Aluer or er nahan yô, tiônnongo una nenge ivese i nan i hiihii la ér yange i kure shighe u nan hide nan vôso orgen la. Shi tiônnongo una nenge ivese i nan i he ne ér tindi kange i. Er i hii ve tiônnongo una nenge nahan yô, de se time sha kwagh u Yesu yange ôr sha kwagh u paven ivaa hiden vôson orgen la tsô se fa.

Er i nger ken Mateu 19:9 nahan, Yesu pase ityôkyaa i or a pav ivaa vea or u nan vôso la ve, a lu sha tindi la wang. A kaa ér: “Aluer or pav ivaa a kwase u nan man ka sha ci u kwase la er idya ga, man nan za er kwase ugen yô, or la nan er idya.” Akaa a se hen ken mkaanem ma Yesu mara yô, ka a ne: (1) ka sha ityôkyaa i idya tseegh Bibilo i lumun ér or a pav ivaa ye, shi (2) aluer or pav ivaa a kwase u nan sha ityôkyaa i Bibilo i lumun a mi ne ga, nan hide nan vôso kwase ugen yô, or la nan er idya. *

Mkaanem ma Yesu mara tese ér aluer nom nan er idya man nan pav ivaa a kwase u nan yô, nan ngu a ian i hiden vôson kwase ugene? Ka nahan keng ga. Aluer nom nan er idya yô, kwase u nan u a er idya ga la una fatyô u den nan kwaghbo shin vendan ér una kera lu vea nan ga. Aluer a venda u lun vea nom na u a er idya la, shi a pav ivaa a na sha tindi yô, ngu a ian i hiden vôson orgen, nom la kpa ngu a ian i hiden vôson kwase ugen.

Nahan kpa, alaghga a sar kwase u a er idya ga la kpishi u lun vea nom na u a er idya la her, nahan una pase nom na la ér un soo u den un kwaghbo. Kpa aluer nom na shon lumun ga, mough za tswen a za nger takeda u paven ivaa ye? Er kwase la a soo u den nom na kwaghbo la ér ivese ve i za hemen yô, Bibilo lumun ér nom na la a hide a vôso kwase ugen ga. Aluer nom na shon per tindi u Bibilo za er kwase ugen yô, shi a er ka idya igen, nahan a gba u mbatamen shi vea tsua kômatii ugen, a ôr un ijir.—1 Kor. 5:1, 2; 6:9, 10.

Aluer or u Bibilo i lumun ér nana paa ivaa nana hide nana vôso orgen ga la, nan per tindi u Bibilo nan hide nan vôso orgen yô, tiônnongo una nenge ivese i nan i hiihii la man i he ne nena? Sha kwagh u Bibilo i tese yô, tindi kange ivese i nan i hiihii la here? Kwase u nan u a er idya ga la una fatyô u kaan ér una lu vea nan her, shin vendan ér una kera lu vea nan gaa? Tiônnongo una nenge ivese i he i or la nan er la ér ka idyaa?

Tsuaa la, yange or a pav ivaa a or u nan vôso la, nana hide nana vôso orgen, man or u yange nan hii vôson ve nan pav a nan la nana lu uma her, shi nana vôso orgen ga, shi nana er idya kpaa ga yô, tiônnongo a nenge or u nan hide nan vôso orgen la ér nan ngu eren idya. Nahan kpa, shighe u Yesu lu ôron kwagh u paven ivaa hiden vôson orgen la, yange ter kwagh u or u ken ivese u nan er idya ga la ga. Sha nahan yô, kwagh u paven ivaa hiden  vôson orgen u Yesu kaa ér ka idya la, una kure ivese i hiihii i or u nan hide nan vôso orgen la.

Aluer or u nan er idya la nan pav ivaa a kwase u nan u a er idya ga la, nan hide nan za vôso kwase ugen yô, ian kera ngi i kwase u i pav ivaa a na a ishô na la una za keren atôakyaa a una de or la kwaghbo shin una venda u lun vea nan ga. Sha nahan yô, kwase la una kera ya ican ken ishima kpishi u henen kwagh u una tsua u eren sha ikyaa shon la ga. Shi aluer kwase u i pav ivaa a na a ishô na iyol la ngu uma her, shin a er nom ugen ga, shin a er idya ga kpa, tiônnongo una nenge ér ivese na vea or u a hide a vôso kwase ugen la kure. *

Kwagh u se tim sha mi ne cii, se mba ôron ka shighe u nom nan er idya, nahan nan hingir u paven ivaa a kwase u nan yô. Nahan, aluer nom nan er idya ga, kpa nan pav ivaa a kwase u nan, nan hide nan er kwase ugen di ye? Shin aluer nom nan pav a kwase u nan cii nan mase za eren idya, man kwase u nan la soo u den nan kwaghbo je kpa, nan hide nan er kwase ugen di ye? Sha igbenda ne cii, er nan pav ivaa a kwase u nan la nan hide nan vôso kwase ugen je, nan er idya, nahan ivese i nan i tse la kure. Tindi una kange ivese i nan i he ne. Er yange i ôr ken Iyoukura i ken zwa buter i Novemba 15, 1979, peeji u sha 32 la nahan, “nana kera fatyô u paven ivaa a kwase u nan u he la, hiden za kohol kwase u tse la ga. Er nan vande paven ivaa a kwase u nan u tse la, shi yange nan er idya, shi nan hide nan vôso kwase ugen yô, ivese i nan i tse la kure.”

Gbenda u i hide i nyôôso mkav ne la tese ér ivese kera ka icighankwagh ga ze, shin tese ér idya kera ka isholibo i vesen ga ze. Aluer or pav ivaa a kwase u nan man ka sha ityôkyaa i Bibilo i lumun ér i pav ivaa la ga, shi nan per tindi u Bibilo nan hide nan vôso kwase ugen yô, nan er idya, nahan a gba u mbatamen vea tsua kômatii, a ôr nan ijir. (Aluer kwase u he u or shon nan hide nan vôso la kpa nan civir Yehova yô, nan kpa nan er idya, nahan nan kpa a gba u mbatamen vea tsua kômatii, a or nan ijir.) Shin er tiônnongo una nenge ivese ve la ér mba eren ka idya ga nahan kpa, ve per tindi u Aôndo sha kwagh u ivesegh, nahan nom la nan kera kuma u a na nan ityom i ken tiônnongo ga anyom imôngo, zan zan saa mba ken tiônnongo vea va de u nengen nan dang sha kwaghbo u vesen u yange nan er la. Shi cii ve i na nan ma tom ken tiônnongo yô, a gba u mbatamen vea hen sha mlu u kwase u or shon yange nan paa ivaa a nan sha mimi ga la, kua mlu u wan shin ônov mba alaghga yange nan undu kwase shon a mi la kpaa.—Mal. 2:14-16.

Er u paven ivaa sha tindi er Bibilo i tese la ga i lu isholibo i vesen yô, doo u Mbakristu vea dondo ikyav i Yehova shi vea nengen ivese ér ka icighankwagh.—Orpa. 5:4, 5; Heb. 13:4.