1. Ka nyi i gbe u anmgbian u nomso nana er keng ve nana hingir nomsoor u dondon ikyav i Yesu?

 TOR Davidi yange wa Solomon kwagh kaa ér: “Taver ishima, tese iyol you er u lu nomsoor yô.” (1 Utor 2:1-3) Kwaghwan la ngu sha ci u nomso mba ve soo u dondon ikyav i Yesu nyian la cii. Kwagh u una wase ve u eren nahan yô, saa vea hen u kuran atindi a Aôndo shi dondon akaawan a Bibilo sha hanma kwagh u ve eren ken uma ve cii. (Luka 2:52) Er nan ve i gbe u anmgbianev mba ve lu agumaior la vea nôngo vea hingir nomso mba dondon ikyav i Yesu?

2-3. Er nan ve i gbe hange hange u anmgbian u nan lu gumor nana hingir nomsoor u dondon ikyav i Yesu?

² Orkristu u nomso ka nan lu a ityom i vesen kpishi hen tsombor kua ken tiônnongo. Agumaior, ka keng ne lu henen sha kwagh u ityom i ne va er ken hemen yô. Alaghga u lu a awashima u va eren tom u pasen kwagh hanma shighe cii la, gayô lun orshiren tiônnongo, nahan va lun ortamen ken hemen. Shi alaghga u ngu a washima u va vôson kwase maren ônov. (Ef. 6:4; 1 Tim. 3:1) Nahan kpa, saa u lu or u dondon ikyav i Yesu ve u fatyô u eren kaa ne shi a saan we iyol ye. b

³ Ka nyi ia wase u ve u hingir or u dondon ikyav i Yesu? Akaa nga atar a i gbe u u hen u eren shi u fa u eren a tsembelee yô. Nahan ka nyi u er hegen sha er u wa ago iyol sha nyityô tom i a va gba u u er ken hemen shi a saan u we iyolo?

4. Ka han u zua a ior mba dedoo mba u fatyô u dondon ikyav ve? (Shi nenge foto kpaa.)

⁴ Kaven mba ve ver ikyav i dedoo yô. Bibilo ôr kwagh u ior kpishi mba agumaior aa fatyô u dondon ikyav ve yô. Aôndo yange doo  nomsombaiorov mba sha ayange a tsuaa mbara ishima shi ve nenge sha ior nav sha igbenda kposo kposo. Shi u fatyô u zuan a nomso mba fan kwagh hen tsombor wou kua ken tiônnongo wou, mba ve lu dondon ikyav i Yesu yô. (Heb. 13:7) Shi Yesu ver u ikyav i hemban cii, i u dondo yô. (1 Pet. 2:21) Er u lu timen sha kwagh u ior mban vighe vighe la, hen sha aeren a doon a ve lu a mi la. (Heb. 12:1, 2) Nahan nenge er u fatyô u dondon ikyav i nomsombaiorov mban yô.

5. U er nan ve u hingir or u henen kwagh sha inja, man ieren ne ngi hange hange sha ci u nyi? (Pasalmi 119:9)

⁵ Nôngo lu or u henen kwagh sha inja shi kura mhen wou. (Anz. 3:21) Or u nan henen kwagh yô, nan gbe eren kwagh gagher ga, kpa ka nan hen sha kwagh tsembelee cii ve nan mase tsuan kwagh u nana er ye. Nahan nôngo kpoghuloo lu a ieren ne, shi i hingir ikye you. Sha ci u nyi? Sha ci u agumaior kpishi sha tar nyian nga eren kwagh sha mbamhen vev, shin ka ve er kwagh er ve nenge i doo ve la. (Anz. 7:7; 29:11) Shi akaa agen er televishen man ufiim kua ajiir a lamen a ior sha Intanet nahan kpa aa fatyô u geman gbenda u u henen kwagh la kua ieren you. Kpa u er nan ve u lu or u henen kwagha? Hii timen ken Bibilo sha er u fa gbenda u Yehova a henen kwagh la kua mnenge na sha akaa yô, maa hide hen ér i hii ve i doo u u eren kwagh u a kaa yô. U eren nahan cii yô, akaa a u hen la a wase u u eren kwagh u doon Yehova. (Ôr Pasalmi 119:9.) Aluer u hii u henen kwagh sha imba gbenda ne nahan yô, kwagh la una wase u kpishi je, u hingir u eren kwagh er Yesu nahan. (Anz. 2:11, 12; Heb. 5:14) Aluer u ngu henen kwagh yô, kwagh ne una wase u (1) shighe u u lu eren kwagh a anmgbianev mba kasev yô, man (2) shighe u u lu tsuan ikyondo i u hua, shin hwe u u er yô.

6. Aluer anmgbian u nan lu gumor nan ngu henen kwagh sha inja yô, kwagh la una wase nan u eren kwagh a anmgbianev mba kasev sha icivir nena?

⁶ Aluer or hen kwagh er Yehova nahan gbem var nan yô, kwagh la una wase nan u eren kwagh a kasev sha icivir. Ikyav i tesen yô, alaghga gumor soo u seer fan anmgbian u kwase, ngura ka kwaghbo ga. Nahan kpa, gumor u nan henen kwagh yô, nana nger anmgbian u kwase la washika shin nana er ma kwagh u tesen un ér ka ishiôr ga, aluer nan soo u vôson un ga yô. (1 Tim. 5:1, 2) Shi aluer gumor la nan ngu sôôr ma anmgbian u kwase je kpa, nana soo u vihin anmgbian u kwase u nan lu sôôr la iti ga, nahan mayange nana lu vea nan ve uhar tseegh ga.  Hanma shighe u ve soo u lun imôngo cii yô, nana soo ér orgen kpa nan lu her keng, sha er kwagh la una wase ve u palegh idya yô.—1 Kor. 6:18.

7. Ieren i henen kwagh sha inja la ia wase gumor u ken tiônnongo u tsuan ikyondo shin hwe u nana er la nena?

⁷ Shi gumor u nan hen kwagh er Yehova nahan gbem i var nan yô, ka nan tese ér nan ngu a mhen u Yehova sha akondo a nan hoo kua hwe u nan eren la. Ior kpishi mba ve koron akondo a fashôn shi ve yôôn kasua u a la ka mba ve cie Yehova shin ve ne un icivir ga yô. Shi a fatyô u lun ior mba ve eren idya yô. Mhen u idyaa u ve lu a mi la na yô, ka ve kor akondo a tsulen ken iyol bing, shin akondo a nomso vea hua vea lu er ka kasev nahan yô. Nahan shighe u gumor u nan soo u dondon ikyav i Yesu sha mimi la nan lu yamen ikyondo yô, nana hen sha kwagh u nana er ve a doo Yehova la, shi nana dondo ikyav i dedoo i mbagenev ken tiônnongo ve ver la. Nana fatyô u pinen iyol i nan ér: ‘Akondo a m huan la tese ér m eren kwagh sha kwaghfan shi m we mnenge u mbagenev ikyo kpa? M woho iyol sha gbenda u or a nenge a mo je maa nana fa ér m ngu or u civir Aôndo kpa?’ (1 Kor. 10:31-33; Titu 2:6) Gumor u nan henen kwagh yô, nana lu a icivir sha ishigh ki anmgbianev mba nan mba nomso man mba kasev kua Ter u nan u sha la.

8. Anmgbian u nan lu gumor nana er nena ve nana fatyô u eren kwagh sha gbenda u a na nan jighjigh?

⁸ Eren kwagh er a na u jighjigh yô. Gumor u nan eren kwagh sha gbenda u a na nan jighjigh yô, ka nan ver ishima sha ityom i nan shi nan eren i cii sha gbashima. (Luka 16:10) Nenge ikyav i hemban cii i Yesu yange ver yô. Mayange Yesu eren kwagh gera gera ga, shin lu orahumbe ga. Kpa yange a er hanma kwagh u Yehova a kaa ér a er cii, kua shighe u i taver u eren nahan je kpaa. Yange ior doo un ishima, hemban cii je yô mbahenen nav, nahan a na uma na sha ci ve a ishima na. (Yoh. 13:1) Hanma tom u i ne u cii yô, er u kpoghuloo, er Yesu eren nahan. Aluer u fa er u er tom shon jighilii ga yô, hide a iyol ijime, nahan ker iwasen hen anmgbianev mba ve dondon ikyav i Yesu yô. Mayange de eren kpuaa tseegh tsô maa deen ga. (Rom. 12:11) Kpa aluer u ngu eren tom u i ne u la “er ka sha ci u Yehova nahan . . . ka sha ci u ior ga” yô, u nôngo sha afatyô wou cii u er tom shon tsembelee, shi u bee hanma kwagh u i kaa ér we u er cii. (Kol. 3:23) Nahan kpa, fa wer u ngu a mbamyen, nahan aluer u er kwagh shami ga yô, hide a iyol ijime, lumun ibo.—Anz. 11:2.

9. Gba u anmgbian u nan lu gumor nana hen u eren akaa a wasen nan ayange ayange sha ci u nyi?

⁹ Kwagh u u er ve u hingir or u dondon ikyav i Yesu yô, a gba u u hen u eren akaa a wasen we ayange ayange. Akaa la aa wase u eren ityom i ken tiônnongo, shi zuan a tom u wasen we u nengen sha iyol you shin tsombor wou, shi lun vea mbagenev doo doo. Nenge akaa a hange hange agen kpuaa, a u fatyô u henen yô.

10-11. Aluer anmgbian u nan lu gumor nan hen u ôron takeda shi ngeren kwagh tsembelee yô, kwagh la una wase nan kua tiônnongo nena? (Pasalmi 1:1-3) (Shi nenge foto kpaa.)

¹⁰ Hen u ôron takeda shi ngeren kwagh tsembelee. Bibilo kaa ér or ka nana tôôn shighe hanma iyange nana ôron Mkaanem ma Aôndo shi  nana henen sha mi yô, i saan nan iyol shi nan fatyô u eren hanma kwagh kuren doo doo. (Ôr Pasalmi 1:1-3.) Aluer or ngu ôron Bibilo hanma iyange yô, nana fa gbenda u Yehova a henen kwagh la, nahan kwagh la una wase nan u henen kwagh tsembelee, shi nana fa u dondon akaawan a Ruamabera kpaa. (Anz. 1:3, 4) Kwagh ka a gba sha mba ve eren nahan la ken tiônnongo kpen kpen. Sha ci u nyi?

¹¹ Anmgbianev asev mba nomso man mba kasev ka ve suur sha nomsombaiorov mba ve fe u tesen shi wan ior kwagh ken Bibilo la. (Titu 1:9) Aluer u fa u ôron takeda shin ngeren kwagh tsembelee yô, u fatyô u wan iyol sha akaaôron kua kwaghhenen, sha er kwaghôron wou una wase mbagenev, shi ikyaa you ia seer taver jighjigh ve u nan yô. Shi u fatyô u ngeren atôakaa a vesen tiônôô tiônôô shin takeda, zum u lu henen kwagh shin u lu ungwan akaaôron a ken mbamkombo mba tiônnongo, shin sha mbamkohol mba ningir shin mbamkohol mba vesen yô. Akaa a u nger la aa wase u u seer lun a jighjigh u nan shi taver mbagenev asema.

12. U er nan ve u fa u lamen a ior shi keghen ato a ve tsembelee?

¹² Hen u lamen a ior shi keghen ato a ve tsembelee. Gba u Orkristu nana fa u lamen tsembelee. Inja na yô, gba u nana keghen ato a mbagenev shi nana kaven er i lu ve ken ishima man er ve henen kwagh la. (Anz. 20:5) Ka nan fan er i lu or ken ishima la sha ikyenge i nan, shin sha gbenda u nan lu eren sha ishi shin iyol i nan cii la. Saa u luun imôngo vea ior ve u fa u eren kwagh ne ye. Aluer hanma shighe u ngu tindin ior a loho sha Intanet shin ken hanseeti, shin sha igbenda igen i i lamen a ior sha ahumbe la yô, u kera fatyô u lamen a ior shighe u u lu vea ve ishigh a ishigh la tsembelee ga. Sha nahan yô, keren aan a lamen a ior ishigh a ishigh.—2 Yoh. 12.

13. Ka nyi igen kpa i gbe u gumor nana hen keng ne? (1 Timoteu 5:8) (Shi nenge foto kpaa.)

¹³ Hen u keren inyaregh nengen sha iyol you. Gba u Orkristu u nan dondon ikyav i Yesu nana nengen sha iyol i nan kua tsombor u nan. (Ôr 1 Timoteu 5:8.) Ken ityar igen yô, shighe ugen anmgbianev mba ve lu agumaior la ka ve hen tom gayô kpenga u eren sha ikyev i ter shin ma orgen hen tsombor ve. Sha ajiir agen di yô, ka i tese agumaior kpenga u eren shin ityom igen shighe u ve lu ken kôleeji la je. Wea lu henen akaa ne sha ikyev i teru shin ken makeranta kpa, ka i doo u u hen u eren kwagh u una wase u u va lun a tom yô. (Aer. 18:2, 3; 20:34; Ef. 4:28) Eren tom kpoghuloo, shi wea hii kwagh yô, er kwagh shon bee. Nahan mbagenev vea nenge ieren you ne shi tom wou ua doo ve kpishi. Aluer u ngu eren nahan yô, u ngôôr zuan a tom ga, shi a taver kpishi u i de u tom. Gba hange hange u Orkristu nana lu a aeren a se ter la shi nana fa u eren akaa a se lam sha mi ne, sha er ken hemen nana va fatyô u eren ityom igen kpaa yô. De se nenge ityom shon igen.

14. Anmgbian u nan lu gumor nana er nan ve nana wa ago iyol u va eren tom u pasen kwagh hanma shighe laa?

¹⁴ Tom u pasen kwagh hanma shighe. Nomso kpishi mba ve lu dondon ikyav i Yesu nyian la yange ve hii u eren tom u pasen kwagh hanma shighe la iyev je. Pania u eren ka a wase gumor nan fa u eren kwagh vea ior kposo kposo. Shi ka a wase nan nan fa u vihin inyaregh sha kwaghfan, sha er nana vihin inyaregh a hemban kwagh u nan zuan a mi la ga yô. (Fil. 4:11-13) Ka i hemba doon u hiin tom u pasen kwagh hanma shighe la sha u tôôn ishuen pania. Mbagenev kpishi ka ve er ishuen pania shighe a wa karen, nahan kwagh la a wa ve ago iyol u eren pania u keke. Aluer or ngu eren pania yô, kwagh la una fatyô u bughun nan gbenda u va eren tom u pasen kwagh hanma shighe la sha igbenda igen kpaa, er tom u maan kwagh shin ityom i shin Betel nahan.

15-16. Ka nyi ia wase anmgbian u nomso u nan lu gumor nana hingir orshiren tiônnongo shin ortamen?

¹⁵ Tom u orshiren tiônnongo gayô ortamen. Gba u anmgbianev mba nomso cii vea nôngo vea eren akaa a vea kuma u lun mbashiren tiônnongo shin mbatamen, shin vea tese ér mba a aeren a i gbe u vea lu a mi ve vea kuma u eren anmgbianev vev mba nomso man mba kasev tom ken tiônnongo yô. Bibilo kaa ér nomso mba ve keren u eren nahan cii, ka “tom u dedoo je u sar” ve ye. (1 Tim. 3:1) Saa anmgbian nana vande lun orshiren tiônnongo cii ve nana kuma u lun ortamen ye. Mbashiren tiônnongo ka ve wasen mbatamen u eren akaa kpishi. Mbatamen kua mbashiren tiônnongo cii ka ve hide a iyol ijime, ve eren anmgbianev vev mba nomso man mba kasev tom shi ve pasen kwagh sha gbashima. Anmgbianev mba ve lu agumaior la, aluer ve zurum a zurum anyom 20 tseegh kpa, vea fatyô u lun mbashiren tiônnongo. Shi orshiren tiônnongo u nan lu anyom 20 kar tseegh kpa, aluer nan kuma u lun ortamen yô, a fatyô u nan nan ortamen ken tiônnongo.

¹⁶ U er nan ve u lu a aeren a i gbe u u lu a mi keng ve u kuma u lun orshiren tiônnongo shi va lun ortamen ken hemen laa? Bibilo ter aeren a i gbe u u lu a mi yô. Nahan kpa, umbur wer saa u ôron Bibilo shi Yehova una doo u ishima kua tsombor wou man tiônnongo jimin cii ve u fatyô u tesen aeren shon cii ye. (1 Tim. 3:1-13; Titu 1:6-9; 1 Pet. 5:2, 3) Nôngo kpoghuloo kav hanma kwagh ken akaa a i i gbe u u er ve u kuma la. Shi er msen Yehova a wase u sha er u fatyô u eren akaa shon cii yô. c

17. Anmgbian u nomso u nan lu gumor nana wa ago iyol u va hingir nom shin ityough ki tsombor nena? (Shi nenge foto kpaa.)

¹⁷ Tom u nom man u ityough ki tsombor. Nomso mbagenev mba ve dondon ikyav i Yesu yô, ka ve lu kwav, er Yesu ôr nahan. (Mat. 19:12) Nahan  kpa, aluer u tsua u eren kwase yô, u hingir nom shi u lu ityough ki tsombor wou, nahan a gba u u er ityom la cii. (1 Kor. 11:3) Yehova soo ér nom nana tesen kwase u nan dooshima shi nana naan kwase u nan akaa a iyolough a kwagh a gbe nan a mi la, shi nana lu kwase u nan ijende i mimi, shi nana wasen kwase u nan u lun vea Yehova kôôsôô. (Ef. 5:28, 29) Aluer u er kwase, man u ngu a aeren a se hii teren ken ngeren ne kua mfe u eren akaa a se lam sha mi, er u henen kwagh sha inja man u eren kwagh a kasev sha icivir kua u eren kwagh sha gbenda a na u jighjigh nahan yô, kwagh la una wase u u lun nom u injaa. Nahan u wa ago iyol tsembelee u eren tom u nom man u ityough ki tsombor.

18. Anmgbian u nan lu gumor nana wa iyol i va lun ter nena?

¹⁸ Tom u ter. U va eren kwase yô, alaghga u mar wan shin ônov, nahan u hingir ter. Ka nyi akaa nahan u fatyô u henen hen Yehova ve u lu ter u fan kwagha? Akaa nga kpishi. (Ef. 6:4) Yehova yange ôr a Wan na Yesu ken igbar ér a doo un ishima shi doo un a na. (Mat. 3:17) U va hingir ter yô, we kpa ôron a ônov ou hanma shighe wer ve doo u ishima. Hanma shighe u ve er kwagh u dedoo yô, wuese ve sha kwagh shon. Uter mba ve dondon ikyav i Yehova yô ka ve wase mbayev vev mba nomso man mba kasev ve hingir nomso kua kasev mba dondon ikyav i Yesu. Hegen je, u fatyô u wan iyol i va eren tom ne sha u nengen sha mba hen tsombor wou kua mba ken tiônnongo doo doo. Shi hen u kaan a ve wer ve doo u ishima shi mba u a inja kpishi. (Yoh. 15:9) Kwagh ne una wase u u va lun nom u injaa man ter u fan kwagh ken hemen. Er u lu a ar sha iaven la ga ne, u lu Yehova man tsombor wou kua tiônnongo a inja kpishi.

19-20. Ka nyi ia wase anmgbianev mba ve lu agumaior la u hingir nomso mba dondon ikyav i Yesu? (Shi nenge foto u sha igbende kpaa.)

¹⁹ Ne anmgbianev mba ne lu agumaior la, saa ne nôngo kwagh kpoghuloo ve ne hingir nomso mba dondon ikyav i Yesu ye. Gba u ne tsua ior mba injaav mba ne dondo ikyav ve, shi ne nôngo ne lu ior mba henen kwagh sha inja, shi ne eren kwagh sha gbenda u a na ne jighjigh, shi ne hen u eren akaa a wasen ne ayange ayange, shi ne wa ago iyol sha ityom i ne va er ken hemen yô.

²⁰ Aluer u hen sha akaa a i gbe u u er tom sha mi kpoghuloo ne cii yô, alaghga u nenge wer taver u eren nahan. Kpa u fatyô. Umbur wer Yehova kegh iyol u wasen we. (Yes. 41:10, 13) Shi anmgbianev ou mba nomso man mba kasev mba ken tiônnongo kpa vea wase u. U va hingir or u Yehova a soo ér wer u lu la yô, a saan we iyol kpishi. Ne anmgbianev mba ne lu agumaior la, fa nen ner ne doo se ishima. Yehova a ver ne doo doo, er ne lu nôngon hegen ner ne hingir nomso mba dondon ikyav i Yesu yô.—Anz. 22:4.