U ôr Iyoukura mba i gber ken inyom ne vighe vighe kpa? Yô, nenge ase wea fatyô u nan mlumun sha mbampin mban yô:

Yakobu 5:11 kaa ér Yehova “eren a vese kundu kundu” shi “zungwen se mhôônom” nahan, kwagh la na se ishimaveren ér nyi?

Se fa ser, er Yehova a zungwen mhôônom yô, ka a kegh iyol u den se akaabo a se er la. Yakobu 5:11 pase se wang er Yehova a eren a vese kundu kundun yô. Doo u se dondo ikyav na la.—w21.01, p. 21.

Er nan Yehova a ne mbagen tahava?

A er nahan sha ci u uumace doo un ishima. Kwagh la na tsombor na u u civir un sha mimi la ngu ken bem, shi mba eren kwagh ker sha inja sha inja. Hanma or hen tsombor u nan eren kwagh nahan cii yô, nan fa or u i gbe u nana tsuan akaa a i gbe u nana er, shi nana hemen nan u eren a yô.—w21.02, p. 3.

Er nan i doo u Mbakristu vea eren kwagh a app mba tindin ior a ilyoho sha kômputa gayô hanseeti shin tableeti la sha kwaghfana?

Aluer or soo ér nana lamen a ior sha app mbara yô, a gba u nana tsua a tsua ior mba nana ya ijende a ve la. Ka i hemba taver u kôron azende sha kwaghfan ken iniongo i ior ka ve lu ker kpishi mba tindin a ilyoho la. (1 Tim. 5:13) Akaabo agen a a lu ken kwagh ne yô, ka i samber a ripoti sha akaa a i fe mimi u a ga kpaa, shi ior ve tindin ilyoho i yôôn ikpenga ve, i kera lu ilyoho i sha akaa a Yehova tseegh ga.—w21.03, p. 31.

Er nan ve Aôndo yange de ér Yesu a ya ican shi a kpe?

Ityôkyaa i môm yô, yange gba u a mande Yesu sha kon sha er una yima Mbayuda sha ifyan i i wa ve la yô. (Gal. 3:10, 13) ityôkyaa i sha uhar yô, yange gba u Yesu una va hingir se Pristi u Vesen, nahan Yehova lu tsaase un sha ci u tom la. Ityôkyaa i sha utar yô ka i ne, er Yesu ya ican zan zan kar kpen yô, tese ér uumace vea fatyô u civir Yehova sha mimi her, aluer mba yan ican nan nan je kpaa. (Yobu 1:9-11)—w21.04, p. 16-17.

Aluer u ngu eren tom u pasen kwagh hen ijiir i ka i taver u zuan a ior hen uya vev nahan, u er nena?

Nôngon u zan hen ve sha shighe u ve hemban lun hen ya yô. Shi kar u pasen kwagh hen ma ijiir igen kpa nenge. Shi u fatyô u karen ma gbenda u pasen kwagh ugen nengen, er u ngeren washika nahan.—w21.05, p. 15-16.

Inja i kwagh u Paulu kaa ér: “Atindi na yô, m kpe sha kwagh u tindi” la ér nyi? (Gal. 2:19)

Atindi a Mose la yange wase ior u fan er uumace ve yen yô, shi za a ikyurior i Iserael hen Kristu. (Gal. 3:19, 24) Kwagh ne yange wase Paulu na Kristu jighjigh. Paulu eren nahan yô, atindi la kera lu a tahav sha a na ga, nahan hingir inja er a “kpe sha kwagh u atindi” nahan.—w21.06, p. 31.

Yehova ver se ikyav i wan ishima a ior nena?

Er i laha iti i Yehova, shi i venda hemen na, shi ônov nav mbagenev ve hendan a na, shi Satan a lu eren mbaaie hanma shighe, shi mbacivir Yehova ve lu yan ican, shi ku u pav azende a na agen a na, shi i lu nzughul a uumace sha won cii, shi i lu vihin a akaa a Yehova a gbe la nahan kpa, Yehova ngu wan ishima her.—w21.07, p. 9-12.

Yosev ver se ikyav i dedoo sha kwagh u ishimawan nena?

Anmgbianev mba Yosev yange ve nzughul a na. Kwagh ne na yô, i za hingir u wan un akaa iyol shi wuhen un ken purusu ken Igipiti anyom imôngo, kpa wa ishima her.—w21.08, p. 12.

Ka mtenger u sha injakwagh u inyi i tsenga ôron ken Hagai 2:6-9, 20-22?

Akuraior ungwa loho u Tartor u i lu pasen ne yô, nga kumbur, shin a hingir kera ke kera. Kpa ior mbagenev kpishi loho ne urugh ve va a ve ken mimi. Ica ia kera gba ga tsô, a tenger akuraior sha kwa u masetyô sha mtim.—w21.09, p. 15-19.

Doo u se gba uwer u eren tom wase u pasen kwagh la ga sha ci u nyi?

Yehova ka a nenge iniôngon yase la, nahan i doo un a vese. Aluer se gba uwer ga shin iyol kpe se ga yô, se zua injar i uma u tsôron.—w21.10, p. 25-26.

Levitiku ityough 19 una wase se u dondon kwaghwan u a kaa ér: “Hingir nen uicighanmbaiorov sha aeren a en cii” la nena? (1 Pet. 1:15)

Ka inja er ka mkaanem ma ken Levitiku 19:2 la i ôr ken ivur ne nahan. Levitiku ityough 19 tese igbenda kpishi i se fatyô u dondon kwaghwan u ken 1 Peteru 1:15 la sha akaa a se eren ayange ayange la yô.—w21.12, p. 3-4.