Ve Nenge Er I Tese Ve Dooshima Yô
YOMARA vea anmgbianev nav—Marcelo man Hiver—yange ve lu hen angeri ugen ken tar u Guatemala. Tsô Mbashiada mba Yehova hii u henen Bibilo a Yomara. Shighe karen yô, anmgbianev nav kpa hii u henen Bibilo. Kpa zayol lu. Ve mba utar mban cii ve pir ashe, man ve fa u ôron takeda u i gber sha kwaghngeren u mbaapirashe la ga. Nahan anmgbian u lu henen kwagh a ve la a ôr ve akumahiange a ve lu henen ken takeda la, kua avur a Bibilo a i tese hen ijiir i ve lu henen la.
Yange ve faantyô u zan mbamkombo mba tiônnongo ga. Sha ci u Iyou i Tartor i hemba lun ikyua hen ijiir ve la gba ica kuma zende u miniti 40, nahan i lu u ve tseegh vea fatyô u zenden zan ga. Kpa hanma mkombo yô, anmgbianev mba ken tiônnongo ve va tôô ve ve za. Mba va ngur nan ve asaimenti ken mkombo u ken atô u kasua la yô, anmgbianev ve wase ve ve kôr kwagh u i lu u vea za ôr la ken ityou.
Ken uwer u Mei, inyom i 2019 la, i hii u eren mkombo hen anjiir ve la. Hen shighe ne, anmgbian ugen vea kwase na ve yem hen ijiir shon, ve lu pania. Nahan ve tsua ér vea tese Yomara kua anmgbianev nav mba uhar mbara ve fa u ôron takeda u i gber sha kwaghngeren u mbaapirashe (Braille) yô, shi ve fa u ngeren, shin er anmgbian la vea kwase na ve vande fan u eren akaa ne ga nahan kpaa. Yange ve za hen iyou i koson ityakeda ér vea za hen kwagh u braille kua igbenda i tesen un.
Marcelo ngu nan ikyaa ken mkombo
Iwer ngi karen kpuaa yô, kera taver Yomara vea anmgbianev nav u ôron braille ga, nahan ve seer kporom ikyua a Yehova. a Hegen ne, Yomara man Marcelo kua Hiver cii mba eren pania. Marcelo ngu orshiren tiônnongo. Hanma kasua ka ve tume ityough eren Yehova tom. Gbashima ve la na yô, mba ve lun vea ve la kpa hingir u civir Yehova sha gbashima.
Ve mbautar mbara cii ve wuese er tiônnongo a lu tesen ve dooshima sha u wasen ve yô. Yomara kaa ér, “Hii shighe u se zua vea Mbashiada sha kwa u hiihii la je, mba tesen se dooshima u mimi u Mbakristu la.” Shi Marcelo kaa ér, “Se mba a azende a injaa hen tiônnongo wase, shi se mba ken tsombor u anmgbianev mba sha tar cii, mba dooshima a zua ve ve lu kangenaa la.” Yomara vea anmgbianev nav mba veren ashe keghen iyange i a gema tar ua hingir paradiso la.—Ps. 37:10, 11; Yes. 35:5.
a I gber antakeda u a lu a itinekwagh ér Learn to Read Braille la ér a wase or u nan pir ashe shin nan nengen tsembelee ga yô, nana fa u ôron ma takeda u i gber sha kwaghngeren u mbaapirashe yô, shi nana fa u ngeren kpaa.
