1. Er nan Yehova a kom u se civir un tswene?

YEHOVA kuma u se civir un tswen sha ci u ka un a gbe se shi a ne se uma ye. (Mpa. 4:11) Nahan kpa zayol ugen gema ngu. Zayol shon yô, er Yehova a doo se ishima shi se ne un icivir kpishi nahan kpa, alaghga akaa agen aa fatyô u danen se, nahan a kera lu un tseegh se lu civir ga. Doo u se hen se fa er imbakwagh la ia fatyô u eren yô. Kpa hiihii yô, de se hii timen fan kwagh u a lu u civir Yehova tswen la.

2. Er i pase ken Ekesodu 34:14 nahan, aluer Yehova doo se ishima tsung yô, se er nena?

² Ken Bibilo yô, ka a ôron kwagh u Yehova doo or ishima tsung yô, mba kaan ér nan civir Yehova tswen. Sha nahan yô, gba u se lumun ser mayange ma or shin kwagh ugen a kar a hemba gban se kwagh a Yehova ga.—Ôr Ekesodu 34:14.

3. Se mba gbe civir Yehova ashe ikyusu tsô ga sha ci u nyi?

³ Se mba gbe civir Yehova ashe ikyusu tsô ga. Se ôr nahan sha ci u nyi? Se ôr nahan sha ci u ka akaa a mimi a se hen sha kwagh na la a ne se civir un ye. Aeren a na la doo se ishima tsung. Ka se fa akaa a a doo un la, nahan se kpa a doo se, shi se fa akaa a a doo un ga la, maa se kpa se kôr a ihyom. Se fa kwagh u a we ishima u eren sha ci u uumace yô, shi se sue awashima shon. Shi ka se kwagh u icivirigh kpishi er a ne se ian i kôron ijende a na nahan. (Ps. 25:14) Hanma kwagh u se hen sha kwagh u Or u a gbe se ne yô, ngu a na se seer kporom ikyua a na.—Yak. 4:8.

4. (a) Ka nyi Diabolo ka a er tom a mi sha er una na Yehova a de kera doon se ishima tswen ga? (b) Ka nyi se lu timen sha mi ken ngeren nee?

 ⁴ Tar ne ngu sha ikyev i Diabolo, nahan ngu a er tom a akaa a nga a doo uumace la sha er akaa ne a kar a hingir tamen kwagh ken uma wase, shi i taver se tsung u palegh asaren a bo yô. (Ef. 2:1-3; 1 Yoh. 5:19) Awashima na yô, ka u nôngon ér akaa agen kpa a doo se ishima i de kera lu Yehova tswen ga. De se nenge igbenda ihiar i Diabolo una fatyô u eren kwagh ne yô. Hiihii yô, una mee se ér se yem inyaregh ki zendan man sha uhar yô, una nôngo ér una mgbegha se, se tsua iemberyolough i bo.

5. Er nan i gbe u se wa ikyo sha er inyaregh ki a doo se ishima ga?

⁵ Sha gbaaôndo je, se cii ka se soo ser se lu a kwaghyan i kuma se, shi se lu a akondo a dedoo kua ijiir i tsan i injaa. Nahan kpa gba u se wa ikyo sha er inyaregh kia doo se ishima ga yô. Ior kpishi ken tar u Satan ne ka ior mba “soon inyaregh,” kua akaa a inyaregh kia fatyô u yamen yô. (2 Tim. 3:2) Yesu yange fa je ér mbadondon un kpa alaghga inyaregh kia fatyô u saren ve. A kaa ér: “Or môm nana fatyô u eren mbavesen uhar tom ga; sha ci u nana kôr u môm ihyom, ugen la di una doo nan ishima, gayô nana var a u môm, nana gema a laha ugen la. Ne fatyô u eren Aôndo tom kua Inyaregh ga.” (Mat. 6:24) Or u civir Yehova u nan lu vihin shie kpishi kua agee a nan u nôngon ér nana zua a inyaregh yô, a lu inja er nan ngu nôngon ér nana er mbavesen uhar tom nahan. Yehova una kera doo nan ishima tsung shin nana lu civir un tswen er i doo u ma i lu la ga.

6. Ka nyi se fatyô u henen ken mkaanem ma Yesu ôr a tiônnongo u ken Laodishia laa?

⁶ Sha ayange a mbaapostoli la, mbagen ken tiônnongo u ken gar u Laodishia lu timin akende kaan ér: “M ngu yôughyôugh shi m ngu a  kwagh ave kpishi, kwagh môm banem ga.” Nahan kpa hen ishigh ki Yehova man Yesu yô, ve lu mba ‘kwagh a tser ve, ve kôr kunya, ve kungu ican, ve pir ashe shi ve lu idyelegh’ yô. Yesu wa ve kwagh sha ci u mba a kwagh ave yum ga, kpa lu sha ci u yôughyôugh la doo ve ishima, nahan kwagh la lu vihin mlu ve a Yehova. (Mpa. 3:14-17) Aluer se nenge ser isharen i zendan inyaregh shin yôughyôugh ngi wan amishe ken a vese yô, gba u se er kwagh fese sha u kôôm mhen la. (1 Tim. 6:7, 8) Kpa aluer se er kwagh sha mi ga yô, se hingir asema ahar, nahan Yehova una kera lumun a mcivir wase ga; gadia un ka “u gban iwuhe” shin soon ér i civir un tswen. (Dut. 4:24) Kpa inyaregh ki a fatyô u karen hingir tamen kwagh ken uma wase nena?

7-9. Ka nyi se fatyô u henen ken kwagh u ortamen u i yer iti na ér David laa?

⁷ Nenge ase ikyav sha kwagh u David, ortamen ugen ken tar u Amerika u a eren tom kpoghuloo yô. A kaa wener yange un lu or u eren tom taveraa. I na un poromoshen hen kômpeni u lu eren tom her la, shi i fa un ken tar la wuee je kpaa sha tom u eren la. David kaa ér: “Yange kwagh lun nahan yô, m hen mer akaa a m lu zuan a mi ne ka iveren i Yehova.” Kpa mimi je lu nahana?

⁸ Ica gbe ga yô, David hii u nengen a akaa a tesen ér tom na la ngu vihin mlu na vea Yehova. A kaa wener: “Yange mea za mbamkombo mba tiônnongo shin mea due kwaghpasen kpa, m henen sha mbamzeyol mba sha tom. M lu zuan a inyaregh kpishi, kpa gema lu lun mo hang seer a seer, shi m hii u lun a mbamzeyol vea kwase wam.”

⁹ David mase kaven ér gba u una sôr akaa ken uma na, una fa akaa a i doo u una ver hiihii ken uma na yô. A kaa ér: “Yange m kange ishima m tsua kwagh u me er sha u sôron mlu  wam ne yô.” David maa hide sôr akaa sha kwagh u tom na, maa za pase or u tôô un tom la kwagh u un we ishima u eren yô. Nahan lu nyi i ere? Yange i de David tom! Nahan a er nena? A kaa ér: “Kpernan je maa m wa uwegh shin foom u hiin ishuen pania u eren zan zan a kighir shio.” David vea kwase na hii u eren tom u esen ayou sha er vea zuan a kwagh u kuren mbamgbe vev yô. Shighe kar yô, David maa hii u eren pania u keke, shi ken masejime yô, kwase na kpa kohol un ken tom pania ne. David vea kwase na tsua u eren tom u ior kpishi ve kenger u ashe ashe yô, kpa ka tom ve u lu kwagh u vesen ken uma ve ga. Er ve kera lu zuan a inyaregh er ngise la nahan ga kpa, kwagh u ve lu masen zuan a mi u kuren mbamgbe vev hanma uwer la kuma ve. Ve soo u veren Yehova hiihii ken uma ve, nahan ve mase kaven er Yehova a koson mba ve veren tom u Tartor na hiihii ken uma ve yô.—Mat. 6:31-33.

10. Se kura ishima yase nena?

¹⁰ Aluer se mba a kwagh ave kpishi shin se mba a kwagh ave yum ga kpa, gba u se kuran ishima yase. Se er kwagh ne nena? Mayange inyaregh ki de doon we ishima ga. Shi de lumun wer tom wou u kar u hemba u tom u Yehova ga. Kpa aluer kwagh ngu eren nahan yô, u er nan ve u fa? U fatyô u pinen iyou you mbampin mban: ‘Ka mea lu ken mkombo shin ken kwaghpasen kpa m shi henen sha kwagh u tom u m eren laa? Ishima ka i zer nyian mo sha kwagh u inyar er kper sev a hungwa a av ve a lum yôô? M ngu lun a zayol vea nomom shin kwase wam sha ikyaa i inyar shin akaa a iyolougho? Me fatyô u eren tom u mbagen ve nengen ér ve gande u sha er me hemba zuan a shie u eren Yehova tom kpa?’ (1 Tim. 6:9-12) Zum u se lu henen sha mbampin mban yô, doo u se umbur ser se doo Yehova ishima shi a tôndo zwa a mba ve civir un tswen sha mimi la ér: “Mayange me undu u ga, shi mayange me kende u ga.” Ka nahan ve apostoli Paulu yange nger ér, se ‘de lun ior mba soon inyaregh ga’ ye.—Heb. 13:5, 6.

11. Iemberyolough ia fatyô u eren a or nena?

¹¹ Yehova soo ér se ember uma, man iemberyolough ia fatyô u nan se iember la. Jighilii je yô, Mkaanem ma Aôndo kaa ér: “Kwaghdoon ugen ngu ga, saa u or nana̱ ya kwagh nana̱ ma kwagh man á kpe uma u nan iyol ken tom u nan u sha ican la.” (Orpa. 2:24) Nahan kpa, akaa a nan ior msaanyol a tar ne u samber a mi la aa fatyô u vihin mhen wase. Ka a na yô, ior kpishi ve kera wa ikyo sha aeren a wang ga, shi  akaa a Mkaanem ma Aôndo ma vende la kpa a doo ve ishima.

12. Sha kwagh u 1 Mbakorinte 10:21, 22 a er yô, er nan ve i doo u se her a her tsuan iemberyolough?

¹² Se soo u civir Yehova tseegh. Sha nahan yô, se fatyô u yan kwagh sha “tebul u Yehova” kua sha “tebul u azôv ga.” (Ôr 1 Mbakorinte 10:21, 22.) Ashie kpishi, or ka nana yaan kwagh vea orgen yô, i lu ikyav i tesen ér mba azende. Aluer se tsua iemberyolough i i tese ipila man tsav man ijimba gayô aeren shin asaren a iyolough yô, se lu yan kwagh u mbaihyomov mba Aôndo ve er yô. Kwagh ne una bula se tseegh ga, shi una vihi mlu wase vea Yehova kpaa.

13-14. Sha kwagh u Yakobu 1:14, 15 a er yô, er nan i doo u se wa ikyo sha iemberyolough i se tsuana? Tese ikyav.

¹³ Nenge ase akaa a tesen er iemberyolough i lu er ka kwaghyan u kpôô kpôô ne yô. Shie u se lu yan kwagh yô, ka se lu a tahav mbu tsuan kwagh u se soo ser se wa ken zwa yô. Kpa ka sea menan kwaghyan shon yô, se kera lu a tahav sha gbenda u una er tom ken iyol yase, shin kwagh u una na se ken iyol la ga. Ka a lu kwaghyan u dedoo yô, a wase se ken iyol, kpa ka a lu u bo yô, se gba angev. Alaghga a lu her ave ave je se kav gbenda u kwaghyan la a er se tom ken iyol la ga, kpa shie a karen yô, kwagh ne una due ken igbar.

¹⁴ Kape kwagh u iemberyolough kpa a lu je la. Ka se lu a tahav mbu tsuan iemberyolough i se soo u eren cii sha er se zua a msaanyol yô. Kpa ka sea eren iemberyolough la je se kera lu a tahav sha gbenda u iemberyolough la ia bende a mhen man ishima yase la ga. Ka a lu iemberyolough i injaa yô, i na i kundu se iyol, kpa i i doo ga yô, ka i bula se. (Ôr Yakobu 1:14, 15.) Alaghga a lu her ave ave je se kav er iemberyolough i bo i lu vihin mlu wase ga, kpa shie a karen yô, se va mase kaven kwagh ne wang. Ka nahan ve Bibilo i er kwagh ne sha u tan se icin ye, ér: “I de bumen ne ga: Mba nahan Aôndo tar ga. Kwagh u or nan lôô cii, ka un shi nana sunda ye; gadia or u nan lu lôôn a awashima u sha iyol yô, nana sunda kwagh u hôôn ken iyol i nan.” (Gal. 6:7, 8) Nenge ase i doo u se palegh hanma iemberyolough i i tesen akaa a Yehova a ker a ihyom cii sha wono!—Ps. 97:10.

15. Ka nyi iyua Yehova a ne se sha er i kpe se iyolo?

¹⁵ Ka i doo ior mba Yehova kpishi u nengen uporogeram mba i eren sha ityôgh yasegh ki televishen ki sha Intanet ki JW Broadcasting^® la; uporogeram mban mba lun a acôghor ga. Anmgbian u kwase ugen u i yer un ér Marilyn yô, kaa ér: “Ityôgh ki televishen ki JW Broadcasting la wasem u lun saan saan sha ci u m heren a her u tsuan kwagh u me nenge ga; hanma kwagh u sha mi cii ka u doon. Ka a huan mo shin iyol a kpem yô, m ker ma kwaghôron u taver ishima gayô Mcivir u Pepe m nenge. Kwagh ne ka a wasem u kporom ikyua a Yehova man nongo na. Ityôgh ki televishen ki JW Broadcasting ne gema uma wam kpishi.” We u ngu zuan a mtsera ken iyua i Yehova a ne se ne kpa? Dugh uporogeram mba hev mba ka i duen a mi hanma uwer la sha yô, ityôgh ki televishen ki JW Broadcasting ka ki lu a uporogeram mba ungwan a ungwa man mba nengen kua atsam a taver ishima a u fatyô u ungwan shin nengen shie u u soo cii yô.

16-17. Er nan ve i gbe u se wa ikyo sha shie u ka se tôô u eren iemberyolough laa, man se er kwagh ne nena?

¹⁶ Ka iemberyolough i se tsough u eren la tseegh i gbe u se wa ikyo sha mi ga, gba u se wa ikyo sha shie u se tôôn u eren i la kpaa. Se er nahan ga yô, alaghga shie u se tôô u eren iemberyolough la una hemba shie u ka se tôô u eren Yehova tom la. Ior mbagen kpishi ka i taver ve u wan ikyo sha shie u ka ve tôô u eren  iemberyolough la. Anmgbian u kwase ugen u a lu anyom 18 yô, iti na ér Abigail, a kaa ér: “Ka mea tema aikighe a nengen televishen yô, m mem i doom. Nahan ka mea wa ikyo ga yô, m tôô ahwa imôngo u nengen televishen.” Anmgbian ugen u a lu gumor yô, iti na ér Samuel, a kaa ér: “Ka m nenge uvidio mba lun tiônôô tiônôô kpishi sha Intanet. Ka m nenge zan zan m faan shie u me de ga. Ka m hii sha môm, man cii ve m fa yô, m vihi shighe her i kuma ahwa atar shin anyiin.”

¹⁷ U er nan ve u pande shie u u vihin sha iemberyolough kpishi laa? Kwagh u u hii eren yô, fa shie u ka u tôô u eren iemberyolough la. U fatyô u ngeren shighe la shin inya kasua jimin sha er u kohol u fa yô. Nger ahwa a ka u tôô u nengen televishen shi zan sha Intanet shi gbidyen gyeem sha hanseeti shin tablet wou la. Aluer u nenge wer u ngu vihin shie kpishi yum yô, nôngo sôr akaa sha inja. Hii ngeren shie u u tôô u eren akaa a i gbe u u er hange hange la, maa ver shie u eren iemberyolough. U been yô, sôn Yehova a wase u u eren kwagh u u nger la. Aluer u er nahan yô, u lu a shie man agee a henen Bibilo sha tseeneke wou shi eren mcivir u hen tsombor shi zan mbamkombo shi eren tom u Yehova a ne u, u pasen ior shi tesen ve la. U er nahan yô, alaghga ka keng ishima ia kera na u ibo sha shie u u tôôn u eren iemberyolough la ga.

18-19. Se tese ser Yehova doo se ishima tswen shi ka un tseegh se civir nena?

¹⁸ Apostoli Peteru yange ngur ngeren kwagh u mkur u tar u Satan ne, man tar u he u u sôôn haan angahar la yô, a kaa ér: “Ne mba doon mo ishima, er ne lu keghen akaa ne yô, nôngo nen sha afatyô wen cii sha er ken masejime una va kohol ne ne lu wang a acôghor iyol shio, shi ne lu ken bem vea na yô.” (2 Pet. 3:14) Ka sea dondo kwaghwan shi sea nôngo sha afatyô wase cii ser aeren a ase a lu wang shi sea lu wang ken jijingi yô, se tese ser Yehova doo se ishima tswen shi ka un tseegh se lu civir ye.

¹⁹ Satan man tar na ne vea za hemen u meen se ér se ver akaa agen hiihii ken uma wase, i de lu Yehova ga. (Luka 4:13) Nahan kpa, mayange se lumun ser or môm shin kwagh môm a kar a ngohol ian i Yehova la ken ishima yase ga. Se kange ishima ser se na Yehova kwagh u a kom sha mi la, ka u se soon shi civir un tswen je la!