▪ Ei, ka nahan ga. Kpa kwagh u Davidi ôr ne lu sha inja, shi lu mimi kpaa.

Ken avur la, Davidi kaa ér, “Me wuese iti You gbem sha won.” (Ps. 145:1, 2) Shi a ôr ken ivur igen kpaa ér: “Me wa icam, me ter erdoo u TER gbem sha won.”—Ps. 89:1.

Davidi yange ôr mkaanem man kpa, hen ér una kpe ga ze. Yange fa er Yehova a we tindi ér uumace ve kpeen sha ci u ve er isholibo yô. Davidi shi fa er un lu orsholibo yô. (Gen. 3:3, 17-19; Ps. 51:4, 5) Yange fa ér ior mba Aôndo lumun ve, er Aberaham man lsaka man Yakob nahan je kpa kpe kera. Nahan un iyol na kpa fa ér un ngu va kpen. (Ps. 37:25; 39:4) Kpa mkanem nam ma ken Pasalmi 145:1, 2 la tese er yange sar un shi kange ishima ér una wuese Aôndo gbem sha won, shin ken ayange a uma na cii yô.—2 Sam. 7:12.

Ashighe agen Davidi yange a nger kwagh sha akaa a a er un ken uma na yô, er a a nger ken Pasalmi 18, 51 man 52 la nahan. Ken Pasalmi 23 la, Davidi kaa ér Yehova ka Orkuran u a hemen ior nav, u ka a na i kundu ve iyol shi a wase ve ve palegh kwaghbo yô. Davidi yange lu imba orkuran la. Nahan soo ér una civir Aôndo “sha ayange a uma [na] cii.”—Ps. 23:6.

Shi umbur wer, ka Yehova yange kaa a Davidi ér a nger mkaanem mara ye. Davidi nger akaa agen lu akaaôron a profeti a sha kwagh u una va er ken hemen ica je yô. Ikyav i tesen yô, ken Pasalmi 110 la, Davidi ôr kwagh u shighe u Ter na una ‘Tema ken uwegh ku yanegh ku Aôndo’ sha, shi a na un tahav kpishi la. Tahav mbu eren nyi? Tahav mbu hemban mbaihyomov mba Aôndo shi una “ôr ijir her atô u akuraior” shin tar la. Lu u Mesiya una va due ken tsombor u Davidi. Mesiya una tema tor sha, una gema a lu hemen tar, shi una lu “pristi u tsôron gbem sha won.” (Ps. 110:1-6) Yesu yange kaa ér kwaghôron u profeti u ken Pasalmi 110 la lu sha kwagh na i ôr ye, shi ér una va kure sha mi ken hemen.—Ps. 110; Mat. 22:41-45.

Yehova yange kaa ér Davidi a nger kwagh u una er sha shighe u lu uma la, shi una va er ken hemen sha shighe u a nder un shin ku ve una fatyô u wuese Yehova gbem sha won la. Kwagh ne wase se u nengen er akaa a i nger ken Pasalmi 37:10, 11, 29 la a pase i lu kwagh u mlu u sha ayange a i nger a la kua mlu u ken hemen yô. Kwagh u avur ne a ôr la yange kure sha mi sha ayange a tar u Iserael u tsuaa la, shi una va kure sha mi ken hemen, shighe u Aôndo una kure uityendezwa nav la.—Nenge ikyumhiange i sha 8 ken ngeren u a lu a itinekwagh ér, “U Va Lu vea Mo ken Paradiso” la, ken Iyoukura ne.

Sha nahan yô, mkaanem ma Davidi ma ken Pasalmi 145:1, 2 la kua avur agen a a er imbakwah la ker la cii tese ér yange Davidi yange soo ér una wuese Yehova zan zan una kar kpen. Shi avur shon wase se u nengen er i lu u Davidi una va wuese Aôndo gbem sha won shighe u Yehova una nder un shin ku, una hide a lu uma la yô.