U ôr Iyoukura mba i gber ken inyom ne vighe vighe kpa? Yô, nenge ase wea fatyô u nan mlumun sha mbampin mban yô:

U ‘lun a mhen u he’ la inja ér nyi? (Rom. 12:2)

Inja na yô, ka u se eren akaa a dedoo kpuaa tseegh ga. Kpa gba u se hen sha imbaor u se lu la, shi se sôr akaa a i gbe u se sôr ken uma wase la, sha er se ungwan imo i Yehova tsembelee er se fetyô la cii yô.—w23.01, p. 8-9.

Shighe u se lu nengen abaver yô, se tese ser se mba a mnenge u vough sha akaa a a lu zan hemen sha tar hegen la nena?

Ka se ver ishima sha akaa a a lu zan hemen sha tar nyian u kuren kwagh u Bibilo i tsenga ôron la yô. Kpa gba u se palegh u keren ahaba er kwagh u se nenge la una za la, sha ci u kwagh ne una fatyô u van a mpav ken tiônnongo. Nahan gba u se lamen vea mbagenev sha akaa a nongo u Yehova u nger ken ityakeda yase la. (1 Kor. 1:10)—w23.02, p. 16.

Batisema u Yesu la kaha kposo a batisema u mbadondon un la nena?

Yange i mar Yesu ken ikyurior i Aôndo vande tseghan sha ci na iyol na yô, nahan gba u una tsegha iyol na sha ci u Yehova, er se eren nahan ga. Bee kera yô, Yesu lu a myen môm môm ga, shi ken uma na cii, er isholibo ga. Nahan gba u una gema ishima sha ma isholibo ga.—w23.03, p. 5.

Ka nyi se er ve mbagenev kpa vea fatyô u nan ikyaa ken mkombo?

Se fatyô u ôron kwagh tiônôô, nahan nan mbagenev ian ser ve kpa ve wa zwa. Shi se palegh u lamen sha atôakaa kpishi. Nahan atôakaa a a shi her a mbagenev kpa vea lam sha mi yô.—w23.04, p. 23.

“Icighangbenda” u i er kwagh na ken Yesaia 35:8 la lu nyi sha hiihii laa, man nyian di ka nyi?

Sha hiihii la, kômgbenda u sha injakwagh ne lu gbenda u Mbayuda kar sha mi, shighe u ve mough ken Babilon ve hide ken tar ve la. Sha ayange a ase ne di ye? Yange i er tom u sôron gbenda u sha injakwagh ne anyom uderi imôngo cii man inyom i 1919 la ye. Tom shon yô, lu u geman ukôpi mba Bibilo ken ijô igen shi gberen ukôpi mba Bibilo, shi i er akaa agen kpaa. Ior mba Aôndo mba zenden sha “Icighangbenda” van ken paradiso u ken jijingi. Vea za sha u zan zan vea za nyôr ape u yem u nyer la, ka averen a Tartor je la.—w23.05, p. 15-19.

Ka kasev mba sha injakwagh mba uhar mba han Bibilo i we se kwagh sha kwagh ve ken Anzaakaa ityough 9?

Takeda u Anzaakaa ôr kwagh u “ibumekwase” u a lu lôhôn ior ér ve za ape vea za kure shin “Sheol,” shin ken ku yô, kua kwagh u ‘kwaghfan u mimi’ u i tôô un i kar sha kwase ugen, u a lu lôhôn ior ér ve za ape vea zua a “gbenda u mkav” man uma yô. (Anz. 9:1, 6, 13, 18)—w23.06, p. 22-24.

Gbenda u Aôndo er kwagh a Loti la tese ér hidi a iyol ijime shi sendegh sha kwagh ga nena?

Yehova yange kaa a Loti ér a due ken gar u Sodom a yevese a yem sha iwo. Kpa Loti zamber a na ér ma un za yer ken gar u Soar yô, Aôndo lumun ér a yem ker.—w23.07, p. 21.

Aluer kwase fa ér nom u nan ngu nengen ufoto mba ijimbagh yô, ka nyi kwase la nana fatyô u erene?

Kwase la nana umbur ér ka ibo i nan ga. Kpa nana hemba veren ishima sha mlu u nan vea Yehova, shi nana hen sha kwagh u kasev mbagenev ken Bibilo mba Aôndo yange wase ve ve zua a ishimasurun sha mbamzeyol vev yô. Shi nana fatyô u eren akaa a aa wase nom u nan la u palegh ufoto mba ijimbagh yô.—w23.08, p. 14-17.

Shighe u or pin se mpin sha kwagh u atesen a ase yô, kwaghfan una wase se se lam a nan kundu kundu nena?

Se fatyô u henen sha mpin shon, nahan fan kwagh u nan henen ken ishima shin kwagh u a hembe gban nan ishima la. Nahan kwagh ne una hemba wasen se u lamen a nan kundu kundu.—w23.09, p. 17.

Ka nyi se fatyô u henen ken gbenda u Maria zua a agee laa?

Zum u Maria fa ér ka un una mar Mesiya yô, a zua a agee hen mbagenev. Ortyom Gaberiel man Elisabetu yange ve ôr Maria akaa a ken Ruamabera a taver un ishima. Se kpa se fatyô u zuan a agee hen mba se civir Yehova a ve imôngo la.—w23.10, p. 15.

Yehova una fatyô u ungwan mbamsen asev nena?

Yehova tôndo zwa ér una kegh ato a mbamsen asev, shi ka a nenge aluer akaa a se sônon la zua sha awashima na yô. (Yer. 29:12) Yehova una fatyô u ungwan msen môm sha igbenda kposo kposo, kpa una wase se hanma shighe cii.—w23.11, p. 21-22.

Mbaroma 5:2 ter ishimaverenkeghen i Mbakristu mba ken Roma lu a mi la, man er nan ve shi i ôr kwagh u “ishimaverenkeghen” ken ivur i sha 4 laa?

Shighe u or ongo loho u dedoo yô, nana fatyô u zuan a ishimaverenkeghen i va lun uma gbem sha won ken paradiso shin tar. Kpa er nan lu yan ican shi wan ishima a mi shi nengen ér Aôndo lumun nan yô, ishimaverenkeghen i nan lu a mi la kpa ia lu taver seer a seer.—w23.12, p. 12-13.