Ken ngeren la, se time se fa ikyaa i vesen igen i uumace kua mbatyomov cii ve tagher a mi yô: Ka ikyaa i tseghan iti i Yehova i i hembe sha won cii la je la. Aluer gbenda u Yehova a hemen se la u hemba doon shin u hemba doon ga kpa, kwagh shon wa zua vea ikyaa i vesen la i môm. Kape kwagh u tilen sha mimi hen Yehova shin tilen ga la kpa a we a zough vea ikyaa i vesen shon je la.

Er nan ve se lu ôron kwagh sha kwagh ne hegen var var ser, ikyaa i vesen ne har sha kwagh u iti i Yehova man u tseghan i? De se time sha atôakyaa atar.

Hiihii yô, Satan yange lam sha Yehova dang, shin vihi Yehova iti ken sule u Eden. Mpin u Satan yange pine Ifa sha atseregh la tese ér Aôndo ne or kwagh ga, shi akaawan a a soo ér Adam man Ifa ve dondo la ka a sha ifer. Maa Satan ôr ve kwagh ugen kposo a kwagh u Yehova ôr yô. Nahan kwagh ne tese ér Satan lu kaan ér Aôndo wa aie. Kape yange Satan laha Yehova, shin vihi un iti je la. Maa i hingir u yilan un ér “Diabolo,” inja na yô ér, “ormsende.” (Yoh. 8:44) Er Ifa na jighjigh a mbaaie mba Satan er la yô, a hemba Aôndo ato. Nahan kwagh ne tese ér a hendan a hemen u Aôndo. (Gen. 3:1-6) Zan zan nyian kpa, Satan ngu vihin Aôndo iti her sha kwagh u imba Aôndo u Yehova a lu la. Ior mba ve ne jighjigh a mbaaie nav mbara cii ka ve soo u hemban Yehova ato. Kpa ior mba Aôndo yô, ve nenge u vihin icighanti i Yehova la ér ka ifer i hemban vihin gban kera cii. Ka kwagh ne jighilii je a ve a ican man ifer sha tar jimin cii ye.

Sha uhar yô, Yehova una tsegha iti na, una kar a ilyahan i i ve a mi sha i la cii kera, sha ci u iwasen i akaa a a gbe la cii. Kwagh ne gba Yehova ishima kpishi. Sha nahan yô, a kaa ér: “Me tsegha iti Yam i vesen.” (Esek. 36:23) Shi Yesu yange pase mbacivir Yehova mbajighjigh kwagh u i gbe u vea hii sônon ken mbamsen vev yô, a kaa ér: “I tsegha iti you.” (Mat. 6:9) Bibilo ôr kwa kimbir kimbir er i gbe hange hange u a tsegha iti i Yehova la yô. De se nenge ikyav sha ajiir kpuaa: “Na nen TER icivir i i kom sha iti Na yô.” (1 Kron. 16:29; Ps. 96:8) “Wa icam, ter icivir i iti Na.” (Ps. 66:2) “Me civir iti You gbem.” (Ps. 86:12) Shighe ugen la Yehova iyol na ôr kwagh imo due sha ken tempel ken Yerusalem, maa her la je Yesu kaa ér: “Tere, na iti you icivir.” Yehova di gema kaa ér: “M vande nan i icivir, shi me na i icivir kpaa.”—Yoh. 12:28. a

Sha utar yô, awashima u Yehova wa zua vea iti na, shin iti i dedoo i a lu a mi la. Hen sha kwagh ne: Hemen u Kristu u Anyom Dubu la ua been yô, ka nyi igen ia ere? Shighe la kpa, mbatyomov kua uumace vea za hemen u lun a mbamnenge kposo kposo sha kwagh u tseghan iti i Yehova laa? Kwagh u una wase se u zuan a mlumun sha mpin la yô, de se umbur akaa ahar a a gbe a biishi a kwagh ne yô. Akaa shon yô, ka mtil sha mimi u uumace, man kwagh u or u nan kom u hemen sha man tar cii la. Uumace mba vea za hemen u civir Aôndo sha mimi la vea tagher a ican sha ci u ve  tile sha mimi her yumu? Ei. Shighe la vea lu a myen môm môm ga, shi a kar ve sha hanma gbenda cii a bee. Nahan vea zua a uma u tsôron. Shi a kera gba u a tese ér ka gbenda u Yehova a hemen la u hembe doon ga. Shighe la, mbatyomov mba shaav kua uumace mba vea lu shin tar cii, vea zua vea lu gungur môm, shi vea lumun ér Yehova a hemen ve. Nahan shighe la kpa, iti i Yehova ia za hemen u lun ior nav kwagh u vesen u hemban ciili?

Sha shighe la, hanma or nana fa mimi sha kwagh u Yehova, shi a tsegha iti na vindi vindi. Nahan kpa, iti i Yehova ia za hemen u lun mbatyomov mbajighjigh kua uumace mba civir un shin tar cii kwagh u vesen u hemban cii sha ci u nyi? Sha ci u vea lu nengen akaa a kpilighyol a Yehova una za hemen u eren la. Hen sha kwagh ne: Yesu una hide a iyol na ijime, una geman hemen cii una waan sha ikyev i Yehova yô, Yehova una “lu ityough sha akaa cii.” (1 Kor. 15:28) Kwagh ne una eren kera yô, a saan uumace mba sha tar cii iyol, sha ci u vea lu sha “ian i icivirigh i ônov mba Aôndo mba i pase ve, ve kera lu uikyangen ga la.” (Rom. 8:21) Nahan Yehova una kure awashima na u sha hiihii je lu a mi la. Una zua mbatyomov mba shaav vea uumace mba shin tar cii a hingir zege tsombor na, vea lu civir un gungur môm, shin ken mzough.—Ef. 1:10.

Akaa ne aa eren kera cii yô, a lu mbatyomov mba shaav kua uumace mba shin tar cii mba ve lu ken tsombor u Yehova la nena? Hen shighe la kpa, isharen i wuese iti i Yehova la ia za hemen u lun ken a vese her taveraa. Aôndo yange na orpasalmi Davidi nger ér: “I̱ wuese TER, Aôndo . . . i̱ wuese iti Na i doon tsung gbem sha won.” (Ps. 72:18, 19) Se za hemen u zuan a atôakyaa a he man a kpilighyol a eren nahan.

Iti i Yehova la pase hanma kwagh sha kwagh na. Ka sea hen sha kwagh u iti i Yehova yô, i lu dooshima na la a va se ken ishima ye. (1 Yoh. 4:8) Se za hemen u umbur hanma shighe cii ser, ka dooshima u Yehova a lu a mi la yange na ve gba se ye. Shi a na nagh ku paan se sha ci u se doo un ishima. Shi se za hemen u umbur hanma shighe ser gbenda u a hemen se la ka u vough, shi ngu hemen se sha dooshima. Shi se za hemen u nengen er Yehova una tese se dooshima na gbem sha won yô. Se za hemen u kporom hen Ter wase u sha la, shi wan atsam a wuese icighanti na gbem sha won.—Ps. 73:28.