Doo u se hen ser er Yesu hii kwagh u Kwaghyan u Ter u Aikighe la man mbahenen mba 70 mbara lu her ga yô, maa tese ér yange venda ve shin ve undu un ga. Yesu yange soo ér una lu vea mbaapostoli nav tseegh hen shighe la.

Yange lumun a mbahenen mba 12 man mba 70 mbara cii. Yesu yange hii tsuan iorov 12 ken mbahenen mba lu a mi kpishi la maa yila ve ér mbaapostoli. (Luka 6:12-16) Yange lu ken Galilia shighe u “yila Mbapuekaruhar mbara” “tindi ve ér ve za pase loho u dedoo u Tartor u Aôndo shi ve bee ior iangev” la. (Luka 9:1-6) Shighe kar yô, Yesu yem ken Yudia, maa a za “tsua mbahenen mbagenev 70 tindi ve uhar uhar.” (Luka 9:51; 10:1) Nahan Yesu yange lu a mbahenen sha ajiir kposo kposo mba ve pasen kwagh na yô.

Mbayuda mba ve hingir mbahenen mba Yesu mbara yange ve eren iniongo i Paseka la hanma inyom, man a shi nan kpa yange ve er i vea icombor ve. (Eks. 12:6-11, 17-20) Cii ve Yesu a kpe yô, yange za ken Yerusalem vea mba mbaapostoli nav. Kpa yange kaa a mbahenen nav mba ken Yudia man mba ken Galilia kua ken Perea ér ve cii ve va kohol ve ember Paseka a na imôngo ga. Ikyav tese ér Yesu yange soo ér una lu vea mbaapostoli nav tseegh hen shighe la. A kaa a ve ér: “Sarem tsung u yan Paseka ne a ven imôngo cii me mase yan ican ye.”—Luka 22:15.

Yange er kwagh ne lu sha inja je. Lu u ica a gba ga tsô Yesu u a lu “Waniyôngo u Aôndo, u a lu va tôôn asorabo a tar ne kera la” una kpe. (Yoh. 1:29) Man lu u a wua un ken Yerusalem ape i vanden nan Aôndo iniav ica gba cii ve Yesu mase van la. Paseka u Waniyôngo la yange umbur Mbaiserael er Yehova yima ve ken Igipiti yô. Kpa aluer Yesu na nagh ku ipaan kura yô, a hemba wasen ve cii. A paa uumace jimin cii sha ikyev i isholibo man ku! (1 Kor. 5:7, 8) Nagh ku Yesu kura na yô, lu u mbaapostoli mbapuekaruhar mbara vea hingir imagh ki tiônnongo u Kristu. (Ef. 2:20-22) Ka nahan ve i kaa ér, i wa girgar u Yerusalem u a lu icighangar la ‘ityô tav sha, ngu awen 12,’ shi i nger “ati a 12 a mbaapostoli mba 12 mba Waniyôngo mbara sha mi” ye. (Mpa. 21:10-14) Nahan mbaapostoli mbajighjigh mbara lu a ian i vesen i kuren awashima u Aôndo. Sha nahan yô, se fa er i hii ve Yesu soo ér una er Paseka u masetyô la vea mbaapostoli nav, maa una mase yan Kwaghyan u Ter u Aikighe la vea ve ye.

Mbahenen mba 70 mbara man mbahenen mbagenev yange ve ya kwaghyan la vea Yesu imôngo ga. Nahan kpa, lu u mbahenen mba ve tile sha mimi la cii vea zua a iwasen ken Kwaghyan u Ter u Aikighe la. Lu u mbahenen mba Yesu mba vea va hingir Mbakristu mba i shighe ve mkurem la cii vea lu ken ikyuryan i tartor i Yesu ter mbaapostoli nav kwagh sha mi hen tugh mbura la.—Luka 22:29, 30.