UIYUA kposo kposo mba Yehova a ne se la mba u a inja kpishi je ka u henen a hen ga, shi doo u er a ne u ian i tsuan kwagh u u er a uiyua mba shon yô. Kwagh er doo yô, Bibilo kaa ér wain ka iyua i Aôndo a ne se yô. I kaa ér Aôndo er “zar u wain sha u nan or msaanyol . . . man ruam sha u taver or ishima.” (Orpa. 10:19; Ps. 104:14, 15) Nahan kpa, alaghga u nenge er ior mbagenev ve zough a mbamzeyol sha msôrom ma man yô. Heela tseegh ga, sha tar cii ior mba a mbamnenge kposo kposo kua atindi sha kwagh u msôr. Ka nyi ia wase Mbakristu ve vea tsua u man msôrom sha kwaghfana?

Sea lu han han shin a yese se sha eren a ikyurior i han han kpa, shighe u se soo u eren ma kwagh yô, gba u se suur sha kwaghwan u Aôndo, a lu sha mhen u ior ga. Se er nahan yô, kwagh la una wase se shi a saan se iyol kpaa.

Er alaghga u nenge nahan, ior kpishi sha tar mba me msôrom hanma shighe man ka ve ma kpishi. Alaghga mbagenev mba me msôrom sha ci u ka vea ma yô, i kundu ve iyol. Mbagen di ka ve ma msôrom ér ishima i de kera ze ve iyol sha mbamzeyol vev ga. Sha ajiir agen yô, ior ka ve nenge or u nan me msôrom kpishi la ér nan via or shi nan tsough iyol.

Nahan kpa, Mbakristu yô mba dondon kwaghwan u injaa u a dugh hen Aôndo u a gbe ve la. Ikyav i tesen yô, a ta se icin sha akaa a aluer se ma msôrom kpishi ve aa tser yô. Alaghga se ôr ken Anzaakaa 23:29-35 se nenge er i pase mlu u or u hunden msôrom vighe vighe, kua mbamzeyol mbagenev mba kwagh la ka a va nan a mi yô. a Ortamen ugen ken veghertar u Yuropa, iti na ér Daniel, a pase uma u yange eren shighe u lu a hingir Orkristu u mimi ga la, a kaa ér: “Yange m maan msôrom kpishi. Nahan kwagh shon na yô, m eren kwagh u injaa ga, shi akaa a vihin kpishi erem, a hegen je kpa ka mea hen sha mi ve ishima i doom ga yô.”

Orkristu nana er kwagh a ian i nan lu a mi i tsuan kwagh u nan soo u eren la nena ve nana palegh mbamzeyol mba ieren i man msôrom kpishi ka i va a mi laa? Kwagh u vesen yô, ka u dondon kwaghwan u Aôndo shighe u se lu tsuan kwagh u se er shin se lu eren ma kwagh yô.

De se nenge akaa a Bibilo i ôr sha kwagh u msôr yô, shi se time sha atôakyaa agen a ior ve me msôrom la kpaa.

U man msôrom akuma akuma yô, Mkaanem ma Aôndo venda ga. Jighilii yô, Bibilo ôr er wain a doo u man yô. I kaa ér: “Ya kwaghyan wou a iember, ma wain wou a iember ken ishima.” (Orpa. 9:7) Ashighe agen Yesu yange a ma wain, man kape mbacivir Aôndo mba jighjigh mbagenev kpa eren je la.—Mat. 26:27-29; Luka 7:34; 1 Tim. 5:23.

Er Mkaanem ma Aôndo ma yange se u man msôrom akuma akuma ga nahan kpa, ma gema ma yange se u man msôrom je hunden la. Bibilo kaa wang ér: “De hunden nen msôrom ga.” (Ef. 5:18) Mkaanem ma Aôndo venda kwagh ne taveraa je yô, ma kaa ér “mbahunden msôrom . . . vea ya dyako u Tartor u Aôndo ga.” (1 Kor. 6:10) Sha kpôô yô, Yehova yange u man msôrom karen ikyaa inya shi hunden la. Sha nahan yô, se gbaa man msôrom er se nenge ior ve me hen ijiir yase la ga, kpa se maan msôrom er Aôndo a nenge ér doo u se ma la.

Mbagenev nenge ér vea fatyô u man msôrom kpishi kpa ma a kôr ve ga. Nahan kpa, u eren nahan la kwaghbo ngu ker kpishi je. Ruamabera ôr wang ér ieren i man msôrom kpishi la ka ia ya tor ken or (shin kwase) yô, kwagh la a vihi mlu u nan vea Yehova. (Titu 2:3; Anz. 20:1) Yesu kpa yange ta icin ér ieren i “man kwagh kpishi” la ia fatyô u  yangen or u nyôron ken tar u he u Aôndo a tende zwa u van a mi la. (Luka 21:34-36) Sha nahan yô, ka nyi ia wase Orkristu u palegh mbamzeyol mba msôrom ka ma va or a mi laa?

Aluer se dondo mhen u ior ve lu a mi hen ijiir yase sha kwagh u man msôrom la shighe u se lu man msôrom yô, kwagh a tser se. Mbakristu ka vea yaan kwagh shin vea maan kwagh yô, ve er sha kwaghfan sha er a doo Yehova a ve yô. Bibilo kaa a vese ér: “Aluer ne mba yan kwagh shin man kwagh shin eren nyityôkwagh igen cii kpaa, eren nen akaa cii sha ci u icivir i Aôndo.” (1 Kor. 10:31) De se time sha mbampin mbagenev mba ve dondo ne kua akaawan a Bibilo agen kpaa.

M me msôrom mer ior ve soo kwagh wamaa? Ekesodu 23:2 kaa ér: ‘De dondon ikpelaior ga.’ Yehova lu wan Mbaiserael kwagh heen ér ve de dondon ieren i ior mba un venda ve la ga. Nyian kpa, kwaghwan la ngu a inja sha ci u Mbakristu. Aluer se mba dondon mhen u ior sha kwagh u msôr yô, se de u dondon atindi a Yehova kure kure, maa se va pav a na.—Rom. 12:2.

M me kwagh mer ior ve nengem ér m ngu nomsooro? Sha ajiir agen yô, ior kpishi mba me kwagh hanma shighe shi ka ve ma kpishi, shi i nenge ieren ne ér ka kwaghbo ga. (1 Pet. 4:3) Kpa nenge ase kwagh u 1 Mbakorinte 16:13 a kaa ér se er ne, ér: “Lu nen per, tile nen dông sha jighjigh u nan, eren nen kwagh sha inja i nomsombaiorov, hingir nen mbatseen asema.” Msôrom ka ma wase or nan hingir ortseen ishimaa? Ei, ka ma er or nan kera tsee ishima ga. Msôrom ma ngôôr geman or ga; ka ma er or nan kera henen kwagh tsembelee ga, shi nan eren akaa sha ibume. Sha nahan yô, ieren i man msôrom kpishi la i tesen ér or ngu nomsoor shin or u taver iyol ga. Kpa kwagh la ka a gema a tese ér nan ngu ibumeor shin or u gban kera. Yesaia 28:7 ôr kwagh u or u msôrom ma er nan nan hingir mee la ér ka or u nan nôngo gbeev nan hingir zemba ze zemba, shin nan kera henen kwagh sha inja ga yô.

Ka Yehova ka a na se agee a eren kwagh u vough ye, man agee shon yô ka u ‘lun per, tilen dông sha jighjigh u nan.’ (Ps. 18:32) Se er kwagh ne nena? Se er sha u lun tsevaa hanma shighe cii sha er se fatyô u palegh akaabo shi eren ma kwagh u una vihi mlu wase vea Yehova ga yô. Shighe u Yesu  lu shin tar la, a tese ér un ngu a imba agee la sha ci u lu vea Yehova kangenaa. Nahan ior kpishi naan un icivir sha ci u lu or u taver ishima, u eren kwagh u vough hanma shighe cii yô.

Ka m ma msôrom mer ishima i de u nyian mo sha mbamzeyol ava? Aôndo yange mgbegha orpasalmi ugen nger ér: “Zum u ishimanyian na m hingir tenge tenge yô, we [Yehova] u surum ishima shi u na ishima gbam shimi.” (Ps. 94:19 NWT) Shighe u ishima i nyian we kpishi sha mbamzeyol ou yô, suur sha Yehova wer a wase u, i de lu sha msôr ga. Gbenda u u er kwagh ne ve a wase u yô, eren msen hen Yehova fele fele i hemba er u vanden eren kera la. Heela tseegh ga, ior kpishi nenge ér ka vea ker kwaghwan hen ma anmgbian u ken tiônnongo u nan vie yô, kwagh la a wase ve. Jighilii yô, aluer or ngu man msôrom ér ma wase nan u wan ishima a mbamtaver yô, kwagh la una na nana kera fatyô u eren kwagh u vough hanma shighe ga. (Hos. 4:11) Daniel u se vande ôron kwagh na la kaa ér: “Yange ishima zer nyian mo shi nan mo ibo gbem. Nahan m lu man msôrom mer me hungur a zayol la. Kpa mbamzeyol av lu seer a seer; azende a am kpa pav a mo shi m kera lu a icivir ga.” Ka nyi yange i wase Daniel? A kaa ér: “Yange m nenge mer gba u me suur sha Yehova, a lu sha msôr ga. Nahan ken masejime yô, m fatyô u wan ishima a mbamzeyol av shi civir Yehova sha mimi. Doo u se fa ser Yehova kegh iyol u wasen se hanma shighe cii, shighe u i lu inja er mbamzeyol asev gande ave je kpaa.—Fil. 4:6, 7; 1 Pet. 5:7.

Wea lu or u ashighe agen ka u ma msôrom yô, hen sha gbenda u u me msôrom la, pine iyol you wer: ‘I lu nahan or u hen tsombor wam shin ma ijende yam nan huna gbenda u ka m ma msôrom laa?’ Aluer or huna yô, tese je ér u ngu a ieren shin zayol ugen u u fe ga yô. ‘M ngu man msôrom hegen ka hemban er yange m maan laa?’ Or u msôrom ma ye tor ken a nan ga je kpa, aluer nan hii u man msôrom kpishi yô, ma a va ya tor ken a nan. ‘M fetyô u wan ishima mer ayange a kar kpuaa shin shighe a kar tsô shi me ma msôrom je kpa?’ Aluer ka nahan yô, kwaghman hingir ikye you shin a ya tor ken a we. Nahan a gba u mbatwerev vea wase u sha er u de ieren la yô.

 Er msôrom ma man ka ma va a mbamzeyol kpishi yô, Mbakristu mbagenev tswer u man msôrom jimin cii. Mbagenev yô mba me msôrom ga sha ci u ma doo ve ken zwa ga. Aluer kwagh u or ngu nahan yô, u fatyô u tesen nan erdoo sha u nengen wer nan ngu a ian i tsweren msôrom, a u puun nan shio.

Alaghga Orkristu nana nenge ér doo u nana ver ingyegh ki akpe a msôr a nana maan, shin nana ver ashighe a nana maan msôrom yô. Alaghga nana tsua u man kwa môm ken kasua, gayô man akuma akuma shighe u nan lu yan kwagh yô. Mbagenev ver a ver msôrom ma vea maan yô. Mba me wain man bia akuma akuma, kpa msôrom ma taver yô, mba me ga, ka a nungwa ma sha akaaman agen je kpaa. Aluer or ver akpe a msôr a nana maan, shin nan ver a ver msôrom ma nana maan, shin ashighe a nana maan msôrom nahan yô, a taver nan u dondon ga. Orkristu u nan vie ken jijingi shi nan eren nahan yô, ityôkyaa ngi i ishima ia za nan iyol sha gbenda u alaghga mbagenev vea lu nengen nan la ga.

Shighe u se soo u man msôrom yô, a gba u mbagenev kpa se wa mnenge ve ikyo. Mbaroma 14:21 kaa ér: “Doo u u ya inyam shin u ma wain shin u er nyityôkwagh i ia na anmgbian wou gbeev mbu nôngon ga.” U dondo kwaghwan ne nena? Tese wer anmgbian wou doo u ishima. Aluer u nenge wer u ma msôrom a doo orgen ga yô, dooshima una mgbegha u u tsweren msôrom hen shighe u u lu vea nan yô. U er nahan yô, u tese wer u wa mnenge u mbagenev ikyo, shi u ngu keren u eren kwagh u una lu ve a iwasen, a lu sha ci u iwasen you ga yô.—1 Kor. 10:24.

Shi alaghga gomoti una wa atindi sha kwagh u msôr. Nahan a gba u Orkristu nana kura atindi la. Alaghga atindi la aa tese anyom a or a lu ve nana kuma u man msôrom yô, gayô aa kaa ér aluer or ma kwagh yô, nana de nahan kwaghhendan ga, shin nana de eren kwagh a injin ga.—Rom. 13:1-5.

Yehova na se uiyua mba dedoo kpishi, man iyua igen ken uiyua mba shon yô, ka ian i tsuan er se er kwagh a uiyua mba shon la. Kwagh ne wa u tsuan kwagh u se ya man kwagh u se ma yô. Yô, akaa a se tsough la a tese ér ian i a ne se ne doo se kpishi, sha u eren kwagh a i sha gbenda u a doo Ter wase u sha la a vese yô.