SHA igbenda igen yô, mbahenen Bibilo sha mimi mba er ka ior mba keren zenaria nahan. Gba u mbahenen Bibilo mban vea er tom kpoghuloo shi vea za hemen u keren akaainjaa ken Ruamabera ve vea zua a kwaghfan u una wase ve tsung la ye. Er se lu mbahenen Bibilo yô, aluer se tôv se fa igbenda itiar i zuan a zenaria nahan, se hen nyi kere?

Tôô ase wer u ngu zenden hen kpemnger, maa u za nenge a kwagh lu er aniwen u kpuaa nahan, iyange tan sha mi, ngu mondon. Tsô u ngurum u tôô, nahan saan we iyol kpishi er u zough a zenaria u doon tsung yô. A hemba ndahar a ityough ki ashanu, kpa a gema a hemba taver u zuan a mi a daimondi u a hembe doon cii la je kpaa. Jighilii yô, u hide u jinge u nenge aluer avur agen kpa nga yô.

Kape we kpa, yange i lu u shighe u Orshiada u Yehova va hen ya wou, va ôr u loho u ishimaverenkeghen u u lu ken Bibilo la je la, man a tsa kpa iyange la ia hungur we ga. Alaghga u umbur kwagh u doon tsung u ken jijingi u yange u hii zuan a mi la vindi vindi, er ka zenaria nahan. Alaghga lu shighe u u hii nengen a iti i Aôndo i Yehova ken Bibilo la. (Eks. 6:3) Shi adooga lu shighe u u fa wer u fatyô u hingir ijende i Yehova yô. (Yak. 2:23) Her je maa u fa er u zough a kwagh u a hembe doon a zenaria yô! Shi alaghga sar u tsung u seer zuan a akaa a doon tsung a ken jijingi la.

Ashighe agen yô, avur a zenaria ka a kohol a lu shin iagh man uifi. Zenaria ne ka a lu verver. Ken atô u iwer kpuaa tseegh, mbaeren tom u keren zenaria ne kpoghuloo ka ve ker ve zua a mi kpishi je yô, aluer i tee yô, i zua a inyaregh ki kuman udola udubu imôngo.

Shighe u u hii u henen Bibilo vea Orshiada la, alaghga lu u er or u keren zenaria, u nan za tagher a mi shin inya kpishi la nahan. Alaghga er u lu gbidyen kwar sha avur a Bibilo môm môm la, u seer zuan a kwaghfan, nahan kwagh ne na u seer vesen ken jijingi. Er maa u iyol u gbidyen kwar sha mimi u ken Bibilo u doon tsung ne yô, kwagh la na u hen er u seer kporom ikyua a Yehova shi u lu ken dooshima na a ishimaverenkeghen i va lun uma gbem sha won yô.—Yak. 4:8; Yuda 20, 21.

Er or u keren zenaria ka nan ker zenaria u doon tsung u lun verver la nahan, alaghga we kpa u ngu keren akaainjaa a ken jijingi la sha gbashima.  Shighe u u hii fan mimi u hange hange u or ka nan hii fan ken Bibilo la, alaghga kwagh ne mgbegha u u er akaa a a na u tsegha iyol you hen Aôndo shi u er batisema yô.—Mat. 28:19, 20.

Ashighe agen yô, or u keren zenaria ka nan zua a mi ken avande. Avande ne agen ka a lu a zenaria kpishi je yô, i gba u a time a shi a hembe a sha er a zua a zenaria yô. Aluer u nenge a avande la sha hiihii yô, u fatyô u fan wer zenaria ngu ker ga. Sha ci u nyi? Sha ci u vande u u doo shi u hen wer zenaria una lu ker kpishi la je kpa, ka wea hembe u yô, u zua a zenaria ker cuku tseegh tsô! Nahan kpa, hen or u keren zenaria yô, iniôngon i nan i saa nan ishe.

Kape or u nan fe “kwaghôron u hiihii u sha kwagh u Kristu la” kpa, i gbe u nana za hemen u nôngon kwagh sha er nana seer zuan a mkav je la. (Heb. 6:1, 2) Gba u u nôngo kwagh kpoghuloo sha er u zua a akaa a he man a lun we a iwasen ken Bibilo you i henen la yô. Nahan yô, ka nyi u er ve Bibilo i u henen sha tseeneke wou la ia za hemen u lun we a iwasen, shin er u ndera henen Ruamabera anyom imôngo nahan je kpaa?

Za hemen u henen kwagh shi i girim we iyol u eren nahan. Ver ishima zulee sha akaa a kiriki kpaa. Za hemen u nôngon kwagh kpoghuloo, nahan u zua a akaa a doon tsung ken Ruamabera u a lu a kwaghfan u Aôndo kua gbendatesen na ker la. (Rom. 11:33) Wea soo u seer zuan a kwaghfan u Ruamabera yô, er tom a akaa a tôvon sha kwagh a a lu ken zwa wou la. Kundu ishima, tôv fa kwagh u i doo u u er la, shi ker mbamlumun sha mbampin mba u pin sha akaa a ken Bibilo la. Pine mbagenev ve ôr u avur a ruamabera man ngeren asev mba ve wase ve shi ve taver ve ishima la. Ôr mbagenev akaa a doon tsung a u zough a mi ken Bibilo you i henen la.

Jighilii yô, awashima wou ka u henen Bibilo sha er u seer zuan a kwaghfan di tsô ga. Apostoli Paulu yange ta se icin kaa ér, “kwaghfan yô, ne iyolmoron.” (1 Kor. 8:1) Sha nahan yô, nôngo tsung sha er u za hemen u hiden a iyol ijime shi u taver ken jijingi yô. Aluer u ngu eren mcivir u hen tsombor hanma shighe shi u ngu henen Bibilo sha tseeneke wou yô, kwagh la una wase u u dondon akaawan a Yehova ken uma wou, shi una mgbegha u u wasen mbagenev kpaa. Kwagh u hemban cii je yô, u ember kpishi sha ci u u zough a kwagh u a hembe doon a zenaria yô.—Anz. 3:13, 14.