1. Ka i doo u a ior mba ve we ishima la sha ci u nyi?

 SE CII ka se soo ior mba ve we ishima yô. Er nan ve kwagh a lu nahana? Or ka nana wa ishima a kwagh zan zan nana vihi ishima ga yô, i doo se a nan. Mbagenev ka vea wa ishima a vese shighe u se er kwagh u shami ga yô, kwagh ve a doo se. Ka i doo se kpishi er or u nan hen Bibilo a vese la yange nan wa ishima a vese shighe u se lu nôngon ser se hen Bibilo shin se ngohol kwagh u Bibilo i tese, shin se dondo ityesen i Bibilo la yô. U hemban cii yô, se wuese kpishi er Yehova Aôndo a lu wan ishima a vese yô!—Rom. 2:4.

2. Ka akaa a nyi nahan alaghga aa na a taver se u wan ishima?

² Er ka i doo se a mbagenev mba ve we ishima a vese la nahan kpa, alaghga se ayol ase yô, a gema a taver se u wan ishima a mbagenev. Ikyav i tesen yô, aluer se mba zan mape man kwaghhendan za ngee sha gbenda hen ijiir igen kpishi, se mba fantyô u zan ken hemen ga yô, alaghga ishima a vihi se, hemban cii je yô shighe u se gbe leti yô. Alaghga se nyoon ishima a mbagenev zum u ve er kwagh u vihin se yô. Heela tseegh ga, ashighe agen a taver se u wan ishima keghen tar u he u Yehova a tende zwa u van a mi la. U soo wer u seer lun a ishimawana? Ken ngeren ne, se lu timen sha igbenda i se tese ishimawan yô, man er i hii ve i gbe hange hange u se er nahan yô. Shi se time sha akaa a aa wase se u seer lun a ishimawan yô.

3. Ka a er kwagh dang a or u wan ishima kpa nan er nena?

³ Nenge igbenda inyiin i se fatyô u tesen ishimawan yô. Hiihii yô, or u wan ishima nan vihin ishima fele ga. Mbagenev ka vea er kwagh a nan dang kpa, nan vihi ishima ga, shi nan ker u oron iyev ga. Ijiir i i hii teren ishember i “wan ishima” la ken Bibilo yô, kape i kaa ér “Aôndo u mgboughon a mhôônom ma zungwen  kua mrumun u sha mhôôn, u wan ishima man u lun a erdoo man mimi wuee” la.—Eks. 34:6.

4. Ka a gba u or u wan ishima nana kegh kwagh nahan, nan er nena?

⁴ Sha uhar yô, or u wan ishima nan hingir tenge tenge shighe u nan lu keghen kwagh ga. Ka nana kegh kwagh a hemba shighe u nan ver ishima la je kpa, nan kôr iyol i nan tsaha, sha er nana hingir tenge tenge shin nana nyoon ishima ga yô. (Mat. 18:26, 27) Ashighe nga kpishi a ka i gba u se wa ishima se kegh kwagh yô. Ikyav i tesen yô, shighe u or nan lu lamen nahan, gba u se wa ishima se kegh ato a nan, se nyôr nan sha zwa ga. (Yobu 36:2) Shi shighe u se lu wasen orhenen Bibilo ser nana kav ma kwagh u Bibilo i tese, shin nana de ieren i doon ga i nan lu a mi yô, a gba u se wa ishima.

5. Ka sha gbenda ugen u nyi se fatyô u tesen ishimawana?

⁵ Sha utar yô, or u wan ishima nan torough eren kwagh ga. Ashighe agen ka i gba u se er kwagh torough torough. Nahan kpa, ka a gba u or u wan ishima nana er kwagh u i gbe hange hange u nana er kpa, nan torough u hiin kwagh shon ga, shi nan eren kwagh la gyaver gyaver ér nana nôngo a bee ga. Kpa ka nan tôô shighe nan hen sha kwagh u nan soo u eren la, man er nana er kwagh shon la kpaa. Nahan nan tôô shighe nan er kwagh shon tsembelee.

6. Or u wan ishima ka nana yaan ican nahan nan er nena?

⁶ Sha unyiin yô, or u wan ishima ka nana yaan ican kpa nan gbe ahon ga. Kwagh ne tese ér ishimawan man ishimataver nôngo u lun kwaghmôm. U ngu wer aluer se ôr ijende yase ma zayol wase yô, se er kwaghbo ga. Nahan kpa, or u wan ishima yô, nana hen sha akaa a dedoo a a er nan ken uma u nan la kpaa, nahan nana nôngo sha afatyô u nan cii nana za hemen u civir Yehova saan saan. (Kol. 1:11) Gba u se Mbakristu se tese ishimawan sha igbenda ne cii. Sha ci u nyi? De se time sha atôakyaa kpuaa.

7. Yakobu 5:7, 8 tese ér gba hange hange u se lu a ishimawan sha ci u nyi? (Shi nenge foto kpaa.)

⁷ Saa se lu a ishimawan ve se war ye. Gba u se wa ishima se kegh shighe u Aôndo una kure uityendezwa nav la, er mbajighjigh mba sha ayange a tsuaa la nahan. (Heb. 6:11, 12) Bibilo tôô mlu wase kar sha mlu u orsule. (Ôr Yakobu 5:7, 8.) Orsule ka nan er tom u lôôn iyiav shi urun mbi la kpoghuloo, kpa nan gema nan fa shighe u iyiav mbi shon mbia va ume atam la jighilii ga. Nahan orsule ka nan wa ishima nan kegh a jighjigh u nan ér nana sunda iyiav ki nan lee la. Se kpa gba u se nôngo kwagh kpoghuloo sha er se lu mbadondon Kristu yô, er se ‘fe iyange i Ter wase una va la ga’ nahan kpaa. (Mat. 24:42) Se mba wan ishima keghen a jighjigh u nan ser shighe u Yehova a ver la una va kuman vough yô, una er akaa a tende zwa u eren la cii. Aluer se yina ishima yô, iyol a kpe se u keghen, se gba vôron kure kure, maa se va undu Yehova. Heela tseegh ga, se hingir u hemban veren ishima sha akaa a se hen ser aa na se msaanyol hegen la tseegh. Kpa aluer se wa ishima yô, se taver ishima zan zan mkur, nahan a yima se.—Mika 7:7; Mat. 24:13.

8. Ishimawan ka i wase se u eren kwagh a mbagenev nena? (Mbakolose 3:12, 13)

⁸ Gba hange hange u se lu a ishimawan sha er se fatyô u lun vea mbagenev doo doo yô. Ishimawan ka i wase se u keghen ato a mbagenev zulee shighe u ve lu lamen yô. (Yak. 1:19) Shi ishimawan ka i wase se u lun ken bem vea mbagenev. Aluer se mba a ishimawan yô, shighe u se tagher a zayol je kpa se er kwagh gagher shin se lam bagenaa ga. Shi shighe u or nan er kwagh u vihin se je kpa se nyoon ishima a nan shin se lam a nan dang ga. Aluer mbagenev mba eren kwagh a vese sha inja ga kpa, mayange se ker u oron iyev ga, kpa se ‘waan ishima a mbagenev shi deen mbagenev kwaghbo sha mimi.’—Ôr Mbakolose 3:12, 13.

9. Shighe u i gbe u se er ma kwagh yô, ishimawan ia wase se nena? (Anzaakaa 21:5)

⁹ Shi aluer se mba a ishimawan yô, kwagh la una wase se u eren akaa a a hembe lun a inja yô. Se kera torough shin se er kwagh gagher ga, kpa se tôô shighe se hen sha akaa a se soo u eren la er se fetyô la cii, maa se tsua u eren a se nenge ser hemba ngan a inja la. (Ôr Anzaakaa 21:5.) Ikyav i tesen yô, shighe u se lu keren tom yô, alaghga se soo u eren tom u se hii zuan a mi la, aluer ka u tom shon ua bunden se mbamkombo shi ua yange se u eren tom wase u pasen kwagh la kpoghuloo je kpaa. Kpa aluer se wa ishima yô, se tôô shighe se hen sha akaa agen kpaa sha kwagh u tom la, er ape ijiirtom shon i lu, man ahwa a se eren tom shon, man er tom la ua bende a tsombor wase kua akaa a se eren sha ci u Yehova la yô. Aluer se wa ishima yô, se palegh u eren kwagh sha ibume.

10. Orkristu nana er nena ve nana lu a ishimawan shi nana za hemen u wan ishima?

¹⁰ Sôn Yehova a wase u u seer lun a ishimawan. Ishimawan ka vegher u ityamegh ki jijingi. (Gal. 5:22, 23) Nahan se fatyô u eren msen hen Yehova sônon un ser a na jijingi na a wase se u umen ityamegh nagh. Shighe u se tagher a kwagh u una na a taver se u wan ishima yô, se eren msen hen Yehova se “sônon” un icighan jijingi na ser a wase se se wa ishima. (Luka 11:9, 13) Shi se fatyô u sônon Yehova ser a wase se u nengen zayol wase la er un kpa a nenge la. Se eren msen se been kera yô, a gba u se nôngo sha afatyô wase cii se waan ishima hanma iyange. Aluer se mba eren msen hanma shighe, shi nôngon sha afatyô wase cii ser se wa ishima yô, ishimawan ia ya tor ken a vese, shin ia hingir ieren yase.

11-12. Yehova tese ishimawan nena?

 ¹¹ Hen sha aeren a ior mba Bibilo i er kwagh ve la zulee. Bibilo ôr kwagh u mbagenev kpishi mba yange ve tese ér mba ior mba wan ishima yô. Aluer se mba henen sha akaa ve a Bibilo i ôr la yô, se fatyô u fan igbenda i se tese ishimawan yô. Cii ve se time sha kwagh u ior mba shon mbagenev yô, de se time sha kwagh u Yehova, un u a ver ikyav i hemban cii sha kwagh u ishimawan la.

¹² Satan yange laha Yehova ken sule u Eden, shi nôngo ér Ifa a nenge ér Yehova ka Orhemen u eren kwagh sha mimi ga, shi ngu a dooshima ga. Yehova yange tim Satan u vihi un iti la her ave ave ga, kpa wa ishima, shi kôr iyol na tsaha, sha ci u fa ér gba u saa shighe a kar ve una tese ér un ngu Orhemen u injaa u hemban cii ye. Shighe u Yehova a lu keghen ne kpa ngu wan ishima a akaa a ior ve lu ôron sha a na dang dang la cii. Heela tseegh ga, Yehova wa ishima ngu keghen sha er ior kpishi vea fatyô u aren sha ian i zuan a uma u tsôron yô. (2 Pet. 3:9, 15) Kwagh ne wase ior umiliôn imôngo hingir u fan un. Aluer se hemba veren ishima sha gbenda u ishimawan i Yehova la i wase se la yô, a kera lu se ican ga u keghen shighe u a ver u va karen a tar ne kera la.

13. Ka nyi Yesu yange er u tesen ér we ishima vough er Ter na nahana? (Shi nenge foto kpaa.)

¹³ Yesu we ishima vough er Ter na nahan. Yange tese ieren ne shighe u lu shin tar la. Ka keng ashighe agen yange a taver un u wan ishima, hemban cii je yô a mbawanatseregh, er mbangerenatindi man Mbafarishi nahan. (Yoh. 8:25-27) Kpa Yesu waan ishima vough er Ter na nahan. Yange a naha un tar, shin a hii un iyongo kpa a or iyev ga. (1 Pet. 2:23) Yesu yange wa ishima a atsan a u gban ahon shio. Kwagh ne wase se u fan er i hii ve Bibilo i kaa a vese ér “hen nen zulee sha kwagh u un u yange wa ishima a mbaasorabo mba ve lu lamen sha a na dang” la yô. (Heb. 12:2, 3) Sha iwasen i  Yehova yô, se kpa se fatyô u wan ishima a nyityô ican i se tagher a mi cii.

14. Ka nyi se fatyô u henen ken ishimawan i Aberaham laa? (Mbaheberu 6:15) (Shi nenge foto kpa.)

¹⁴ Aluer mkur u tar ne ngu van fele er se ver ishima la ga nahan, se er nena? Alaghga yange se lu veren ishima ser mkurtar una va sha ayange a ken ijime la je, kpa zan zan hegen ngu a va ga. Alaghga ishima ia lu nyian se ér se va kpe cii mkurtar a mase van ye. Ka nyi ia wase se ve se za hemen u wan ishima keghene? Nenge ikyav ken Aberaham. Shighe u Aberaham lu anyom 75, bee iyol man lu a wan ga la, Yehova tôndo zwa a na ér: “Me er u, ú hingir ikyurior i vesen.” (Gen. 12:1-4) Aberaham yange nenge er Yehova kure ityendezwa na ne kpa? Ityendezwa la lu a kure cica cii ga tsô Aberaham kpe kera. Aberaham yange per Ifi u Uferati za kegh anyom 25 nga karen yô, a mar wan na Isaka sha ivande. Shi anyom a 60 nga karen yô, wan na Isaka mar Isou man Yakob. (Ôr Mbaheberu 6:15.) Kpa mayange Aberaham nenge tsombor na hingir zege ikyurior shi ya dyako i Tar u Ityendezwa la er i tôndo zwa a na la ga. Nahan kpa, orjighjigh la za hemen u lun ijende i Aôndo u a gbe un la. (Yak. 2:23) Nahan a va nderen Aberaham shin ku yô, a saan un iyol kpishi u nengen er jighjigh na kua ishimawan na la i ne akuraior cii a hingir u zuan a iveren yô! (Gen. 22:18) Ka nyi se hen ken kwagh ne? Alaghga se nenge a akaa a Yehova a tende zwa u eren la cii hegen ga. Nahan kpa, aluer se wa ishima er Aberaham nahan yô, se fatyô u lun a vangertiôr ser Yehova una na se injar hegen, shi se va zua a injar i hemban cii ken tar u he u a tende zwa u van a mi la.—Mar. 10:29, 30.

15. Shighe u se lu henen kwagh sha tseeneke wase yô, ka nyi se fatyô u timen sha mini?

¹⁵ Bibilo shi ôr kwagh u ior mbagenev kpishi mba yange ve wa ishima yô. (Yak. 5:10) Aluer  u tôô shighe u time sha kwagh ve yô, a doo kpishi. b Ikyav i tesen yô, yange i shighe Davidi mkurem shighe u lu cuku la je ér a va lu tor u Iserael, kpa Davidi kegh anyom kar kpishi cii va mase teman tor ye. Shimion vea Ana kpa yange ve lu civir Yehova sha mimi shighe u ve lu keghen Mesiya u i tôndo zwa ér ngu van la. (Luka 2:25, 36-38) Aluer u ngu timen sha kwagh u ior mban nahan yô, ker mlumun sha mbampin mban: Ka nyi nahan alaghga yange i wase or ne u wan ishima? Yange wa ishima nahan kwagh la wase un nena? Me dondo ikyav na ne nena? Shi aluer u time sha kwagh u mba yange ve tese ishimawan ga la yô, a wase u. (1 Sam. 13:8-14) U fatyô u pinen iyol you wer: ‘Alaghga ka nyi yange i na ve or ne wa ishima ga? Yange wa ishima ga nahan, ka akaa a vihin a nyi yange er unu?’

16. Aluer se mba wan ishima a mbagenev yô, kwagh la una wase se nena?

¹⁶ Hen sha igbenda i ishimawan ia wase u yô. Ka sea waan ishima yô, i hemba saan se iyol, shi ishima i kera nyian se kpishi ga. Sha nahan yô, ishimawan ka i wase se u lun gbang gbang sha iyol kua ken ishima kpaa. Ka sea waan ishima a mbagenev yô, se hemba lun vea ve doo doo. Shi kwagh ne ka a na mzough a hemba lun ken tiônnongo. Aluer or er kwagh a vese dang kpa se wa ishima a nan yô, kwagh shon una kera hingir zege kwagh ga. (Ps. 37:8; Anz. 14:29) Kpa kwagh u hemban cii yô, aluer se mba wan ishima a mbagenev yô, se mba dondon ikyav i Ter wase u sha la, shi se hemba lun kôôsôô vea na cii.

17. Ka nyi se soo ser se za hemen u erene?

¹⁷ Sha kpôô yô, ishimawan ka ieren i dedoo, shi ka sea lu a ishimawan yô, kwagh la a wase se kpishi! Alaghga ashighe agen a taver se u wan ishima, kpa sha iwasen i Yehova yô, se fatyô u nôngon lun a ieren ne, shi tesen i hanma shighe cii. Heela tseegh ga, er se lu wan ishima keghen shighe u tar u he ua va la, se fatyô u lun a vangertiôr ser ‘ashe a TER nga sha mba ve cie Un, mba ve ver ishima ve keghen erdoo Na yô.’ (Ps. 33:18) Yô, se cii se haa nen ishimawan iyol, shi se za nen hemen u wan ishima.