Yehova yange kaa a Mbaiserael ér ve lu uicighanmbaiorov. Shi wa ve tindi u suen kwagh ne, ér: “De zenden anger hen ior ou ga, de nenge u haan awambe a or u nan we ndor a we ga; ka Mo TER.”—Lev. 19:2, 16.

Kwagh u i kaa ér “De nenge u haan awambe a or u nan we ndor a we ga” la, inja na ér nyi? Takeda u Mbayuda u sha kwagh u Levitiku kaa ér: “Kwagh u ivur ne i ôr heen ne . . . taver u pasen sha ci u taver u fan kwagh u ishember i ken zwa Heberu ne i lu tesen jim jim yô; a fatyô u geman i jighilii ér ‘de tilen sha, shin vea, shin ikyua a or ga.’ ”

Mbatimen sha akaa a ken Bibilo mbagenev zua ivur ne vea ivur i sha 15 la, i kaa ér: “De eren ifer sha ijirôron ga; de gbe tan ken icanor tsô ga, de hembe wan shagbaor ikyo kpaa ga, kpa ôr or u nan we ndor a we ijir sha perapera je.” (Lev. 19:15) Sha nahan yô, tindi u ken ivur i sha 16 u a ôr jighilii ér de tilen sha or, shin tilen vea nan, shin tilen ikyua a or ga la, inja na yô ér, Mbaiserael ve de eren ma kwagh sha ifer ken ijirôron shin kpenga u eren shin hen tsombor ga. Shi Oriserael nana de eren ma kwagh sha anyighe ér nana zua a mtsera ga. Ka mimi, doo u se eren akaa la ga, kpa gbenda ugen ngu u se kav kwagh u i ôr ken ivur 16 la ve, a hemba lun sha inja yô.

Nenge vegher u hiihii u ivur i sha 16 la. Aôndo kaa a ior nav ér ve de zenden anger hen ior vev ga. Ka mimi, or ka nana kaan a ior yô, kwagh la a va a mbamzeyol. Kpa or ka nana er anger sha orgen yô, heela ka i hemba vihin. (Anz. 10:19; Orpa. 10:12-14; 1 Tim. 5:11-15; Yak. 3:6) Or u eren angereke ka nan ôr kwagh u mimi ga sha orgen sha u vihin nan iti. Or u eren angereke nana er shiada u aiegh sha kwagh u orgen, aluer ka u shiada u nan la una na a wua or shon je kpaa. Umbur wer mbaeren angereke yange ve er mbaaie sha Naboti, nahan kwagh la na i ta Naboti awen kpe, a ishô na iyol. (1 Utor 21:8-13) Sha kpôô yô, or u eren angereke nana fatyô u nôngon sha ma gbenda ér orgen ma nan kpe, er vegher u sha uhar u Levitiku 19:16 la a kaa nahan.

Heela tseegh ga, or a fatyô u eren angereke sha orgen sha ci u nan kôr or la ihyom. 1 Yohane 3:15 kaa ér: “Hanma or u nan ker anmgbian u nan ihyom yô, nan ngu orwuanor, man ne fa er i lu u orwuanor môm nana zua a uma u tsôron ga yô.” Doo u se umbur ser, Aôndo ôron mkaanem ma ken ivur i sha 16 la been maa, a kaa ér: “De ker anngôu ihyom ken ishima you ga.”—Lev. 19:17.

Sha nahan yô, kwagh u i nger ken Levitiku 19:16, u i sar se u kaven yum la, ka kwaghwan u injaa kpishi sha ci u Mbakristu. Gba hange hange u se venda hanma mhen u bo, shi mayange se er angereke sha or ga. Jighilii yô, aluer se mba ‘nôngon se haa awambe a or’ sha u soon kwagh u nan ga, shin gban nan iyuhwe je eren angereke sha a nan yô, a tese ér se kôr nan ihyom. Gba u Mbakristu vea palegh u kôron or ihyom.—Mat. 12:36, 37.