Yange i marem ken geri u Quebec, kpentar u Quebec, tar u Kanada; ka zwa French i lamen hen kpentar ne ye. Mbamaren av lu Louis man Zélia. Yange ve soom kpishi shi ve eren a mo kundu kundu. Terem lu or u cian ashe shi soo takerada u ôron kpen kpen. Kwaghngeren yange a doom kpishi, shi m wa ishima mer me va hingir or u tôôn abaver.

Shighe u m lu anyom 12 la, orgen u eren tom vea terem yô, va hen ya wase vea ijende na, iti i or ne lu Rodolphe Soucy. Ior mban lu Mbashiada mba Yehova. Yange m fa kwagh u Mbashiada kpishi ga, shi sarem u fan kwagh u kwaghaôndo ve la keng ga. Kpa gbenda u ve na se mbamlumun sha mbampin asev ken Bibilo la doom. Mbamaren av kpa kwagh la doo ve, nahan se lumun ser i va hen Bibilo a vese.

Hen shighe la m lu zan makeranta u adua u Fada bugh yô. Ashighe agen yange m lamen vea mbayev mba ken kelase wam sha akaa a m lu henen ken Bibilo la. Shighe kar yô, atica am a a lu ufada la va fa kwagh ne. Kpa ve kera tesem ijiir i Bibilo i vende kwagh u m lu eren la ga. Tica ugen ken ve gema wam kwagh iyol sha ishigh ki kelase cii ér mo m ngu wan u hemban ato! Er yange yinam ga nahan cii kpa, kwagh u dedoo gema va due ken kwagh ne. Kwagh ne wasem u kaven mer atesen a kwaghaôndo a i tesen hen makeranta la cii zua sha kwagh u Bibilo i er ga. Yange m nenge mer gba u me de u zan makeranta heela. Mbamaren av kpa ve va lumun, nahan m musan makeranta.

Yange m za hemen u henen Bibilo, nahan kpa m gema m lu vesen ken jijingi fele fele ga sha ci u i cier mo iyol u pasen kwagh sha uya uya. Adua u Fada lu a tahav hen ijiir yase kpishi, shi lu hendan a tom wase u pasen kwagh la kpoghuloo. Orgen u i yilan un ér Maurice Duplessis u lu hemen kpentar u Quebec la eren kwagh vea adua ne  ikyooso ikyooso. Er lu suen ior mba ken adua ne yô, ve shi eren Mbashiada ayôôso shi ashighe agen ve ta num sha Mbashiada je kpaa. Yange i gba u saa or a taver ishima ve nana pase kwagh ye.

Anmgbian u yange wasem u hemban mciem yô, lu John Rae. Yange za Makeranta u Gileadi kelase u sha utaankarunyiin la. John lu a mkav kpishi, shi eren kwagh kundu kundu shi kenden a iyol sha ga shi luun ior ican u lamen a na kpaa ga. Yange i kar a kar a wam kwagh jighilii ye, kpa m hen akaa kpishi ken ikyav na i dedoo la. John yange a sharegh a sharegh a zwa French, nahan m due kwaghpasen vea na shi m wasen un u lamen a ior ken zwa ne. Er m luun vea John ashighe kpishi yô, kwagh la wasem u tsuan mer me hingir Orshiada u Yehova. Yange m er batisema sha iyange i Mei 26 inyom i 1951; hii shighe u m zua a Mbashiada la va hen shighe ne lu anyom pue.

Tiônnongo wase u kiriki u ken geri u Quebec lu a upania ker kpishi. Ieren ve la mgbegham u mo kpa hingir pania. Sha shighe la se pasen kwagh sha uya uya a Bibilo tseegh. Er se luun a ityakerada ga yô, i gba u se eren tom a Bibilo tsema tsema. Nahan m nôngo kpoghuloo m seer fan avur a Bibilo sha er me paan mimi iyol yô. Nahan kpa ior kpishi yange vea nenge a ikyav sha Bibilo i tesen ér Mbafada lumun i ga je ve venda u ôron i.

Ken inyom i 1952 la, m vôso Simone Patry, anmgbian u kwase u hen vegher wase la u civir Yehova sha mimi yô. Maa se mough se yem ken geri u Montreal, ivese yase lu a zua inyom ga maa se mar wan u kwase; se ii un iti ser Lise. Er m de u eren pania shighe kar kpuaa cii ve m vôso kwase nahan kpa, mo vea Simone se nôngo ser se eren kwagh ken uma akuma akuma sha er tsombor wase ua eren akaa a ken tiônnongo kpoghuloo yô.

Anyom yange kar kuma pue cii ve m hide m hen sha kwagh u tôôn pania ye. Ken inyom i 1962 la, m za Makeranta u Tsaase Mbatamen; yange i er u shin Betel u ken tar u Kanada la uwer jimin. Shighe u m za makeranta shon ne la i verem ken iyou vea anmgbian ugen, i yilan iti na ér Camille Ouellette. Gbashima u anmgbian Camille lu a mi sha tom u kwaghpasen la doom kpishi, hemban je yô er lu a tsombor ave yô. Ken ashighe a karen la lu anmgbianev mba nomso man mba kasev kpuaa tseegh ve lu a icombor shi ve lu eren pania hen Quebec ye; man lu kwagh u Camille lu nôngon u eren je la. Yange taver mo ishima ér m hen sha kwagh u eren pania. Iwer ngi kar kpuaa yô, m va mase kaven mer shi me fatyô u hiden eren tom pania. Mbagenev yô nenge a kwaghfan ken kwagh u m tsua u eren la ga. Kpa mo yô m lu a vangertiôr mer Yehova una ver iniôngon  yam i m tsough u eren tom u kwaghpasen la doo doo, nahan m za hemen.

Ken inyom i 1964 la, i kaa ér mo vea Simone se za er ikpur pania ken geri u Quebec, ape lu ijiir yase la. Yange se pase kwagh hen ijiir ne anyom imôngo. Hen shighe ne nahan ior wa panden u hendan a vese ken kwaghpasen, nahan kpa mbagen lu hendan a vese her.

Sati ugen la Dasenda va kôrom atetan, hen angeri u i yilan ér Sainte-Marie u a lu ikyua a geri u Quebec la. Ordasenda u kôrom la za wuhem ken sev sha ci u m lu pasen kwagh sha uya uya a takerada u nan or ian i pasen kwagh shio. Shighe kar yô, i va a mo hen jôôji ugen i yilan un ér Baillargeon. Or la cieryol u kenger kpishi. A pinem ér ka an nan lu lun loya wam ken koti? M yer iti i Glen How * u lu Orshiada shi i fa un wuee la yô, ishima ta un kwe, maa a kaa ér: “Ei he! I de lu un ga!” Glen How lu loya u i fa un wuee sha ayange la, u a zenden sha ajir a mbashiada ken koti yô. Nahan ica gbe ga yô, atejir la maa kaa a mo ér mo m yem kwagh wam.

Er ahendan lu ken Quebec kpishi yô, lu se zange u zuan a ijiir i injaa i se kôr haya her se eren mkombo ga. Lu an-tseiyou u veren akaahendan u yange a ndôhôr kpishi yô, tiônnongo wase zua a mi u nyôron mkombo her ye. Anmgbianev mba hen ijiir ne yange ve zua a an-mashin u tan ahumbe a tseen u i yer ér oil heater la. Nahan ashighe kpishi se tema her se ôson un se lamen sha akaa a taver ayol ase asema. Yange ve tema her ahwa a kar kpuaa cii ve mkombo a hii ye.

Akaa a dedoo aa se nenge a mi ken tom u pasen kwagh ken anyom a karen ken ijime la kpilighyol kpishi. Ken kwavanyom u 1960 la, atôônanongo lu di kpuaa tseegh hen geri u Quebec kua hen haregh u Côte-Nord man Gaspé Peninsula la, shi lu atôônanongo a kiriki. Hegen ne, anmgbianev ka ve kumba ken Ayou a Tartor a doonashe hen uharegh mban, shi mba a uningir hen ajiir ne hemba uhar.

Ken inyom i 1970 la, i lôhôm vea Simone ér se za er tom u sôron atôônanongo. Kpa mba ker inyom i 1973 la yô, i tindi se ér se za er tom u sôron uharegh. Ken anyom ne m hen akaa kpishi sha ikyev i anmgbianev mba vian er Laurier Saumur * kua David Splane * nahan, ve cii ve lu mbatamen mba ningir sha. Hanma mkohol u kiriki u yange una bee yô, mo vea David se lam sha akaa a aa wase hanma wase u seer fan ityesen yô. M umbur kwagh u David ôr a mo kwagen la yô, a kaa ér: “Léonce u na kwaghôron wou u masetyô la doom. Kwaghôron la doo, kpa luun er ka mo yô, akaa a u ôr ken kwaghôron wou la kuma u me na akaaôron atar a mi.” Yange mea naan kwaghôron yô, m kura akaa kpishi m lam sha mi. Nahan gba u me nôngo me pande kwagh la.

Mbatamen mba sôron uharegh yange ve lu a tom u taver mbatamen mba sôron atôônanongo asema. Kpa mbapasenkwagh mba ken Quebec gema fam  tsembelee. Nahan mea za u sôron uningir vev mbara yô, ashighe kpishi ve soo u duen kwaghpasen vea mo. Er yange i doom u pasen kwagh vea ve nahan kpa, m gema m luun a shighe u lun vea ortamen u sôron atôônanongo yum ga. Kwagen la, ortamen u sôron atôônanongo u lu inja kundu kundu shi fa kwagh kpishi yô kaa a mo ér: “Ka u na anmgbianev shighe kpishi nahan i doo, nahan kpa umbur wer kasua ne yô, ka mo u ve u sôron ye. Mo kpa gba u a taver mo ishima!” Yange m hen akaa kpishi ken kwaghwan u kundu kundu ne.

Ken inyom i 1976 la, kwagh erem u vihin tsung u m ver ishima ga yô. Kwase wam Simone gba angev maa kpe. Yange tangen iyol ga shi Yehova doo un ishima, kwagh ne na yô lu kwase kpen kpen. Kpa u duen kwaghpasen hanma sev la na yô m zua a ishimasurun, man m wuese Yehova kpishi er yange wasem hen shighe u taver ne nahan. Shighe kar yô, shi m vôso Carolyn Elliott. Lu kwase buter u eren tom pania sha gbashima yô. Yange va ken Quebec u va eren tom hen ape kwagh a hembe gban sha mbapasenkwagh yô. Carolyn ka kwase u lun a ior sar sar shi kwagh u mbagenev ngu a gba un ishima tsung, hemban je yô mba ve cie ashe shin mtswenem ma ker ve yô. Shighe u se lu eren tom u ningir sha la, a wasem kpishi.

Ken inyom i 1978 la, i kaa ér m za tese Makeranta u Henen Tom Pania u hiihii u i er ken kpentar u Quebec la. Yange cier mo iyol sha ci u m lu a vande zan makeranta la ga shi m lu a vande nengen a takerada u ka i hen ker la kpaa ga, nahan mo kpa lum kwagh u he di vough er mbayevmakeranta mbara nahan. Kpa kwagh er doo yô, kelase u hiihii u m tese la lu a upania mba ve tse ken tom pania yô. Shin er lu mo m lu tesen mbayevmakeranta mbara nahan kpa, m hen akaa ken a ve kpishi!

Shi ken inyom i 1978 shon, i er Mkohol u Ityar Ityar u “Victorious Faith” (Jighjigh u Nan Hemba Ityav) la hen agirigi u anumbegh ken geri u Montreal. I gbe je lu mkohol u hemban ngeen a ior u se er ken Quebec je la. Ior za mkohol la hemba 80,000. Yange i kaa ér m er tom vea Gbaatom  u Nan Abaver hen mkohol la. M lam vea mba tôôn abaver kpishi shi doom tsung er ve lu ngeren akaa a dedoo sha iyol yase nahan. Yange ve tôv se, nahan ve due a mtaviu mbara sha televishen man sha redio. I kohol shighe u yange ve tôô u eren kwagh ne yô hemba ahwa 20, shi ve nger akaa ken upipambaabaver kpishi sha kwagh wase. Kwagh ne lu shiada u kpilighyol!

Ken inyom i 1996 la, kwagh er u gema gbenda u m eren akaa ken uma wam yô. Hii shighe u m er batisema la je lu ken Quebec m lu eren tom wam ye. Nahan kpa, i va tindim ér m sôron haregh u i lamen zwa buter her yô ken vegher u geri u Toronto la. Yange m nenge mer m kuma ga, shi hii u cier mo iyol er me gba za nôngon a zwa buter shighe u i gbe u me na kwaghôron yô, sha ci u m fa buter u lamen tsembelee ga. Yange gba u me seer eren msen shi me hemba suur sha Yehova cii.

Cii man m hii u eren tom hen haregh ne yô cier mo iyol kpishi, kpa hegen ne me fatyô u ôron mer, mimi je yange saan mo iyol kpishi ken anyom a ahar a m er tom hen Toronto la. Carolyn yange wa ishima wasem sha er me lu a vangertiôr u lamen zwa buter yô, shi anmgbianev mba hen ijiir la kpa lu wasen mo shi taver mo ishima kpaa. Ica gba ga je se zua a azende a he kpishi.

Dugh akaa a yange i gba u me wa iyol sha mi kua akaa agen a i gba u me er sha mbamkohol mba kiriki la yô, ashighe kpishi m due kwaghpasen u sha uya uya la sha iyange i Tomataan aikighe; m pase kwagh i kuma ihwa i môm nahan. Alaghga mbagen yange vea pine ér, ‘Mkohol kpa ngu kasua ne man akaa nga kpishi a eren sha mi, nahan ityôkyaa i duen kwaghpasen keng yô ka nyi?’ Kpa mo yô, yange mea lamen a ior shighe u m due kwaghpasen nahan i doom kpishi. Zan zan hegen kpa, ka mea pasen kwagh yô i hemba saan mo iyol.

Ken inyom i 1998 la i tindim vea Carolyn se yem ken geri u Montreal se za hingir ikpur pania. M er tom u sôron akaa veren sha er a due kwaghpasen u ken igbar shighe u ma kwagh u vesen a lu eren hen vegher wase yô, kua u lamen vea mba tôôn abaver sha er me pase akaa agen a ior ve fe sha kwagh u Mbashiada mba Yehova ga la yô. M er ityom ne shighe kar hegen. Mo man kwase wam cii ka i doo se kpishi u lamen a ior mba ve mough ken ityar igen ve ve ken Kanada shi i sar ve u seer fan kwagh u Bibilo yô.

Ka mea hide mea hen sha anyom 68 a m er batisema m lu civir Yehova ne yô, m nenge er Yehova a verem kpishi yô. Yange m hen u soon kwaghpasen shi m wase ior kpishi u fan mimi nahan saan mo iyol tsung. Wan wam Lise vea nom na kpa yange mba yesen ônov vev mba ganden yô, ve kpa ve hii pania u keke. Ka mea nenge er a lu pasen kwagh nduuluu nahan i saan mo iyol kpishi. Shi m wuese Mbakristu mba ve verem ikyav i dedoo shi yange ve wam kwagh tsembelee nahan m vese ken jijingi shi m er Yehova ityom kposo kposo la. M mase kaven mer saa se suur sha icighan jijingi u Yehova u a lu a tahav kpishi la ve se kôrcio u eren nyityô tom i nongo u Yehova u ne se cii ye. (Ps. 51:11) Ka m shi sughun Yehova er a nem ian i icivirigh i wuese iti na yô!—Ps. 54:6.