1. Ka nyi se er ve a maa se iyol u timen sha akaaôron a profeti a Bibilo?

 ANMGBIAN ugen u a lu gumor yô, iti na ér Ben, a kaa ér: “Ka i doom u timen sha akaaôron a profeti.” We kpa ka i lu u nahana? Shin u nenge wer akaaôron a profeti taver u kavene? Shin ka maan we iyol u timen sha akaaôron a profeti gaa? Kpa aluer u seer fan er hii ve Yehova a ne i nger akaaôron ne ken Bibilo i lu Mkaanem nam la yô, alaghga a hemba maan we iyol u timen sha mi.

2. Ka nyi se lu timen sha mi ken ngeren nee?

² Ken ngeren ne, se lu nengen er i hii ve i doo u se timen sha akaaôron a profeti, man kwagh u una wase se u timen sha a yô. Maa se time sha akaaôron a profeti ahar ken takeda u Daniel la, se nenge er aluer se kav akaaôron a profeti shon ve, kwagh la una wase se nyian yô.

3. Aluer se soo u kaven akaaôron a profeti a Bibilo yô, ka nyi i gbe u se ere?

³ Saa se ker iwasen ve se fatyô u kaven akaaôron a profeti a Bibilo ye. De se tese ikyav. Tôô wer u ngu zan hen ijiir i u lu a vande zan her ga yô. Kpa u gema u ngu zan vea ijende you i nan fe ijiir la tsembelee yô. Nan fa ape ne lu la, kua ape hanma gbenda u ne nenge a mi cii u yem u nyer yô. Ka keng a doo u er ijende you la i lumun u za veren we zende la yô. Yehova ngu er ka ijende you la nahan. A fa er uma wase una va lu ken hemen la tsembelee. Nahan aluer se soo u kaven akaaôron a profeti a Bibilo yô, saa se hide a iyol ijime, se pine un iwasen.—Dan. 2:28; 2 Pet. 1:19, 20.

4. Er nan ve Yehova yange na i nger akaaôron a profeti ken Bibilo? (Yeremia 29:11) (Shi nenge foto kpaa.)

⁴ Er mbamaren mba fan kwagh ka ve soo ér i va saan mbayev vev iyol ken hemen nahan, kape Yehova kpa a soo ér i va saan se iyol ken hemen je la. (Ôr Yeremia 29:11.) Nahan kpa, mbamaren asev vea fatyô u ôron se kwagh u ken hemen ga, kpa Yehova yô una fatyô. Man hanma kwagh u a ôr se cii yô, ka i lu u  mimi. Yange tsua nomsombaiorov nger akaaôron a profeti ken Bibilo, sha er se fa akaa a vesen a aa va er ken hemen la cii man shighe u aa er la yô. (Yes. 46:10) Nahan akaaôron a profeti ka iyua i doon tsung i Ter wase u sha la a ne se yô. Nahan u er nan ve u fa wer mimi je nga va kuren sha mini?

5. Ka nyi gumor nana fatyô u henen ken kwagh u yange er Max laa?

⁵ Anmgbianev asev mba kiriki ka ve lu vea ior mba Bibilo i gbe ve kwagh ga yô ken makeranta. Ashighe agen yô, akaa a ior mban ka ve ôr shin ve er la a na wanye u nan lu Orshiada yô nan hingir u tan akperan sha akaa a nan ne jighjigh a mi la. Nenge kwagh u yange er anmgbian ugen yô, iti na ér Max. A kaa ér: “Shighe u m lu ken makeranta la, m hii u tan akperan sha ityesen i kwaghaôndo u mimi i mbamaren av lu tesen mo la. Shi m hingir u henen mer ka Aôndo a ne i nger Bibilo ga.” Nahan mbamaren nav er nena? A kaa ér: “Shin er m nenge mer kwagh ne za mbamaren av iyol nahan kpa, ve lam a mo kundu kundu.” Mbamaren mba Max yange ve na un ikyaa sha mbampin nav ken Bibilo. Max kpa yange er kwagh. A kaa ér: “Yange m time sha akaaôron a profeti ken Bibilo iyol yam, shi m lam a mbayev mbagenev sha akaa a m hen la.” Nahan lu nyi i due kere? Max kaa ér: “Yange m mase kaven wang er i lu Aôndo a ne i nger Bibilo yô.”

6. Aluer u ngu tan akperan sha kwagh u Bibilo i ôr yô, ka nyi i gbe u u ere, man ka sha ci u nyi?

⁶ Aluer we kpa u hii u henen wer akaa a Bibilo i ôr cii ka mimi ga er Max nahan yô, kunya u de kôron we a iyol you ga. Nahan kpa, a gba u u er kwagh sha kwagh ne fele. Akperan nga inja er ka nduran nahan. Aluer nduran hii u tan sha kwagh u injaa man i wa ikyo ga yô, ua ta sha kwagh shon kure kure, maa ua vihi un. Kwagh u u er ve u kera lu a akperan a vihin jighjigh wou ga yô, pine iyol you wer, ‘M na jighjigh a akaa a Bibilo i tsenga ôron ér aa va er ken hemen la kpa?’ Aluer u ngu tan akperan yô, a gba u u time sha akaaôron a profeti a a vande kuren sha mi la. U er kwagh ne nena?

7. Daniel ver se ikyav i timen sha akaaôron a profeti nena? (Daniel 12:10) (Shi nenge foto kpaa.)

⁷ Daniel ver se ikyav i dedoo i tesen se er se time sha akaaôron a profeti yô. Yange timen sha akaaôron a profeti a awashima u dedoo, man awashima na shon yô lu u fan mimi. Shi Daniel lu or u hiden a iyol ijime. Yange fa je ér aluer un za hemen u lun kôôsôô a Yehova yô, Yehova una wase un u kaven akaaôron a profeti. (Dan. 2:27, 28; ôr Daniel 12:10.) Daniel yange tese ér un ngu or u hiden a iyol ijime sha ci u yange suur sha Yehova ér a wase un. (Dan. 2:18) Shi Daniel yange una henen kwagh yô, a ver ishima zulee. Heela tseegh ga, Daniel yange a time sha kwagh vighe vighe. Yange a ker iwanger sha akaa a a tsume un la ken ityakeda i Ruamabera i yange i lu sha ayange na la. (Yer. 25:11, 12; Dan. 9:2) Se dondo ikyav i Daniel la nena?

8. Er nan ve mbagenev ka ve venda u nan jighjigh ér akaaôron a profeti a Bibilo nga kur sha mini, kpa ka nyi i gbe u se ere?

⁸ Hen sha ityôkyaa i u lu timen sha akaaôron a profeti yô. U ngu timen sha akaa a Bibilo i tsenga ôron la ka sha ci u sar u u fan mimii? Aluer ka nahan yô, Yehova una wase u. (Yoh.  4:23, 24; 14:16, 17) Nahan kpa, ior mbagenev ka ve timen sha akaaôron a profeti a Bibilo sha atôakyaa agen. Mbagen ka ve timen sha akaaôron a profeti ér vea nôngo vea zua a kwagh u tesen ér ka Aôndo a ne i nger Bibilo ga. Ka ve henen ér, aluer Bibilo ka Mkaanem ma Aôndo ga yô, vea wa atindi ayol a ve sha kwagh u ve nenge ér ka kwagh u dedoo man kwagh u bo la. Nahan kpa, gba u se henen kwagh a awashima u dedoo. Heela tseegh ga, saa se lu a ieren igen i hange hange ve se fatyô u kaven akaa a Bibilo i tsenga ôron la ye.

9. Ka ieren i nyi i gbe u se lu a mi ve se fatyô u kaven akaaôron a profeti a Bibilo? Ta iwanger.

⁹ Hide a iyol ijime. Yehova tôndo zwa ér una wase mbahiden a iyol ijime. (Yak. 4:6) Sha nahan yô, gba u se eren msen ser Yehova a wase se se kav akaaôron profeti a Bibilo. Shi aluer se mba mbahiden a iyol ijime yô, se lumun iwasen i Yehova a lu nan se sha ikyev i wanakiriki u jighjigh sha shighe vough la. (Luka 12:42) Yehova ka Aôndo u a eren kwagh nzughul nzughul ga yô. Sha nahan yô, se fa ser ngu wasen se u kaven mimi u Mkaanem nam sha ikyev i wanakiriki u jighjigh tseegh nahan ka sha inja je.—1 Kor. 14:33; Ef. 4:4-6.

10. Ka nyi u hen ken kwagh u yange er Esther laa?

¹⁰ Time sha kwagh vighe vighe. Tsua kwaghôron u profeti u a doo u la hii u timen sha mi. Ka kwagh u anmgbian u kwase ugen yange er je la, iti na ér Esther. Yange soo u seer timen sha akaaôron a profeti a sha kwagh u mve u Mesiya la. A kaa ér: “Shighe u m lu anyom 15 la, m hii u timen sha akaa a a tese ér yange i nger akaaôron a profeti ne cii man shighe u Yesu la yô.” Akaa a yange hen ken Uihyurenmbaruamabera mba i Zough a Mi hen Kpe Zegemnger u Kuugh la wase un na jighjigh. Esther kaa ér: “Yange i nger Uihyurenmbaruamabera mban mbagen cii ve shighe u Kristu la ye. Nahan akaaôron a profeti a a lu ker la ka hen Aôndo a dugh ye.” Esther shi kaa ér: “Yange i gba u me ôr akaa agen kwa kimbir kimbir cii ve me kav ye.” Kpa er yange nôngo er kwagh ne yô, saan un iyol. Yange tôô shighe time sha akaaôron a profeti agen vighe vighe, nahan a kaa ér: “Yange m nenge iyol yam er akaa a Bibilo i ôr la cii i lu mimi yô.”

11. Aluer se nenge er akaa a Bibilo i ôr la cii i lu mimi yô, kwagh la una wase se nena?

¹¹ Aluer se nenge er akaaôron a profeti a Mkaanem ma Aôndo ma kur sha mi la yô, kwagh la una wase se u nan Yehova jighjigh kua hanma kwagh u a kaa ér se er cii a akperan a tan shio. Shi akaa a Bibilo i tsenga ôron la aa wase se se za hemen u lun a ishimaverenkeghen sha kwagh u mlu wase u ken hemen la, aluer se tagher a atsan hegen nan nan je kpaa. De se time sha akaaôron a profeti agen ahar, a Daniel yange nger, man a lu kuren sha mi nyian yô. Aluer se kav akaaôron a profeti ne yô, kwagh la una wase se u tsuan akaa a se er yô sha kwaghfan.

12. Akevangahar a a lu ‘iyôgh nungwa sha inyatyuu’ la ka nyi? (Daniel 2:41-43)

¹² Ôr Daniel 2:41-43. Ken mnyam ma Daniel pase Tor Nebukadinesar la, yange tor nenge a eev mbugen. Akevangahar a eev mbu tor nenge a mi la lu ‘iyôgh nungwa sha inyatyuu.’ Aluer se tôô kwaghôron u profeti ne se kar sha akaaôron  a profeti agen ken takeda u Daniel man Mpase yô, se mase kaven er akevangahar la a til sha ityough ki tar u Amerika vea tar u Britain, ugomoti mba uhar mba ve eren kwagh ken mzough shi ve hembe tahav sha tar cii sha ayange a ase ne la yô. Daniel yange ôr kwagh u tahav vev mbura kaa ér: “Tartor la, vegher ugen una taver, vegher ugen una oson a oso.” Vegher ugen una oson a oso sha ci u nyi? Sha ci u ishamior i i lu inyatyuu la ka i na yô, tartor ne u kera taver iyol er ka iyôgh nahan ga, nahan u kera fatyô u eren kwagh sha utaha er ma u er la ga. b

13. Ka akaa a mimi a vesen a nyi se hen ken kwaghôron u profeti ne?

¹³ Se hen akaa a mimi a vesen ken eev mbu Daniel yange pase kwagh u mbu la, kpa se hemba henen akaa kpishi sha kwagh u akevangahar a eev mbura. Hiihii yô, tar u Amerika vea tar u Ingila tese er ve lu a tahav sha tar cii yô. Ikyav i tesen yô, ka Amerika vea Ingila yange ve hemba Ityav mbi Tar Cii mbi Hiihii man Ityav mbi Tar Cii mbi sha Uhar la ye. Nahan kpa, er ior mba ken ityar i ihiar ne ka ve shi gban anyiman ayol a ve shi ve eren ayôôso a gomoti yô, kwagh ne pande tahav mbu ityar ne i lu a mi la, shi mbua za hemen u panden kpaa. Sha uhar yô, ka Tahav mbu Tar u Amerika vea Ingila Ve Lu a Mi sha Tar Cii La mbua mase hemen tar maa Tartor u Aôndo ua va kar a ityartor i uumace sha tar cii kera ye. Shin er ashighe agen ityar igen ia fatyô u hendan a Tahav mbu Tar u Amerika vea Ingila Ve Lu a Mi sha Tar Cii La nahan kpa, mayange je ia fatyô u ngohol tahav mbura ga. Se fa nahan sha ci u “iwen” i i til sha ityough ki Tartor u Aôndo la, ia va ta sha akevangahar a lu vegher u eev mbura, u a til sha ityough ki Tahav mbu Tar u Amerika vea Ingila Ve Lu a Mi sha Tar Cii La, aa hembe avur avur.—Dan. 2:34, 35, 44, 45.

14. Aluer se kav kwaghôron u profeti u sha kwagh u akevangahar a a lu iyôgh nungwa sha inyatyuu la yô, kwagh la una wase se u tsuan akaa a se er la sha kwaghfan nena?

¹⁴ U na jighjigh wer kwaghôron u profeti u Daniel ôr sha kwagh u akevangahar a a lu iyôgh nungwa sha inyatyuu la ka mimii? Aluer ka nahan yô, kwagh la una bende a gbenda u u eren akaa ken uma wou la. Mayange je u ker u lun a akaa kpishi ken tar u ica a gba ga tsô a tim u kera ne ga. (Luka 12:16-21; 1 Yoh. 2:15-17) Shi aluer u kav kwaghôron u profeti ne yô, kwagh la una wase u u nengen er tom u pasen kwagh shi tesen ior la u lu kwagh u hange hange yô. (Mat. 6:33; 28:18-20) Aluer u time sha kwaghôron u profeti ne u bee yô, pine iyol you wer, ‘Akaa a m tsough u eren ken uma la tese ér m na jighjigh mer ica ia gba ga tsô Tartor u Aôndo ua va kar a tartor u uumace cii kera kpa?’

15. Ka an nan lu “tor u ken imbusutarimese” laa, man “tor u ken imbusutariyan” la di gema ka ana? (Daniel 11:40)

¹⁵ Ôr Daniel 11:40. Daniel ityough 11 ôr kwagh u ator ahar shin ugomoti mba ityar ihiar, mba ve lu kperan hemen u tar cii yô. Aluer se tôô kwaghôron u profeti ne se kar sha akaaôron a profeti agen ken Bibilo yô, se fatyô u nengen er “tor u ken imbusutarimese” la i lu tar u Russia vea ityar igen i i te ikyaa a u la yô. Shi se nenge er “tor u ken imbusutariyan” la i lu tar u Amerika vea Ingila, ityar i ihiar i i lu a tahav sha tar cii la yô. c

16. “Tor u ken imbusutarimese” la ngu eren kwagh a mbacivir Aôndo nena?

¹⁶ Mbacivir Aôndo mba ve lu ken tar u “tor u ken imbusutarimese” a lu hemen la, mba  tôvon ve a ican kpoghuloo. I gbidye Mbashiada mbagenev shi i wuhe ve ken upurusu sha ci u jighjigh ve u nan. Anmgbianev asev mban cia akaa a “tor u ken imbusutarimese” a lu eren ve la ga. Kpa kwagh shon gema na yô, jighjigh ve seer taver. Sha ci u nyi? Sha ci u anmgbianev asev fa er mtev u sha ican u ve tagher a mi la a lu kuren kwaghôron u profeti u ken takeda u Daniel la yô. d (Dan. 11:41) Aluer se fa kwagh ne yô, mfe la una wase se u lun a ishimaverenkeghen yase her taveraa, shi se za hemen u civir Yehova sha mimi.

17. Ka nyi mbacivir Aôndo mba ve lu ken tar u “tor u ken imbusutariyan” a hemen la ve tagher a mini?

¹⁷ Tsuaa la, “tor u ken imbusutariyan” kpa ta num sha ior mba Yehova. Ikyav i tesen yô, mough ken inyom i 1900 va ken inyom i 1950 la, yange i wuhe anmgbianev asev kpishi ken upurusu sha ci u ve venda u wan ave sha akaa a taregh. Shi i zenda mbayev mbagenev mba ve lu Mbashiada yô ken makeranta sha ityôkyaa shon i môm. Nahan kpa, ken anyom a a kar kpishi ne,  “tor u ken imbusutariyan” tôv ior mba Yehova mba ve lu ken tar na la a ican kpoghuloo ér ve de fetyô u civir Yehova sha mimi ga. Shighe u mbapatii ve lu eren kyampen yô, alaghga Orkristu nana nenge ér pati ugen hemba doon a ugen, shin orgen ken mba ve til ishangen la nana hemba eren kwagh u injaa a mba ve til ishangen vea nan la. Shin er Orkristu la nana haa ishangen la ga nahan kpa, alaghga nana ver ishima ér pati ugen ma a ye ishangen la. Nahan kpa, gema gba hange hange u se palegh u wan ave sha akaa a patii sha ieren yase tseegh ga, kpa kua sha iliam yase man ken mhen wase cii.—Yoh. 15:18, 19; 18:36.

18. Ka sea nenge er “tor u ken imbusutariyan” a nôngon num vea “tor u ken imbusutarimese” la nahan, i lu se nena? (Shi nenge foto kpaa.)

¹⁸ Alaghga mba ve ne jighjigh a akaa a Bibilo i tsenga ôron ga la vea nenge “tor u ken imbusutariyan” una lu “nôngon num” vea “tor u ken imbusutarimese” yô, ishima i a nyian ve kpishi. (Dan. 11:40) Ator a ahar ne cii var ubom mba vea fatyô u timin akaauma cii sha tar kera yô. Kpa se fa er Yehova una lumun ér kwagh a er nahan ga yô. (Yes. 45:18) Sha nahan yô, ishima ze se iyol sha num u “tor u ken imbusutarimese” a nôngon vea “tor u ken imbusutariyan” la ga, kpa kwagh shon gema taver a taver jighjigh wase. Num ve la ngu tesen er mkur u tar ne a zulum yô.

19. Ka nyi i gbe u se fa sha akaa a Bibilo i tsenga ôron laa?

¹⁹ Se fa er akaa agen a Bibilo i tsenga ôron la aa va kure ga. Profeti Daniel je kpa yange kav akaa agen ken akaa a yange nger la ga. (Dan. 12:8, 9) Kpa u ngu wer aluer se kav er ma kwaghôron u profeti una va kure la ga yô, maa tese ér una va kure sha mi ga ze. Se mba a vangertiôr ser Yehova una wase se u kaven akaa a i gbe u se fa la sha shighe vough, er yange er sha ayange a tsuaa la nahan.—Amo. 3:7.

20. Ka akaa a sagher iyol a nyi Bibilo i tsenga ôron ér ica a gba ga tsô aa ere, man ka nyi i gbe u se za hemen u erene?

²⁰ Shighe ngu van u a va yôô ér “bem gba, zayol kera ngu ga” yô. (1 Tes. 5:3) Kwagh ne a eren yô, ugomoti mba tar ne vea ta num sha kwaghaôndo u aiegh, vea tim un kera. (Mpa. 17:16, 17) Maa vea ta num sha ior mba Aôndo. (Esek. 38:18, 19) Akaa ne a er zan zan a za kuusu sha ityav mbi Armagedon. (Mpa. 16:14, 16) Se fa dedoo ser, ica a gba ga tsô akaa ne aa er. Kpa cii man shighe la yô, se za nen hemen u tesen ser se wuese Ter wase u sha u se doo un ishima la, sha u veren ishima sha akaaôron a profeti a Bibilo shi wasen mbagenev kpa ve er nahan.