1. Aluer se hen sha kwagh u Jighjigh u nan u Aberaham yô, alaghga se pine ser nyi?

 ER IOR kpishi ve ongo kwagh u Aberaham nahan kpa, ve fa kwagh na kuma ve ga. Kpa we u fa akaa kpishi sha kwagh u Aberaham. Ikyav i tesen yô, u fa er i yila Aberaham ér “ter u mba . . . ve ne jighjigh la cii” yô. (Rom. 4:11) Nahan kpa, alaghga u pine wer, ‘Me fatyô u nan Yehova jighjigh er Aberaham nahan je he?’ Een, u fatyô.

2. Aluer se mba timen sha ikyav i Aberaham la yô, kwagh la una lu se a inja sha ci u nyi? (Yakobu 2:22, 23)

² Gbenda môm u se fatyô u lun a jighjigh u nan er Aberaham nahan yô, ka u timen sha ikyav na la zulee. Aberaham yange eren ishima i Aôndo hanma shighe cii. Ka nahan ve yange mough yem ken tar u icaa, lu za tsan ken utenti anyom imôngo, shi kegh iyol u nan nagh sha Isaka, wan na u ishima ishima la kpaa ye. Aberaham er akaa ne cii sha ci u a na Yehova jighjigh taveraa. Er Aberaham na Yehova jighjigh shi tese jighjigh shon sha aeren a na yô, doo Yehova a na, nahan Aberaham hingir ijende i Aôndo. (Ôr Yakobu 2:22, 23.) Yehova soo ér we u er kwagh u a doo un a we shi u hingir ijende na yô. Ka nahan ve yange mgbegha Paulu man Yakobu ve nger kwagh u Aberaham ken Bibilo ye. Nahan se lu timen sha kwagh u Mbaroma ityough 4 man Yakobu ityough 2 ve ôr sha kwagh u Aberaham yô. Paulu man Yakobu ôr kwagh u vesen sha kwagh u Aberaham u i doo u se fa yô.

3. Ka avur a Bibilo a han Paulu man Yakobu yange ve ôr kwagh ve tere?

³ Paulu man Yakobu cii ôr kwagh ter Genese 15:6, ape i kaa ér: Aberaham “na TER jighjigh, tsô A gema kwagh ne hingir  perapera na je” la. Yehova ka a nenge or u nan eren ishima na la ér nan ngu orperapera, shi nan ngu a acôghor iyol ga. Kpilighyol kpishi er Aôndo ka a nenge uumace mba ve lu mbaasorabo shi ve yen ne ér mba a acôghor iyol ga yô! Ka keng we kpa u soo wer Aôndo a nenge u ér u ngu orperapera, shi una fatyô u nengen nahan kpaa. Nahan hegen se time se fa er i hii ve Yehova yange yila Aberaham ér orperapera, man kwagh u we kpa u er ve una nenge ér u ngu orperapera yô.

4. Ka nyi ka i yange orumace u lun orperapera?

⁴ Paulu ôr ken washika na u nger hen Mbaroma la ér, uumace cii mba mbaasorabo. (Rom. 3:23) Nahan a er nan ve Aôndo una lumun se shi una nenge se ér se mba mbaperapera sha wono? Kwagh u una wase se u zuan a mlumun sha mpin la yô, ka u timen sha kwagh u Paulu ôr sha Aberaham la.

5. Yehova yange kaa ér Aberaham ngu orperapera sha ci u nyi? (Mbaroma 4:2-4)

⁵ Yehova yange yila Aberaham ér orperapera shighe u Aberaham lu ken tar u Kanaan la. Yehova yange kaa ér Aberaham ngu orperapera sha ci u nyi? Lu sha ci u Aberaham lu kuran Atindi a Mose vough voughlo? Mayange ga cii. (Rom. 4:13) Aôndo yange yila Aberaham ér orperapera anyom kar hemba 400 cii ve, i va mase nan Mbaiserael Atindi a Mose la ye. Nahan lu nyi i na ve Aôndo kaa ér Aberaham ngu orperapera? Er Aberaham na Yehova jighjigh yô, Yehova tese un erdoo u sha mhôôn, nahan a yila un ér orperapera.—Ôr Mbaroma 4:2-4.

6. Yehova una fatyô u nengen orsholibo ér nan ngu orperapera sha ci u nyi?

⁶ Paulu kaa ér, or ka nana na Aôndo jighjigh yô, “Aôndo a nenge nan ér nan ngu orperapera sha ci u nan na jighjigh.” (Rom. 4:5) Paulu shi kaa ér: “Vough er Davidi kpa a ôr kwagh u msaanyol u or ka nan zua a mi zum u Aôndo a nenge nan ér nan ngu orperapera, kpa i lu sha ityom i nan ga la nahan, ér: ‘Saan mba i de ve aferakaa a ve, shi i cir asorabo a ve la iyol; saan or u Yehova a umbur isholibo i nan ma shighe môm ga la iyol.’” (Rom. 4:6-8; Ps. 32:1, 2) Aôndo den shin cirin asorabo a mba ve ne un jighjigh yô. Ka a de ve a asorabo a ve vindi vindi, shi a kera umbur a ma shighe môm ga. Sha mnenge na yô, mba a acôghor iyol ga, sha ci u jighjigh ve u nan la.

7. Se fatyô u kaan ser mbacivir Aôndo mba sha ayange a tsuaa la lu mbaperapera sha ci u nyi?

⁷ Yehova yange nenge Aberaham man Davidi kua mbajighjigh mbagenev ér mba mbaperapera, shin er ve lu mbaasorabo nahan kpaa. Er ve na Aôndo jighjigh yô, Aôndo nenge ve ér mba a acôghor iyol ga, sha ci u ve hemba mbagenev mba ve na Aôndo jighjigh ga la. (Ef. 2:12) Saa se lu a jighjigh ve se fatyô u yan ijende vea Aôndo ye, er Paulu pase ken washika na u nger hen Mbaroma la nahan. Aberaham man Davidi yange ve lu azende a Aôndo sha ci u ve na un jighjigh. Se kpa, aluer se na Aôndo jighjigh yô, se fatyô u lun azende a na.

8-9. Ka akaa a shami ga a nyi mbagenev ve ôr sha uwashika mba Paulu man Yakobu ve nger laa, man ka sha ci u nyi?

⁸ Mbahemenev mba ukwaghaôndo mba ve senge ér mba Mbakristu la mbagenev kaa ér, kwagh u or a er ve a yima nan yô, ka u nan Ter Yesu Kristu jighjigh tseegh, kwagh hemba nahan ga. Alaghga ka u ungwa ve kaa ér, “Ngohol Yesu, nahan u war.” Mbagenev kaa ér Paulu ôr nahan, sha ci u a nger ér: ‘Aôndo ka a nenge or ér nan ngu orperapera, kpa i lu sha ityom i nan ga.’ (Rom. 4:6) Nahan kpa, mbagenev di kaa ér aluer u ngu zan hen ijiir i adua ve a nenge ér ka icighan ijiir la, shi u ngu  eren akaa a dedoo a ior yô, u war. Alaghga vea ôr kwagh u i nger ken Yakobu 2:24 ér: “A fatyô u kaan ér or ngu orperapera sha aeren, a lu sha jighjigh u nan tseegh ga” la sha u suen ityesen ve.

⁹ Er mbamnenge ve lu kposo kposo sha kwagh ne yô, mbatôvon sha akaa a ken Bibilo hen ér Paulu man Yakobu gba zwa môm sha kwagh u or nana er ve Aôndo una lumun nan la ga. Sha kwagh u mbahemenev mba kwaghaôndo ve tesen yô, kwagh u Paulu a ôr la kaha kposo a u Yakobu la, sha ci u Paulu kaa ér gba u or a na jighjigh ve Aôndo una lumun nan ye. Kpa Yakobu yô gema tese ér saa or a eren akaa a dedoo ve Aôndo una lumun nan ye. Profesôr ugen u a tesen kwaghaôndo yô kaa ér: “Yakobu yange kav kwagh u Paulu nger ér ka jighjigh tseegh or a lu a mi ve a nenge nan ér nan ngu orperapera la ga. Shi Yakobu yange lumun a iwanger i Paulu ta sha kwagh ne la kpaa ga.” Kpa kwagh u Paulu kua Yakobu ve ôr la cii, lu Yehova kaa ér ve nger ye. (2 Tim. 3:16) Kwagh ngu u una wase se u fan ityôkyaa i i ne ve kwagh u Paulu a nger la a kaha kposo a u Yakobu yô. Cii ve se kav kwagh u ve nger la yô, a gba u se vande fan kwagh u ve lu ôron ve ve va ôr kwagh ve ter kwagh shon la.

10. Ka ityom i nyi Paulu lu ôron kwagh u i? (Mbaroma 3:21, 28) (Shi nenge foto kpaa.)

¹⁰ Ka ityom i nyi Paulu lu ôron kwagh u i ken Mbaroma ityough 3 man 4? Jighilii yô, yange lu ôron kwagh u kuran Atindi a Mose a i na Mbaiserael la. (Ôr Mbaroma 3:21, 28.) Ikyav tese ér, Mbayuda mbagenev sha ayange a Paulu la, mba ve lu Mbakristu yô lu nengen ér gba u vea kuran Atindi a Mose la her. Nahan Paulu yange ter kwagh u Aberaham la u wasen ve u fan ér saa or a kuran Atindi a Mose la keng ve Aôndo una lumun nan ér nan ngu orperapera ga. Kpa Paulu pase wang ér gba u se lu a jighjigh u nan. Kwagh ne ka kwagh u taver se ishima kpishi sha ci u a tese  ér, aluer se na Aôndo, kua Kristu jighjigh yô, Aôndo una lumun se.

11. Ka “aeren” a nyi Yakobu lu ôron kwagh u a?

¹¹ Nahan kpa, “aeren” a i ôr kwagh u a ken Yakobu ityough 2 la tese ér ka u kuran Atindi a Mose ga. Kpa Yakobu lu ôron kwagh u aeren shin akaa a Mbakristu ve eren ayange ayange yô. Ka sha aeren la ka i fa ér mimi je Orkristu nan na Aôndo jighjigh shin nan na un jighjigh ga ye. De se time sha igbenda ihiar i Yakobu a tese ikyav sha kwagh ne yô.

12. Yakobu yange pase er Jighjigh a we a zough vea aeren la nena? (Shi nenge foto kpaa.)

¹² Ken ikyav i hiihii la, Yakobu tese er i gbe u Mbakristu vea tesen ayol a ve dooshima u sangen a sange la ga yô. A tese ikyav sha or u nan er kwagh a orinyar doo doo, kpa nan gem nan er kwagh a icanor dang yô. Yakobu kaa ér, imbaor la nana senge ér nan ngu a jighjigh u nan, kpa nan gema nan er kwagh u a tese ér nan ngu a jighjigh ga yô. (Yak. 2:1-5, 9) Ken ikyav i sha uhar la, Yakobu ôr kwagh u or u nan nenge ‘anmgbian u nomso shin u kwase nan lu a ikyondo shin kwaghyan ga,’ kpa nan er kwagh u wasen nan ga yô. Aluer imbaor la nan senge ér nan na jighjigh kpa, aeren a nan tese ér nan na jighjigh ga. Sha nahan yô, jighjigh u nan ne la, ngu a iwasen ga. Ka vough er Yakobu yange ôr nahan, ér, “jighjigh u nan kpaa, aluer ngu a aeren ga yô, ngu kpenegh.”—Yak. 2:14-17.

13. Ka ikyav i nyi nahan Yakobu yange tese u pasen er i doo u se lu a jighjigh u nan, shi se tese un sha aerene? (Yakobu 2:25, 26)

¹³ Yakobu yange ôr kwagh u Rahabi ér a tese sha aeren a na ér un ngu a jighjigh u nan. (Ôr Yakobu 2:25, 26.) Rahabi yange ungwa kwagh u Yehova shi fa er lu suen Mbaiserael yô. (Yos. 2:9-11) Rahabi shi tese sha aeren a na ér un na Yehova jighjigh, sha ci u yange yer mbamkerev mba ken Iserael mba uhar, mba i lu keren ve a ku la, nahan ve war. Kwagh ne  na yô, Yehova yila Rahabi, u lu ken ikyurior igen, shi lu a mbamyen ne ér ngu kwase u perapera, vough er Aberaham kpa lu a mbamyen, shi kuran Atindi a Mose ga kpa, Yehova nenge un ér ngu orperapera nahan. Kwagh u Rahabi ne wase se u fan er i gbe hange hange u se tesen jighjigh u nan wase sha aeren yô.

14. Se fatyô u kaan ser kwagh u Paulu man Yakobu ve nger la gba zwa môm sha ci u nyi?

¹⁴ Nahan Paulu man Yakobu ve lu pasen kwagh u a lu jighjigh u nan la sha igbenda kposo kposo di tsô. Paulu lu pasen Mbayuda mba ve lu Mbakristu la ér, ka sha u dondon Atindi a Mose la man Yehova una lumun ve ga. Kpa Yakobu yô, lu pasen er i gbe hange hange u Mbakristu cii vea eren akaa a dedoo a mbagenev yô.

15. Ka sha igbenda i nyi nahan se fatyô u tesen jighjigh u nan wase sha aerene? (Shi nenge foto kpaa.)

¹⁵ Yehova ngu kaan ér saa se er hanma kwagh u Aberaham yange er la ve se lu mbaperapera ga. Jighilii yô, igbenda ngi kpishi i se fatyô u tesen sha ieren yase ser se mba a jighjigh u nan yô. Se fatyô u ngohol mbahev mba ve ve ken tiônnongo wase la, shi wasen anmgbianev mba nomso man mba kasev sha akaa a a gbe ve la, shi eren kwagh a mba hen tsombor wase doo doo. Aluer se mba eren akaa ne cii yô, a doo Aôndo a vese shi una ver se doo doo kpaa. (Rom. 15:7; 1 Tim. 5:4, 8; 1 Yoh. 3:18) Shi gbenda u vesen ugen u se fatyô u tesen ser se na jighjigh yô, ka u pasen loho u dedoo vea mbagenev sha gbashima. (1 Tim. 4:16) Se cii se fatyô u tesen sha aeren a ase ser akaa a Yehova a tôndo zwa u eren la aa va kure sha mi vough, shi gbenda u a eren kwagh la hemba doon. Aluer se er akaa ne yô, se fatyô u lun a vangertiôr ser Aôndo una yila se ér mbaperapera, shi se lu azende a na kpaa.

16. Ka nyi Aberaham yange lu veren ishima keghen, man yange na jighjigh a mi nena?

¹⁶ Mbaroma ityough 4 ôr kwagh u injaa ugen u se fatyô u henen ken Aberaham yô. Ityough kira wase se u fan er i gbe hange hange u se veren ashe a shighe u a akaa a se lu veren ishima keghen la a kure sha mi yô. Yehova yange tôndo zwa a Aberaham ér ka ken tsombor na “akuraior kpishi” aa zua iveren ye. Nenge er Aberaham yange una lu veren ashe keghen uityendezwa mba doon tsung mba i er na ne yô. (Gen. 12:3; 15:5; 17:4; Rom. 4:17) Nahan kpa, hen shighe u Aberaham va nyôr anyom 100, Sara di lu anyom 90 la kpa, ve lu a mar wan ga. Alaghga yange a lu inja er Aberaham vea Sara vea kera fatyô u maren wan ga nahan. Kwagh ne yange una na Aberaham iyolkpen kpishi je. Nahan cii kpa, Aberaham “na jighjigh shi lu a ishimaverenkeghen ér una va hingir Ter u akuraior kpishi.” (Rom. 4:18, 19) Shighe kar yô, kwagh u Aberaham lu veren ishima keghen la va er nahan vough. Yange va mar wan na Isaka, u ndera veren ishima keghen ér una mar la.—Rom. 4:20-22.

17. Hii nan ve se fe ser Aôndo una fatyô u nengen ser ér se mba mbaperapera, shi se ya ijende a naa?

¹⁷ Aôndo una fatyô u lumun se shi una nenge se ér se mba mbaperapera shi se fatyô u yan ijende a na er Aberaham nahan. Paulu kpa yange nger kwagh sha kwagh ne ér: “Kwagh u yange i nger ér, ‘Aôndo nenge un ér’ la, lu sha ci na [Aberaham] tseegh ga, lu sha ci wase kpaa. Aôndo una nenge se ér se mba mbaperapera sha ci u jighjigh u nan wase la, gadia se na Un u yange nder Yesu . . . shin ku la jighjigh.” (Rom. 4:23, 24) Gba u se na Yehova jighjigh shi se tese jighjigh u nan wase la sha aeren er Aberaham nahan. Shi doo u se lu a vangertiôr taveraa ser uityendezwa mba Yehova a er a vese la vea va kure sha mi kpee a bunde ga. Ken ngeren u a dondo la se lu nengen kwagh ugen u Paulu a ôr ken Mbaroma ityough 5 sha kwagh u ishimaverenkeghen yase yô.