1. Ka ian i civirigh i nyi se cii se lu a mi?

KA SE kwagh u icivirigh kpishi u lun ken tiônnongo u Yehova! Se mba civir Yehova ken tiônnongo vea anmgbianev asev mba nomso man mba kasev bem bem shi saan se iyol tsung kpaa. Ka nyi tom u lu a mi ken tiônnongo?

2. Ka injakwagh i nyi apostoli Paulu a er tom a mi ken uwashika mba jijingi mgbegha un nger laa?

² Se fatyô u henen kwagh u tom u hanma wase nan lu a mi ken tiônnongo la ken injakwagh i apostoli Paulu yange ôr ken uwashika mba jijingi mgbegha un nger la. Ken uwashika mbara cii, Paulu tôô tiônnongo kar sha iyol i orumace. Shi a kar hanma or u ken tiônnongo sha alegh a iyolough.—Rom. 12:4-8; 1 Kor. 12:12-27; Ef. 4:16.

3. Ka akaa atar a nyi se lu henen ken ngeren nee?

³ Ken ngeren ne, se lu timen sha akaa a vesen atar a se fatyô u henen ken injakwagh i Paulu la yô. Hiihii yô, se hen se fa er hanma wase nan lu a inja * ken tiônnongo u Yehova yô. Sha uhar yô, se hen se fa kwagh u i doo u se er zum u i lu se inja er se gba kwagh ken tiônnongo ga yô. Kwagh u sha utar yô, se hen se fa er i doo u se uve ityough eren tom u Yehova a ne hanma wase ken tiônnongo na yô.

4. Ka nyi Mbaromanu 12:4, 5 a tese se?

⁴ Kwagh u hiihii u se hen ken injakwagh i Paulu la yô, ka u fan tom u vesen u hanma wase nan lu a mi ken tsombor u Yehova la. Paulu yange hii injakwagh na la sha u kaan ér: “Er se lu a alegh a iyolough kpishi ken iyol i môm, kpa alegh ne cii a eren tom môm ken iyol ga nahan, kape se kpa se lu iyol i môm sha ci u se mba ken mzough vea Kristu je la, shin er se ngee nahan kpaa. Kpa se asange asange se mba alegh a iyol i môm.” (Rom. 12:4, 5) Lu nyi jighilii Paulu lu ôron? Paulu lu ôron ér, shin er hanma wase ken tiônnongo nan lu a tom u nan nahan kpa, se cii se mba tiônnongo a inja.

5. Ka “uiyua” mba nyi Yehova a ne se ken tiônnongo?

⁵ Ka wea henen sha kwagh u mba ve lu sha tom ken tiônnongo la yô, ishima i hemba zan we sha mba ve lu hemen la. (1 Tes. 5:12; Heb. 13:17) Ka mimi, Yehova na tiônnongo na “uiyua, ka nomsombaiorov,” sha ikyev i Kristu. (Ef. 4:8) Nomsombaiorov mba ve lu “uiyua” ne, ka Mbahemenev mba Shin Itine man mbawasen Mbahemenev mba Shin Itine tom man mba ken Kômatii u Nengen sha Branci man mbatamen mba sôron atôônanongo man mba ve tesen ken imakeranta i nongo u Yehova man mbatamen mba ken tiônnongo kua mbashiren tiônnongo. Anmgbianev mban cii ka icighan jijingi a tsough ve sha u ve nengen sha iyongo i Yehova shi ve taver mba ken tiônnongo ishima ye.—1 Pet. 5:2, 3.

6. Er i pase ken 1 Mbatesalonika 2:6-8 nahan, anmgbianev mba icighan jijingi a tsough ve la, ka ve nôngo ér vea er nyi?

⁶ Icighan jijingi ngu a tsua anmgbianev mba nomso u eren ityom kposo kposo. Er alegh a iyolough inja er ave man angahar a eren tom sha ci u iwasen i iyol jimin cii nahan, kape anmgbianev mba nomso mba icighan jijingi a tsough ve la kpa ve eren tom kpoghuloo sha ci u iwasen i tiônnongo jimin cii je la. Tativ mba keren icivir ga. Ka ve nôngo sha afatyô ve cii sha er vea maa anmgbianev vev mba nomso man mba kasev shi vea taver ve asema yô. (Ôr 1 Mbatesalonika 2:6-8.) Se sugh Yehova kpishi sha ior mba tangen iyol ga, mba ve civir un sha mimi ne!

7. Ka averen a nyi mba ve eren tom u pasen kwagh hanma shighe la ka ve zua a mi?

⁷ Alaghga a tsua mbagen ken tiônnongo vea lu mbamishen, mbagen di vea lu ikpur pania gayô upania mba keke. Jighilii je yô, anmgbianev mba nomso man mba kasev sha tar na uma ve u eren tom u geman ior hingir mbahenen hegen sha hanma shighe cii. Sha nahan yô, ve wase ior kpishi hingir mbadondon Yesu Kristu. Er anmgbianev mban ka ve lu a kwagh a ve ga nahan kpa, Yehova na ve akaa a dedoo kpishi. (Mar. 10:29, 30) Anmgbianev mba nomso man mbakasev mban doo se ishima tsung, shi doo se kpishi er ve lu ken tiônnongo a vese yô!

8. Er nan ve hanma orpasenkwagh cii nan lu Yehova a inja?

⁸ Nahan ka anmgbianev mba nomso mba i tsough ve la kua mba ve eren tom u pasen kwagh hanma shighe la tseegh ve lu a tom shin iwasen ken tiônnongo yee? Ka nahan ga cii! Hanma orpasen loho u dedoo nan ngu Aôndo a inja shi nan ngu tiônnongo a iwasen. (Rom. 10:15; 1 Kor. 3:6-9) Jighilii yô, tom u vesen u i gbe u tiônnongo una eren yô, ka u za geman ior hingir Mbahenen mba Ter wase Yesu Kristu. (Mat. 28:19, 20; 1 Tim. 2:4) Hanma or ken tiônnongo cii, mba ve er batisema man mba ve lu a er ga kpaa ka ve ver tom ne hiihii ken uma ve.—Mat. 24:14.

9. Er nan ve anmgbianev asev mba kasev mba ken Kristu ve doo se ishima yumu?

⁹ Yehova na anmgbianev mba kasev ian i  icivirigh sha u nan ve tom u vesen ken tiônnongo. Anmgbianev mba kasev mba ve lu civir Yehova sha mimi ne cii ve gba un kwagh tsung. Ka kasev mbayaav man ungô man kasev mba côgholov kua anmgbianev mba kasev mba ve lu kwav la. Bibilo ter kwagh u kasev mbainjaav kpishi mba yange ve eren ishima i Aôndo yô. I wuese ve ér ve ver ikyav i dedoo i kwaghfan man jighjigh kua gbashima man ishimataver, shi ve lu kasev mba nan kwagh wuee shi i ter ve sha ityom i dedoo igen kpaa. (Luka 8:2, 3; Aer. 16:14, 15; Rom. 16:3, 6; Fil. 4:3; Heb. 11:11, 31, 35) Se wuese Yehova kpishi er se lu a kasev Mbakristu mba lun a aeren a dedoo er kasev mba Bibilo i er kwagh ve la nahan ken atôônanongo ase yô!

10. Anmgbianev asev mbabeenyol ve doo se ishima sha ci u nyi?

¹⁰ Yehova na se iveren igen kpaa, se mba a anmgbianev asev mbabeenyol kpishi ken tiônnongo. Atôônanongo agen nga a anmgbianev mba nomso man mba kasev mbabeenyol mba ve lu civir Yehova a uma ve cii yô. Mbabeenyol mbagen yô, fa mimi ne ica ngi a gba ga. Nahan kpa, aluer ve civir Yehova ica gba shin ica ngi a gba ga kpa, alaghga anmgbianev mbabeenyol mban mbagen vea lu nôngon a mbamnyoon ato kposo kposo mba iyolbeen ka i va a mi la. Mbamzeyol mban vea na yô, anmgbianev mban vea kôrcio u eren akaa ken tiônnongo shin ken kwaghpasen kpuaa tseegh. Nahan cii kpa, mbabeenyol mban ka ve er tom u pasen kwagh la er ve fetyô la, shi ve tsaase mbagen shi ve taver ve asema kpaa! Mfe u ve lu a mi la ngu a wase se kpen kpen. Sha mimi yô, ve doo Yehova man se cii ishima kpishi je.—Anz. 16:31.

11-12. Agumaior a ken tiônnongo nga a taver we ishima nena?

¹¹ Hen ase sha kwagh u agumaior ase kpaa. Er ve lu vesen ken tar u u lu sha ikyev i Satan Diabolo shi u iv a mbamhen nav mba bov ne yô, ka ve tagher a mbamtaver kpishi. (1 Yoh. 5:19) Nahan kpa, se cii ka se zua a ishimataver ken mbamlumun mba agumaior ne nga a na ken mbamkombo la, shi ka sea nenge er ve lu pasen kwagh kpoghuloo shi paase akaa a ve ne jighjigh a mi la iyol a mciem shio yô, ishima i  taver se. Nahan ne agumaior, fa nen ner, ne kpa Yehova ver ne sha ian i injaa ken tiônnongo na!—Ps. 8:2.

¹² Nahan cii kpa, anmgbianev asev mbagenev ka i lu ve er mba a inja ken tiônnongo ga nahan. Ka nyi ia wase se u fan sér hanma wase nan ngu tiônnongo a iwasene? De se tôv se fa.

13-14. Er nan ve mbagen ka ve nenge ér mba tiônnongo a inja ga?

¹³ Kwagh u sha uhar u se fatyô u henen ken injakwagh i Paulu la una umbur se zayol u ior kpishi ve lu a mi nyian yô. Ior kpishi ka i taver ve u nan jighjigh ér mba tiônnongo a inja. Nahan kpa Paulu nger ér: “Aluer nguhar kaa ér, ‘Er m lu uwegh ga yô, m ngu ilyeegh ki iyolough ga’ kpa, ngula tese ér ku ilyeegh ki iyolough ga ze. Shi aluer tough kaa ér, ‘Er m lu ishe ga yô, m ngu ilyeegh ki iyolough ga’ kpa, ngula tese ér ku ilyeegh ki iyolough ga ze.” (1 Kor. 12:15, 16) Ka nyi Paulu lu tesen se?

¹⁴ Aluer u ngu tôôn iyol you karen sha ior mbagen ken tiônnongo yô, alaghga u hii u henen wer u gba kwagh ga. Alaghga mbagen ken tiônnongo vea lu mba fan ityesen shin vea fa u sôron akaa vough vough, mbagen di vea fa u surun ior ishima shi taver ve asema. Adooga u nenge wer u ngu a uiyua mban er mbagen ve lu a mi nahan ga. Aluer u ngu a mnenge ne yô, tese ér u hiden a iyol ijime shi u eren kwagh akuma akuma. (Fil. 2:3) Kpa wa ikyo. Aluer hanma shighe u ngu tôôn iyol you karen sha ior mbagen mba ve lu a uiyua mba we u lu a mi ga la yô, kwagh la una na u iyolkpen. Adooga u hii u nengen wer u gba kwagh ken tiônnongo ga, vough er Paulu ôr nahan. Ka nyi ia wase u u hemban mnenge laa?

15. Er i pase ken 1 Mbakorinte 12:4-11 nahan, ka nyi i gbe u se fa sha kwagh u uiyua mba se lu a mi laa?

¹⁵ Nenge ase kwagh ne: Yehova yange na Mbakristu mbagen sha ayange a mbaapostoli la iyua i icighan jijingi, kpa Mbakristu mbara gema zua a uiyua kposo kposo. (Ôr 1 Mbakorinte 12:4-11.) Yehova yange na ve uiyua mban kposo kposo, kpa hanma Orkristu yô, nan lu a iwasen. Nyian ne, i na se iyua i icighan jijingi la sha ivande ga. Nahan kpa, kwaghwan  u a lu shin heen ne ngu sha ci wase kpaa. Se mba a uiyua kwaghmôm ga, kpa se cii se gba kwagh sha ishigh ki Yehova.

16. Ka kwaghwan u apostoli Paulu u nyi i gbe u se dondo?

¹⁶ Doo u tôôn iyol yase karen sha Mbakristu mbagen ga, hemba doon u se dondo kwaghwan u apostoli Paulu ne; a kaa ér: “Hanma or nana tôv sha aeren a nan, nahan nana lu a ityôkyaa i ember sha kwagh u nan iyol i nan tseegh, a lu sha u tôôn iyol i nan karen sha orgen ga.”—Gal. 6:4.

17. Aluer se dondo kwaghwan u Paulu yô, kwagh la una wase se nena?

¹⁷ Aluer se mba dondon kwaghwan u Paulu ne shi tôvon sha ieren yase tsembelee yô, se mase kaven er se kpa se lu a iyua i ior mbagen ve lu a mi ga yô. Ikyav i tesen yô, adooga ortamen nana fa u nan kwaghôron tsembelee ga, kpa alaghga nan fa tom u geman ior hingir mbahenen la tsema tsema. Gayô, adooga nan fa u sôron akaa veren sha inja sha inja er mbatamen mbagen ken tiônnongo nahan ga, kpa nan gema nan fa u eren a ior kundu kundu man sha dooshima, nahan ka taver anmgbianev u zan ikyua a nan ér nana wa ve kwagh ken Mkaanem ma Aôndo ga. Gayô, i fa nan wuee ér nan ngu or u ngohol ior sar sar. (Heb. 13:2, 16) Aluer se fa iyua i se lu a mi yô, ishima ia hemba gban se shimi sha ci u se fa je ser se kpa se mba tiônnongo a iwasen. Kpa ka cii la ga, se kera gba anmgbianev mbagen iyuhwe sha ci u mba a uiyua mba se se lu a mi ga ze.

18. Se er nan ve se seer fan ityesene?

¹⁸ Aluer ka nyi ian je, se lu sha mi ken tiônnongo kpa, gba u se cii se za hemen u seer eren Yehova tom sha gbashima shi seer mfe wase kpaa. Yehova ngu tsaase se sha ikyev i nongo na sha er se za ikyura yô. Ikyav i tesen yô, ka i tese se ken mbamkombo asev mba ken atô u kasua la er se hemba fan u eren tom wase u pasen kwagh la yô. U ngu nôngon kpoghuloo dondon ityesen i i ne se ken mbamkombo mban la kpa?

19. Ka nyi u er ve u kuma u zan Makeranta u Mbapasen Ivangeli i Tartor laa?

¹⁹ Gbenda ugen u doon tsung u i tsaase se yô, ka ken Makeranta u Mbapasen Ivangeli i Tartor. Ka anmgbianev mba nomso man mba kasev mba ve eren tom u pasen kwagh hanma shighe mba ve lu anyom 23 zan zan 65 nahan tseegh ka i lôhô ve makeranta ne ye. Alaghga a lu u inja er u tsa u za makeranta ne ga nahan. Nahan kpa de veren ishima sha atôakyaa a a yange u u zan makeranta shon la ga, hemba veren ishima sha atôakaa a a ne ve u soo u zan u la. Maa hii u eren akaa a a na ve u kuma u zan makeranta shon yô. Sha iwasen i Yehova man tom u u lu eren taveraa la yô, u fatyô u eren kwagh u sha hiihii la lu u inja er u kanshio u eren ne.

20. Ka nyi se fatyô u henen ken Mbaroma 12:6-8?

²⁰ Kwagh u sha utar u se fatyô u henen ken injakwagh i Paulu la ngu ken Mbaroma 12:6-8. (Ôr.) Heen kpa Paulu shi kimbir tesen er mba ken tiônnongo ve lu a uiyua kposo kposo yô. Kpa heen yô, a ôr var var ér, hanma wase nana er tom a iyua i nan lu a mi la u wasen mba ken tiônnongo shi taver ve asema.

21-22. Ka nyi se fatyô, u henen ken kwagh u Robert man Felice laa?

²¹ Nenge ase ikyav i anmgbian ugen u i yer un ér Robert * yô. Yange i tindi un lu za eren tom u Yehova ken tar ugen, kpa shighe karen yô, i kaa na ér a hide a za er tom shin Betel ken tar na. Er yange i pase un ér ka sha ci u a er ma kwaghbo ga nahan kpa, a kaa ér: “Yange ishima zam iyol kpishi je yô, m kera saan ga iwer  imôngo. M lu henen mer adooga tsô m er ma kwagh u doon ga. Ashighe agen yange i lum er m kura ikyav, m due Betel nahan.” Kpa yange hide zua a msaanyol nena? Ortamen ugen kaa a na ér, Yehova ka a tsaase se sha hanma iantom i se vande aren sha mi cii, sha er se hemba lun un a inja hen tom ugen u a va ne se yô. Kwagh la wase Robert mase kaven ér gba u una de u veren ishima sha akaa a a kar ken ijime la; una hii u veren ishima sha kwagh u una fatyô u eren hegen ne yô.

²² Anmgbian ugen kpa yange tagher a imba kwagh ne. Mba yer un ér Felice Episcopo. Yange bee makeranta u Gileadi vea kwase na ken inyom i 1956 la, maa i kaa ér ve za er tom u sôron atôônanongo ken tar u Bolivia. Ken inyom i 1964 la, ve mar wannomso. Felice kaa ér: “Yange vihi se kpishi u undun tom wase u u doo se ishima yum ne. Me ôr sha mimi, yange iyol kpem je kuma inyom jimin. Kpa Yehova wasem, nahan m de u henen sha kwagh la, m hide m ver ishima yam sha u eren tom u ormaren.” We kpa ka i lu er Robert shin Felice nahana? Iyol ka i kpe u sha ci u u kera ngu sha iantom i ngise u lu sha mi la gaa? Aluer ka nahan yô, fa wer aluer u hide u ver ishima you sha kwagh u u fatyô u eren hegen sha ci u Yehova man anmgbianev ou la yô, a hemba saan we iyol. Nahan yô, de teman a tema ga, eren tom a uiyua ou sha u wasen mbagen, nahan a saan we iyol kpishi er u lu maan tiônnongo yô.

23. Ka nyi i gbe u se tôô shighe se ere, man se lu timen sha nyi ken ngeren u dondon nee?

²³ Hanma wase cii nan gba Yehova kwagh. A soo ér se lu ken tsombor na. Aluer se tôô shighe se hen sha kwagh u se er ve se maa anmgbianev asev mba nomso man mba kasev la, shi se nôngo kpoghuloo se er kwagh u i gbe u se er yô, a hemba lun se zange u nengen ser se mba tiônnongo a inja! Nahan kpa hide gbenda u se nengen mbagen ken tiônnongo la di ye? Se tese ser ve doo se ishima shi se mba ne ve icivir nena? Se lu timen sha itinekwagh injaa ne ken ngeren u a dondo la.