SHA ayange a i ngeren Bibilo la, yange a gba u or a vôso kwase, nan shin tsombor u nan u kimbi tsombor u kwase u nan lu vôson la kem-kwase, zum u icombor u nan man u kwase la cii u lumun a ivese ve la yô. Yange i kimbi kem-kwase sha ma kwagh u injaa, shin sha zendenya gayô sha inyar. Ashighe agen yange i kimbi kem-kwase sha u eren ior mba kwase tom, er Yakob yange lumun u eren ter u Rahel tom anyom ataankarahar sha er una vôso Rahel nahan. (Gen. 29:17, 18, 20) Yange i kimbin kem-kwase sha ci u nyi jighilii?

Or u timen sha akaa a ken Bibilo ugen mba yilan un ér Carol Meyers, a kaa ér: “Shighe ugen yange i kimbi tsombor u kwase u i lu vôson nan la kem-kwase sha ityough ki tom u i gbe u nana de u yaren ior mba nan la. Tom u wan u kwase lu kwagh u vesen hen icombor i i eren tom sule yô.” Shi kem-kwase yange u na ior mba kwase kua ior mba nom u nan la ve hemba lun kangenaa. Nahan hanma tsombor u kegh iyol u wasen tsombor ugen shighe u uma a va taver yô. Heela tseegh ga, yange a kimbi kem u kwase yô, kwagh la a tese ér kwase shon or tsôr nan, shi nan kera ngu lun sha ikyev i ter u nan ga, kpa nana za lu sha ikyev i nom u nan la.

Kem-kwase yange u tese ér kwase u i kimbi u sha ityough ki nan la nan ngu ma kwagh u a kaa ér i za yam shin i tee ga. Takeda ugen (Ancient Israel—Its Life and Institutions) kaa ér: “Ikyav tese wang ér inyaregh ki yange i gba u Oriserael nana na ior mba kwase u nan lu kemen la, shin yange a lu u nana na ve ma kwagh ugen u kuman sha inyaregh ki shon yô, i lu inja er nan ngu yamen a yam kwase shon nahan. Kpa ikyav gema tese ér yange i nengen kwagh u i kem kwase a mi la ér ka ishe i i yam kwase la ga, kpa ka kwagh u i ne ior mba kwase la sha ityough ki nan di tsô.”

Nyian kpa, ior mba kimbin kem-kwase ken ityar igen sha imba gbenda la. Mbamaren mba ve lu Mbakristu yô, ka ve wa or u nan tsôr wan ve la kem-kwase akuma akuma, nahan “ior cii ve nenge er [ve] lu mba norom sha kwagh ga yô.” (Fil. 4:5; 1 Kor. 10:32, 33) Kwagh u ka ve er ne ka a tese er ve lu “mba soon inyaregh” ga, shin mbawan hua ga yô. (2 Tim. 3:2) Heela tseegh ga, shi ka i kera gba u or u nan tsôr wan ve la nana yem a ayange a vôson kwase ken hemen ér nana za ker inyaregh ki kuma kem-kwase ga. Shin nan kera nenge ér gba u nana de pania, nana hide a eren tom hanma shighe sha er nana zua a inyaregh ki kuma u kimbin kem-kwase u i we nan kpishi la ga.

Sha ajiir agen yô, ka i wa kem-wase er tindi a tese la. Sha ajiir la nahan cii, mbamaren mba ve lu Mbakristu la ka ve dondo tindi shon. Sha ci u nyi? Sha ci u Mkaanem ma Aôndo kaa ér hanma Orkristu nana “wa iyol i nan sha ikyev i mbautahav mba ve hemen nan la,” shi nana dondon atindi a a hendan a atindi a Aôndo ga yô.—Rom. 13:1; Aer. 5:29.