1. Ka i lu mbagenev nena shighe u ve due kwaghpasene? (Shi nenge foto kpaa.)

 ER SE lu ior mba Yehova yô, ka se pasen ior kwagh sha ci u Ter wase u sha la doo se ishima shi se soo ser se wase mbawanndor a vese kpa ve fa un. Man ka i doo mbapasenkwagh kpishi u eren tom ne. Kpa mbagenev yô, ka maan ve iyol u pasen kwagh ga. Sha ci u nyi? Mbagenev ka i cier ve iyol u pasen kwagh sha ci u mba cie ashe. Mbagenev di ka i cier ve iyol u zan hen ya u or abur abur. Alaghga a cier mbagenev iyol ér or a va za zenda ve hen ya u nan. Mbagenev yô, i tese ve u palegh u lun a zayol vea mbagenev. Shin er Yehova a doo anmgbianev mban ishima nahan kpa, ka i taver ve u pasen mba ve fa ve ga la kwagh u loho u dedoo. Nahan kpa, er ve fe ér tom ne ka kwagh u hange hange yô, ka ve pasen kwagh hanma shighe cii. Man kwagh la ka a na i saan Yehova iyol a ve je ka u henen a hen ga!

2. Aluer ashighe agen ka i saan we iyol ken kwaghpasen ga kpa, er nan ve i doo u iyol a kpe u ga?

² Ka i taver we u zuan a msaanyol ken kwaghpasen sha ci u ashe a cianaa? Aluer ka nahan yô, iyol i de kpen we ga. Er u cie ashe yô, alaghga kwagh la ka ikyav i tesen ér u hiden a iyol ijime shi u keren wer i nenge a we ga. Shi kwagh la tese ér u soon wer u gba anyiman sha kwagh vea mbagenev ga. Or môm kpa nan soon ér nana er kwagh i vihi mbagenev ga, hemban je yô shighe u nan lu nôngon ér nana er kwagh u dedoo yô. Teru u sha la fa mbamtaver mba u lu tagher a mi yô, nahan a soo ér una na u iwasen i kwagh a gbe u a mi la. (Yes. 41:13) Ken ngeren ne, se lu timen sha akaa ataan a aa wase se u nôngon a mbamtaver  mban shi aa wase se u zuan a msaanyol ken kwaghpasen yô.

DE MKAANEM MA AÔNDO MA TAVER WE ISHIMA

3. Ka nyi yange i wase profeti Yeremia u pasen mbagenev kwagh?

³ Sha ayange a tsuaa la kpa, mkaanem ma Aôndo yange ma taver mbacivir un ishima shighe u tom u a ne ve la u taver ve u eren yô. Nenge ase ikyav sha kwagh u profeti Yeremia. Ishima yange i nyian un shighe u Yehova tindi un ér a za pase kwagh la. Nahan Yeremia kaa ér: “M fa u ôron kwagh dedoo ga, gadia mo m ngu wanye je.” (Yer. 1:6) Ka nyi yange i wase un ve taver ishima za er tom u Yehova wa un laa? Mkaanem ma Aôndo yange ma taver un ishima. Nahan a kaa ér: “Hingir mo ken ishima er usu u hian, u i cir u ken akuhe am yô, m wa ishima je, m vôr.” (Yer. 20:8, 9) Shin er ior mba hen haregh u Yeremia pasen kwagh her la taver kwagh kpishi nahan kpa, loho u i tindi un ér a za pase la na un agee a kwagh gba un a mi la.

4. Ka sea ôron Mkaanem ma Aôndo shi sea henen sha mi yô, kwagh la a wase se nena? (Mbakolose 1:9, 10)

⁴ Mbakristu ka vea ôr Mkaanem ma Aôndo yô, ve zua a ishimataver. Shighe u apostoli Paulu lu ngeren washika hen tiônnongo u ken Kolose la, yange ôr ve er i gbe u anmgbianev vea lu a mfe u vough la ve vea fatyô u “zenden sha gbenda u doon Yehova” shi vea za hemen u “umen atam ken hanma tom u dedoo” yô. (Ôr Mbakolose 1:9, 10.) Tom u dedoo la wa u pasen loho u dedoo kpa ker. Nahan ka sea ôron Mkaanem ma Aôndo shi sea henen sha mi yô, jighjigh u se ne Yehova la a seer taver, shi se nenge er i gbe hange hange u se pase loho u Tartor yô.

5. Se er nan ve se hemba zuan a iwasen ken Bibilo i ôron man kwaghhenen wase?

⁵ Cii ve se zua a iwasen ken Mkaanem ma Aôndo yô, gba u se palegh u ôron shin henen ma ayem ayem. Tôô shighe tsembelee hen sha kwagh u u ôr ken Bibilo la. Aluer u ôr ma ivur Bibilo man taver we u kaven yô, de karen i yemen ga. Kpa, seer henen sha kwagh u u ôr la ken Takerada u Tôvon sha Kwagh ú Mbashiada mba Yehova gayô za hen Ijiir i Watchtower a Koson Ityakerada sha Intanet la, sha er u zua a iwanger yô. Aluer u tôô shighe u ngu henen kwagh yô, u seer lun a vangertiôr wer hanma kwagh u Bibilo i ôr cii ka mimi. (1 Tes. 5:21) Ka wea luun a vangertiôr wer Mkaanem ma Aôndo ka mimi yô, i hemba saan we iyol u pasen mbagenev kwagh u u hen la.

 WAAN IYOL TSEMBELEE SHA KWAGHPASEN

6. Gba u se waan iyol tsembelee sha kwaghpasen sha ci u nyi?

⁶ Aluer u wa iyol sha kwaghpasen tsembelee yô, a kera cier we iyol u lamen a ior ga. Yesu yange wase mbahenen nav u wan iyol cii ve mase tindin ve ér ve za pase kwagh ye. (Luka 10:1-11) Man er yange ve dondo akaa a Yesu tese ve ér ve er la yô, ve zua a msaanyol kpishi ken akaa a ve er la.—Luka 10:17.

7. Se wa iyol sha kwaghpasen nena? (Shi nenge foto kpaa.)

⁷ Se wa iyol sha kwaghpasen nena? Gba u se hen sha kwagh u se za ôr yô, man gbenda u se ôr kwagh shon ken mkaanem asem ve a hemba doon yô. Shi doo u se hen sha akaa a ior mba hen haregh wase vea ôr a vese la, man gbenda u se er kwagh sha kwagh u ve lam a vese sha mi la kpaa. Nahan shighe u se lu pasen ior kwagh yô, doo u se kundu ishima shi se lu a ve sar sar.

8. Ka sha igbenda i nyi nahan Mbakristu ve lu er ka mkam ma inyaav ma apostoli Paulu a ôr kwagh u ma laa?

⁸ Apostoli Paulu yange kaa a anmgbianev nav mba nomso man mba kasev mba ve lu Mbakristu la ér: “Se mba a kwagh u injaa ne ken mkam ma inyaav.” (2 Kor. 4:7) Kwagh u injaa ne ka nyi? Ka tom u pasen kwagh u Tartor u se eren sha u waren uuma mba iorov la. (2 Kor. 4:1) Mkam ma inyaav mara di ka nyi? Ma tile sha ityough ki mbacivir Aôndo mba ve pasen ior mbagenev loho u dedoo la. Sha shighe u Paulu la, mbakasuav yange ve wa akaainjaa er kwaghyan man wain kua inyaregh nahan ken mtem ma inyaav shighe u vea zaan zende yô. Se kpa Yehova na se tom u injaa u pasen mbagenev kwagh u loho u dedoo. Man sha iwasen na yô, se fatyô u zuan a agee a kwagh a gbe se a mi u eren tom u pasen kwagh la.

SÔN YEHOVA A NA U ISHIMATAVER

9. Se er nan ve se de u cian ior shin cian ser ior vea venda u keghen ato a vese? (Shi nenge foto kpaa.)

⁹ Ashighe agen a cier se iyol er ior vea zenda se hen uyaav vev shighe u se dugh kwaghpasen nahan. Kpa se er nan ve se hemba mciem maraa? Nenge ase msen u mbaapostoli yange ve er shighe u i kaa ér ve de u pasen kwagh la. Yange ve de ér mciem ma yange ve u pasen kwagh ga, kpa ve sôn Yehova ér a wase ve vea “za hemen u pasen loho [na] gbar gbar.” Yehova maa ungwa msen ve la her a ave ave je. (Aer. 4:18, 29, 31) Aluer se kpa ashighe agen ka i cier se iyol u pasen kwagh yô, gba u se sôn Yehova ser a wase se. Sôn Yehova a wase u sha er ior vea  seer doon we ishima nahan u de u cian ve, kpa u ôr ve loho u dedoo yô.

10. Yehova ngu wasen se u eren shiada sha kwagh na nena? (Yesaia 43:10-12)

¹⁰ Yehova tsua se ér se lu Mbashiada nav, shi a tôndo zwa ér una wase se, se lu taveraa. (Ôr Yesaia 43:10-12.) Nenge ase igbenda inyiin i ka a er kwagh ne yô. Hiihii yô, Yesu ka a lu a vese hanma shighe u se lu pasen loho u dedoo cii. (Mat. 28:18-20) Sha uhar yô, Yehova ver mbatyomov ér ve wasen se. (Mpa. 14:6) Sha utar yô, Yehova na se icighan jijingi na ér a wase se u umbur akaa a se vande henen yô. (Yoh. 14:25, 26) Sha unyiin yô, Yehova na se anmgbianev mba nomso man mba kasev mba vea eren tom u pasen kwagh ne a vese imôngo yô. Nahan sha iwasen i Yehova man anmgbianev asev yô, se fatyô u taver ishima eren tom u pasen kwagh ne.

GEMAN A GBENDA U PASEN KWAGH SHI LU A MNENGE U VOUGH

11. U er nan ve u zua a ior kpishi ken kwaghpasene? (Shi nenge foto kpaa.)

¹¹ Ka wea due kwaghpasen man wea zua a ior kpishi mba pasen ve kwagh ga nahan iyol i kpe u wee? Doo u u pine iyol you wer: ‘Ka han ior mba hen haregh wam ve lu hegene?’ (Aer. 16:13) ‘Mba sha ajiir a tom shin ve yem kasua?’ Aluer ka nahan yô, alaghga u hemba zuan a ior mba pasen ve kwagh aluer u due kwaghpasen sha godobi yô. Anmgbian ugen iti na ér Joshua, a kaa ér: “M nenge mer ka mea due kwaghpasen sha ajiir a i teen kwagh shin ajiir a ior ve lun her kpishi yô, m hemba zuan a ior.” Shi un vea kwase na Bridget ve nenge ér ka vea due kwaghpasen aikighe shin sha iyange i Lahadi atetan yô, ve hemba zuan a ior hen uya vev.—Ef. 5:15, 16.

12. Se er nan ve se fa akaa a ior ve ne jighjigh a mi shin a hembe gban ve kwagh laa?

¹² Aluer ior mba u lu pasen ve kwagh la soo u keghen ato a we ga kpa, nôngo fa akaa a ve ne jighjigh a mi shin a hembe gban ve kwagh la. Joshua man Bridget ka ve pine ior mbampin mba ka ve lu sha ishigh ki trak la u hiin iliam a ve. Ikyav i tesen yô, ka vea soo u lamen a or ken trak u U Nenge Bibilo Nena? la yô, ve kaa a nan ér: “Ior mbagenev nenge Bibilo ér ka takeda u Aôndo a ne i nger yô, kpa mbagenev yô nenge i nahala keng ga. We  u nenge nena?” Kwagh ne ka a wase ve u lamen a ior.

13. Aluer ior venda u keghen ato a vese je kpa doo u se fa ser se er tom wase u pasen kwagh la doo doo sha ci u nyi? (Anzaakaa 27:11)

¹³ Aluer se due kwaghpasen man ior kegh ato a vese ga kpa, se kure awashima wase. Se ôr nahan sha ci u nyi? Sha ci u se er shiada sha kwagh u Yehova man Yesu, man ka kwagh u ve soo ér se er je la. (Aer. 10:42) Shighe u se zua a or môm u pasen nan kwagh ga shin i venda loho wase je kpa, a fatyô u saan se iyol sha ci u se fa ser se mba eren kwagh u doon Ter wase u sha la.—Ôr Anzaakaa 27:11.

14. Aluer orpasenkwagh nan zua a or u nan soo u henen Bibilo hen haregh wase yô, a fatyô u saan se iyol sha ci u nyi?

¹⁴ Shi aluer orpasenkwagh ugen nan zua a or hen haregh wase u nan soo u henen Bibilo kpa a fatyô u saan se iyol. Iyoukura tôô tom wase u pasen kwagh ne kar sha tom u keren wanye u nan saa yô. Ior kpishi ka ve due ve samber sha ajiir wue wue ve keren nan. A za zuan a wan shon yô, i saan hanma or iyol, ka lun or môm u nan zough a nan la tseegh ga. Kape tom u geman ior hingir mbahenen kpa u lu vough je la. Ka i gba u hanma or ken tiônnongo nana er tom u pasen kwagh ne ve se pase kwagh hen haregh wase se tser ye. Nahan ka i saan hanma or ken tiônnongo iyol shighe u or u he nan hii u van mbamkombo yô.

YEHOVA MAN MBAWANNDOR A WE VE HEMBA DOON WE ISHIMA

15. Aluer se mba dondon kwagh u i ôr ken Mateu 22:37-39 la yô, kwagh la una na a saan se iyol ken tom u pasen kwagh la nena? (Shi nenge foto kpaa.)

¹⁵ Aluer Yehova man mbawanndor a vese hemba doon se ishima yô, a hemba saan se iyol u eren tom u pasen kwagh ne. (Ôr Mateu 22:37-39.) Hen er Yehova ka una nenge sea eren tom ne ve i saan un iyol, man er or ka nana hii Bibilo i henen ve i doo nan yô! Shi umbur wer mba ve ongo loho wase ne shi ve tsua ér vea civir Yehova yô vea fatyô u va lun uma gbem sha won.—Yoh. 6:40; 1 Tim. 4:16.

16. Aluer ka u se kera fatyô u zenden ga je kpa, se er nan ve se zua a msaanyol ken tom wase u pasen kwagh laa? Tese ikyav.

¹⁶ Kwagh ngu u a na ve ka i taver we u duen zan mape yôô? Aluer ka nahan yô, hemba veren ishima sha kwagh u u fatyô u eren sha u tesen wer Yehova man mbawanndor a we doo u ishima la. Anmgbian ugen iti na ér Samuel, un vea kwase na Dania yange angev mbu Korona  na yô lu u vea fatyô u duen zan mape ga, nahan ve gba lun hen ya tsô. Ken shighe u ican ne cii, ve lu pasen ior kwagh sha telefon shi ve lu ngeren ior uwashika shi henen Bibilo a ior sha Zoom. Samuel yange una za hen ape i lu sôron un kyansa la yô, a pase mba a zough a ve her la kwagh. A kaa ér: “Shighe u se tagher a mbamtaver yô, ishima ka i nyian se shi se vôr kpaa, man kwagh ne una fatyô u karen jighjigh u nan wase. Nahan gba u a saan se iyol ken mcivir u Yehova.” Hen shighe shon môm, Dania va dorough gba nahan i ver un tsa sha gambe je kuma iwer itiar. Maa i na un ikyekye i mbaawanev, nahan lu u una tsa shimi iwer ataratar. Dania kaa ér: “Yange m nôngo kpoghuloo m er akaa a mlu wam nam ian u eren la. Kwasenôôsu ugen yange va u va nengen a mo, nahan m pase un kwagh. Shi yange m lamen a ior mba ve vaan hen ya wam u va nan mo akaa yô. Shi m lam a kwase ugen u eren tom hen zege iyouci yô.” Samuel man Dania cii yange ve tagher a mbamtaver mba ve na taver ve u eren akaa agen yô, kpa yange ve er kwagh u ve fatyô la nahan ve zua a msaanyol.

17. U er nan ve u hemba zuan a iwasen ken mbamhen mba i dugh a mi ken ngeren ne laa?

¹⁷ Nôngo dondon mbamhen utaan mba i dugh a mi ken ngeren ne la cii. Hanma mhen u i dugh se a mi ken ngeren ne cii, ngu er ka ilyôghonough mbi sha iue nahan. Ka a nungwa ilyôghonough a wa sha iue yô, iue la i hemba doon u yan. Nahan aluer se mba dondon mbamhen mba i dugh se a mi mban cii yô, kwagh la una hemba wasen se u wan ishima a mbamnenge mba kpee shi a saan se iyol ken tom wase u pasen kwagh la kpaa.