Shighe u se lu wan iyol i henen kwagh yô, se fatyô u pinen iyol yase ser, ‘Ka nyi m soo u henene?’ Nahan kpa, gba u se umbur ser aluer se tôô ser se hen ma kwagh u he kpa, ngula tese ér ka cii akaa a he a Yehova a soo ér se hen la ga. Nahan se er nan ve se za hemen u henen akaa a he shighe u se lu henen kwagha?

Sôn Yehova a na u kwaghfan. Sôn Yehova a wase u u kav kwagh u u soo u henen hen shighe la yô. (Yak. 1:5) De saan sha kwagh u u vande fan la tseegh ga.—Anz. 3:5, 6.

Na Mkaanem ma Aôndo ian ma hemen we. “Mkaanem ma Aôndo ma uma.” (Heb. 4:12) Hanma shighe u se ôr Bibilo yô, “mkaanem” ma Aôndo ma ma lu uma la ma a fatyô u tesen se kwagh u he u una wase se ken uma wase yô. Kpa saa se lumun ser gba u se hen kwagh u Aôndo a lu tesen se la ve, kwagh a fatyô u lun nahan ye.

Wuese hanma kwagh u Yehova a lu eren tom a mi u tesen se la cii. Kwaghyan u ken jijingi u Yehova a nan se la ngu er “iwer [i] sha akaa a wan ahôm” nahan. (Yes. 25:6) Timen sha akaa a u nenge wer aa doo u u henen ga la kpaa, de palegh a ga. Aluer u er nahan yô, u lu lumun wer Aôndo a wase u u lu or u injaa shi a maa u iyol kpishi u henen kwagh kpaa!