1. Ior mba Yehova sha ayange a mbaapostoli la, yange ve eren kwagh sha inja sha inja nena?

 HANMA shighe u Yehova a ne ior nav tom ér ve er yô, ka a ver ishima ér ve er tom shon sha inja sha inja, i de lu nzughul nzughul ga. (1 Kor. 14:33) Ikyav i tesen yô, Aôndo soo ér i pase loho u dedoo i tser tar. (Mat. 24:14) Yehova ver Yesu ér a hemen tom ne. Man Yesu ngu nengen ér i er tom ne sha inja sha inja. Yange mba veren atôônanongo sha ayange a mbaapostoli la yô, i ver mbatamen sha ajiir kposo kposo sha er vea tesen er a er akaa yô. (Aer. 14:23) Annongo u mbatamen kua mbaapostoli mba sha Yerusalem yange ve tsua kwagh ugen u lu u atôônanongo cii a dondo yô. (Aer. 15:2; 16:4) Er anmgbianev mba nomso man mba kasev mbara dondo kwagh u i kaa ér ve er la yô, “anmgbianev mba sha atôônanongo la cii za hemen u taver jighjigh ve u nan, shi ingyegh ve lu seer ayange ayange.”—Aer. 16:5.

2. Hii ken inyom i 1919 la zan zan nyian, Yehova ngu hemen ior nav shi koson ve ken jijingi nena?

² Nyian ne kpa, Yehova za hemen u tesen ior nav kwagh u vea er yô. Hii ken inyom i 1919 la je, Yesu ngu eren tom a annongo u nomso mba i shighe ve mkurem la u hemen tom u pasen kwagh la shi nengen sha mbadondon un. a (Luka 12:42) Man Yehova ngu veren tom u annongo ne a lu eren la je, ka ashe tugh ga.—Yes. 60:22; 65:13, 14.

3-4. (a) Ôr kwagh môm u a tese er se eren kwagh sha inja sha inja ve kwagh la a wase se yô. (b) Ka nyi se lu timen sha mi ken ngeren nee?

³ Luun er sea lu eren kwagh sha inja sha inja ga yô, ma se fetyô  u eren tom u Yesu a ne se ne ga. (Mat. 28:19, 20) Ikyav i tesen yô, luun er i tese se ajiir a se pasen kwagh her ga yô, ma i gbaa pasen kwagh nungwa nungwa tsô. Alaghga ma se pase kwagh sha ajiir agen kwa kimbir kimbir, kpa ajiir agen yô, ma se lu a pase kwagh her cuku kpaa ga. De se nenge igbenda igen i se eren kwagh sha inja sha inja yô, man er kwagh ne ka a wase se yô.

⁴ Yesu za hemen u tesen ior mba Aôndo kwagh u vea er yô, vough er yange tesen mbadondon un shighe u lu shin tar la nahan. Ken ngeren ne, se lu timen sha ikyav i Yesu a ver, man er nongo wase u lu dondon ikyav na la yô. Shi se nenge kwagh u se er ve a tese ér se na nongo u Yehova jighjigh yô.

NONGO WASE NGU DONDON IKYAV I YESU

5. Ka sha gbenda môm u nyi nahan se lu dondon ikyav i Yesu? (Yohane 8:28)

⁵ Yesu yange hen hanma kwagh u ôron shi eren hen Ter na u sha la. Nongo u Yehova kpa ngu dondon ikyav i Yesu la, ka ve tese se ken Mkaanem ma Aôndo kwagh u a lu u vough man u bo la, man er se eren kwagh ken uma wase ve a doo yô. (Ôr Yohane 8:28; 2 Tim. 3:16, 17) Ka ve umbur se hanma shighe ér se ôron Mkaanem ma Aôndo shi se eren sha mi kpaa. Nahan ka sea dondo kwaghwan ve ne yô, kwagh la a wase se nena?

6. Ka gbenda môm u nyi ka sea henen Bibilo ve i wase se?

⁶ Ka sea eren tom a ityakeda yase u henen Bibilo yô, kwagh la a wase se kpishi. Ikyav i tesen yô, ka se fatyô u tôôn kwagh u Bibilo i tese la karen sha kwagh u nongo wase u kaa ér se er yô. Man ka sea nenge kwagh u nongo wase u kaa ér se er la, una zua sha kwagh u Bibilo i ôr yô, se seer nan nongo u Yehova jighjigh.—Rom. 12:2.

7. Ka loho u nyi yange Yesu pasen, man nongo u Yehova ngu dondon ikyav na la nena?

⁷ Yesu yange pasen “loho u dedoo u Tartor u Aôndo.” (Luka 4:43, 44) Shi Yesu yange kaa a mbahenen nav ér ve pase kwagh u Tartor. (Luka 9:1, 2; 10:8, 9) Nyian kpa, hanma or u nan lu ken nongo u Yehova cii nan pasen loho ne. Ka vea ngee a ityom sha ave shin vea lu han han kpa ve eren tom u pasen kwagh ne.

8. Ka ian i icivirigh i nyi se lu a mini?

⁸ Ka se kwagh u icivirigh kpishi u ôron mbagenev kwagh u Tartor u Aôndo! Ka hanma or nan zough a ian i icivirigh ne ga. Ikyav i tesen yô, shighe u Yesu lu shin tar la, yange lumun ér ujijingi mba bov ve er shiada sha kwagh na ga. (Luka 4:41) Nyian ne kpa, cii ve or a hii u pasen kwagh vea ior mba Yehova yô, saa nana eren kwagh sha ishima i Yehova ve nana kuma u eren tom ne ye. Ka se tese ser ian i icivirigh i se lu a mi i pasen kwagh ne gba se kwagh, sha u ôron mbagenev kwagh u Tartor u Aôndo hanma ijiir shin hanma shighe u ian i dugh cii. Awashima wase yô, ka i lu u nôngon sha afatyô wase cii, pasen ior kwagh shi tesen ve er Yesu kpa eren nahan.—Mat. 13:3, 23; 1 Kor. 3:6.

9. Ka nyi nongo u Yehova u er sha u wasen ior u fan iti i Aôndo?

⁹ Yesu yange wase ior u fan iti i Aôndo. Yange er msen hen Ter na u sha la kaa ér: “M pase ve iti you.” (Yoh. 17:26) Nongo u Yehova ngu dondon ikyav i Yesu la sha u eren hanma kwagh u ve fetyô cii sha u vea wase ior ve fa iti i Aôndo yô. Gbenda môm u ve er kwagh ne yô, ka u gberen Bibilo i New World Translation of the Holy Scriptures la. I hide i wa iti i Aôndo ken Bibilo ne sha ajiir a yange i nger Bibilo sha hiihii ve lu la cii. I gber Bibilo ne jimin shin avegher a i ken ijô i hemban 270. Aluer u soo u seer zuan a iwanger er i hii ve i hide i we iti i Aôndo ken Bibilo ne yô, ôr ngeren u sha Intanet u a lu a itinekwagh ér, Ka An Nan Lu Yehova? la.  Ngeren u Pasen Asember a ken Bibilo u Ruamabera u Mbakristu u ken zwa Grika la tese wang er i gbe u iti i Aôndo ia due ken Ruamabera u Mbakristu u ken zwa Grika la kwa 241 yô.

10. Ka nyi u hen ken kwagh u er kwase ugen ken tar u Myanmar laa?

¹⁰ Se kpa, se soo u wasen ior kpishi er se fetyô la ve fa iti i Aôndo er Yesu kpa eren nahan. Kwase ugen ken tar u Myanmar u lun anyom 67, yange va fe ér Aôndo ngu a iti yô, doo un je hii u vaan. A kaa ér: “Ken uma wam cii, ka hiin je m fe mer iti i Aôndo ér Yehova je ne. . . . Kwagh u ne tesem ne ka kwagh u vesen u m hen ken uma wam je ne.” Kwagh u kwase ne a ôr ne tese ér ior ka vea fa iti i Aôndo yô, kwagh la a gema uuma vev.

ZA HEMEN U TESEN WER U NA NONGO U YEHOVA JIGHJIGH

11. Mbatamen vea tese ér ve na nongo u Yehova jighjigh nena? (Shi nenge foto kpaa.)

¹¹ Ka sha gbenda u nyi nahan mbatamen vea tese ér ve na nongo u Yehova jighjigh? Gba u mbatamen vea ôr uwashika mba nongo u Yehova ka u tindi ve a mi u tesen ve kwagh u vea er la zulee shi vea nôngo tsung vea dondo kwagh shon kpaa. Ikyav i tesen yô, ka i tese ve er vea eren mbamkombo shin mbamsen ken tiônnongo tseegh ga, kpa ka i tese ve er vea nengen sha iyôngo i Kristu yô. Mbatamen ka vea dondon hanma kwagh u nongo u Yehova u tese ér ve er cii yô, kwagh la a wase anmgbianev mba nomso man mba kasev u fan ér ve doo Yehova ishima shi ngu nengen sha a ve kpaa.

12. (a) Er nan ve i gbe u se ungwan imo i mba ve lu hemen se laa? (Mbaheberu 13:7, 17) (b) Er nan ve i doo u se hemba veren ishima sha aeren a dedoo a mba ve lu hemen se laa?

¹² Shighe u mbatamen ve kaa ér se er ma kwagh yô, doo u se er kwagh shon a ishima i môm. Ka sea eren nahan yô, kwagh la a wase mba ve lu hemen la ve hemba eren tom ve tsembelee. Bibilo taver se ishima ér se ungwan imo i mba ve lu hemen hen atô wase la, shi se keghen iyol u lumun hemen ve. (Ôr Mbaheberu 13:7, 17.) Nahan kpa, alaghga ashighe agen a taver se u dondon kwaghwan ne, sha ci u nyi? Sha ci u nomso mban kpa ka uumace mba ve yen yô. Nahan aluer se hemba veren ishima sha mbamyen vev, ka sha aeren a ve a dedoo la ga yô, se lu wasen mbahyomov asev tom. Er nan ve se ôr nahana? Mbahyomov asev soo ér se hen ser Yehova ngu hemen se sha ikyev i nongo ne ga. Nahan aluer se mba hemban veren ishima sha mbamyen mba mbatamen ve lu a mi la yô, nongo u Yehova jimin cii kpa se kera na u jighjigh ga. Kpa se er nan ve se fa mbaaie mba mbahyomov asev ve samber a mi la shi se palegh ve?

DE DEEN WER MBAGENEV VE NA U HII U TAN AKPERAN SHA KWAGH U NONGO U YEHOVA GA

13. Ka sha gbenda u nyi nahan mbahyomov mba Aôndo ve nôngo ér se nenge nongo na sha gbenda u bo?

¹³ Mbahendan a Aôndo ka ve soo ér se nenge akaa a doon a nongo u Yehova u eren la sha gbenda u dedoo ga. Ikyav i tesen yô, se hen ken Ruamabera er Yehova a soo ér mbacivir un ve lu wang sha iyol man sha mhen ve kua ken jijingi yô. A kaa ér or u nan ze hemen u eren akaabo shi nan soo u geman ishima ga yô, i dugh nan ken tiônnongo kera. (1 Kor. 5:11-13; 6:9, 10) Se mba dondon tindi u Bibilo ne. Er se dondon kwagh u Bibilo i tese ne yô, mbahendan a vese ka ve kaa ér se mba a dooshima ga shi se mba ôron ior ijir shi se mba we ishima a mba aeren a ve a lu kposo la ga.

14. Ka an nan lu mgbeghan ior ér ve samber a mbaaie sha nongo wase?

¹⁴ Fa or u nan lu tan num sha nongo u Yehova  la. Ka Satan Diabolo jighilii a lu samber a mbaaie sha nongo u Yehova ye. Ka un a lu “ter u mbaerenaie” ye. (Yoh. 8:44; Gen. 3:1-5) Nahan se fatyô u veren ishima ser una mgbegha mbahyomov asev u samber a mbaaie sha nongo u Yehova. Ka kwagh u yange er Yesu kua Mbakristu mba sha ayange a mbaapostoli la je la.

15. Ka nyi mbahemenev mba kwaghaôndo yange ve er a Yesu kua mbadondon unu?

¹⁵ Shin er Yesu, Wan u Aôndo lu vough shi er uivande mba kpilighyol kpishi nahan kpa, Satan mgbegha ior wa Yesu mbaaie iyol. Ikyav i tesen yô, mbahemenev mba kwaghaôndo yange ve kaa a ior ér tahav mbu Yesu yange lu a mi u dughun ujijingi mbabov la, ka hen “tor u azôv” a zough a mi ye. (Mar. 3:22) Shighe u i lu ôron Yesu ijir la, mbahemenev mba kwaghaôndo kaa ér Yesu ngu or u lahan Aôndo nahan ve tuur ior ér ve wua un. (Mat. 27:20) Shighe kar yô, mbadondon Kristu mba ve lu pasen loho u dedoo la kpa, mbaahendanev “tor ior mba ken akuraior agen mbara asema shi vihi ve ityough a anmgbianev” sha u tôvon ve a ican. (Aer. 14:2, 19) Iyoukura i Disemba 1, inyom i 1998 la, pase kwagh u i ôr ken Aerenakaa 14:2 la kaa ér: “Mba yange ve lu dondon Satan la cii yange ve venda u ungwan loho u Mbakristu mba sha ayange a mbaapostoli lu pasen la. Shi yange ve ôr akaa a kpilighyol sha a ve sha er ior vea kegh ato a loho ve ga shi vea kôr ve ihyom yô.”

16. Ka nyi i gbe u se umbur shighe u se ongo ior ve lu samber a mbaaie sha kwagh u nongo wase?

¹⁶ Satan za hemen u eren aie her zan zan nyian. Ngu “tsughun tar jimin cii” her. (Mpa. 12:9) Aluer u ungwa akaabo sha nongo wase shin sha iyol i anmgbianev mba ve lu hemen la yô, umbur kwagh u mbaihyomov mba Aôndo yange ve er a Yesu kua mbahenen sha ayange a  mbaapostoli la. Yesu yange tsenga ôron ér ior vea hendan a mbacivir Yehova shi vea wa ve mbaaie iyol kpaa. Man ka kwagh u a lu zan hemen nyian vough je la. (Mat. 5:11, 12) Aluer se fa or u nan lu samber a mbaaie mban shi se er kwagh fele u kuran iyol yase yô, se na mbaaie mban jighjigh ga. Ka nyi se er sha u kuran iyol yase?

17. Se er nan ve mbaaie mba ior ve samber a mi la vea bula se ga? (2 Timoteu 1:13) (Shi nenge ngeren u kiriki u a lu a itinekwagh ér “ Kwagh u Se Er Shighe u Se Ongo Mbaaie Yô.”)

¹⁷ De keghen ato a mbaaie ga. Apostoli Paulu yange ôr kwagh u i gbe u se er shighe u se ongo mbaaie mba ior ve lu samber a mi la yô. Yange kaa a Timoteu ér a “venda kwagh a mbagenev taver taver ve̱ . . . de veren ato sha akaa a aiegh a ior ve ôron la ga,” shi ve “venda akaaôron a aiegh” kpaa. (1 Tim. 1:3, 4; 4:7) Hen sha kwagh ne. Alaghga wanye u kiriki nana tôô kwagh hen inya nana wa ken zwa, kpa organden yô mayange nana er kwagh nahan ga, sha ci u nan fa ér kwagh la una na nana gba angev. Nahan se mba keghen ato a mbaaie ga sha ci u se fa ape ve dugh yô. Kpa ka se gema se kegh ato a “kwaghôron u dedoo” u a lu u mimi yô.—Ôr 2 Timoteu 1:13.

18. Se tese ser se na nongo u Yehova jighjigh nena?

¹⁸ Igbenda ngi kpishi i nongo u Aôndo u dondon ikyav i Yesu yô, kpa ken ngeren ne, se time sha igbenda itiar tseegh. Er u lu henen Bibilo ne, ver ishima nenge igbenda igen i nongo ne u lu dondon ikyav i Yesu yô. Wase mbagenev ken tiônnongo wou ve seer nan nongo u Yehova jighjigh. Shi za hemen u tesen wer u na nongo u Yehova jighjigh sha u civir un sha mimi shi lun kôôsôô a nongo u a lu eren tom a u nyian u kuren awashima na ne. (Ps. 37:28) Nahan se za nen hemen u tesen ser ian i se lu a mi i lun ken nongo u Yehova u u lu a dooshima shi u eren kwagh sha mimi ne gba se kwagh.