YANGE mbayev kasev mbagenev uhar lu karen hen kasua ugen ken geri u Baguio, ken tar u Philippines. Ve nenge i ver ikyekye i tuur ityakeda, kpa ve za her ga. Anmgbian u kwase Helen, u tile hen ikyekye ne la, nengen a ve yô, a se teghelee. Mbayev kasev mbara kar lu yemen kwagh ve, kpa er ishigh ki Helen lu sha saan saan, lu sen mugh mugh yô, kwagh shon doo ve.

Shighe kar yô, agumaukase la za mough u hiden yemen ken ya, nahan ve nyôr bôôsu. Mba ngur yemen yô, ve za nenge a Iyou i Tartor, i mande zege ikyav i jw.org la sha mi. Maa ve umbur ikyav i sha ikyekye i tuur ityakeda la, lu di kwagh môm vough a i i mande sha Iyou i Tartor la. Nahan ve hungwa mato, ve kar ve za nenge ashighe a nyôron mkombo a i var sha gyeeti i Iyou i Tartor shon la.

Agumaukase a ahar ne maa va mkombo ugen ken mbamkombo mba ve dondo la. Mba gbe karen u nyôron ken Iyou i Tartor yô, ve nenge a or u ve kav nan yô, lu Helen! Fese je maa ve fa er lu kwase u yange lu sen hen ikyekye i tuur ityakeda la yô. Helen kaa ér: “Er m nenge a ve van yô, ishima wa zan mo iyol, sha ci u m hen mer alaghga yange m er kwagh shami ga shinii.” Kpa mbayev kasev mbara va pase Helen ér, yange ve vande nengen a na hen ikyekye i tuur ityakeda.

Mkombo la yange doo ve kpishi shi saan ve iyol er ior lu saan saan yô. Doo ve tsung u lun imôngo vea anmgbianev. Mba gbe esen Iyou i Tartor shighe u i due mkombo la yô, ve kaa ér ve kpa ve soo u wasen. Mbayev kasev mbara, u môm yange hii u henen Bibilo shi zan mbamkombo, ugen la yô, kera ngu ken tar la ga ica gba hegen. Kwagh ne cii yange hii lu sha ahan a sen!