Sha iyange igen la, anmgbian u kwase ugen ken tar u New Zealand nenge vidio igen sha jw.org. Vidio shon tese er mhôônom ma ker Yehova tseegh tsô ga, kpa ka ma mgbegha un a er kwagh yô. (Yes. 63:7-9) Yange dondo kwagh u hen la, shi ker aan a una wase or yô. Sha iyange shon la, gbe za yamen akaayan ken shôôpu yô, a nenge a kwase ugen u lu a ijiir i tsan ga yô, maa a kaa a na ér una yam un kwagh a ya. Kwase shon maa lumun. Anmgbian u kwase la za ve a kwaghyan la yô, a pase un kwagh kpuaa, a trak u Ican i Yan Ia Tsa a Bee Kpa? la.

Kwase la maa gba vaan. A kaa ér yange mbamaren nav yese un ken mimi, kpa un undu mimi anyom imôngo ken ijime. Nahan kpa, semberee ne, lu eren msen hen Yehova ér a wase un una hide hen a na. Anmgbian u kwase la maa na kwase shon Bibilo, shi a lumun ér a hen Bibilo a na. a

Se fatyô u kaven Yehova sha u zungwen ior mhôônom, kua ior asev mba hen tsombor man anmgbianev asev mba nomso man mba kasev mba ken tiônnongo. Shi se fatyô u tesen ser mhôônom kôr se a ior sha u keren aan a pasen ve kwagh.