakorinte ishima ér ve veren kwagh sha ci u iyua i yange ve kaa ér vea er la “sha hanma iyange i hiihii ken kasua,” ve de keghen ér vea de zan zan una va man vea hii u kohol inyaregh ki shon ga. (1 Kor. 16:2) Aluer u pav ityom ker kpuaa kpuaa yô, kwagh la una na tom shon ua kera yuhwa u vanger ga.

15. U duen a mhen cii yô, ka nyi igen kpa u fatyô u eren?

¹⁵ Mhen u ú dugh a mi shi u nger un shin inya la una wase u ú hii u eren kwagh u ú tsough la. (1 Kor. 14:40) Ikyav i tesen yô, i kaa a hanma mzough u mbatamen ér a tsua ortamen nana ngeren hanma kwagh u mbatamen ve tsough u  eren cii, kua or u i gbe u nana er kwagh shon yô, kua shie u i gbe u a er kwagh shon a bee la kpaa. Mbatamen mba ve eren kwagh ne yô, ka i hemba lun ve zange u eren kwagh u ve tsough la. (1 Kor. 9:26) We kpa u fatyô u karen imba kwagh ne sha akaa a ou. Ikyav i tesen yô, u fatyô u ngeren akaa a u soo u eren ken iyange yô shin takerada, shi ngeren a sha adondo a dondo zan zan u kar been. Kwagh ne una wase u u eren kwagh u u tsough la been, shi u bee un sha shie kpaa.

16. Cii ve u er kwagh u ú tsough la u kure yô, ka nyi i gbe u ú ere, man Mbaroma 12:11 sue kwagh ne nena?

¹⁶ Nôngo sha afatyô wou cii. Ka i gba u ú nôngo kwagh kpoghuloo cii ve, u fatyô dondon mhen u ú dugh a mi la shi eren kwagh u u tsough la kuren ye. (Ôr Mbaroma 12:11.) Paulu yange kaa a Timoteu ér a “za hemen u veren ishima” shi a “de gbe uwer” u nôngon sha er una hingir ortesen u fan ityesen ga. Se fatyô u dondon kwaghwan u Paulu ne sha hanma kwagh u se soo u eren sha ci u Yehova cii.—1 Tim. 4:13, 16.

17. Kwagh u i nger ken Mbaefese 5:15, 16 la una wase se shie u se lu eren kwagh u se tsough u eren la nena?

¹⁷ Er tom a shie wou sha inja. (Ôr Mbaefese 5:15, 16.) Ver shie u ú er kwagh u ú tsough la yô, shi de va geman shie shon ga. De keghen wer saa shie u akaa aa va hii u zan vough vough la tsô u er ga, sha ci u alaghga u zua a imba shie la sha won ga. (Orpa. 11:4) De lumun wer akaa a hange hange ga la a kar a ya shie u ma u tee u eren akaa a a hembe lun a inja la ga. (Fil. 1:10) Wea fatyô yô, tsua i lu shie u akaa a danen we a lu kpishi ga yô. Pase mbagen ve fa er shie la i lu shie u u soo u veren ishima sha kwagh u ú soo u eren la yô. Aluer gba sha mi yô, pir hanseeti wou. Shi u fatyô u wan ishima, u va bee tsô u mase nengen ilyoho i ior ve tindi u a mi sha Intanet kua ajiir a lamen a ior sha Intanet la. *

18-19. Aluer u tagher a mbamtaver je kpa, ka nyi ia wase u ve u yina ishima u de u eren kwagh u dedoo u ú tsough u eren la ga?

¹⁸ Hemba veren ishima sha kwagh u injaa u una due ken kwagh u ú tsough u eren la. Kwagh u una due ken kwagh u ú tsough u eren la ngu er ka zende u zan nahan. Aluer mimi je u soo u za nyôron ape u lu zan la yô, a gba u ú hide ijime ga. Aluer u za nyôr ape i yisa gbenda je kpa, u hide u goom u yem gbenda ugen sha er u za nyôr ape u lu zan la yô. Kape se kpa i lu je la. Aluer se hemba veren ishima sha kwagh u injaa u una due ken kwagh u se tsough u eren la yô, mbamtaver vea lu nan je kpa, se yina ishima ga.—Gal. 6:9.

¹⁹ U tsuan wer u er kwagh u dedoo ka kwagh u taver. Shi u nôngon wer u er kwagh shon u kure la kpa ka kwagh u zange ga. Kpa sha iwasen i Yehova yô, u fatyô u zuan a kwaghfan man agee a kwagh a gbe u a mi la, sha er u er kwagh u u hii la u kure doo doo yô.