Apostoli Paulu yange nger washika hen Timoteu, u un kpa lu ortamen la kaa ér: “M ngu kaan a we sha ishigh ki Aôndo man Kristu Yesu kua mbatyomov mba Aôndo a tsough la mer, vande tôvon sha akaa ne vighe vighe cii man u tsua kwagh u u er ye, a u sangen a sange shio.”—1 Tim. 5:21.

Kwagh u una wase se u fan mbatyomov mban yô, ka u tôvon fan mbatyomov mba i tsough ve ga la. Ikyav tese wang ér mbatyomov mba i tsough la mba kposo a mba 144,000 la. Shighe u Paulu nger washika ne hen Timoteu la, i lu a hii u nderen Mbakristu mba i shighe ve mkurem la ér ve yem sha ga. Mbaapostoli man mbagenev mba i shighe ve mkurem la lu a hingir ior mba ken jijingi ga, nahan lu u a fatyô u ôron kwagh ve ér mba “mbatyomov mba Aôndo a tsough” ve la ga.—1 Kor. 15:50-54; 1 Tes. 4:13-17; 1 Yoh. 3:2.

Shi “mbatyomov mba Aôndo a tsough” ve la ka mbatyomov mba yange ve hemba ato hen shighe u Mngerem ma Deemee va la ga. Mbatyomov mbara yange ve ta ikyaa a Satan shi ve hingir azôv, nahan ve hingir mbahyomov mba Yesu. (Gen. 6:2; Luka 8:30, 31; 2 Pet. 2:4) Ken hemen yô, Yesu una kende ve shin ihyungwa i i ze kweng la, vea lu shimi anyom 1,000. Shighe la una been yô, a tim ve a Satan imôngo.—Yuda 6; Mpa. 20:1-3, 10.

Sha nahan yô, “mbatyomov mba Aôndo a tsough” ve, mba Paulu ôr kwagh ve la, ka keng a lu mbatyomov mba ve sue “Aôndo man Kristu Yesu,” ve mba uhar mba i ter ve ken ivur shon la.

Mbatyomov mba jighjigh mba udubu imôngo. (Heb. 12:22, 23) Hanma ve yô, Yehova na nan tom u nan kposo a mbagen. (Mpa. 14:17, 18) Ikyav i tesen yô, Yehova yange kaa a ortyom ugen la ér a za tim shoja i Ashiria 185,000. (2 Utor 19:35) Shi alaghga i tsua mbatyomov mbagen kpishi ér ve va “kar a hanma kwagh u nan gbeev mbu nôngon cii ken Tartor [u Yesu] kera, kua mba ve peren atindi la cii.” (Mat. 13:39-41) Alaghga mbatyomov mbagen di vea lu va “kohol ior nav mba a tsough” ve la yemen a ve sha. (Mat. 24:31) Shi i na mbagen tom ér ‘ve kuran se sha igbenda yase cii.’—Ps. 91:11; Mat. 18:10; nenge Mateu 4:11; Luka 22:43.

Nahan ikyav tese ér “mbatyomov mba Aôndo a tsough,” mba i ôr kwagh ve ken 1 Timoteu 5:21 la ka mbatyomov mba Aôndo yange na ve tom u nengen sha tiônnongo yô. Kwagh u Paulu lu ôron ve va ter kwagh ne la tese ér, yange lu wan mbatamen kwagh er i gbe u vea eren ityom ve, man er i gbe u mba ken tiônnongo vea naan ve icivir yô. Paulu yange kaa a mbatamen ér ve de “sangen a sange” ga, shi ve tôvon sha kwagh tsembelee cii vea tsua kwagh u vea er ye. Kwagh u vesen u a ne ve i gbe u mbatamen vea dondo kwaghwan u Paulu la yô, ka sha ci u mba eren kwagh ne “sha ishigh ki Aôndo man Kristu Yesu kua mbatyomov mba Aôndo a tsough la.” Nahan ikyav tese wang ér i ver mbatyomov mbagen ér ve nengen sha tiônnongo, man kwagh ne wa u kuran tiônnongo, shi hemen ken tom u pasen kwagh, shi ôron Yehova kwagh u ve nenge yô.—Mat. 18:10; Mpa. 14:6.