1. Ka sea hen sha kwagh u uma u tsôron u Yehova a tende zwa u nan se la nahan, se er nena?

 YEHOVA tôndo zwa ér mba ve ungwan imo na la vea va zua a “uma u tsôron.” (Rom. 6:23) Ka sea hen sha ityendezwa i Yehova ne yô, kwagh na a seer doon se ishima. Hen ase sha kwagh ne: Se doo Ter wase u sha la ishima kpishi je yô, ka u mayange se pav a na ga.

2. Ityendezwa i sha kwagh u uma u tsôron la ka i wase se nena?

² Ityendezwa i Aôndo i sha kwagh u uma u tsôron la ka i wase se u taver ishima shighe u se tagher a mbamzeyol yô. Aluer mbaihyomov asev kaa ér vea wua se je kpa, se de u civir Yehova ga. Sha ci u nyi? Ityôkyaa i môm yô, ka sha ci u se fa ser aluer se civir Yehova sha mimi zan zan se kar kpen yô, una va nder se shin ku, se kera kpe mayange ga. (Yoh. 5:28, 29; 1 Kor. 15:55-58; Heb. 2:15) Er nan ve se ne jighjigh ser se fatyô u lun uma gbem sha wono? Time sha atôakyaa a a dondo ne.

3. Se na jighjigh ser Yehova una fatyô u nan ér se lu uma gbem sha won sha ci u nyi? (Pasalmi 102:12, 24, 27)

³ Se fa ser Yehova una fatyô u nan ér se lu uma gbem sha won sha ci u ka un a lu Imbor i uma ye, shi un ka u tsôron. (Ps. 36:9) Nenge ase avur a Bibilo kpuaa a a tese ér Yehova yange lu je tsô ngu, shi ngu lun zan zan gbem sha won yô. Pasalmi 90:2 kaa ér Yehova ngu “hii sha uicôronmbaashighev je zan  zan gbem sha won” yô. Pasalmi 102 kpa ôr imbakwagh la. (Ôr Pasalmi 102:12, 24, 27.) Shi profeti Habaku yange nger kwagh sha kwagh u Ter wase u sha la ér: “Yehova, we u ngu u tsôron je gaa? Aôndo wam man Icighan wam, we u ngu u kpen ga.”—Hab. 1:12, NWT.

4. Aluer ka taver se u kaven kwagh u i kaa ér Yehova yange lu je tsô ngu la yô, doo u ishima ia za se iyolo? Ta iwanger.

⁴ Ka i taver we u kaven kwagh u i kaa ér Yehova ka u “tsôron” laa? (Yes. 40:28) Ior kpishi ka i taver ve u kaven kwagh la. Elihu yange ôr kwagh u Aôndo ér: “Iyenge i anyom Na gande u tôvon fan.” (Yobu 36:26) Kpa aluer se kav kwagh ga yô maa tese ér kwagh shon ka mimi ga ze. Ikyav i tesen yô, er se fetyô u kaven gbenda u iwanger i usu i eren tom la vindi vindi ga yô maa tese ér usu ngu gaa? Tese nahan ga cii! Usu ngu. Kape se uumace kpa mayange se fatyô u kaven er Yehova yange lu je tsô a lu, man er una za hemen u lun gbem sha won la vindi vindi ga je la. Er se fe ga nahan kpa, tese ér Aôndo ka u tsôron ga ze. Sea kav kwagh u Aôndo u a gbe akaa cii la shin sea kav ga kpa, mimi u sha kwagh na yô ngu her. (Rom. 11:33-36) Shighe u akaa a sha man a shin tar a se nengen a mi, kua akaa a nan iwanger er iyange nahan lu a lu ga la je tsô, Aôndo lu. Yehova pase se wang ér ‘Un gba tar sha tahav Nav.’ Yange lu cii ve va “samber Usha sha mkar Na ye.” (Yer. 51:15; Aer. 17:24) Ka sha ityôkyaa igen i nyi kpa se ne jighjigh ser se fatyô u lun uma gbem sha wono?

5. Yange i gba orumace u hiihii la vea kwase na ér ve tsa i kuma nena?

⁵ Dugh uumace sha yô, Yehova yange gba akaauma agen cii ér a tsôr ga. Yange gba uumace kposo a akaauma agen cii, ér ve de kpen mayange ga. Nahan kpa, Yehova ta Adam icin ér: “Kon u mfe u fan kwagh u dedoo man kwagh u bo la, de ye u ga, gadia iyange i ú ya u la, ú kpe je.” (Gen. 2:17) Adam man Ifa yange vea ongo imo i Yehova yô, ma ve kpe ga. Se na jighjigh ser Yehova yange ver shighe u a va kuma yô, una na ve ian ér ve ya “kon u uma” la. Yane vea yaan u yô, kwagh la ma lu u pasen ve er i lu u vea “tsôr” sha won yô. b—Gen. 3:22.

6-7. (a) Ka nyi igen kpa i tese ér yange i gba uumace ér ve kpeen ga? (b) Ka akaa a nyi nahan i sar u kpishi u ma u hii u erene? (Nenge ufoto.)

⁶ Mbaisainsi mba tôvon sha kwagh u mhirinim nenge a ikyav i tesen wang ér mhirinim asem ma a fatyô u kôron akaa hemban  akaa a se hen ken ayange a uma wase cii la ica je, saan a mi. Ken inyom i 2010 la, ngeren ugen ken pipaabaver igen kaa ér mhirinim asev ma a fatyô u kôron kwagh u a tôô ahwa miliôn utar (shin a hemba anyom 300) u ôron sha Televishen yô, saan a mi. Man adooga mhirinim asem ma a fatyô u kôron kwagh hemban nahala ica je. Nahan kpa, kwagh ne tese ér Yehova er mhirinim asem ér ma kôr kwagh i hemba akaa a ka se hen ken anyom 70 shin 80 tseegh la ica je.—Ps. 90:10.

⁷ Yehova shi gba se a isharen i lun uma gbem sha won la taveraa. Bibilo ôr kwagh u uumace ér Aôndo “ver mtsôr ken asema a ve.” (Orpa. 3:11) Ka kwagh môm u a ne ve se nengen ku ser ka orihyom wase je la. (1 Kor. 15:26) Ka sea gba angev mbu vesen nahan, se gba teman a mi tsô se keghen kuu? Ei. Ka se za iyouci shi se maan mcimbin sha er angev mbu shon mbua bee yô. Jighilii yô, ka se er kwagh u se fetyô la cii sha er se kpe ga yô. Shi or wase ka nana kpe, a lu wanye shin organden kpa, ku la ka u nyoon se je i saa her gaa? (Yoh. 11:32, 33) Gba keng u se za hemen u henen kwagh gbem sha won shi se lu a isharen i lun uma la gbem sha won sha ci u kape Aôndo u a gbe akaa cii la a er se je la. Kwagh ne tese wang ér una na se fatyô u lun uma gbem sha won. Kpa atôakyaa agen kpa nga a se ne jighjigh ser se fatyô u lun uma gbem sha won yô. De se time sha akaa agen a Yehova yange er, man a a lu eren hegen u tesen ér awashima u yange gba orumace a mi la gema ga yô.

8. Yesaia 55:11 tese se nyi sha kwagh u awashima u Yehova sha a vese?

⁸ Shin er yange Adam man Ifa ve er isholibo  maa kwagh la na ônov vev hingir u kpen nahan kpa, Yehova gema kwagh sha awashima u yange gba or a mi la ga. (Ôr Yesaia 55:11.) Awashima na u uumace mba civir un sha mimi ve lu uma gbem sha won la ngu her. Se fa nahan sha sha ci u Yehova ôr akaa shi er akaa a tesen ér awashima na gema ga.

9. Aôndo tôndo zwa ér nyi? (Daniel 12:2, 13)

⁹ Yehova tôndo zwa ér una va nder mbakpenev shin ku shi una na ve ian i lun uma gbem sha won. (Aer. 24:15; Titu 1:1, 2) Orjighjigh Yobu yange na jighjigh ér sar Yehova kpishi u nderen mba ve kpe la shin ku. (Yobu 14:14, 15) Profeti Daniel yange fa er i lu va nderen uumace shin ku shi a na ve ian i lun uma gbem sha won yô. (Ps. 37:29; ôr Daniel 12:2, 13.) Mbayuda mba sha ayange a Yesu la kpa fa er Yehova una va na mbacivir un sha mimi ‘uma u tsôron’ yô. (Luka 10:25; 18:18) Yesu yange ôr kwagh u ityendezwa ne kwa kimbir kimbir, shi un iyol na kpa Ter na u sha la va nder un shin ku.—Mat. 19:29; 22:31, 32; Luka 18:30; Yoh. 11:25.

10. Mnder u shin ku u ior mba sha ayange a tsuaa la tese ér nyi? (Nenge foto.)

¹⁰ Ka Yehova a ne uma ye, shi ngu a tahav mbu una fatyô u nderen ior shin ku vea hide a lu uma. Yange na profeti Eliya tahav nder wan u kwasechôghol u ken Sarefati shin ku. (1 Utor 17:21-23) Shighe karen yô, profeti Elisha nder wan u kwase Shunem shin ku. (2 Utor 4:18-20, 34-37) Mnder u shin ku u mba se ter kwagh ve ne kua mbagenev kpaa cii tese ér Yehova ngu a tahav mbu una fatyô u nderen ior shin ku vea hide a lu uma. Shighe u Yesu lu shin tar la, yange tese ér Ter na na un tahav mbu nderen ior shin ku. (Yoh. 11:23-25, 43, 44) Hegen ne, Yesu ngu sha, shi i na un “tahav sha akaa a sha man a shin tar cii.” Sha nahan yô, una fatyô u kuren ityendezwa i va nderen “mba ve lu shin iwar cii” la, vea lu uma gbem sha won.—Mat. 28:18; Yoh. 5:25-29.

11. Er nan ve nagh ku ipaan kura ku ne i lu u se fatyô u lun uma gbem sha wono?

¹¹ Er nan ve Yehova yange de Wan na u ishima ishima la kpe ku u nyoon kpishi nahana? Yesu yange pase ityôkyaa kaa ér: “Tar ne doo Aôndo ishima kpishi je yô, a na Wan na u môm môm la, sha u hanma or u nan ne un jighjigh cii nana̱ de timin ga, kpa nana̱ zua a uma u tsôron.” (Yoh. 3:16) Er Aôndo na Wan na hingir nagh ku ipaan sha ci u cirin asorabo a ase yô, kwagh la na hingir u se fatyô u zuan a uma u tsôron. (Mat. 20:28) Apostoli Paulu yange pase kwagh u a lu kwagh u vesen ken awashima u Aôndo ne yô, a nger ér: “Er lu or môm nan na ku va yô, shi ka sha or môm a nder ior shin ku ye. Gadia er i lu Adam a ne ior cii ve lu kpen yô, ka sha Kristu di ior vea hide a lu uma ye.”—1 Kor. 15:21, 22.

12. Tartor ua wase u kuren awashima u Yehova sha a vese nena?

¹² Yesu yange tese mbadondon un ér ve eren msen ér Tartor u Aôndo u va shi i er ishima i Aôndo shin tar. (Mat. 6:9, 10) Kwagh ugen ken awashima u Aôndo yô, ka u uumace ve lu uma gbem sha won shin tar. Yehova ver Wan na Tor u Tartor u Mesiya, ér a er kwagh ne. Aôndo ngu kohol iorov 144,000 shin tar, ér ve va er tom u kuren awashima na vea Yesu imôngo.—Mpa. 5:9, 10.

13. Ka nyi Yehova a lu eren hegen, man gba u se sue un nena?

¹³ Hegen ne, Yehova ngu kohol “zegeikpelaior” shi ngu tesen ve u va lun sha ikyev i hemen u Tartor na. (Mpa. 7:9, 10; Yak. 2:8) Shin er mba ve lu ken zegeikpalaior ne ve lu ken tar u mpav a lu ker kpishi sha ci u mciem man ityav ne nahan kpa, ka ve nôngon  sha afatyô ve cii ér ihyom i de lu hen atô ve sha ma gbenda môm tsô kpaa ga. Mba geman usanker vev varen induhar a mi sha injakwagh. (Mika 4:3) Mba ze ityav mbi mbi lu wuan ior kpishi la ga, kpa ka ve wasen ior ér ve zua a “uma u a lu uma jim jim la,” sha u tesen ve kwagh u Aôndo u mimi la kua awashima na. (1 Tim. 6:19) Alaghga mba hen icombor ve vea lu hendan a ve shin inyaregh vev kia saa sha ci u mba suen Tartor u Aôndo yum, kpa Yehova una na ve akaa a kwagh a gbe a ve a mi la keng a bunde ga. (Mat. 6:25, 30-33; Luka 18:29, 30) Akaa ne cii na yô, se na jighjigh ser Tartor u Aôndo ngu kpôô kpôô, shi ua za hemen u kuren awashima u Yehova.

14-15. Ityendezwa i Yehova i va timin ku sha won kera la ia kure sha mi nena?

¹⁴ Yesu ngu Tor u Tartor u Aôndo sha hegen, nahan una kure uityendezwa mba Yehova cii. (2 Kor. 1:20) Yesu ngu hemban mbaihyom nav, hii ken inyom i 1914 la je. (Ps. 110:1, 2) Ica ia kera gba ga tsô, un vea mba vea za tema tor a na imôngo la vea hemba mbaihyomov gburu gburu, shi vea tim mbaaferev kera.—Mpa. 6:2.

¹⁵ Sha shighe u Hemen u Yesu u Anyom Dubu la, una nder mbamkpenev shin ku shi una wase uumace mba ungwan imo i Yehova vea kera lu a myem môm môm ga. Imeen i  masetyô la ia karen kera yô, mba Yehova a nenge ér mba mbaperapera la ‘vea ya dyako u tar, vea lu ken u gbem sha won.’ (Ps. 37:10, 11, 29) “Orhyom u a va mase timin kera yô, ka ku.”—1 Kor. 15:26.

16. Ka sha ityôkyaa i vesen i nyi i gbe u se civir Yehova?

¹⁶ Ngeren ne wase se u nengen er ishimaverenkeghen yase i va lun uma gbem sha won la i lu kwagh u Mkaanem ma Aôndo ma kaa yô. Ishimaverenkeghen shon ia wase se se za hemen u civir Yehova sha mimi ken ayange a masejime a uma a taver kpishi yum ne. Kpa kwagh u se er ve a doo Yehova a vese yô, i de lu isharen i va lun uma la tseegh i taver se ishima ga. Ityôkyaa i vesen i se lu civir Yehova shi dondon Yesu sha mimi yô, ka sha ci u ve doo se ishima kpishi. (2 Kor. 5:14, 15) Dooshima ne na yô, se soo ser se eren kwagh er ve nahan shi se pasen ior kwagh u ishimaverenkeghen yase la. (Rom. 10:13-15) Aluer se mba henen u tesen dooshima u tangen iyol ga la shi wasen mba kwagh a tser ve la yô, Yehova una soo ér se lu azende a na.—Heb. 13:16.

17. Ka nyi i gbe u hanma wase nana tsua u erene? (Mateu 7:13, 14)

¹⁷ Se va lu ken mba vea zua a uma u tsôron la je kpa? Yehova na se ian i se fatyô u zuan a uma u tsôron yô. Hegen mase shin u se tsua u lun sha gbenda u zan ken uma la. (Ôr Mateu 7:13, 14.) Shighe u se va lu uma gbem sha won la, uma una lu nena? Se va time sha mlumun u sha mpin la ken ngeren u a dondo la.