1. Paradiso u ken jijingi la ka nyi, man ka nyi i gbe u se kange ishima u erene?

 NYIAN ne se mba ken paradiso u sha injakwagh u ior kpishi ve lu ker shi ve uve ityough u eren ishima i Yehova yô. Ior umiliôn imôngo mba ve lu ker la cii mba ken bem u mimi la. Mba ve lu ken paradiso ne, kange ishima ér mayange vea undu un ga. Shi ve soo ér vea wase ior kpishi er ve fetyô la ve va kohol ve ken ijiir i hemban doon ne. Ka hanma ijiir laa? Ka paradiso u ken jijingi la! a

2. Ka nyi i hembe kpiligh we iyol sha kwagh u paradiso u ken jijingi laa?

² Er se lu ken tar u Satan u u cieryol shi ifer kua ihyom i ngee ker nahan kpa, kwagh er doo yô, Yehova ver ijiir i sha injakwagh i ior nav vea lu ker ken bem man ken mzough yô. (1 Yoh. 5:19; Mpa. 12:12) Ter wase u sha u se doo un ishima la ngu nengen er mlu u tar ne a lu benden a ior yô, kpa ngu kuran mbacivir un sha er vea za hemen u civir un saan saan yô. Mkaanem nam kaa ér paradiso u ken jijingi ne ngu er “ijiir i yeren” man er “sule u i ur u mngerem” nahan. (Yes. 4:6; 58:11) Sha iwasen i Yehova yô, ior mba ve lu ken paradiso ne mba wan ishima a ayange a masejime a uma a taver yum ne.—Yes. 54:14; 2 Tim. 3:1.

3. Kwagh u i tsenga ôron ken Yesaia 65 la, yange kure sha mi sha ayange a Mbaiserael la nena?

³ Yehova yange mgbegha profeti Yesaia ôr er uma una lu ken paradiso u ken jijingi la yô. U fatyô u nengen a kwagh u profeti ne yange ôr la ken Yesaia ityough 65. Kwagh u yange tsenga  ôron la yange hii kuren sha mi ken inyom i 537 cii man shighe u Yesu la. Hen shighe la i pase Mbayuda mba ve lu uikyangen ken Babilon mba ve gema asema la, hide yem ken tar ve. Yehova yange ver ior nav doo doo shi wase ve u hiden sôron gar u Yerusalem u i vihi un côu côu la, hingir ijiir i doonashe shi i hide i sôr tempel na hide hingir ijiir i Mbaiserael cii civir Yehova her yô.—Yes. 51:11; Sek. 8:3.

4. Kwagh u i ôr ken Yesaia ityough 65 la, ngu kuren sha mi sha ayange ase ne nena?

⁴ Shi mkur u kwaghôron u Yesaia u sha uhar la, yange hii u kuren ken inyom i 1919 la. Ken inyom la mbacivir Yehova mba sha ayange ase ne due ken Zegebabilon kera. Nahan paradiso u ken jijingi la hii u samber sha tar cii. Mbapasen kwagh u Tartor sha gbashima yange ve ver atôônanongo kpishi sha tar shi ve lu tesen aeren a Mbakristu. Nomso man kasev mba yange ve wa tswam shi ve eren ijimba yô, hingir u ‘haan or u he iyol, u i gbe un sha awashima u Aôndo’ la. (Ef. 4:24) Nahan kpa, averen agen kpishi a Yesaia ôr kwagh u a la aa va kure sha mi kpôô kpôô ken tar u he. Hegen ne kpa, er se lu ken paradiso u ken jijingi ne, se mba zuan a averen kpishi. De se nenge sha averen a se lu zuan a mi ken paradiso u ken jijingi ne yô, man er i hii ve i doo u mayange je se due ker ga yô.

ER I LU MBA KEN PARADISO U KEN JIJINGI LA YÔ

5. Yesaia ityough 65:13 kaa ér, ka averen a nyi mba ve lu ken paradiso u ken jijingi la ve lu zuan a mi?

⁵ Mba gbang gbang shi kundu ve iyol. Profeti Yesaia yange ôr mkposo u a lu hen atô u ior mba ve lu ken paradiso u ken jijingi la man u mba ve lu ker ga la wang. (Ôr Yesaia 65:13.) Yehova ngu nan mbacivir un hanma kwagh u kwagh a gbe ve a mi u una wase ve vea za hemen u lun vea na kôôsôô yô. A na se icighan jijingi na kua Mkaanem nam, man ityakeda kpishi i pasen Bibilo sha er se “ya kwagh, . . . [se] ma kwagh, . . . [shi se] ember” yô. (Nenge Mpase 22:17.) Kpa mba ve lu ken paradiso u ken jijingi ga la yô, mba “ijen . . . , [shi mba] imura . . . , [shi ve kôr] kunya.” Mba ijen ken jijingi sha ci u ve fa Aôndo ga.—Amo. 8:11.

6. Sha kwagh u Yoel 2:21-24 a ôr yô, ka akaa a nyi nahan Yehova a ne se, man akaa shon aa wase se nena?

⁶ Ken kwaghôron u profeti, u profeti Yoel ôr la, a ter akaa a ken uma a hange hange a Yehova a ne ior nav yô. Yange ôr kwagh u ishamakaa man wain kua mkurem ma olev u tesen er Yehova a nengen sha mbamgbe mba ior nav mba sha iyol kua mba ken jijingi tsembelee yô. (Yoel 2:21-24) Ikyav i tesen yô, a na se Bibilo kua ityakeda i pasen Bibilo, man ijiir yase i sha Intanet la kua mbamkombo man mbamkohol mba kiriki kua mbamkohol mba vesen. Se fatyô u zuan a iwasen ken akaa a a ne se hanma iyange ne, kwagh la una na yô, se hemba lun kôôsôô a Yehova shi a saan se iyol.

7. Ka nyi ka i na se “iember ken ishima”? (Yesaia 65:14)

⁷ Saan ve iyol shi kwagh u ve lu a mi la kuma ve. Ior mba Yehova vea ‘wa icam sha iember’ sha ci u ve wuese akaa a Yehova a er a ve la. (Ôr Yesaia 65:14.) Akaa a taver se ishima man a surun se ishima a Mkaanem ma Aôndo ma ôr la kua ishimaverenkeghen i sha kwagh u ken hemen i se lu a mi sha ci u nagh ku ipaan ku Kristu kura na yô, se mba a “iember ken ishima.” Ka sea lamen vea anmgbianev asev mba se civir Yehova a ve imôngo la sha akaa ne yô, i saan se iyol sha mimi!—Ps. 34:8; 133:1-3.

8. Ka aeren a vesen ahar a nyi a lu hen atô u ior mba Yehova mba ve lu ken paradiso u ken jijingi laa?

⁸ Aeren a vesen ahar a a lu hen atô u ior mba Yehova mba ve lu ken paradiso u ken jijingi la yô, ka dooshima man mzough. Aeren a a zua se ve se lu kangenaa ne, wase se u fan er  uma una va lu ken tar u he la yô. Hen shighe la dooshima man mzough u una lu hen atô u mbacivir Yehova la una ngee a hemba er a lu hegen ne. (Kol. 3:14) Anmgbian u kwase ugen ôr kwagh u yange nenge a mi hen atô u ior mba Yehova shighe u hii fan ve la, a kaa ér: “Yange saan mo iyol ga, kua shighe u mea lu vea tsombor wam je kpaa. Lu hen Mbashiada mba Yehova m hii nengen er ka i er kwagh a or sha dooshima ye.” Hanma or u nan soo ér i saan nan iyol sha mimi shi kwagh u nan lu a mi la a kuma nan yô, a gba u nana va kohol se ken paradiso wase u ken jijingi ne. Aluer ka nyi je ior i tar ne i hen sha ior mba Yehova kpa, se mba a iti i dedoo vea Yehova man mba se civir un a ve la cii.—Yes. 65:15.

9. Yesaia 65:16, 17 kaa ér nyi sha kwagh u mbamzeyol mba ve ne se lu yan ican hegen nee?

⁹ Ishima ze ve iyol ga shi mba bem bem. Yesaia 65:14 kaa ér mba ve venda u nyôron ken paradiso u ken jijingi la, vea “vaa sha ci u ishima i vihin,” shi ‘vea gbire ivaa sha ci u mvihi u i vihi jijingi ve tsung la.’ Kpa ior mba Aôndo mba akaa a vihin tsung a lu eren ve la di ye? Shighe una karen yô, mbamzeyol vev mbara vea ‘hungur ve kera, sha ci u i yer ve sha ashe a Aôndo.’ (Ôr Yesaia 65:16, 17.) Yehova una bee a mbamzeyol asev kera, shi shighe a karen yô, se kera umbur er yange mbamzeyol mbara na lu se ken ishima la tsô kpaa ga.

10. U nenge wer ka sea luun vea anmgbianev asev mba nomso man mba kasev nahan kwagh la a wase se nena? (Shi nenge foto Kpaa.)

¹⁰ Hegen je kpa, ka sea za mbamkombo asev mba Mbakristu yô, i pever se iyol shi se hungur a mbamzeyol mba ve lu ken botar ne la cii. Ka se wase anmgbianev asev mba nomso man mba kasev sha er ve kpa a pever ve iyol sha u lun a aeren a ityamegh ki jijingi er dooshima man iember man bem man erdoo man ishima i legh legh nahan. (Gal. 5:22, 23) Doo se kpishi er se lu ken nongo u Yehova yô! Mba vea za hemen u lun ken paradiso u ken jijingi ne cii vea nenge er Aôndo una kure ityendezwa na i a er u van a “usha mba hev man tar u he” la.

11. Sha kwagh u Yesaia 65:18, 19 a ôr yô, paradiso u ken jijingi la na ka se ken ishima nena?

¹¹ Saan ve iyol shi mba a iwuese. Yesaia shi pase er i hii ve i gbe u se lu ‘saan saan shi se ember’ ken paradiso u ken jijingi ne yô. Ka Yehova a er paradiso u sha injakwagh ne ye. (Ôr Yesaia 65:18, 19.) Nahan ka a inja kpishi er Yehova a lu eren tom a vese u wasen ior ér ve due ken mbamzough mba tar ne, mba ve tesen ve kwagh u Aôndo ga la, ve va ken paradiso u ken jijingi ne yô! Averen a se lu zuan a mi sha ci u se mba ken mimi ne na yô, saan se iyol kpishi.  Nahan kwagh la ka a mgbegha se u za ôron mbagenev kwagh u paradiso la.—Yer. 31:12.

12. Akaa a i ôr ken Yesaia 65:20-24 la na yô, ka u ken ishima nena, man ka sha ci u nyi?

¹² Shi ishimaverenkeghen i se lu a mi sha ci u se ya ijende a Yehova kôôsôô la na yô, saan se iyol shi se mba a iwuese kpishi. Hen sha hanma kwagh u se va fatyô u nengen a mi shi eren ken tar u he u a Aôndo a tende zwa u van a mi la! Bibilo kaa ér: “Wanikyundan u lun ayange kpuaa nana kera lu ga,” ior vea tsa gbem. Se ‘maa uya man se tema keregh, shi se kaha ishule i ikon i wain, man se ya atam a i.’ ‘Se lôô, man orgen á kar á ya, ga;’ sha ci u ‘Yehova una ver se doo doo.’ A tôndo zwa a vese ér kwagh môm a kera lu u nan se mciem ga, a kpe se iyol shi uma wase una lu a inja. A kaa ér: “Tsô er se lu a yila ga kpaa” una fa kwagh u se soo la, nahan ‘Una na hanma kwagh u uma sha isharen na, a kuma un.’—Yes. 65:20-24; Ps. 145:16.

13. Yesaia 65:25 pase gbenda u ior ka ve sôr anza a ve, shighe u ve hii u civir Yehova la nena?

¹³ Mba ken bem shi kwagh u nan ve mciem ngu ga. Ior kpishi mba yange ve eren kwagh sha tswam shi ve eren kwagh sha mimi ga kpa jijingi u Aôndo wase ve u dughun anza ne ken a ve kera. (Ôr Yesaia 65:25.) Ve nôngo kpoghuloo ve dugh aeren a bo la ken ve kera. (Rom. 12:2; Ef. 4:22-24) Ka mimi, er ior mba Aôndo ve yina her yô, vea za hemen u eren akaa agen shami ga. Nahan kpa Yehova zua ior kposo kposo ve soo ayol a ve shi mba ken bem. (Titu 2:11) Ka Aôndo u hembanagee la tseegh una fatyô u eren ivande ne ye!

14. Kwagh u i ôr ken Yesaia 65:25 la zua sha kwagh u anmgbian ugen nena?

¹⁴ Ior vea fatyô u geman anza ve sha mimi je kpa? Nenge kwagh ugen u yange er yô. Gumor ugen u lu anyom 20 yô, yange i shi wuhen un ken purusu sha ci u lu or u wa tswam kpishi shi eren idya yô. Yange i wuhe un kwagen la sha ci u za ii or mato shi vihi or hunda nyôr ii shi er afer agen a vihin kpishi. Yange a kegh a kegh iyol u nôngon num. Kpa va fe mimi u Bibilo shi hiin u zan mbamkombo vea Mbashiada mba Yehova yô, a mase kaven er uma na a lu a inja yô, sha ci u hingir u lun ken paradiso u ken jijingi la. Va eren batisema hingir Orshiada yô, ka a shi henen er kwagh u Yesaia 65:25 a ôr la a zough sha kwagh na yô. A gema inja, nahan kera eren kwagh sha tswam er ka begha nahan ga, kpa a hingir u eren kwagh ken bem er ka iyôngo nahan.

15. Se soo ser se wase mbagenev ve va kohol se ken paradiso u ken jijingi ne sha ci u nyi, man se er kwagh ne nena?

¹⁵ Yesaia 65:13 hii sha u kaan ér: “Ter AÔNDO ngu kaan nahan er.” Ivur i sha 25 la maa kure sha mkaanem man nahan ér “kape TER A kaa la.” Uityendezwa mba Yehova mba kur sha mi hanma shighe cii. (Yes. 55:10, 11) Hegen je kpa, se mba ken paradiso u ken jijingi la. Yehova ngu a tsombor u ior mba ve lu ker la ve due kposo a ior i tar ne yô. Er se lu ken tsombor u Yehova ne yô, saan se iyol shi se mba ken bem shin er se lu ken tar u ior ve we tswam ker kpishi ne nahan kpaa. (Ps. 72:7) Sha nahan yô, se soo ser se wase ior kpishi er se fetyô la cii ve va kohol se ken tsombor wase u Mbakristu ne. Se fatyô u eren kwagh ne aluer se hemba veren ishima sha tom wase u geman ior hingir mbahenen la yô.—Mat. 28:19, 20.

KWAGH U SE ER VE SE URUGH MBAGENEV VEA VA KEN PARADISO U KEN JIJINGI NE YÔ

16. Ka nyi ia na ve mbagenev kpa vea soo u van ken paradiso u ken jijingi nee?

¹⁶ Hanma wase nan ngu a kwagh u i gbe u nana er hange hange u una na a sar mbagenev u van ken paradiso u ken jijingi ne yô. Man cii ve se fatyô u eren kwagh ne yô, saa se lu mbakaven Yehova. Kighir or ér nana va ken nongo na ga. Kpa ka a “urugh” ior kure kure ve va  hen a na ayol a ve. (Yoh. 6:44; Yer. 31:3) Ior mbalun a ishima i mimi ka vea hen kwagh u dooshima u Yehova kua aeren a na a doon tsung agen la yô, kwagh la a mgbegha ve u kporom ikyua a na. Kpa se er nan ve aeren a ase a dedoo la aa urugh mbagenev u van ken paradiso u ken jijingi nee?

17. Se er nan ve se urugh mbagenev vea va ken paradiso u ken jijingi nee?

¹⁷ Kwagh môm u se er ve se urugh ior vea va ken paradiso u ken jijingi ne yô, ka u eren kwagh a mba se civir Yehova a ve imôngo la kundu kundu man sha dooshima. Ior mbahev ka vea va mkombo ken tiônnongo wase yô, se soo ser i lu ve ken ishima er ior mbafan Aôndo ga, mba alaghga ve za mkombo ken Korinte sha ayange a tsuaa la kpa lu ve nahan. Yange ve kaa ér: “Mimi je Aôndo ngu a ven.” (1 Kor. 14:24, 25; Sek. 8:23) Sha nahan yô, gba u se za hemen u dondon kwaghwan u a kaa ér: “Luun nen ken bem a hanmô wen cii” la.—1 Tes. 5:13.

18. Ka nyi alaghga ia na mbagenev vea soo u van ken nongo wase?

¹⁸ Doo u se nôngo sha afatyô wase se nengen anmgbianev asev mba nomso man mba kasev mba ken tiônnongo er Yehova kpa a nengen ve la. Se er kwagh ne sha u hemban veren ishima sha aeren a ve a dedoo la, a lu sha mbamyen vev mba ica a gba ga tsô vea kar kera la ga. Aluer se mba ‘eren kwagh a hanmô wase kundu kundu, zungwen ve mhôônom tsung, shi den hanmô ve kwaghbo sha mimi’ yô, kwagh la una wase se u sôron ma zayol u a ve hen atô wase cii. (Ef. 4:32) Nahan kwagh ne una urugh mba ve soo ér i eren kwagh a ve sha dooshima nahan la, u van ken paradiso u ken jijingi ne. b

 LU KEN PARADISO U KEN JIJINGI NE HER

19. (a) Er i tese ken ngeren u kiriki u “ Yange Ve Due kpa Ve Hide” la nahan, ka nyi mba yange ve due ken paradiso u ken jijingi kpa ve hide la, ve ôrô? (b) Gba u se kange ishima u eren nyi? (Shi nenge foto kpaa.)

¹⁹ Doo se kpishi er se lu ken paradiso u ken jijingi ne yô! Paradiso ne ngu doon seer a seer, shi mbacivir Yehova mba ngeen ker seer a seer. Sha nahan yô, se za nen hemen u tesen ser se wuese paradiso u Yehova a er sha ci wase ne. Hanma or u nan soo ér i kundu nan iyol shi kwagh u nan lu a mi la a kuma nan shi nana lu bem bem shi nana lu a kwagh u nan nan mciem ga yô, a gba u nana va nyôr ken paradiso u ken jijingi ne, shi mayange nana due ker ga! Kpa a gba u se wa ikyo sha ci u Satan ngu nôngon sha afatyô na cii ér una na se due ken paradiso ne kera. (1 Pet. 5:8; Mpa. 12:9) Mayange se de un ser a hemba se ga. Sha nahan yô, se nôngo nen kpoghuloo sha er mdoom man mlu u wang kua bem u a lu ken paradiso u ken jijingi ne a lu her yô.