NGEREN U TIMEN SHA MI 34
ICAM 107 Aôndo Ver Se Ikyav i Tesen Dooshima
Er Mbatamen ka Ve Tese Mbaasorabo Dooshima man Mhôônom ma Zungwen Yô
‘Erdoo u Aôndo la ngu nôngon ér u̱ gema ishima.’—ROM. 2:4.
KWAGH U SE LU HENEN YÔ
Er mbatamen ka ve nôngo ér vea wase anmgbianev mba ken tiônnongo mba ve er isholibo i vesen yô.
1. Shighe u or er isholibo i vesen je kpa, ka nyi a fatyô u erene?
KEN ngeren u a kar la, yange se hen kwagh u apostoli Paulu kaa ér tiônnongo u ken Korinte a er shighe u orgen ken tiônnongo la er isholibo i vesen yô. Orsholibo la yange venda u geman ishima, nahan gba u a dugh un ken tiônnongo kera. Nahan kpa, er ivur i kwaghhenen ne a har sha mi la i tese nahan, mba ve er isholibo i vesen je kpa Aôndo una fatyô u wasen ve ér ve gema ishima. (Rom. 2:4) Ka a er tom a mbatamen sha u wasen orsholibo ér nana gema ishima nena?
2-3. Ka nyi i gbe u se er shighe u se va fe ser or u se civir Aôndo vea nan imôngo nan er isholibo i vesene, man ka sha ci u nyi?
2 Cii ve mbatamen ve wase orsholibo yô, gba u vea fa kwaghbo u nan er la. Nahan ka nyi i gbe u se er zum u se fe ser, or u se civir Aôndo a nan imôngo nan er isholibo i vesen i a fatyô u dughun nan ken tiônnongo kera? Hiihii yô, se taver anmgbian u nomso shin u kwase la ishima ser nana za ker iwasen hen mbatamen.—Yes. 1:18; Aer. 20:28; 1 Pet. 5:2.
3 Nahan kpa, aluer or shon nan venda u lamen a mbatamen di ye? Aluer kwagh ngu nahan yô, se za lam a mbatamen sha er vea na or shon iwasen i i gbe u a na nan la yô. Ka sea er nahan yô, se tese anmgbian wase u nomso shin u kwase la dooshima sha ci u se fa ser mbatamen vea wase nan. Aluer orsholibo la nan za hemen u eren kwaghbo yô, nana va kera lu ijende i Yehova ga, shi nana vihi iti i tiônnongo kpaa. Er Yehova man orsholibo la ve doo se ishima yô, se za lam a mbatamen ser ve wase nan, aluer taver se u eren nahan je kpaa.—Ps. 27:14.
ER MBATAMEN KA VE WASE OR U NAN ER ISHOLIBO I VESEN YÔ
4. Ka nyi i lu awashima u mbatamen shighe u ve tem vea or u nan er isholibo i vesen laa?
4 Or u ken tiônnongo ka nana er isholibo i vesen yô, mzough u mbatamen a tsua mbatamen utar ér ve lu ken kômatii. a Gba u mbatamen mban vea eren kwagh akuma akuma shi vea hiden a iyol ijime. Doo u vea fa ér, shin er ve lu nôngon ér vea wase orsholibo la nana gema ishima nahan kpa, vea fatyô u kighir nan ér nana gema ga. (Dut. 30:19) Mbatamen fa ér ka hanma orsholibo cii nana gema ishima er Tor Davidi nahan ga. (2 Sam. 12:13) Adooga mbaasorabo mbagen vea venda u ungwan kwaghwan u Yehova. (Gen. 4:6-8) Nahan kpa, awashima u mbatamen yô, ka u wasen orsholibo la sha afatyô ve cii ér nana gema ishima. Ka nyi i doo u mbatamen vea umbur shighe u ve tem vea orsholibo laa?
5. Ka aeren a nyi mbatamen ka ve tese ér mba a mi shighe u ve tem ijir a orsholibo? (2 Timoteu 2:24-26) (Shi nenge foto kpaa.)
5 Mbatamen fa ér aluer or er isholibo i vesen je kpa, nan ngu er iyôngo i i saa yô, nan gba Yehova kwagh her. (Luka 15:4, 6) Sha nahan yô, mbatamen ka vea shar orsholibo ijir kpa mba lamen a nan sha tswam ga shi ka ve er a nan kundu kundu shi ka vea tema vea nan kpa ve pinen a pine nan mbampin sha er vea fa kwagh u a ze hemen tseegh ga. Kpa ka ve tese ér mba a aeren a i ter a ken 2 Timoteu 2:24-26 la. (Ôr.) Mbatamen ka vea wasen orsholibo ér nana gema ishima yô, ve lu a nan sar sar shi ve lu ishima i legh legh shi ve er a nan kundu kundu.
Mbatamen ka ve ker iyôngo i i saa la, vough er mbakuranilev mba sha ayange a tsuaa la kpa eren nahan (Nenge ikyumhiange i sha 5)
6. Mbatamen vea wa iyol sha er vea lu a mnenge u Yehova sha isholibo i or er la cii ve vea tema vea nan nena? (Mbaroma 2:4)
6 Mbatamen ka ve wa iyol sha er vea lu a mnenge u Yehova sha ikyaa la yô. Mbatamen ka ve nôngo ér vea kav Yehova shighe u ve tem ijir a orsholibo yô, ka ve umbur mkaanem ma Paulu man ér: ‘Erdoo u Aôndo la ngu nôngon ér u̱ gema ishima.’ (Ôr Mbaroma 2:4.) Gba u mbatamen vea umbur ér mba mbakuran, man gba u vea ungwan Kristu shi vea dondon ikyav na sha gbenda u ve hemen tiônnongo la. (Yes. 11:3, 4; Mat. 18:18-20) Cii ve kômatii ne a tema vea orsholibo la yô, mbatamen mbara ka ve vande eren msen sha er vea kure awashima ve yô, ka u wasen orsholibo la nana gema ishima je la. Ka ve time ken Ruamabera man ken ityakeda yase shi ve er msen ér Yehova a wase ve vea seer fan or shon, man kwagh u a ze hemen la. Ka ve tôv sha kwagh u i gbe u vea seer fan sha kwagh u or shon u alaghga a ne ve nan hen shin nan er kwagh sha imba gbenda la yô.—Anz. 20:5.
7-8. Mbatamen vea kav ishimawan i Yehova la shighe u ve tem vea orsholibo la nena?
7 Mbatamen ka ve kav ishimawan i Yehova la. Ka ve umbur er Yehova yange nôngo ér una wase mbaasorabo sha ayange a tsuaa la yô. U tesen ikyav yô, Yehova yange wa ishima a Kain, wase un ér a gema ishima. Yange ta Kain icin sha kwagh u una gema ishima ga ve una er un la, man averen a una gema ishima ve una zua a mi la. (Gen. 4:6, 7) Yehova yange wa Davidi kwagh sha ikyev i profeti Natan. Natan yange ôr Davidi injakwagh i i kôr tor ken ishima yô. (2 Sam. 12:1-7) Shi Yehova “lu tindin” uprofeti nav “ayange ayange” hen ikyurior i Iserael i hembanato la. (Yer. 7:24, 25) Yange kegh ér ior nav ve gema ishima cii ve una wase ve ga. Kpa er ve lu eren asorabo her la je, a taver ve ishima ér ve gema ishima.
8 Mbatamen ka ve dondo ikyav i Yehova la shighe u ve lu wasen or u nan er isholibo i vesen ér nana gema ishima yô. Er i ôr ken 2 Timoteu 4:2 nahan, ka ve lu a “ishima i wan tsung” shighe u ve lu wasen or u nan er isholibo yô. Gba u mbatamen vea waan ishima hanma shighe ve vea fatyô u wasen orsholibo ér nana gema ishima, nana er kwagh u vough ye. Aluer mbatamen mba nyoon ishima yô, or shon nana kera ngohol kwaghwan ve la ga shi nana gema ishima ga.
9-10. Mbatamen vea wase or u nan er isholibo la u henen sha akaa a a ne ve nan hingir u eren isholibo la nena?
9 Mbatamen ka ve nôngo ér vea fa akaa a yange na ve or shon nan hingir u eren isholibo yô. Ikyav i tesen yô, ijende i nan vea Yehova i kera taver gaa? Nan de u henen Bibilo shi nan kera dugh kwaghpasen hanma shighe gaa? Nan de u eren msen hen Yehova hanma shighe shi msen u nan kera ngu kôrough gaa? Nan de asaren a bo nga yan tor sha a nana? Ka unô ve lu azende a nana? Ka iemberyolough i nyi nan tsua u erene? Akaa a nan tsough u eren la bende a asaren a nan man mhen u nan nena? Nan kav er ieren i nan la i ne i lu Yehova, Ter u nan la ken ishima kpa?
10 Mbatamen vea fatyô u pinen nan mbampin mba vea wase nan u henen sha akaa a a vihi ikyaryan i nan vea Yehova, nahan nan hingir u eren isholibo la. Ka ve lam a nan kundu kundu, kpa ve palegh u pinen nan akaa a i gbe u vea fa keng ga la. (Anz. 20:5) Shi mbatamen vea fatyô u ôron nan injakwagh i ia wase nan u nengen er ieren i nan la i lu shami ga yô, di er Natan yange er tom a injakwagh u wasen Davidi nahan. Alaghga shighe u mbatamen ve hii teman vea or shon la je, nana vaa afanyô kpishi sha ieren man mhen u nan u shami ga la. Adooga je yô nana gema ishima.
11. Yesu yange eren a mbaasorabo nena?
11 Mbatamen ka ve nôngo ér vea dondo ikyav i Yesu. Shighe u Yesu u i nder un la lu lamen a Saulu u Tarsu yô, yange pine un mpin sha kwaghfan nahan ér: “Saulu, Saulu, er nan u tôvon mo a icana?” Mpin ne wase un u fan er ieren na la lu shami ga yô. (Aer. 9:3-6) Shi Yesu yange ôr kwagh u “kwase u i yer ér Yesebel” la ér: “M na un [shighe] mer a gema ishima.”—Mpa. 2:20, 21.
12-13. Mbatamen vea na or u nan er isholibo la shighe u geman ishima nena? (Shi nenge foto kpaa.)
12 Mbatamen ka ve dondo ikyav i Yesu, nahan mba kur ikyaa fele ér orsholibo la nan venda u geman ishima ga. Ior mbagen ka ve tese mgemshima sha kwa hiihii u mbatamen ve tem vea ve la je, kpa mbagen yô shighe ka a kar cii ve, ve gema ishima ye. Nahan a gba u mbatamen vea tema vea orsholibo u nan gem ishima sha kwa hiihii ga la a hemba kwa môm tseegh. Adooga mbatamen vea teman vea or shon sha kwa hiihii la je, nana hii u henen sha kwagh u i ôr nan la zulee. Nahan nana hide a iyol ijime nana zamber Yehova ér a de nan kwaghbo u nan. (Ps. 32:5; 38:18) Sha nahan yô, mbatamen vea hiden a teman vea nan yô, alaghga mnenge u nan una kaha kposo a u yange nan lu a mi sha kwa hiihii la.
13 Mhôônom ka ma kôr mbatamen mba ve lu nôngon ér vea wase orsholibo nana gema ishima la, shi ka ve er a nan kundu kundu. Ka ve sôn Yehova ér a ver iniôngon ve la doo doo, shi ve ver ishima ér anmgbian ve la nana kav ibumegh ki nan nana gema ishima.—2 Tim. 2:25, 26.
Mbatamen vea tema vea orsholibo la a hemba kwa môm tseegh, sha er vea na nan shighe nana gema ishima yô (Nenge ikyumhiange i sha 12)
14. Ka an ka nan zua a iwuese shighe u orsholibo nan gema ishima, man ka sha ci u nyi?
14 Orsholibo ka nana gema ishima yô, se ember kpishi! (Luka 15:7, 10) Ka an ka nan zua a iwuese? Ka mbatamenaa? Umbur kwagh u Paulu a nger sha kwagh u mbaasorabo la, ér: “Alaghga Aôndo una na vea gema ishima.” (2 Tim. 2:25) Nahan ka orumace ka nan wase Orkristu u geman mhen u nan ga, ka Yehova. Paulu pase se akaa a dedoo a or ka nana gema ishima ve nan zua a mi yô. Or shon ka nan zua a mfe u vough u mimi la, nahan nan mase kaven er nan er ibumekwagh yô, maa nan osough ken kwaghhônon u Satan la.—2 Tim. 2:26.
15. Mbatamen vea za hemen u wasen orsholibo u nan gem ishima la nena?
15 Shighe u or gem ishima yô, mbatamen vea za hemen u sôron or shon sha er vea wase nan nana hide a taver jighjigh u nan shi nana za hemen u palegh ameen a Satan geman eren kwagh u dedoo yô. (Heb. 12:12, 13) Nahan kpa, mbatamen mba pasen mbagenev akaa a orsholibo la nan er la ga. Kpa ka nyi ka i gba u a pase tiônnongo ashighe agene?
“KÔÔM MBA VE EREN ISHOLIBO LA SHA ISHIGH KI IOR CII”
16. Sha kwagh u i ôr ken 1 Timoteu 5:20 yô, ka unô ve lu “ior cii” mba Paulu a ôr kwagh ve laa?
16 Ôr 1 Timoteu 5:20. Paulu yange kaa a Timoteu, u un kpa lu ortamen la ér a “kôôm mba ve eren isholibo la sha ishigh ki ior cii.” Paulu yange lu kaan ér i kôôm orsholibo la sha ishigh ki tiônnongo jimin ciili? Ka nahan keng ga. Kpa yange lu ôron kwagh u iorov kpuaa mba alaghga ve fe kwaghbo u or shon nan er la. A fatyô u lun ior mba ve nenge kwagh u or shon nan er la, shin mba orsholibo shon nan ôr ve kwagh u nan er la. Nahan mbatamen vea pase ior mba ve fe kwagh shon la ér, i nenge sha kwagh u orsholibo shon nan er la.
17. Aluer mba ken tiônnongo kpishi fa isholibo i vesen i or nan er la shin ka u ior vea va fa kwagh shon yô, a yôô ken tiônnongo ér nyi, man ka sha ci u nyi?
17 Nahan kpa ashighe agen yô, mba ken tiônnongo kpishi vea fa kwagh u or shon nan er la shin vea va hingir u fan. Aluer ka nahan yô, ishember i “ior cii” la ia wa tiônnongo jimin cii ker. Nahan ortamen nana yôô ken tiônnongo ér, i kôôm anmgbian u nomso shin u kwase shon. Sha ci u nyi? Paulu na mlumun ér: “Sha er a lu icintan hen mbagenev cii” nahan vea kera er isholibo i vesen ga yô.
18. Shighe u wanye u nan yen anyom 18, u nan er batisema nan er isholibo i vesen yô, ka nyi mbatamen ka ve ere? (Shi nenge foto kpaa.)
18 Shighe u wanye u nan yen anyom 18, u nan er batisema nan er isholibo i vesen yô, ka nyi mbatamen vea ere? Mzough u mbatamen una tsua mbatamen uhar vea tema vea wanye shon kua mbamaren mba nan mba ve lu Mbashiada yô. b Mbatamen vea pine mbamaren mbara kwagh u ve lu vanden eren u wasen wan ve ér nana gema ishima yô. Aluer wanye la nan lumun kwaghwan u mbamaren mba nan shi nan ngu eren tom sha mi yô, mbatamen mba uhar mbara vea fatyô u tsuan ér vea de mbamaren mbara ve za hemen u wasen wan ve la. Mbatamen fa ér Aôndo na mbamaren tom u kôôm mbayev vev sha dooshima. (Dut. 6:6, 7; Anz. 6:20; 22:6; Ef. 6:2-4) Mbatamen mbara vea masen lamen vea mbamaren mba nan sha u fan er ve lu wasen wan ve la vough vough yô. Kpa aluer wanye la nan venda u geman ishima yô, mbatamen vea er nena? Aluer kwagh ngu nahan yô, kômatii u mbatamen una tema vea wanye shon kua mbamaren mba nan mba ve lu Mbashiada yô.
Mbatamen uhar vea tema vea wanye u nan yen anyom 18 u nan er isholibo i vesen la, kua mbamaren mba nan mba ve lu Mbashiada la (Nenge ikyumhiange i sha 18)
‘YEHOVA EREN A VESE KUNDU KUNDU SHI ZUNGWEN SE MHÔÔNOM’
19. Mbatamen ka ve dondo ikyav i Yehova shighe u ve tem vea or u nan er isholibo i vesen la nena?
19 Yehova soo ér mbatamen ve yange mba ve vende u kuran atindi a na la u vihin ior nav. (1 Kor. 5:7) Shi mbatamen ka ve soo u wasen mbaasorabo ér ve gema ishima, aluer gba shami yô. Nahan ka vea wasen orsholibo yô, ve ver ishima ér nana gema ishima. Sha ci u nyi? Sha ci u mbatamen mba dondon ikyav i Yehova, u a ‘eren a vese kundu kundu shi a zungwen se mhôônom’ la. (Yak. 5:11) Kape apostoli Yohane yange eren a anmgbianev nav mba nomso man mba kasev sha dooshima je la. A nger ér: “Mbayev av, m ngu ngeren ne akaa ne sha er ne er isholibo ga yô. Kpa aluer or er ma isholibo yô, se mba a orwasen u a lu vea Ter yô, ka Yesu Kristu je la, un ka u perapera.”—1 Yoh. 2:1.
20. Ka nyi se lu timen sha mi ken ngeren u masetyô ken Iyoukura nee?
20 Kwagh ka a er i vihi yô, ashighe agen Orkristu nana venda u geman ishima. Aluer kwagh ngu nahan yô, i dugh nan ken tiônnongo kera kpee je. Shighe u kwagh a lu nahan yô, mbatamen ka ve er nena? Se va seer timen sha kwagh ne ken ngeren u masetyô ken Iyoukura ne.
ICAM 103 Mbakuran mba I Ne, Ve Lu Uiyua La
a Kera yô, yange i yila anmgbianev mban ér kômatii u ijirigh. Kpa er ijirôron i lu di vegher môm u tom u mbatamen yô, se kera er tom a ishember i “kômatii u ijirigh” la ga. Kpa se gema yilan anmgbianev mban ser, kômatii u mbatamen.
b Kwagh u i ôr sha kwagh u mbamaren la a fatyô u lun or u tindi a ne nan ian i hingir ormaren shin or u nengen sha wanye u nan yen anyom 18 la. (A fatyô u lun nom vea kwase u nan cii.)
