Shighe u Yehova kaa ér uumace ve ‘iv tar, ve gema u u lu sha ikyev ve’ la, yange tese ér ken masejime yô, tar cii ua hingir paradiso. (Gen. 1:28) Gba u mba vea va lu uma gbem sha won la vea er kwagh u i ôr ne. Kpa vea hii kwagh ne a lu ken paradiso ga, sha ci u sule u Eden la kera ngu mape môm môm ga. Armagedon una been kera je maa, a gba u se er tom kpoghuloo sha er se sôr ajiir a i vihi a hingir cimba cimba sha tar hegen la aa hingir wang yô. Kwagh la a lu zege tom u kiriki ga!

Kwagh ne umbur se tom u yange gba u Mbaiserael vea er shighe u ve due ken Babilo ve hide la. Yange or tema ya hen tar ve la ga zan zan anyom 70. Kpa Yesaia tsenga ôron ér sha iwasen i Yehova yô, vea fatyô u sôron tar la ua hide a dooashe. Kwaghôron u profeti la kaa ér: “A gema deserti na hingir er ka Eden nahan, taaikyôngo na kpaa er ka sule u TER yô.” (Yes. 51:3) Yehova yange wase Mbaiserael sôr tar ve hide hingir ijiir i doonashe. Mba vea ya dyako u tar la kpa, sha iwasen i Yehova yô, vea gema u ua hingir  paradiso. Shi hegen je kpa, akaa nga a u fatyô u eren u tesen wer sar u u va eren tom la yô.

Kwagh môm yô, ka u eren kwagh u u fetyô la cii sha u sôron ya wou kimi kua ken won cii lun sha ashe tsembelee man sha inja kpaa. U fatyô u eren kwagh ne, aluer mbawan ndor a we mba eren nahan ga je kpaa. Shi u fatyô u wasen tom u sôron Iyou i Tartor kimi kua ken won cii lun sha ashe tsembelee, kua tom u sôron akaa a a vihi sha mi la. Aluer mlu wou na u ian yô, shi u fatyô u ngeren apelekeshen wer u na iyol u eren tom u wasen anmgbianev mba kwagh a tser ve yô, hen ijiir yen la. U er nahan yô, kwagh la una tese ér u kegh iyol wer u wase anmgbianev ou mba nomso man mba kasev, mba i gbe u a wase ve yô. Pine iyol you wer, ‘Me fatyô u henen ityom i me va er kwagh a mi ken tar u he, aluer Yehova de ér m lu uma gbem sha won yôô?’

Yesu yange nderen wan u Yairu u kwase la shin ku yô, fese je maa kaa ér i na wankwase shon kwagh a ya. (Mar. 5:42, 43) Alaghga tom u nengen sha wankwase u lu anyom 12 la yange ua taver ga. Nahan kpa, hen sha tom u a va gba u se er kpoghuloo shighe u Yesu una kure ityendezwa na i a kaa ér, “mba ve lu shin iwar cii vea ungwa imo na” la. (Yoh. 5:28, 29) Shin er Bibilo i pase vighe vighe ga nahan kpa, se fatyô u tôôn ser a gba u se wase mba a nder ve shin ku la vea zua kwaghyan man ajiir a tsan kua akondo. Hegen je kpa, u fatyô u tesen wer u soo u wan iyol i va wasene. Akaa nga kpuaa a u fatyô u eren yô.

Ka a yôô ér ortamen u sôron atôônanongo ngu van tiônnongo wen inya nahan, u wa iyol i lôhôn un iwer hen ya wou kpa? Aluer i kaa ér mba ve eren tom u icivirigh hanma shighe la mbagenev ve mem tom u ve eren shin Bethel la ve hide ve za sue atôônnongo, man ugen nan hide hen tiônnongo wou, shin ortamen u sôron atôônanongo nan mem tom u zenden sha la nan hide hen tiônnongo wou nahan, u wase nan sha u keren nan ya kpa?

Sha ci u kwagh u i ôr ken Aerenakaa 24:15 la yô, se fa ser a va nder ior ubiliôn imôngo shin ku. Man ior kpishi ken mba a nder ve la, a lu mba yange ian lu a due i vea fa Aôndo ga tsô maa ku wua ve yô. A va nderen ve shin ku kera yô, ian ia bugh i vea fa Aôndo yô. a A lu mbajighjigh mba ve civir Aôndo ica i gbe la je vea er tom u tesen ve la ye. (Yes. 11:9) Anmgbian u kwase ugen u a er tom u pasen kwagh ken veghertar u Yuropa man South Amerika kua Afrika yô, iti na ér Charlotte, ngu veren ashe u va eren tom la. Ka a ôr sagher sagher ér: “M ngu veren ashe u va tesen ior mba a va nder ve shin ku la. Ka mea ôr kwagh u ma or u yange nan lu uma sha ashighe a ken ijime la yô, m kaa ken ishima mer: ‘Or ngun nahan luun er yange nan fa Yehova yô, kwagh u nan ma lu nahan ga.’ M ngu veren ashe u va ôron mba a va nder ve shin ku la kwagh u Yehova, shi wasen ve ve nenge er vea lu civir un ve a saan ve iyol kpishi yô.”

Mbacivir Aôndo shin mbajighjigh mba yange ve kpe cii man Yesu va shin tar la je kpa, a gba u vea hen akaa kpishi. Hen ase er a lu kwagh u icivirigh kpishi shi a saan iyol u pasen Daniel er akaaôron a profeti a yange nger kpa kav ga la yange va kure sha mi yô. (Dan. 12:8) U wasen Rutu man Naomi u fan er Mesiya yange va due ken tsombor ve la di ye? A saan se iyol u eren tom u tesen ior sha tar cii sha won, man shighe la mbamzeyol kua akaa a a danen se nyian ken tar u ifer ne cii aa kera lu ga!

Ka nyi u fatyô u eren hegen sha er u wa iyol i va wasen tom u tesen ior mba a va nder ve shin ku laa? Kwagh môm yô, ka u nôngon sha afatyô wou cii seer fan igbenda i tesen ior, kua u eren tom u pasen kwagh u i lu eren sha tar cii nyian la hanma shighe cii. (Mat. 24:14) Aluer iyolbeen shin mbamzeyol mbagenev na u kera ngu fantyô u eren akaa agen sha ci u Yehova kpishi er yange u eren la ga kpa, iniôngo you la ia tese ér u ngu wan iyol i va tesen mba a va nder ve shin ku la.

Sha kpôô yô, doo u se hen sha mbampin mba vesen mban: Mimi je u ngu veren ashe u va yan dyako u taraa? U ngu veren ashe u va geman tar hingir paradiso, man u va wasen shi tesen mba a va nder ve shin ku laa? U fatyô u tesen hegen wer u ngu wan iyol i va lun uma shin tar gbem sha won sha u eren ityom i i lu kwaghmôm a ityom i u va er ken hemen, shighe u u ya dyako u tar la!