AÔNDO yange mgbegha apostoli Paulu nger kwagh u aeren ataankaranyiin a icighan jijingi ka a na or nan lu a mi la. (Gal. 5:22, 23) Yange kaa ér aeren a doon tsung ne cii kohol ka “ityamegh ki Jijingi.” * Ityamegh ki jijingi kin ka vegher u “orhe” la. (Kol. 3:10) Er ka a nenge sha kon tsembelee ve u ume atam nahan, kape icighan jijingi ka una eren tom gbar gbar ken or ve, nan tese ér nan ngu a ityamegh ki jijingi je la.—Ps. 1:1-3.

Vegher u hiihii u ityamegh ki jijingi u Paulu ter kwagh na la yô, ka dooshima u a lu ieren i doon tsung la. Ieren ne i doo nan je? Paulu yange kaa ér, a dooshima shio yô, un ngu “ma kwagh je ga.” (1 Kor. 13:2) Kpa ka nyi i lu dooshima, man se fatyô u lun a ieren ne shi tesen i hanma iyange nena?

Er i taver kpishi u pasen kwagh u a lu dooshima jighilii la nahan kpa, Bibilo gema pase gbenda u se fatyô u tesen dooshima yô. Ikyav i tesen yô, i kaa a vese ér dooshima “we ishima” shi “lu sar sar.” Heela tseegh ga, ka “saan un iyol a kwagh u mimi,” shi dooshima “we ishima a akaa cii; un ne jighjigh sha akaa cii, lun a ishimaverenkeghen sha akaa cii, taver ishima sha akaa cii.” Shi dooshima wa u soon mbagenev tsung shi tesen ser kwagh ve gba se ishima sha mimi, shi lun a ve kôôsôô kpa ker. Nahan kpa, aluer or ngu a dooshima ga yô, ka nan tese ieren ne sha u gban mbagenev iyuhe shi wan ihyagh shi wan dang shi wan iyol i nan ikyo tseegh shi vihin ishima shi den mbagenev a kwaghbo ve ga. Kpa dooshima u i sar se u lun a mi la yô, ngu a aeren a bo la ga, sha ci u “keren kwagh na iyol na tsô ga.”—1 Kor. 13:4-8.

Bibilo kaa ér “Aôndo ka dooshima je.” Sha kpôô yô, ka Yehova a hembe tesen dooshima cii ye. (1 Yoh. 4:8) Ityom na man aeren a na cii tese ér ngu a dooshima. Dooshima u hemban cii u yange tese uumace yô, lu sha u tindin Yesu ér a va ya ican shi a kpe sha ci wase. Apostoli Yohane kaa ér: “Ka sha kwagh ne man i pasen dooshima u se doo Aôndo ishima la ye, ér Aôndo tindi Wan Na u môm môm shin tar, sha u se̱ lu uma sha a Na. Ka hen ape dooshima a lu ne: ka Aôndo man A doo se ishima ga, kpa ka se, se doo Aôndo ishima ye, man A tindi Wan Na hingir iwom sha asorabo ase.” (1 Yoh. 4:9, 10) Dooshima u Aôndo la na yô, a fatyô u den se a asorabo a ase shi se lu a ishimaverenkeghen shi se zua a uma kpaa.

Yesu yange tese ér uumace doo un ishima, sha u eren ishima i Aôndo. Paulu nger wener: “[Yesu] kaa ér: Nenge, M va, ka sha u eren ishima You. . . . Ka sha awashima ne man i tsegh se kwa môm bee, sha naagh ku i ne sha iyol i Yesu la ye.” (Heb. 10:9, 10) Or môm nana fatyô u tesen dooshima u a hembe ngura ga. Yesu kaa ér: “Or ngu a dooshima u a hembe ngun ga, je u or nana gbihi uma u nan sha ci u akar a nan” ga. (Yoh. 15:13) Se uumace mba se yen ne, se fatyô u tesen dooshima, er Yehova man Yesu ve tese se nahan kpa? Se fatyô yum! De se time ase se nenge nen er se fatyô u eren nahan yô.

Paulu taver se ishima ér: “Lu nen mbakaven Aôndo er ônov mba doon ishima nahan. Man  zenden nen ken dooshima, er Kristu kpaa se doo Un ishima man A na iyol Na sha ci wase nahan.” (Ef. 5:1, 2) Ka sea tesen ieren ne sha hanma gbenda u se eren kwagh ken uma wase la yô, se tese ser se mba ‘zenden ken dooshima.’ Ka se tese imba dooshima ne sha aeren a ase, ka lun sha mkaan tseegh tsô ga. Yohane nger ér: “Mbayev av, dooshima wase a̱ de kera luun sha mkaan shin sha nombor tsô ga, kpa i̱ lu sha ieren man sha mimi kpaa.” (1 Yoh. 3:18) Ikyav i tesen yô, aluer se mba zenden ken dooshima sha ci u Aôndo man mbawanndor a vese yô, kwagh ne una mgbegha se u pasen ve “Loho u Dedoo u tartor” la. (Mat. 24:14; Luka 10:27) Shi ka se zenden ken dooshima sha u tesen ishimawan shi lun sar sar shi den mbagenev a kwaghbo ve. Sha nahan yô, Bibilo wa se kwagh ér: “Er Ter A de ne akaabo nahan, ne kpaa kape eren nen la.”—Kol. 3:13.

Nahan cii kpa, aluer se kôôm mbagenev shin se wa ve kwagh yô, tese ér ve doo se ishima ga ze. Ikyav i tesen yô, ormaren u nan soo u kumbur wan u nan ér a de u vaan la, alaghga nana kure hanma isharen i wan u nan la cii. Kpa ormaren u wan u nan a doo nan ishima sha mimi yô, nana fatyô u tsoghom uwegh a wan u nan shighe u i gbe hange hange u nana er nahan yô. Kape Aôndo kpa i lu je la. Aôndo ka dooshima je, kpa “or u nan doo ter ishima yô, ka nan man A kôôm nan ye.” (Heb. 12:6) Aluer se mba zenden ken dooshima yô, se kpa gba u se na tsaha u vough la, shighe u i gbe hange hange u se er nahan yô. (Anz. 3:11, 12) Nahan cii kpa, aluer se mba eren nahan yô, gba kpee u se umbur ser se kpa se mba mbaasorabo shi ashighe kpishi ka se er akaa a tesen dooshima ga. Nahan se cii se mba a igbenda i se fatyô u seer tesen mbagenev dooshima yô. Se fatyô u eren kwagh ne nena? De se time ase nen sha igbenda itiar.

Kwagh u hiihii yô, sôn Aôndo a na u icighan jijingi na, u ka a wase or nan lu a dooshima la. Yesu yange kaa ér Yehova ne “mba ve sen Un la Icighan Jijingi.” (Luka 11:13) Aluer se sôn Aôndo icighan jijingi na shi se nôngo se mba ‘zenden sha Jijingi’ yô, aeren a ase aa lu hemban tesen ér se mba a dooshima. (Gal. 5:16) Ikyav i tesen yô, aluer u ngu ortamen ken tiônnongo u Kristu yô, u fatyô u sônon Aôndo icighan jijingi na wer a wase u u wan mbagenev kwagh ken Ruamabera, sha gbenda u u tese dooshima yô. Shin aluer u ngu ormaren yô, u fatyô u sônon Aôndo icighan jijingi na wer a wase u u tsahan mbayev ou sha dooshima, i de lu sha ishimavihin ga.

Kwagh u sha uhar yô, hen sha gbenda u Yesu yange tese dooshima, shighe u i vihi un ishima ker la je kpaa yô. (1 Pet. 2:21, 23) Shighe u or hii se shin i er kwagh a vese sha mimi ga yô, alaghga a gba u se hemba henen sha ikyav i Yesu la cii. Shighe u kwagh a lu nahan yô, doo u se pine ayol ase ser, ‘Luun er ka Yesu yô, ma a er nena?’ Anmgbian u kwase u i yer un ér Leigh yô, nenge ér ka una hen sha mpin ne yô, kwagh la a wase un u henen sha kwagh cii man eren ye. A kaa ér: “Shighe ugen la, kwase ugen u se eren tom ijiir i môm yô, tindi ior mbagenev mba se eren tom imôngo la a loho sha Intanet, ôr akaa a vihin sha kwagh wam man tom u yange m eren yô. Kwagh ne vihim pev. Kpa m gema m pine iyol yam mer, ‘Me dondo ikyav i Yesu la sha u eren kwagh a kwase ne nena?’ Yange m henen sha kwagh u luun er ka Yesu ve ma er la yô, m tsua u den ikyaa la, shi i kera lum zegekwagh kpaa ga. Shighe kar yô, m kav mer kwase u se eren tom ijiir i môm ne lu nôngon a angev mbu vesen, nahan ishima lu nyian un tsung. Tsô m kure ikyaa mer adooga yange soo u vihin mo ishima ker sha kwagh u nger la ga. Er m gbidye kwar sha dooshima u Yesu tese shighe u i vihi un ishima ker je kpaa la yô, kwagh la wasem m tese kwase u m eren tom vea na ne imba dooshima la.” Sha mimi yô, aluer se dondo ikyav i Yesu la yô, se tesen mbagenev dooshima hanma shighe cii.

Kwagh u sha utar yô, lu a dooshima u tangen iyol ga, u i fe Mbakristu mba mimi a mi la. (Yoh. 13:34, 35) Ka nahan ve, Ruamabera a taver se ishima ér se lu a “mhen” u Yesu kpa lu a mi la ye. Yesu yange undu usha, maa “gema iyol Na hingir gbilin” kwagh “zan zan ar ken ku” je kpaa, sha ci wase. (Fil. 2:5-8) Aluer se dondo ikyav i Yesu i tesen dooshima u tangen iyol ga la yô, mbamhen man mbamnenge asev vea hemba lun er mba  Kristu la nahan, shi kwagh ne una mgbegha se u hemban wan kwagh u mbagenev ikyo a u wase. Ka averen agen a nyi ka sea lu a dooshima ve se zua a mini?

Ka sea tesen dooshima yô, se zua a averen kpishi. Nenge ase akav a ahar ne?

• MZOUGH U ANMGBIANEV TAR SHA WON CII: Er se doo ayol a ase yô, se fa ser hanma tiônnongo u alaghga se za her, sha tar cii yô, anmgbianev asev mba nomso man mba kasev vea ngohol se ave ahar. Er se doo ‘anmgbianev asev sha won’ cii ishima yô, kwagh ne ka iveren je gande! (1 Pet. 5:9) Ma ijiir igen ngi i or a zua a imba dooshima ne ga, saa hen atô u ior mba Aôndo tseegh.

• BEM: Ka sea ‘kundu asema a ayol a ase sha dooshima’ yô, kwagh ne a na se lu ken “mkange u bem.” (Ef. 4:2, 3) Ka se nenge a bem ne ayol a ase shighe u se ze mbamkombo mba tiônnongo man mbamkohol mba kiriki kua mba vesen la. Ken tar u mpav a lu ker ne, u nenge wer ka kwagh u kpiligh iyol kpishi er se lu ken bem nahan ga he? (Ps. 119:165; Yes. 54:13) Ka sea keren ser bem a lu hen atô wase a mbagenev yô, se mba tesen ser ve doo se ishima tsung, man ka kwagh u doon Ter wase u sha la.—Ps. 133:1-3; Mat. 5:9.

Paulu nger ér: “Dooshima yô, gem maan a maa.” (1 Kor. 8:1) Dooshima ka a er kwagh ne nena? Ken ityough 13 ki washika u hiihii u Paulu nger hen Mbakorinte la, apostoli ne pase er dooshima a maan a maa yô. Kwagh u hiihii yô, dooshima ne keren mtsera u mbagenev. (1 Kor. 10:24; 13:5) Heela tseegh ga, er dooshima a henen sha kwagh u mbagenev shi a tesen ve ikyo i wan shi a we ishima a ve shi a lu sar sar a ve yô, ka a na icombor man atôônanongo cii a lu ken mzough.—Kol. 3:14.

Dooshima u se cii se lu a mi sha Aôndo la ka dooshima u injaa tsung man u hemban maan a maa cii. Imba dooshima ne ka i na ior mba ve dugh sha ajiir wue wue shi kwavyolough ve u kaha shi ve lamen ijô kposo kposo la, ve zua ve civir Yehova saan saan “sha ishima i môm.” (Sef. 3:9) Yô, se kange nen asema ser se tese vegher u doon tsung u ityamegh ki icighan jijingi u Aôndo la ayange ayange.