U ôr Iyoukura mba i gber ken inyom ne vighe vighe kpa? Yô, nenge ase wea fatyô u nan mlumun sha mbampin mban yô:

Aluer se mba tôôn shighe lamen a Yehova, shi keghen ato a na, shi henen sha kwagh na yô, kwagh la una wase se nena?

Se tsua akaa a se soo u eren la sha kwaghfan, shi se seer fan u tesen ior, shi jighjigh u nan wase un seer taver, shi Yehova una seer doon se ishima.—w22.01, p. 30-31.

Aluer se hen u nan Yehova kua mbatomov nav jighjigh hegen yô, kwagh la una wase se nena?

Hegen ka shighe u se hen u nan jighjigh a gbenda u Yehova a eren akaa la, se palegh u keren ahaba sha kwagh u mbatamen vea va kaa ér i er shin vea tsua yô. Nahan shighe u zegecan a va la kpa, se kegh iyol u ngohol akaawan a se kav inja i a ga yô.—w22.02, p. 4-6.

Ityôkyaa i yange ortyom ôr Sekaria kwagh u “kor u sôron kwagh a min sha u a̱ lu jighelaa, sha uwegh ku [Gomna] Serubabel” yô nyi jimi? (Sek. 4:8-10)

Mpase u sha mnenge la yange wase nongoior u Aôndo u fan er lu u vea maa tempel u akuma akuma u ve lu maan la vea kure shi una doo Aôndo yô.—w22.03, p. 16-17.

Se ver mbagenev “ikyav sha iliam” yase nena? (1 Tim. 4:12)

Shighe u se dugh kwaghpasen yô, se lam a ior kundu kundu man sha icivir, shi hanma shighe u se ze mkombo yô, se wa atsam a ishima yase i môm shi se na ikyaa; se ôron kwagh sha mimi shi se taver anmgbianev ishima, shi se palegh hanma ityuhanev cii.—w22.04, p. 6-9.

Er nan ve inyamikyume i i ôr kwagh u i ken Mpase 13:1, 2 la i lu a akaa a ínyamikyume (ityartor) inyiin i i ter i ken Daniel ityough 7 la i lu a mi la ciili?

Inyamikyume i ken Mpase ityough 13 la ka di tartor môm, er Roma nahan tseegh ga. Kpa ka ugomoti mba sha tar cii mba ve hemen u uumace yô.—w22.05, p. 9.

Ka sha gbenda u vesen u nyi se tese ser se na jighjigh a ijirôron i Aôndo?

Aluer or naha se tar shin nan tuhwa se, shin nan hii se iyongo, shin nan er se kwaghbo yô, se nyoon ishima a nan ga shi se or iyev ga, kpa se na jighjigh ser Yehova una ôr ijir yase sha gbenda u vough. Una va bee a hanma kwaghbo u isholibo i ve a mi cii.—w22.06, p. 10-11.

Shighe u i kaa ér anmgbian nana er msen sha ci u mbagenev ken mkombo yô, ka nyi i doo u nana umburu?

Gba u se wa tiônnongo kwagh shin se yôô kwagh ken msen wase ga. Gba u se ôr “akaa kpishi” ga, hemban je yô shighe u se lu eren msen u hiin mkombo la. (Mat. 6:7)—w22.07, p. 24-25.

‘Mba yange ve lu eren akaabo yô, a ôr ve ijir sha mnder u shin ku la’ nena? (Yohane 5:29)

A ôr ve ijir sha akaabo a yange ve er cii ve kpe la ga. Kpa Yesu una kar ve shighe u a nder ve shin ku kera la, una nenge er ieren ve i lu la.—w22.09, p. 18.

J. F. Rutherford yange ôr sha mkohol u vesen u i er ken Setemba 1922 la sagher sagher ér i er nyi?

Yange ôr sha mkohol u vesen u i er hen Cedar Point, Ohio ken Amerika la zever zever ér: “Tor ngu hemen! Nahan gba u ne ôr hanma or cii. Sha nahan yô, yôô nen, yôô nen, yôô nen angwe u Tor man Tartor na!”—w22.10, p. 3-5.

Yesaia ityough 30 pase ér ka sha igbenda itiar i nyi Yehova ka a wase se se wa ishima a icana?

Ityough kin tese ér ka (1) a kegh ato a vese shi a er kwagh sha mbamsen asev, (2) a wa se kwagh, shi (3) a wase se sha akaa a dedoo a a ne se hegen la, ku sha ishimaverenkeghen yase i sha akaa dedoo a una va na se ken hemen la.—w22.11, p. 9.

Se fatyô u kaan se kwagh u Pasalmi 37:10, 11, 29 a ôr la yange kure sha mi sha shighe u i nger un la, shi una va kure sha mi ken hemen sha ci u nyi?

Mkaanem ma Davidi man pase mlu u tar u Iserael u tsuaa la, er sha ayange a Solomon lu tor la nahan. Yesu yange ôr kwagh u shighe u tar a va hingir paradiso la ter mkaanem ma ken ivur 11 la. (Mat. 5:5; Luka 23:43)—w22.12, p. 8-10, 14.